Πράξεις ι Αποστολόνγκε 13:1-52
13 Κι κχανγκιρί κι Αντιόχεια ισινέ προφήτες ντα δάσκαλοι: ο Βαρνάβας, ο Συμεών σο βακέρντιβελας Νίγερ, ο Λούκιος κατά Κυρήνη, ο Μαναήν σο λιντάας σικλιαριπέ γιεκ ι Ηρωδίσαρ ι βασιλιάσαρ, ντα ο Σαύλος.
2 Καζόμ βον υπηρετίνενας ι Ιεχωβάς* ντα κερένας νηστεία, ο άγιος πνεύμας βακερντάς: «Ντινόμ βίκος ι Βαρναβάς ντα ι Σαυλός για τι κερέν εκ έργος, οτθάρ τραμπίνεν-λεν μάνγκε».
3 Αζομάν κερντέ νηστεία, προσευχισάλε ντα σοράν τσσουντέ πουμαρέ βαστά οπρά-λέντε ντα μουκχλέ-λεν τι νασέν.
4 Ντα οντουλά μουρσά σο μπουτσσάντιλεας κατά άγιος πνεύμας, γουλίστιλε κι Σελεύκεια ντα νασλέ καραβίσαρ οτθάρ για τι τζαν κι Κύπρος.
5 Κάνα ερεσλέ κι Σαλαμίνα, βακερένας ο λάφι ι Ντεβλέσκο κο συναγωγές κι Ιουδαιόνγκε. Τθερένας ι Ιωαννής-ντα για τι βοηθίνελ-λεν.
6 Νασλέ οτθάρ ντα γκιλέ κι γιαβέρ μπάντα κι νησίσκι, κι Πάφος. Οτθέ αρακχλέ εκχέ Ιουδαιός σο βακέρντιβελας Βαρ-Ιησούς ντα ισινέ μάγος ντα προφήτης σο χουχαβέλας.
7 Βοβ ισινέ εκχέ γκοντιαβέρ τζενέσαρ σο κερέλας κουμάντος κο νησίς ντα βακέρντιβελας Σέργιος Παύλος. Βοβ ντινάς βίκος ι Βαρναβάς ντα ι Σαυλός ντα μανγκέλας μπουτ τι ασουνέλ ο λάφι ι Ντεβλέσκο.
8 Αλλά ο Ελύμας ο μάγος (ανταβά μανγκέλα τι βακερέλ λέσκο ναβ) αρχισάλο τι τζαλ λέντζαρ κόντρα για μα τι πακιάλ ο Σέργιος Παύλος κι Ντεβλέσκο λάφι.
9 Αζομάν ο Σαύλος, σο βακέρντιβελα εμ Παύλος, πφερντιλό άγιος πνεύμας, ντικχλάς-λες μπουτ λατσσές
10 ντα βακερντάς: «Χουχαβέσα μπουτ ντα κερέσα πφιρνιπέ,* τσσαβό ι Μπενγκέσκο, ντουσμάνι* ι κάθε δίκαιε πραγμάσκο. Σόσκε κερέσα τι ντικχίντιβελ ότι ο ντρομ ι Ιεχωβάσκο* νανέ σωστός;
11 Άκ’! Ο βας ι Ιεχωβάσκο* ισί οπρά-τούτε, ντα κα αβές κορορό ντα για χάνικ βακίτι να κα ντικχές ο φως ι κχαμέσκο». Οντιά στιγμή πελί οπρά-λέστε μπαρί ομίχλη ντα καρανίκι, ντα τζάλας ακατάρ οκουτάρ για τι αρακχέλ εκχέ τζενές τι γκερέλ-λες κατά βας.
12 Αζομάν ο τζενό σο κερέλας κουμάντος κο νησίς, κάνα ντικχλάς σο αβιλόας-πες, πακιαντάς, σόσκε ατσσιλό πουταρντέ μόσαρ κατά σικλιαριπέ ι Ιεχωβάσκο.*
13 Σοράν, ο Παύλος ντα οντουλά σο ισινέ λέσαρ νασλέ καραβίσαρ κατά Πάφος ντα ερεσλέ κι Πέργη κι Παμφυλία. Ο Ιωάννης όμως μουκχλάς-λεν ντα βουρτισάλο κι Ιερουσαλήμ.
