Πράξεις ι Αποστολόνγκε 14:1-28
14 Κο Ικόνιος ο Παύλος ντα ο Βαρνάβας γκιλέ γιεκ αντρέ κι συναγωγή κι Ιουδαιόνγκι ντα κερντέ λάφι αζόμ σουκάρ σο μπουτ Ιουδαίοι ντα Μπαλαμέ πακιαντέ.
2 Αλλά ο Ιουδαίοι σο να πακιαντέ κερντέ οντουλέν* σο ισινέ γιαβερέ τθεμένταρ τι χολιάνεν ι πφραλένγκε ντα τι τζαν λέντζαρ κόντρα.
3 Βον μπεσλέ οτθέ μπερεκέτι βακίτι ντα κερένας λάφι μπίνταρανες ι Ιεχωβάσκε* ζοριάσαρ. Βοβ μουκχέλας τι αβέν-πες σημάδια ντα θαύματα αντράλ λένταρ ντα αντικάς σικαβέλας ότι ισινέ μπαγιά ο λάφι σο τθερέλας τι κερέλ λέσκε μπαρέ λατσσιμάσαρ.
4 Όμως, ο τζενέ σο μπεσένας κι πόλη ισινέ διχομέ. Μερικοί τσσίντενας κατά Ιουδαίοι, αλλά γιαβερά κατά απόστολοι.
5 Κάνα οντουλά σο ισινέ γιαβερέ τθεμένταρ ντα ο Ιουδαίοι πουμαρέ αρχοντέντζαρ μανγκλέ τι ανέν λένγκε λατζ ντα τι φουρτίνεν λένγκε μπαρά,
6 βον λιντέ-λες αμπέρι ντα γκιλέ κο Λύστρα ντα κι Δέρβη σο ισί κι Λυκαονία ντα κο γκαβά οτθέ πασέ.
7 Οτθέ να τσσιναντέ τι μουτθαβέν ο λατσσέ αμπέρια.
8 Κο Λύστρα μπεσέλας τελέ εκ τζενό σο μπιάντιλοας μπανγκέ πιντρένγκο ντα να πφιρντάας ποτές.
9 Βοβ ασουνέλας ο λάφια ι Παυλόσκε. Κάνα ο Παύλος ντικχλάς-λες λατσσές ντα αγαντάς ότι τθερέλας πίστη ντα πακιάλας μπαγιά ότι μπορίνελας τι αβέλ λατσσές,
10 βακερντάς ζουρανές: «Άτσσουβ τι πιντρέντε». Ντα βοβ χουτλάς* οπρέ ντα αρχισάλο τι πφιρέλ.
11 Κάνα ο μπουτ τζενέ σο ισινέ οτθέ ντικχλέ σο κερντάας ο Παύλος, ντινέ βίκος κι λυκαονική τσσιπ: «Ντικχάσα ι ντεβλέν σο γουλίστιλε σαρ τζενέ αμέντε!»
12 Ντα ντένας βίκος ι Βαρναβάς Δία ντα ι Παυλός Ερμή, σόσκε κερέλας πο μπουτ λάφι βοβ.
13 Ο ναός ι Διάσκο ισινέ ντιπ πασέ κι πόλη, ντα λέσκο ιερέας αντάς κο μπαρέ πόρτες γκουρουβέν ντα στεφάνια ντα μανγκέλας τι κερέλ θυσίες γιεκ ι τζενέντζαρ.
14 Αλλά κάνα ο απόστολοι Βαρνάβας ντα Παύλος ασουντέ-λες ανταβά, πφαραντέ πουμαρέ σέα ντα χουτλέ αντρέ κο τζενέ ντα ντινέ βίκος:
15 «Μουρσάλεν, σο ισί ανταλά σο κερένα; Αμέν-ντα τζενέ ισινάμ σαρ ισινέν τουμέν. Ντα μουτθαβάσα τουμένγκε ο λατσσέ αμπέρια για τι μουκχέν ανταλά πράγματα σο αβένα-πες σινανέ ντα τι βουρτίνεν κο τζουβντό Ντεβέλ, σο κερντάς ο ουρανός ντα ι πφουβ ντα ι ντεριάβ ντα σαρέ οντουλά σο ισί λέντε.
