Πράξεις ι Αποστολόνγκε 11:1-30
11 Ο απόστολοι ντα ο πφραλά κι Ιουδαία ασουντέ ότι τζενέ-ντα γιαβερέ τθεμένταρ δεχτιντέας ο λάφι ι Ντεβλέσκο.
2 Κάνα ο Πέτρος γκιλό κι Ιερουσαλήμ, οντουλά σο βακερένας ότι πρέπει τι αβέλ-πες η περιτομή αρχισάλε τι κρίνεν-λες*
3 ακαλέ λαφίντζαρ: «Γκιλάν κο κχερ μουρσένγκο σο να κερντέ περιτομή ντα χαλάν γιεκ λέντζαρ».
4 Αζομάν ο Πέτρος ακαλέ λαφίντζαρ ντινάς-λεν τι αγαβέν ντιπ λατσσές σο αβιλόας-πες:
5 «Ισινόμας κι Ιόππη, ντα σαρ προσευχίντιβαβας, ντικχλόμ ακαγιά φαντασία: κάτι σαρ μπαρό λινός σεντόνι αβέλας τελέ ντα γουλίλας κατά ουρανός, ασταρντό κατά σταρ γωνίες, ντα αβιλό μάντε.
6 Σαρ ντικχάβας λατσσές σο τθερέλας αντρέ, αγαντόμ ότι ισινέ ζώα σο τθερένα σταρ πιντρέ, εμ άγρια ζώα εμ σαπά ντα σαπουρνιά εμ τσιρικλέ.
7 Ασουντόμ ακαλά λάφια-ντα: “Ίστι, Πέτρο, τσσιν ντα χα!”
8 Αλλά με βακερντόμ: “Να αβέλα-πες, Κύριε, σόσκε ποτές να τσσουντόμ μι μόστε κάτι μαγαριμέ ή μελαλό”.
9 Ασουντόμ δεύτερη φαρ τι βακέρντιβελ κατά ουρανός: “Μα βάκερ ότι ισί μαγαριμέ οντουλά σο κερντάς πάκι ο Ντεβέλ”.
10 Ανταβά αβιλό-πες τρίτη-ντα φαρ, ντα σαρέ οντουλά σο ντικχλόμ λιντιλέ πάλι κο ουρανός.
11 Αζομάν τριν μουρσά αβιλέ κο κχερ σο μπεσάας, μπουτσσάντιλεας μάντε κατά Καισάρεια.
12 Ντα ο πνεύμας βακερντάς μάνγκε τι τζαβ παλά-λέντε ντα μα τι σακιντίναβ ιτς. Αβιλέ παλά-μάντε ανταλά-ντα σιοβ πφραλά, ντα γκιλάμ κο κχερ οντουλέ μουρσέσκο.
13 »Βοβ βακερντάς αμένγκε ότι ντικχλάς εκχέ αγγελός σο γκιλό λέσκε κχερέστε ντα βακερντάς: “Μπούτσσαβ μουρσέν κι Ιόππη ντα ντε βίκος ι Σιμωνάς σο βακέρντιβελα Πέτρος,
14 ντα βοβ κα βακερέλ τούκε σαρ τι σώντιβες τούι ντα σαρέ ο τζενέ σο ισί τι κχερέστε”.
15 Αλλά κάνα αρχισάλομ τι κεράβ λάφι, ο άγιος πνεύμας αβιλό οπρά-λέντε σαρ αβιλόας οπρ’ αμέντε-ντα κι αρχή.
16 Αζομάν ντινόμ-μαν γκοντί ότι ο Κύριος βακερέλας: “Ο Ιωάννης μπολντάς πανίσαρ, αλλά τουμέν κα μπολντιόν άγιε πνευμάσαρ”.
17 Άμα ο Ντεβέλ ντινάς λέντε ο ίδιος δώρος σο ντινάς αμέντε-ντα σο πακιαντάμ κο Κύριος Ιησούς Χριστός, κον ισινόμας με σο κα μπορίναβας τι τσσιναβάβ ι Ντεβλές;»
18 Κάνα ασουντέ-λεν ανταλά, τσσιναντέ τι χαν-πες λέσαρ ντα δοξαντέ ι Ντεβλές ακαλέ λαφίντζαρ: «Αγαβάσα ότι ο Ντεβέλ ντινάς ι ευκαιρία κο τζενέ-ντα σο ισί γιαβερέ τθεμένταρ τι μετανιώνεν ντα τι λεν ζωή».
19 Ντα οντουλά σο τρουγισάλεας κατά στεναχώρια σο αβιλί ιτιρί κατά Στέφανος ερεσλέ μέχρι κι Φοινίκη, κι Κύπρος ντα κι Αντιόχεια, αλλά μουτθαβένας ο λατσσέ αμπέρια σάντε κο Ιουδαίοι.
20 Όμως, μερικοί λένταρ, σο ισινέ κατά Κύπρος ντα κατά Κυρήνη, αβιλέ κι Αντιόχεια ντα αρχισάλε τι μουτθαβέν ο λατσσέ αμπέρια σο τθερένα τι κερέν ι Κυριόσαρ ι Ιησούσαρ οντουλέντε σο κερένας λάφι μπαλαμανές.
21 Ντα ο Ιεχωβά* ισινέ λέντζαρ, ντα μπουτ τζενέ πακιαντέ κο Κύριος.
22 Λιντέ αμπέρι λένγκε κι κχανγκιρί σο ισινέ κι Ιερουσαλήμ, ντα μπουτσσαντέ ι Βαρναβάς μέχρι κι Αντιόχεια.
23 Κάνα ερεσλό ντα ντικχλάς ο μπαρό λατσσιπέ ι Ντεβλέσκο, χαιρισάλο ντα αρχισάλο τι βακερέλ σαριλένγκε μα τι τσσιναβέν τι ντεν καν κο Κύριος σαρέ πουμαρέ γκίσαρ,
24 σόσκε ο Βαρνάβας ισινέ λατσσό τζενό ντα πφερντό άγιος πνεύμας ντα πίστη. Ντα μπουτ τζενέ πακιαντέ κο Κύριος.
25 Βοβ γκιλό κι Ταρσός για τι ρόντελ ι Σαυλόσκε.
26 Κάνα αρακχλάς-λες, αντάς-λες κι Αντιόχεια. Ντα εκ σαστό μπρες γκιντίντιβενας λέντζαρ κι κχανγκιρί ντα σικλιαρένας μπουτέν, ντα κι Αντιόχεια ισινέ η πρώτη φαρ σο ντινάς ο Ντεβέλ κο μαθητές ο ναβ Χριστιανοί.
27 Οντουλά ντιβεσά γουλίστιλε κι Αντιόχεια προφήτες κατά Ιερουσαλήμ.
28 Εκ τανό λένταρ, σο βακέρντιβελας Άγαβος, ιστίντιλο ντα βακερντάς αντράλ κατά πνεύμας ότι κα περέλας μπαρί μποκχ σαρί κι πφουβ, ντα ανταβά αβιλό-πες κάνα κερέλας κουμάντος ο Κλαύδιος.
29 Οτθάρ, ο μαθητές λιντέ ι απόφαση τι μπουτσσαβέν πράγματα, ο κάθε εκ οντουβά σο μπορίνελας, για τι βοηθίνεν ι πφραλέν κι Ιουδαία.
30 Ντα ανταβά κερντέ, ντινέ-λεν κο Βαρνάβας ντα κο Σαύλος για τι γκερέν-λεν κο πρεσβύτεροι.