14 Αλλά βον νασλέ κατά Πέργη ντα ερεσλέ κι Αντιόχεια κι Πισιδία. Ντα κο Σάββατος, γκιλέ αντρέ κι συναγωγή ντα μπεσλέ.
15 Σοράν κατά διάβασμας σο αβιλό-πες αντράλ κατά Νόμος ντα κατά Προφήτες, ο σορέ ι συναγωγιάκε βακερντέ λένγκε: «Πφραλάλεν, άμα τθερένα τι βακερέν καέκ λάφι σο κα ντελ ζορ κο λαός, βακερέν-λες».
16 Οτθάρ, ο Παύλος ιστίντιλο, κερντάς νόημας πι βαστέσαρ ντα βακερντάς:
«Μουρσάλεν κατά Ισραήλ ντα τουμέν ο γιαβερά σο νταρένα κατά Ντεβέλ, ασουνέν.
17 Ο Ντεβέλ ανταλέ λαόσκο, ι Ισραηλίσκο, τραμπιντάς αμαρέ παππουδέν ντα κερντάς-λεν ζουρανό λαός καζόμ τζουβντιόνας σαρ ξένοι κι Αίγυπτος ντα νικαντάς-λεν οτθάρ πι ζουρανέ μουσιάσαρ.*
18 Ντα πασέ 40 μπρεσά, νταϊντίνελας-λεν κι έρημος.
19 Καταστραφιντάς εφτά λαόν κι Χαναάν ντα ντινάς λένγκο τθεμ αμαρέ παππουδέντε σαρ κληρονομιά.
20 Σαρέ ανταλά αβιλέ-πες πασέ 450 μπρεσέντε αντρέ.
»Σοράν ντινάς-λεν κριτέν μέχρι κο προφήτης Σαμουήλ.
21 Αλλά σοράν μανγκλέ τι τθερέν βασιλιάς, ντα ο Ντεβέλ κερντάς τι αβέλ λένγκο βασιλιάς 40 μπρεσά ο Σαούλ, σο λέσκο ντατ ισινέ ο Κεις, κατά φάρα Βενιαμίν.
22 Κάνα νασκιαρντάς-λες, τραμπιντάς ι Δαβιδίς τι αβέλ λένγκο βασιλιάς ντα βακερντάς ακαλά λάφια σο τθερένας τι κερέν λέσαρ: “Αρακχλόμ ι Δαβιδίς, ι Ιεσσαίσκε τσσαβές, εκχέ μουρσές αντικάς σαρ μανγκέλα μο γκι. Βοβ κα κερέλ σαρέ οντουλά σο μανγκάβα”.
23 Ο Ντεβέλ, αντικάς σαρ ντινάς πο λάφι, αντάς ι Ιησούς κατά προσάγγονα οντουλέ τζενέσκε για τι σώνελ ι Ισραηλιτέν.
24 Πριν τι αβέλ βοβ, ο Ιωάννης βακερντάας σαρό κο λαός Ισραήλ τι μπολντιόν για τι σικαβέν ότι μετανιωσάλεας.
25 Αλλά αζομάν σο μπιτισκιαρέλας πο έργος ο Ιωάννης, βακερέλας: “Σο αμντίνενα ότι ισινόμ; Να ισινόμ με οντουβά. Αλλά ντικχέν! Σοράν μάνταρ αβέλα εκ τζενό, ντα με να ισινόμ άξιος ούτε τι πουτράβ ο τεραχά λέσκε πιντρένγκε”.
26 »Πφραλάλεν, σο αστάρντιβενα κατά Αβραάμ ντα σαρέ τουμέν ο γιαβερά σο νταρένα κατά Ντεβέλ, αμέν ασουντάμ σαρ σώνελα-αμέν ο Ντεβέλ.