16 Κο μπρεσά σο νακχλέ βοβ μουκχλάς σαρέ ι λαόν τι κερέν σο μανγκένα,
17 αλλά αντράλ κατά λατσσιπέ σο κερέλας σικαντάς τουμένγκε κον ισί, ντα ντέλας-τουμέν μπρισιμά κατά ουρανός ντα κερέλας τουμαρέ χωράφια τι νικαβέν μπερεκέτι πράγματα ντα τσαλιαρέλας-τουμέν χαμπέσαρ ντα πφερέλας τουμαρό γκι χαρά».
18 Ντα παρόλο σο βακερντέ-λεν ανταλά, ζορίσαρ ατσσικιαρντέ ι τζενέν για μα τι κερέν θυσία λένγκε.
19 Αβιλέ όμως Ιουδαίοι κατά Αντιόχεια ντα κατά Ικόνιος σο κερντέ ι τζενέν τι χολιάνεν ι Παυλόσκε. Φουρτιντέ λέσκε μπαρά, ντα σαρ ισινέ τελέ τσσίντενας-λες για τι νικαβέν-λες αβρί κατά πόλη, σόσκε αμντίνενας ότι μουλόας.
20 Αλλά κάνα ο μαθητές γκιντισάλε ντονταλάι λέσταρ, ιστίντιλο ντα γκιλό αντρέ κι πόλη. Ο γιαβέρ ντιβές βοβ ντα ο Βαρνάβας νασλέ για τι τζαν κι Δέρβη.
21 Κάνα μουτθαντέ ο λατσσέ αμπέρια οτθέ ντα κερντέ μπερεκέτι μαθητέν, βουρτισάλε κο Λύστρα, κο Ικόνιος ντα κι Αντιόχεια.
22 Οτθέ ντινέ ζορ ι μαθητέν* για τι ατσσόν κι πίστη ντα βακερένας: «Πρέπει τι τσσίντας μπουτ στεναχώριες για τι νακχάς κι Βασιλεία κι Ντεβλέσκι».
23 Ντα τσσουντέ πρεσβυτερόν λένγκε κι κάθε κχανγκιρί, ντα κάνα προσευχισάλε ντα κερντέ νηστεία, μουκχλέ-λεν κο βαστά κι Ιεχωβάσκε,* σο πακιαντέας λέστε.
24 Σοράν νακχλέ κατά Πισιδία ντα αβιλέ κι Παμφυλία
25 ντα κάνα μουτθαντέ ο λάφι κι Πέργη, γουλίστιλε κι Αττάλεια.
26 Νασλέ οτθάρ καραβίσαρ για τι τζαν κι Αντιόχεια. Οτθέ ο πφραλά μουκχλέας-λεν κο βαστά κι Ντεβλέσκε για τι σικαβέλ λένγκε πο μπαρό λατσσιπέ ι εργόσκε σο ακανά μπιτισκιαρντέας.
27 Κάνα ερεσλέ ντα γκιντιντέ ι πφραλέν κατά κχανγκιρί, βακερντέ ι μπουτέ πραγματένγκε σο κερντάας ο Ντεβέλ αντράλ λένταρ ντα ότι πουταρντάας ο ντρομ για τι πακιάν ο τζενέ σο ισινέ γιαβερέ τθεμένταρ.
28 Ντα μπεσλέ μπερεκέτι βακίτι ι μαθητέντζαρ.
Υποσημειώσεις
^ Γιαβέρσοϊ «ο ψυχές οντουλένγκε».
^ Γιαβέρσοϊ «τσογκντιντάς».
^ Γιαβέρσοϊ «κο ψυχές κι μαθητένγκε».
