Πράξεις ι Αποστολόνγκε 15:1-41
-
Τθερένα γιαβέρ γνώμη κι Αντιόχεια για την περιτομή (1, 2)
-
Γκερένα ο θέμας κι Ιερουσαλήμ (3-5)
-
Γκιντίντιβενα ο πρεσβύτεροι ντα ο απόστολοι (6-21)
-
Γράμμας κατά κυβερνών σώμας (22-29)
-
Ατσσόν ντουρ κατά ρατ (28, 29)
-
-
Ο κχανγκιριά λένα ζορ κατά γράμμας (30-35)
-
Ο Παύλος ντα ο Βαρνάβας λένα γιαβέρ ντρομ ο εκ κατά γιαβέρ (36-41)
15 Ντα κάποιοι γουλίστιλε κατά Ιουδαία ντα σικλιαρένας ι πφραλέν: «Άμα να κερντέν περιτομή αντικάς σαρ βακερέλα ο Νόμος ι Μωυσίσκο, ναστί σώντιβενα».
2 Ντα αφού ο Παύλος ντα ο Βαρνάβας να αρακχένας-λεν λέντζαρ ντα τθερένας γιαβέρ γνώμη, κανονισάλο τι τζαλ ο Παύλος, ο Βαρνάβας ντα χάνικ γιαβερά κο απόστολοι ντα κο πρεσβύτεροι κι Ιερουσαλήμ για τι πουτσέν ανταλέ θεμάσκε.
3 Η κχανγκιρί γκερντάς-λεν χάνικ πο αβρί ντα βον νακχλέ αντράλ κατά Φοινίκη ντα κατά Σαμάρεια. Αζομάν βακερένας ντιπ λατσσές σαρ λιντέας ι Ντεβλέσκο ντρομ ο τζενέ γιαβερέ τθεμένταρ, ντα ανταβά ανέλας μπαρί χαρά σαρέ κο πφραλά.
4 Κάνα ερεσλέ κι Ιερουσαλήμ, η κχανγκιρί ντα ο απόστολοι ντα ο πρεσβύτεροι κερένας λένγκε σαρ σαρ, ντα βον βακερντέ ι μπουτέ πραγματένγκε σο κερντάας ο Ντεβέλ αντράλ λένταρ.
5 Αλλά κάποιοι σο πακιαντέ κο Ιησούς Χριστός ντα πο ανγκλέ πακιάνας ο σικλιαριπέ ι Φαρισαιόνγκο ιστίντιλε ντα βακερντέ: «Πρέπει τι κεράς λένγκε περιτομή ντα τι ντας-λεν εντολή τι κερέν ο Νόμος ι Μωυσίσκο».
6 Οτθάρ, ο απόστολοι ντα ο πρεσβύτεροι γκιντισάλε για τι κερέν λάφι ανταλέ θεμάσκε.
7 Κάνα κερντέ μπουτ λάφι ντα να αρακχλέ-λεν, ιστίντιλο ο Πέτρος ντα βακερντάς λένγκε: «Πφραλάλεν, τζανένα λατσσές ότι κατά πρώτα ντιβεσά ο Ντεβέλ τραμπιντάς τουμένταρ μαν, για τι ασουνέν αντράλ μάνταρ ο τζενέ κατά γιαβερά τθεμά ο λατσσέ αμπέρια ντα τι πακιάν.
8 Ντα ο Ντεβέλ, σο τζανέλα ο γκι, ντινάς-λεν ο άγιος πνεύμας σαρ ντινάς-λες αμέντε-ντα για τι σικαβέλ ότι κερντέ λέσκο γκι.
9 Ντα να ξεχωριντάς ιτς ούτε αμέν ούτε λεν, αλλά κερντάς πάκι λένγκο γκι αντράλ κατά πίστη.
10 Ακανά σόσκε δοκιμάνενα ι Ντεβλές μπέτι τροπόσαρ ντα τσσουβένα κο μαθητές εκ πφαριπέ σο ναστί βαντιντάμ-λες ούτε αμέν ούτε αμαρέ παππούδες;
11 Αλλά τθεράσα πίστη ότι κα σώντιβας αντράλ κατά μπαρό λατσσιπέ ι Κυριόσκο ι Ιησούσκο ι ίδιε τροπόσαρ σαρ βον-ντα».
12 Αζομάν σαρέ τσσιναντέ τι κερέν λάφι ντα ασουνένας ι Βαρναβάς ντα ι Παυλός τι βακερέν ι μπουτέ σημαδίνγκε ντα ι θαυματένγκε σο κερντάας ο Ντεβέλ αντράλ λένταρ κο τθεμά.
13 Κάνα μπιτισκιαρντέ, ο Ιάκωβος βακερντάς: «Πφραλάλεν, ασουνέν-μαν.
14 Ο Συμεών βακερντάς ντιπ λατσσές σαρ ο Ντεβέλ ντινάς σημασία πρώτη φαρ κο τζενέ σο ισί γιαβερέ τθεμένταρ για τι λελ οτθάρ εκχέ λαός πι ναβέσκε.
15 Ντα ανταλέσαρ συμφωνίνενα ο λάφια ι Προφητένγκε, σαρ ισί γραμμέ:
16 “Σοράν κα βουρτίναβ ντα κα τσσίνταβ πάλι ο τσαντίρι* ι Δαβιδίσκο σο ισί περαντό. Κα λατσσαράβ-λες πάλι ντα κα κεράβ-λες σαρ ισινέ ανγκλέ.
