Ο Ευαγγέλιος σο Γραφιντάς ο Ματθαίος 18:1-35
18 Οντουβά σαάτι ο μαθητές αβιλέ πασέ κο Ιησούς ντα βακερντέ: «Κον ισί ο πο μπαρό κι Βασιλεία κι ουρανόσκι;»
2 Οτθάρ βοβ ντινάς βίκος εκχέ χουρντές, τσσουντάς-λες ανγκλά-λέντε
3 ντα βακερντάς: «Μπαγιά βακεράβα τουμένγκε: Άμα να αλλαξάλεν ντα να αβιλέν σαρ ο χουρντέ, να αβέλα-πες τι νακχέν κι Βασιλεία κι ουρανόσκι.
4 Οτθάρ κον αβέλα ταπεινός σαρ ακαβά χουρντό, βοβ ισί ο πο μπαρό κι Βασιλεία κι ουρανόσκι.
5 Ντα κον κα δεχτίνελ εκχέ ασακέ χουρντές μάξους μι ναβέσκε, δεχτίνελα μαν-ντα.
6 Αλλά κον κα κερέλ εκχές ανταλένταρ σο ισί σαρ ο χουρντέ τι χασαρέλ πι πίστη μάντε,* κα αβέλας πο λατσσές τι ιμπλαβέν λέσκε κοριάτε εκ μπαρό μπαρ* σο γκερέλα-λες ντονταλάι ο χχερ ντα τι φουρτίνεν-λες κι ντεριάβ.
7 »Τιμωρία κα τσσίντελ ο ντουνιάς ιτιρί κατά πράγματα σο κερένα ι γιαβερέν τι χασαρέν πουμαρί πίστη!* Ισί μπαγιά ότι ασακέ πράγματα κα αβέν, αλλά σο τιμωρία κα τσσίντελ ο τζενό σο ανέλα-λεν!
8 Οτθάρ, άμα το βας ή το πιντρό κερέλα-τουτ τι αμαρτίνες,* τσσιν-λες ντα φούρτινε-λες ντουρ τούταρ. Ισί πο λατσσό τι αβές μπι-βαστέσκο ή μπι-πιντρέσκο ντα τι λες ι ζωή παρά τι τθερές ντούι βαστά ή ντούι πιντρέ ντα τι φουρτίντιβες κι γιακ* σο να μερέλα ποτές.
9 Ντα άμα τι γιακχ κερέλα-τουτ τι αμαρτίνες,* νίκαβ-λα ντα φούρτινε-λα ντουρ τούταρ. Ισί πο λατσσό τι τθερές εκ γιακχ ντα τι λες ι ζωή παρά τι τθερές ντούι γιακχά ντα τι φουρτίντιβες κι γιακάκι Γέεννα.*
10 Ντικχέν μα τι κερέν πέρα καεκχές ανταλένταρ σο ισί σαρ ο χουρντέ, σόσκε βακεράβα τουμένγκε ότι λένγκε άγγελοι κο ουρανός ντικχένα πάντα ο μούι μι Νταντέσκο σο ισί κο ουρανός.
11 ——
12 »Σο αμντίνενα; Άμα εκ τζενό τθερέλα 100 μπρακέν ντα εκ τανό λένταρ νασλό, να κα μουκχέλ ο 99 οπρέ κο βεσά ντα να κα τζαλ τι ρόντελ οντουλέσκε σο νασλό;
13 Ντα άμα κα αρακχέλ-λες, μπαγιά βακεράβα τουμένγκε, κα χαιρίνελ πο μπουτ λέσκε παρά ι 99 μπρακένγκε σο να νασλέ.
14 Αντικάς-ντα μο* Ντατ σο ισί κο ουρανός να μανγκέλα τι χασάρντιβελ καέκ ανταλένταρ σο ισί σαρ ο χουρντέ.
15 »Ατζέκ, άμα το πφραλ κα κερέλ αμαρτία, τζα ντα κερ λάφι σάντε λέσαρ για τι σικαβές λέσκε σο λάθος κερντάς. Άμα ασουντάς-τουτ, αντάν τι πφραλές παλάλ κο λατσσό ντρομ.
16 Αλλά άμα να ασουντάς, λε παλά-τούτε ατζέκ εκχέ ή ντουέ τζενέν, για τι σικάντιβελ σο αβιλό-πες μπαγιά οντουλέντζαρ σο κα βακερέν ντούι ή τριν μάρτυρες.
17 Άμα να ασουντάς λεν-ντα, βάκερ-λες κι κχανγκιρί. Άμα να ασουντάς ι κχανγκιριά-ντα, τι αβέλ τούκε σαρ ο τζενέ σο ισί γιαβερέ τθεμένταρ ντα οντουλά σο γκίντενα ο φόροι.
18 »Μπαγιά βακεράβα τουμένγκε: Σο-ντα κα πφάντεν κι πφουβ κα αβέλ πφαντό πο τζανγκλέ κο ουρανός, ντα σο-ντα κα πουτρέν κι πφουβ κα αβέλ πουταρντό πο τζανγκλέ κο ουρανός.
