Ο Ευαγγέλιος σο Γραφιντάς ο Ματθαίος 22:1-46
22 Πάλι σικλιαρντάς-λεν ο Ιησούς παραδειγματέντζαρ.* Βακερντάς:
2 «Η Βασιλεία ι ουρανόσκι ισί σαρ εκ βασιλιάς σο κερντάς μπαρό τραπέζι πι τσσαβέσκε μπιαβέσκε.
3 Ντα μπουτσσαντάς πι δουλόν τι ντεν βίκος οντουλέν σο ισινέ καλεσμέ κο μπιαβ. Αλλά βον να μανγκένας τι αβέν.
4 Πάλι μπουτσσαντάς γιαβερέ δουλόν ακαλέ λαφίντζαρ: “Βακερέν κο καλεσμέ: «Ντικχέν! Κερντόμ ο χαμπέ, τσσιντόμ μι γκουρουβέν ντα μι πο τθουλέ ζωόν, ντα σαρέ ισί έτοιμα. Ελάν κο μπιαβ»”.
5 Αλλά βον να ντινέ σημασία ντα νασλέ, ο εκ πι χωραφίστε, ο γιαβέρ μπικινιμάσκε
6 ντα ο γιαβερά καπτιντέ λέσκε δουλόν, νταπλέ-λεν ντα μουνταρντέ-λεν.
7 »Ο βασιλιάς πφερντιλό χολί, μπουτσσαντάς πι στρατός, μουνταρντάς οντουλέ γκεραλέ τζενέν* ντα πφαμπαρντάς λένγκο τθεμ.
8 Σοράν βακερντάς πι δουλόνγκε: “Σαρέ ισί έτοιμα ι μπιαβέσκε, αλλά ο καλεσμέ να ισινέ άξιοι.
9 Οτθάρ, τζαν κο μπαρέ ντρομά ντα βικίνεν* κο μπιαβ κας κα αρακχέν”.
10 Οντουλά δούλοι νικίστιλε κο ντρομά ντα γκιντιντέ σαρέ οντουλέν σο αρακχλέ, εμ γκεραλέν εμ λατσσέν. Ντα ο μπιαβ πφερντιλό τζενέντζαρ.*
11 »Κάνα ο βασιλιάς αβιλό τι ντικχέλ ι τζενέν, πελέ λέσκε γιακχά εκχέστε σο να ιρίλας σέα μπιαβέσκε.
12 Οτθάρ βακερντάς λέσκε: “Σαρ αβιλάν ατθέ χωρίς τι ιρίς σέα μπιαβέσκε;” Ο τζενό να τθερέλας σο τι βακερέλ.
13 Αζομάν ο βασιλιάς βακερντάς πι υπηρετόνγκε: “Πφάντεν λέσκε βαστά ντα λέσκε πιντρέ ντα φουρτίνεν-λες αβρί κο καρανίκι. Οτθέ κα ροβέλ ντα κα σικίνελ πο ντανά”.*
14 »Σόσκε μπουτ ισί καλεσμέ αλλά χάνικ ισί τραμπιμέ».
15 Αζομάν ο Φαρισαίοι νασλέ ντα κερντέ-πες λάφι για τι ντικχέν σαρ τι κερέν ι Ιησούς τι βακερέλ κάτι λάθος.
16 Οτθάρ μπουτσσαντέ λέσκε πουμαρέ μαθητέν, γιεκ μερικέ τζενέντζαρ σο τσσίντενας κατά Ηρώδης, τι βακερέν: «Δάσκαλε, τζανάσα ότι βακερέσα ι αλήθεια ντα σικλιαρέσα ι αλήθεια ι Ντεβλέσκε ντα να χάλα-τουτ ανάγκη σο βακερένα ο γιαβερά, σόσκε να ντικχέσα σαρ ισί αβριάλ ο τζενέ.
17 Οτθάρ, βάκερ αμένγκε σο αμντίνεσα: Κερέλα* τι ποκινέλ εκ τζενό φόρος κο Καίσαρας ή να κερέλα;»
18 Ο Ιησούς τζανέλας λένγκο πφιρνιπέ,* οτθάρ βακερντάς: «Ντουέ μουένγκε ισινέν! Σόσκε δοκιμάνενα-μαν;
19 Σικαβέν μάνγκε εκ δηνάριος». Βον αντέ λέσκε εκ τανό.
20 Ντα βακερντάς λένγκε: «Κάσκο μούι ντα κάσκο ναβ ισί ακαβά;»
21 Βον βακερντέ: «Ι Καισαράσκο». Ο Ιησούς βακερντάς λένγκε: «Οτθάρ ντεν οντουλά σο ισί ι Καισαράσκε κο Καίσαρας, αλλά οντουλά σο ισί ι Ντεβλέσκε κο Ντεβέλ».
22 Κάνα ασουντέ-λες ανταβά, ατσσιλέ πουταρντέ μόσαρ, ντα μουκχλέ-λες ντα νασλέ.
23 Οντουβά ντιβές αβιλέ ο Σαδδουκαίοι, σο να πακιάνα ότι κα ιστίν ο μουλέ, ντα πουτσλέ-λες:
24 «Δάσκαλε, ο Μωυσής βακερντάς: “Άμα εκ τζενό μουλό ντα να κερντάς τσσαβέν, λέσκο πφραλ πρέπει τι παντρίνελ λέσκε ρομνιάσαρ ντα τι κερέλ τσσαβέν πι πφραλέσκε”.
