Πράξεις ι Αποστολόνγκε 12:1-25
12 Οντουλά ντιβεσά, ο βασιλιάς Ηρώδης γκιλό κόντρα μερικέ τζενέντζαρ κατά κχανγκιρί.
2 Μουνταρντάς-ντα τσσουριάσαρ ι Ιωαννίσκε πφραλές ι Ιακωβός.
3 Κάνα ντικχλάς ότι ο Ιουδαίοι μπεϊντιντέ-λες* ανταβά, ασταρντάς ι Πετρός-ντα. (Ανταβά αβιλό-πες κο ντιβεσά κι Μπι-μαγιάκε Μαντρένγκε.)
4 Επειδή μανγκέλας τι σικαβέλ-λες* ανγκλάλ κο λαός σοράν κατά Πάσχας, ασταρντάς-λες ντα τσσουντάς-λες κι φυλακή ντα βακερντάς τι αρακχαβέν-λες σταρ ομάδες, η εκ σοράν κατά γιαβέρ. Η κάθε ομάδα τθερέλας σταρέ στρατιωτέν.
5 Ο Πέτρος ισινέ πφαντό κι φυλακή, αλλά η κχανγκιρί προσευχίντιβελας αντράλ πι γκίσταρ κο Ντεβέλ λέσκε.
6 Ι ιράτ πριν τι σικαβέλ ο Ηρώδης ι Πετρός, ο Πέτρος σοβέλας πφαντό ντουέ τζαντζιρίντζαρ.* Τθερέλας ντουέ στρατιωτέν, εκχές ακατάρ ντα εκχές οκουτάρ, ντα ανγκλάλ κι πόρτα ισινέ τζενέ σο αρακχαβένας ι φυλακή.
7 Ντα άκ’! Άγγελος ι Ιεχωβάσκο* ατσσιλό οτθέ, ντα εκ φως αβιλό κο κελίς κι φυλακιάκο. Βοβ ασταρντάς ι Πετρός κο ντουμό ντα τζανγκαντάς-λες ακαλέ λαφίντζαρ: «Ίστι σουγκό!» Ντα ο τζαντζιριά πελέ λέσκε βαστένταρ.
8 Ο άγγελος βακερντάς λέσκε: «Ιριάβ-τουτ ντα ιρί το τεραχά». Βοβ κερντάς-λες. Σοράν βακερντάς λέσκε: «Ιρί το αβραϊνέ σέα ντα έλα παλά-μάντε».
9 Ντα βοβ νικίστιλο αβρί ντα τζάλας παλά-λέστε, αλλά να τζανέλας ότι ανταβά σο αβέλας-πες αντράλ κατά άγγελος ισινέ μπαγιά. Αμντίνελας ότι ντικχέλας φαντασία.
10 Κάνα νακχλέ κατά πρώτη ομάδα σο αρακχαβέλας ντα κατά δεύτερη, ερεσλέ κι σιδερένια μπαρί πόρτα σο γκερέλας κι πόλη, ντα πουτάρντιλι κορκορί. Αφού νικίστιλε, νακχλέ εκ ντρομ, ντα οντιά στιγμή ο άγγελος νασλό.
11 Ντα ο Πέτρος, κάνα αγαντάς σο αβέλας-πες, βακερντάς: «Ακανά ισινόμ σίγουρος ότι ο Ιεχωβά* μπουτσσαντάς πι αγγελός ντα σωντάς-μαν κατά βας ι Ηρωδίσκο ντα σαρέ κατά μπέτι πράγματα σο μπεσένας ο Ιουδαίοι τι αβέν-πες μάνγκε».
12 Κάνα αγαντάς-λες ανταβά, γκιλό κο κχερ κι Μαριάκο, κι ντάι κι Ιωαννίσκι σο βακερένας λέσκε Μάρκο-ντα. Οτθέ ισινέ γκιντιμέ μπουτ τζενέ ντα προσευχίντιβενας.
13 Κάνα μπασκιαρντάς ι πόρτα, εκ τερνί υπηρέτρια σο βακέρντιβελας Ρόδη γκιλί τι ντικχέλ κον ισί.