27 Ο τζενέ σο μπεσένα κι Ιερουσαλήμ ντα λένγκε άρχοντες να αγαντέ ανταλέ τζενές, αλλά κάνα δικαντέ-λες, κερντέ τι νικιόν μπαγιά ο λάφια ι Προφητένγκε σο διαβάντιβενα ζουρανές κάθε Σάββατος.
28 Να αρακχλέ λέστε τίποτα για τι αξίνελ τι μερέλ, αλλά μανγκλέ κατά Πιλάτος τι ντελ εντολή τι μουνταρέν-λες.
29 Ντα κάνα κερντέας σαρέ οντουλά σο ισινέ γραμμέ λέσκε, γουλιαρντέ-λες κατά κας* ντα τσσουντέ-λες εκχέ μεζαρίστε.*
30 Αλλά ο Ντεβέλ τζουβντιαρντάς-λες κατά μουλέ,
31 ντα μπουτ ντιβεσά βοβ σικαβέλας-πες οντουλέντε σο νικλιντέας λέσαρ κατά Γαλιλαία κι Ιερουσαλήμ. Βον ακανά ισί οντουλά σο κερένα λάφι λέσκε κο λαός.
32 »Αμέν μουτθαβάσα τουμένγκε ο λατσσέ αμπέρια σο τθερένα τι κερέν ι λαφίσαρ σο ντινάς ο Ντεβέλ αμαρέ παππουδέντε.
33 Ο Ντεβέλ κερντάς ανταβά λάφι τι νικιόλ μπαγιά σαστό αμέντε σο ισινάμ λένγκε τσσαβέ, κάνα τζουβντιαρντάς ι Ιησούς, σαρ ισί γραμμέ κο δεύτερος ψαλμός: “Τούι ισινάν μο τσσαβό. Αντιβές με αβιλόμ το ντατ”.
34 Ο Ντεβέλ τζουβντιαρντάς-λες κατά μουλέ για μα τι τθερέλ ατζέκ φαρ σώμας σο κερνιόλα. Σικαντάς ότι ανταβά ισί μπαγιά κάνα βακερντάς: “Κα σικαβάβ τουμένγκε ι αφοσιωμέ αγάπη σο ντινόμ μο λάφι κο Δαβίδ, ντα μπορίνενα τι ντεν μπέσα ανταλέ λαφίστε”.
35 Οτθάρ, βακερέλα εκχέ γιαβερέ-ντα ψαλμόστε: “Να κα μουκχές μο σώμας τι κερνιόλ σόσκε ισινόμ αφοσιωμέ τούτε”.
36 Ο Δαβίδ υπηρετιντάς ι Ντεβλές πιρέ μπρεσέντε, σοτάς ο σοϊπέ ι μεριμάσκο, πραχούντιλο γιεκ πι παππουδέντζαρ ντα ισί μπαγιά ότι λέσκο σώμας κερνιλό.
37 Ο σώμας, όμως, οντουλέσκο σο τζουβντιαρντάς ο Ντεβέλ να κερνιλό.
38 »Οτθάρ, πφραλάλεν, τι τζανέν ότι αντράλ λέσταρ βακέρντιβελα τουμένγκε ότι τουμαρέ αμαρτίες κα συγχωρίντιβεν.
39 Αντράλ λέσταρ, ο Ντεβέλ κα βακερέλ ότι οντουβά σο πακιάλα ισί δίκαιος σαρέ ανταλένγκε σο ναστί βακέρντιλεν τουμέν δίκαιοι αντράλ κατά Νόμος ι Μωυσίσκο.
40 Οτθάρ, τθερέν τουμαρί γκοντί μα τι αβέλ οπρά-τουμέντε οντουβά σο βακέρντιβελα κο Προφήτες:
41 “Ντικχέν-λες ανταβά, τουμέν σο να σεβάνενα, ντα σαστίνεν ντα εξαφανίντιβεν, σόσκε με κεράβα κάτι τουμαρέ ντιβεσέντε, κάτι σο να κα πακιάν ποτές, ατζέ-ντα άμα κάποιος κα βακερέλ-λες τουμένγκε ντιπ”».