25 Εκχέ φαμιλιάτε ισινέ εφτά πφραλά. Ο πρώτος λιντάς ρομνιά ντα μουλό, αλλά να κερντάς τσσαβέν. Οτθάρ οντουλέ ρομνιά λιντάς-λα λέσκο πφραλ.
26 Ανταβά αβιλό-πες εμ κο δεύτερος εμ κο τρίτος ντα σαρέ κο γιαβερά πφραλά.
27 Τελευταία σαριλένταρ μουλί η ρομνί.
28 Άρα, κάσκι ρομνί κα αβέλ βόι κάνα κα ιστίν κατά μουλέ; Σόσκε ο εφτά-ντα παντρισάλεας λάσαρ».
29 Ο Ιησούς βακερντάς λένγκε: «Κερένα λάθος, σόσκε να τζανένα ούτε ι Γραφή ούτε ι ζορ ι Ντεβλέσκι.
30 Κάνα κα τζουβντιόν ο μουλέ, ο μουρσά ντα ο τζουβλιά να κα παντρίνεν αλλά κα αβέν σαρ ο άγγελοι κο ουρανός.
31 Ο Ντεβέλ βακερντάς τουμένγκε ότι ο μουλέ κα τζουβντιόν πάλι. Να διαβαντέν ο λάφια:
32 “Με ισινόμ ο Ντεβέλ ι Αβρααμίσκο ντα ο Ντεβέλ ι Ισαακίσκο ντα ο Ντεβέλ ι Ιακωβίσκο”; Βοβ νανέ Ντεβέλ ι μουλένγκο, αλλά ι τζουβντένγκο».
33 Κάνα ο μπουτ τζενέ σο ισινέ οτθέ ασουντέ-λες ανταβά, ατσσιλέ πουταρντέ μόσαρ λέσκε σικλιαριμάσταρ.
34 Κάνα ο Φαρισαίοι ντικχλέ ότι ο Ιησούς πφαντάς ο μούι ι Σαδδουκαιόνγκο, γκιντισάλε σαρέ γιεκ.
35 Ντα εκ τανό λένταρ, σο τζανέλας λατσσές ο Νόμος, πουτσλάς για τι δοκιμάνελ-λες:
36 «Δάσκαλε, καγιά ισί η πο μπαρί εντολή κο Νόμος;»
37 Βοβ βακερντάς λέσκε: «“Μανγκ ι Ιεχωβάς* τι Ντεβλές σαρέ τι γκίσαρ ντα σαρέ τι ψυχιάσαρ* ντα σαρέ τι γκοντιάσαρ”.
38 Ανταγιά ισί η πο μπαρί ντα πρώτη εντολή.
39 Η δεύτερη, σο τθερέλα τι κερέλ ανταλάσαρ, ισί ακαγιά: “Μανγκ ι γιαβερέν* σαρ μανγκέσα τουτ”.
40 Οπράλ ανταλέ ντουέ εντολέντε ισταβέλα σαρό ο Νόμος ντα ο Προφήτες».
41 Καζόμ ο Φαρισαίοι ισινέ γκιντιμέ οτθέ, ο Ιησούς πουτσλάς-λεν:
42 «Σο αμντίνενα ι Χριστόσκε; Κάσκο τσσαβό ισί;» Βον βακερντέ λέσκε: «Ι Δαβιδίσκο».
43 Βοβ πουτσλάς-λεν: «Ντα σόσκε ο Δαβίδ, ι Ντεβλέσκε πνευμάσαρ, βικίνελα-λες* “Κύριε”, ακαλέ λαφίντζαρ:
44 “Ο Ιεχωβά* βακερντάς μι Κυριόσκε: «Μπες δεξιά μάνταρ μέχρι τι τσσουβάβ τι ντουσμανίν* τελάλ τι πιντρένταρ»”;
45 Άμα ο Δαβίδ βικίνελα ι Χριστός “Κύριε”, σαρ αβέλα-πες τι ισί λέσκο τσσαβό;»
46 Καέκ ναστί βακερέλας λέσκε ούτε εκ λάφι. Ντα οντουλέ ντιβεσέσταρ καέκ να κοτίνελας τι πουτσέλ-λες.
Υποσημειώσεις
^ Κι Πουρανί Μπαλαμανί βακέρντιβελας «παραβολέντζαρ».
^ Κι Πουρανί Μπαλαμανί βακέρντιβελας «φονιαδέν».
^ Γιαβέρσοϊ «καλίνεν».
^ Γιαβέρσοϊ «οντουλέντζαρ σο ζαντίνενας ανγκλάλ κο τραπέζι». Ο λάφι «ζαντίναβα» βακέρντιβελα εμ «ξαπλώναβα».
^ Ανταβά σικαβέλα ότι κα τθερέλ χολί ντα κα καλιόλ λέσκο γκι.
^ Γιαβέρσοϊ «Ισί σωστός».
^ Γιαβέρσοϊ «γκεραλιπέ, μπίλατσσιπε».
^ Κι Πουρανί Μπαλαμανί βακέρντιβελας «ι τζενές σο ισί πασέ τούτε». Ανταβά λάφι να μανγκέλας τι σικαβέλ σάντε οντουλέν σο μπεσένας πασέ εκχέ τζενέστε, αλλά ι κάθε τζενές.
^ Γιαβέρσοϊ «βακερέλα λέσκε».
^ Γιαβέρσοϊ «εχθρόν».