14 Κάνα αγαντάς ι φωνή ι Πετρόσκι, λιντάς αζόμ μπουτ χαρά σο να πουταρντάς ι μπαρί πόρτα αλλά τθαβντισάλι αντρέ ντα βακερντάς ότι ο Πέτρος μπεσέλας αβριάλ.
15 Βον βακερντέ λάκε: «Ισινάν ντινιλί». Βόι όμως επιμίνελας. Αζομάν βον αρχισάλε τι βακερέν: «Ισί λέσκο άγγελος».
16 Ο Πέτρος μπεσέλας οτθέ ντα μπασκιαρέλας. Κάνα πουταρντέ ι πόρτα, ντικχλέ-λες ντα ατσσιλέ πουταρντέ μόσαρ.
17 Αλλά αφού κερντάς λένγκε νόημας πι βαστέσαρ μα τι κερέν λάφι, βακερντάς λένγκε σαρ ο Ιεχωβά* νικαντάας-λες κατά φυλακή ντα βακερντάς: «Μουτθαβέν-λεν σαρέ ανταλά κο Ιάκωβος ντα κο πφραλά». Σοράν νικίστιλο αβρί ντα γκιλό γιαβερτθέ.
18 Κάνα ντισιλό, αβιλί-πες μπαρί βαβούρα κο στρατιώτες σόσκε να τζανένας σο αβιλόας-πες ο Πέτρος.
19 Ο Ηρώδης ροντιντάς λέσκε λατσσές αλλά να αρακχλάς-λες, οτθάρ κερντάς ερωτήσεις οντουλένγκε σο αρακχαβένας ντα ντινάς διαταγή τι λεν-λεν για τι τιμωρίνεν-λεν. Ντα βοβ γουλίστιλο κατά Ιουδαία κι Καισάρεια ντα μπεσλό χάνικ βακίτι οτθέ.
20 Τθερέλας μπαρί χολί ι λαόσκε κι Τύρος ντα κι Σιδώνα. Οτθάρ, βον αβιλέ σαρέ γιεκ λέστε, μολιντέ ι Βλαστός σο κερέλας κουμάντος ο κχερ ι βασιλιάσκο τι βοηθίνελ-λεν, ντα αντικάς μανγκλέ τι κερέν ειρήνη, επειδή λένγκο τθεμ κινέλας πράγματα χαμάσκε κατά τθεμ ι βασιλιάσκο.
21 Εκ συγκεκριμέ ντιβές, ο Ηρώδης ιριντάς βασιλικά σέα, μπεσλό κι καρέκλα κι δικαστηριόσκι ντα αρχισάλο τι κερέλ λένγκε λάφι.
22 Αζομάν ο λαός σο ισινέ γκιντιμέ ντέλας βίκος: «Ακαβά σο κερέλα λάφι νανέ τζενό, ισί ντεβέλ!»
23 Οντιά στιγμή ο άγγελος ι Ιεχωβάσκο* τιμωριντάς-λες εκχέ νασφαλιμάσαρ,* σόσκε να ντινάς ι δόξα κο Ντεβέλ, ντα χαλέ-λες ο κερμέ ντα μουλό.
24 Αλλά ο λάφι ι Ιεχωβάσκο* λιντιόλας αμπέρι καζόμ τζάλας, ντα ατζέ πο μπουτ τζενέ πακιάνας.
25 Ντα κάνα ο Βαρνάβας ντα ο Σαύλος ντινέ ο πράγματα σο μπουτσσάντιλεας για τι βοηθίνεν ι πφραλέν κι Ιερουσαλήμ, βουρτισάλε ντα λιντέ πουμέντζαρ ι Ιωαννής σο βακέρντιβελας Μάρκος-ντα.
Υποσημειώσεις
^ Γιαβέρσοϊ «ι Ιουδαιόνγκε αρεσάλο».
^ Γιαβέρσοϊ «τι σικαβέλ-λες για τι δικάντιβελ».
^ Γιαβέρσοϊ «αλυσιδέντζαρ».
^ Ο λάφι «νασφαλιπέ» βακέρντιβελα εμ «πασλιπέ» εμ «αμπόρια».
