Πράξεις ι Αποστολόνγκε 1:1-26
1 Κο πρώτος βιβλίος σο γραφιντόμ, Θεόφιλε, βακερντόμ σαρέ οντουλά σο αρχισάλο τι κερέλ ντα τι σικλιαρέλ ο Ιησούς
2 μέχρι κο ντιβές σο λιντιλό κο ουρανός, αφού ντινάς εντολές αντράλ κατά άγιος πνεύμας κο απόστολοι σο τραμπιντάας.
3 Σοράν ανταλένταρ σο τσσιντιντάς, σικαντάς-πες λένγκε μπουτ φαρ για τι αβέν ντιπ σίγουροι ότι μπαγιά ισινέ τζουβντό. Σικαβέλας-πες λένγκε 40 ντιβεσά ντα κερέλας λάφι ι Ντεβλέσκε Βασιλειάκε.
4 Κάνα ισινέ λέντζαρ, ντινάς-λεν εντολή: «Μα νασέν κατά Ιερουσαλήμ, αλλά μπεκλεντίνεν τι νικιόλ μπαγιά ο λάφι σο ντινάς ο Ντατ ντα ασουντέν-λες μάνταρ.
5 Ο Ιωάννης μπολντάς πανίσαρ, αλλά τουμέν κα μπολντιόν άγιε πνευμάσαρ πριν τι νακχέν μπουτ ντιβεσά».
6 Εκ φαρ σο ισινέ γκιντιμέ, πουτσλέ-λες: «Κύριε, ανταβά ισί ο βακίτι σο ανέσα παλάλ ι βασιλεία κο Ισραήλ;»
7 Βοβ βακερντάς λένγκε: «Νανέ τουμαρί μπουτί τι τζανέν ο σαάτι ή ο βακίτι σο τθερέλα ο Ντατ πι βαστέστε.
8 Αλλά κα λεν ζορ κάνα ο άγιος πνεύμας* κα αβέλ οπρά-τουμέντε ντα κα αβέν μάρτυρες μιρέ κι Ιερουσαλήμ, σαρί κι Ιουδαία ντα κι Σαμάρεια, μέχρι κο τθαν-ντα σο ισί πο ντουρ οπράλ κι πφουβ».
9 Σοράν ανταλέ λαφίνταρ, καζόμ βον ντικχένας, βαντίντιλο, ντα εκ σύννεφος καπτιντάς-λες οπρέ ντα γκεραντάς-λες λένγκε γιακχίνταρ.
10 Οτθέ σο ντικχένας ο ουρανός, καζόμ βοβ νασέλας, ντούι μουρσά παρνέ σεΐντζαρ ατσσιλέ πασέ λέντε
11 ντα βακερντέ: «Μουρσάλεν κατά Γαλιλαία, σόσκε ατσσόνα ντα ντικχένα κο ουρανός; Ανταβά Ιησούς σο λιντιλό τουμένταρ κο ουρανός κα αβέλ ι ίδιε τροπόσαρ σο ντικχλέν-λες τι τζαλ κο ουρανός».
12 Αζομάν βουρτισάλε κι Ιερουσαλήμ κατά βες σο βακέρντιβελα Βες ι Ζιτινίνγκο* ντα ισί πασέ εκ χιλιόμετρος* κατά Ιερουσαλήμ.
13 Κάνα ερεσλέ, νικλιντέ κο οπραϊνό δωμάτιος σο μπεσένας. Ισινέ ο Πέτρος, ο Ιωάννης, ο Ιάκωβος, ο Ανδρέας, ο Φίλιππος, ο Θωμάς, ο Βαρθολομαίος, ο Ματθαίος, ο Ιάκωβος σο λέσκο ντατ ισινέ ο Αλφαίος, ο Σίμωνας σο βακέρντιβελα «οντουβά σο κερέλα πράγματα σαρέ πι γκίσαρ» ντα ο Ιούδας ο τσσαβό ι Ιακωβόσκο.