19 Μπαγιά βακεράβα τουμένγκε ακαβά-ντα: Άμα ντούι τουμένταρ κι πφουβ κα συμφωνίνεν τι μανγκέν κάτι σημαντικός μι Νταντέσταρ σο ισί κο ουρανός, βοβ κα κερέλ-λες τουμένγκε.
20 Κάι γκιντίντιβενα ντούι ή τριν τζενέ μι ναβέστε, οτθέ ισινόμ με-ντα λέντζαρ».
21 Αζομάν αβιλό ο Πέτρος ντα βακερντάς λέσκε: «Κύριε, άμα μο πφραλ αμαρτίνελα κόντρα μάντε, καζόμ φαρ πρέπει τι συγχωρίναβ-λες; 7 φαρ;»
22 Ο Ιησούς βακερντάς λέσκε: «Μα 7 φαρ, αλλά 77.
23 »Άκ’ σόσκε η Βασιλεία ι ουρανόσκι ισί σαρ εκ βασιλιάς σο μανγκλάς πι δουλόνταρ τι ντεν-λες παλάλ ο λοβέ σο μανγκένας λέσκε.
24 Κάνα αρχισάλο τι γκίντελ πο λοβέ λένταρ, αντέ λέσκε εκχέ τζενές σο μανγκέλας λέσκε 10 χιλιάδες τάλαντα.*
25 Αλλά βοβ να τθερέλας ο λοβέ τι ποκινέλ. Οτθάρ ο βασιλιάς για τι λελ πο λοβέ, ντινάς εντολή τι μπικίντιβελ βοβ, λέσκι ρομνί, λέσκε τσσαβέ ντα σαρέ οντουλά σο τθερέλας.
26 Οτθάρ ο δούλος πελό τελέ κοτσίντζαρ ανγκλά-λέστε ντα βακερντάς: “Κερ υπομονή μάντζαρ ντα κα νταβ-τουτ σαρέ ο λοβέ σο μανγκάβα τούκε”.
27 Ο βασιλιάς τζιτζισάλο ι δουλόσκε, οτθάρ μουκχλάς-λες τι νασέλ ντα σβηντάς λέσκο μπόρτζι.*
28 Αλλά κάνα οντουβά δούλος νικίστιλο αβρί, αρακχλάς εκχέ γιαβερέ δουλός σο μανγκέλας λέσκε 100 δηνάρια. Λιντάς-λες κατά κουρλό ντα βακερντάς: “Ντε-μαν ο λοβέ σο μανγκέσα μάνγκε”.
29 Ο γιαβέρ δούλος πελό τελέ ντα μολίνελας-λες: “Κερ υπομονή μάντζαρ ντα κα νταβ-λεν τούτε”.
30 Όμως βοβ να μανγκέλας, αλλά νασλό ντα βακερντάς τι τσσουβέν-λες κι φυλακή μέχρι τι ντελ σαρέ ο λοβέ σο μανγκέλας λέσκε.
31 Κάνα ο γιαβερά δούλοι ντικχλέ σο αβιλό-πες, στεναχωρισάλε μπουτ ντα γκιλέ ντα βακερντέ κο βασιλιάς σαρέ οντουλά σο αβιλέ-πες.
32 Αζομάν ο βασιλιάς ντινάς-λες βίκος ντα βακερντάς λέσκε: “Σο πφιρνό* δούλος ισινάν! Με σβηντόμ σαρό το μπόρτζι κάνα μολιντάν-μαν.
33 Δεν έπρεπε τούι-ντα τι τζιτζίνες οντουλέ δουλόσκε σαρ τζιτζισάλομ* με τούκε;”
34 Ντα πφερντό χολί βακερντάς τι τσσουβέν-λες κι φυλακή μέχρι τι ντελ σαρέ ο λοβέ σο μανγκέλας λέσκε.
35 Αντικάς κα κερέλ τουμένγκε μο Ντατ-ντα σο ισί κο ουρανός άμα ο κάθε εκ τουμένταρ να συγχωρίνελα πι πφραλές αντράλ πι γκίσταρ».
Υποσημειώσεις
^ Γιαβέρσοϊ «τι περέλ κατά πίστη σο τθερέλα μάντε».
^ Ανταλέ μπαρέσαρ μορένας ο γκιβ.
^ Γιαβέρσοϊ «τι περέν».
^ Γιαβέρσοϊ «τι περές».
^ Γιαβέρσοϊ «γιανγκ».
^ Γιαβέρσοϊ «τι περές».
^ Ή μπέκιμ «τουμαρό».
^ Ο 10 χιλιάδες ασημένια τάλαντα ισινέ 60 εκατομμύρια δηνάρια.
^ Γιαβέρσοϊ «χρέος».
^ Γιαβέρσοϊ «γκεραλό, μπίλατσσο».