42 Ντα καζόμ βον νικιόνας αβρί, ο τζενέ μολίνενας-λεν τι κερέν λάφι ανταλέ πραγματένγκε ο γιαβέρ Σάββατος.
43 Οτθάρ, κάνα νασλέ κατά συναγωγή, μπουτ Ιουδαίοι ντα τζενέ σο λιντέας ι Ιουδαιόνγκι θρησκεία ντα ντένας λατρεία ι Ντεβλές γκιλέ παλάλ κο Παύλος ντα κο Βαρνάβας. Βον, καζόμ κερένας λέντζαρ λάφι, βακερένας λένγκε τι ατσσόν κο μπαρό λατσσιπέ κι Ντεβλέσκο.
44 Ο γιαβέρ Σάββατος, σχεδόν σαρί η πόλη γκιντισάλι για τι ασουνέλ ο λάφι ι Ιεχωβάσκο.*
45 Κάνα ο Ιουδαίοι ντικχλέ αζόμ μπουτέ τζενέν, πφερντιλέ ζήλια, τζάνας κόντρα οντουλέντε σο βακερέλας ο Παύλος ντα αντικάς να σικαβένας σεβασμός ι Ντεβλέσκε.
46 Αζομάν ο Παύλος ντα ο Βαρνάβας βακερντέ λένγκε μπίνταρανες: «Έπρεπε τι βακέρντιβελ πρώτα τουμένγκε ο λάφι ι Ντεβλέσκο. Αφού τουμέν κερένα-λες πέρα ντα να πακιάνα ότι ισινέν άξιοι τι λεν ζωή για πάντα, αμέν τζάσα οντουλέντε σο ισί γιαβερέ τθεμένταρ.
47 Σόσκε ο Ιεχωβά* ντινάς-αμέν ακαγιά εντολή: “Τσσουντόμ-τουτ τι αβές φως ι τθεμένγκε για τι βακερές κο τζενέ σαρί κι πφουβ σαρ τι σώντιβεν”».
48 Κάνα οντουλά σο ισινέ γιαβερέ τθεμένταρ ασουντέ-λες ανταβά, χαιρισάλε ντα δοξάνενας ο λάφι ι Ιεχωβάσκο,* ντα σαρέ ο τζενέ σο τθερένας λατσσό γκι για τι λεν ζωή για πάντα πακιαντέ.
49 Ντα ο λάφι ι Ιεχωβάσκο* πφιρντιόλας ατζέ πο μπουτ σαρό κο τθεμ.
50 Αλλά ο Ιουδαίοι πφερντέ ι γκοντί ι τζουβλίνγκι σο τθερένας μπαρό ναβ ντα νταρένας κατά Ντεβέλ ντα ι μπαρέ σορένγκι σο ισινέ κι πόλη τι τζαν κόντρα κο Παύλος ντα κο Βαρνάβας. Αντικάς γκιλέ λέντζαρ κόντρα ντα φουρτιντέ-λεν αβρί κατά τθεμ.
51 Οτθάρ, βον τινιαντέ ο πράχος πουμαρέ πιντρένταρ για τι σικάντιβελ λένγκε ότι πρέπει τι τθερέν πουμαρί γκοντί.* Σοράν γκιλέ κο Ικόνιος.
52 Ντα ο μαθητές πφερντιόνας χαρά ντα άγιος πνεύμας.
Υποσημειώσεις
^ Γιαβέρσοϊ «γκεραλιπέ, μπίλατσσιπε».
^ Γιαβέρσοϊ «εχθρός».
^ Γιαβέρσοϊ «οτθάρ μπαρέ ζοριάσαρ».
^ Γιαβέρσοϊ «λιμορίστε».
^ Γιαβέρσοϊ «ότι ο Ντεβέλ ντινάς-λεν τεμπί, δηλαδή προειδοποίηση».