14 Σαρέ βον να τσσιναβένας τι προσευχίντιβεν ενωμέ γιεκ μερικέ τζουβλίντζαρ ντα ι Μαριάσαρ, ι Ιησούσκε νταγιάσαρ, ντα λέσκε πφραλέντζαρ.
15 Οντουλά ντιβεσά ο Πέτρος ιστίντιλο ανγκλάλ κο πφραλά (σαρέ γιεκ ισινέ πασέ 120 τζενέ) ντα βακερντάς:
16 «Πφραλάλεν, έπρεπε τι νικιόν μπαγιά ι Γραφιάκε λάφια σο βακερντάας-λεν ο άγιος πνεύμας αντράλ κατά Δαβίδ ντα τθερένα τι κερέν ι Ιουδάσαρ. Βοβ γκερντάς κο Ιησούς οντουλέν σο ασταρντέ-λες.
17 Ανταβά τζενό ισινέ αμένταρ ντα υπηρετίνελας σαρ αμέν.
18 (Βοβ κιντάς εκ χωράφι ι λοβέντζαρ σο λιντάς ι γκεραλέ* πραγμάσκε σο κερντάς, ντα σαρ πελό σορέσαρ, λέσκο σώμας πφαράντιλο* ντα σαρέ λέσκε ποριά τσσορντιλέ αβρί.
19 Ανταβά λιντιλό αμπέρι σαρέ κο τζενέ σο μπεσένας κι Ιερουσαλήμ, οτθάρ οντουβά χωράφι βακέρντιλο λένγκε τσσιμπάτε Ακελδαμά, γιαβέρσοϊ «χωράφι ρατέσκο».)
20 Σόσκε ισί γραμμέ κο βιβλίος Ψαλμοί: “Τι ατσσόλ τσουτσό λέσκο κχερ ντα μα τι μπεσέλ καέκ λέστε” ντα “Ι μπουτί σο ντιντιλίας-λες* τι λελ-λα εκ γιαβέρ”.
21 Οτθάρ, χρειαζίντιβελα τι τραμπίνας εκχές κατά μουρσά σο ισινέ αμέντζαρ σαρό ο βακίτι σο κερέλας ο Κύριος Ιησούς πο έργος ατθέ αμέντε,
22 εκχέ μουρσές σο ισινέ αμέντζαρ από αζομάν σο μπολντάς ο Ιωάννης ι Ιησούς μέχρι κο ντιβές σο λιντιλό αμένταρ κο ουρανός. Για τι μουτθαβέλ κο τζενέ* γιεκ αμέντζαρ ότι ιστίντιλο κατά μουλέ».
23 Οτθάρ, σκεφτιντέ ντουέν: ι Ιωσηφίς σο βακερένας λέσκε εμ Βαρσαββά εμ Ιούστο, ντα ι Ματθιάς.
24 Αζομάν προσευχισάλε ντα βακερντέ: «Τούι, Ιεχωβά,* σο τζανέσα σαριλένγκε γκιά, σίκαβ κας ανταλέ ντουέ μουρσένταρ τραμπιντάν
25 για τι υπηρετίνελ-τουτ ντα τι αβέλ απόστολος, σόσκε ο Ιούδας νασλό για τι λελ πιρό ντρομ».
26 Ντα τσσουντέ κλήρος λένγκε, ντα ο κλήρος πελό κο Ματθίας, ντα αβιλό απόστολος γιεκ ι γιαβερέ 11 αποστολόντζαρ.
Υποσημειώσεις
^ Γιαβέρσοϊ «Όρος των Ελαιών».
^ Κι Πουρανί Μπαλαμανί ισινέ ο λάφι «Σαββατόσκο ντρομ». Σάντε αζόμ αβέλας-πες τι πφιρέλ εκ τζενό κο Σάββατος.
^ Γιαβέρσοϊ «μπίλατσσε, κακέ».
^ Γιαβέρσοϊ «βοβ πφαράντιλο κο μασκάρ».
^ Δηλαδή ντιντιλίας-λες η ευθύνη τι φροντίνελ ι κχανγκιρί.
^ Γιαβέρσοϊ «Για τι αβέλ μάρτυρας».