17 Αντικάς οντουλά τζενέ σο ατσσόνα τι ρόντεν σαρέ πουμαρέ γκίσαρ ι Ιεχωβάσκε,* γιεκ τζενέντζαρ σαρέ κατά τθεμά, τζενέντζαρ σο τθερένα οπρά-πουμέντε μο ναβ, βακερέλα ο Ιεχωβά* σο κερέλα ανταλά πράγματα
18 ντα τζανέλα-λεν κατά πουρανέ μπρεσά”.
19 Οτθάρ, βακεράβα* ότι να κα αβέλας λατσσό τι τσσουβάς πφαριπέ οπράλ οντουλέντε σο ισί γιαβερέ τθεμένταρ ντα λένα ι Ντεβλέσκο ντρομ,
20 αλλά τι γραφίνας λένγκε τι ατσσόν ντουρ κατά πράγματα σο μαγαρίνενα-λεν ο είδωλα, κατά λουμνιπέ,* κατά τασαντέ ζώα* ντα κατά ρατ.
21 Κατά πουρανέ μπρεσά ο Μωυσής τθερέλα οντουλέν σο μουτθαβένα σαρέ κο πόλεις ο λάφια σο γραφιντάς, σόσκε διαβάντιβενα ζουρανές κο συναγωγές κάθε Σάββατος».
22 Αζομάν ο απόστολοι ντα ο πρεσβύτεροι, γιεκ σαρέ ι κχανγκιριάσαρ, λιντέ ι απόφαση τι μπουτσσαβέν κι Αντιόχεια γιεκ ι Παυλόσαρ ντα ι Βαρναβάσαρ τραμπιμέ μουρσέν πουμένταρ. Μπουτσσαντέ ι Ιουδάς σο βακέρντιβελας εμ Βαρσαββάς ντα ι Σιλάς. Βον ισινέ οντουλένταρ σο οδηγίνενας ι πφραλέν.
23 Γραφιντέ ακαβά ντα μπουτσσαντέ-λες λέντζαρ:
«Αμέν, ο απόστολοι ντα ο πρεσβύτεροι, τουμαρέ πφραλά, γραφίνασα τουμένγκε σο μπεσένα κι Αντιόχεια, κι Συρία ντα κι Κιλικία ντα να ισινέν Ιουδαίοι: Πφραλάλεν σο μανγκάσα-τουμέν,
24 ασουντάμ ότι μερικά τζενέ αμένταρ αβιλέ ντα αντέ τουμένγκε αναστάτωση πουμαρέ λαφίντζαρ ντα μανγκλέ τι χουχαβέν-τουμέν,* παρόλο σο αμέν να ντινάμ-λεν καέκ οδηγία.
25 Οτθάρ, λιντάμ ι απόφαση σαρέ γιεκ τι τραμπίνας μουρσέν για τι μπουτσσαβάς-λεν τουμέντε γιεκ ι Βαρναβάσαρ ντα ι Παυλόσαρ σο μανγκάσα-λεν μπουτ.
26 Βον ντινέ πουμαρί ζωή* αμαρέ Κυριόσκε ναβέσκε, ι Ιησού Χριστόσκε.
27 Οτθάρ, μπουτσσαβάσα ι Ιουδάς ντα ι Σιλάς για τι βακερέν τουμένγκε βον-ντα ανταλά πράγματα.
28 Ο άγιος πνεύμας ντα αμέν βακεράσα ότι ισί λατσσό μα τι τσσουβάς τουμένγκε πο μπουτ πφαριπέ, εκτός ακαλένταρ σο ισί απαραίτητα:
29 ατσσόν ντουρ κατά πράγματα σο θυσιαντέ-λεν κο είδωλα, κατά ρατ, κατά τασαντέ ζώα* ντα κατά λουμνιπέ.* Άμα να τσσιναβένα τι αρακχαβέν-τουμέν ανταλένταρ, κα τζουβντιόν λατσσές. Ζουρανέ τι αβέν!»
30 Κάνα βον νασλέ, γουλίστιλε κι Αντιόχεια ντα γκιντιντέ-λεν σαριλέν ντα ντινέ-λεν ο γράμμας.
31 Βον διαβαντέ-λες ντα χαιρισάλε κατά ζορ σο λιντέ.
32 Ο Ιούδας ντα ο Σίλας, σο ισινέ προφήτες-ντα, κερντέ μπουτ ομιλίες σο ντινέ ζορ ι πφραλέν.
33 Μπεσλέ οτθέ χάνικ βακίτι, ντα κάνα νασένας, ο πφραλά βακερντέ λένγκε τι ερεσέν λατσσιμάσαρ οντουλέντε σο μπουτσσαντέας-λεν.
34 ——
35 Αλλά ο Παύλος ντα ο Βαρνάβας μπεσλέ κι Αντιόχεια. Οτθέ σικλιαρένας, ντα γιεκ μπουτέ γιαβερέντζαρ, μουτθαβένας ο λατσσέ αμπέρια ι Ιεχωβάσκερε.*
36 Μερικά ντιβεσά πο σοράν, ο Παύλος βακερντάς κο Βαρνάβας: «Έλα τι βουρτίνας ακανά* ντα τι τζας τι ντικχάς σαρ ισί ο πφραλά σαρέ κο πόλεις σο μουτθαντάμ ο λάφι ι Ιεχωβάσκο».*
37 Ο Βαρνάβας μανγκέλας σαρ-ντα τι αβέλας-πες τι λεν παλά-πουμέντε ι Ιωαννής-ντα σο βακέρντιβελας Μάρκος-ντα.
38 Αλλά ο Παύλος να μανγκέλας τι λεν-λες παλά-πουμέντε, σόσκε βοβ μουκχλάας-λεν κι Παμφυλία ντα να γκιλόας λέντζαρ κο έργος.
39 Αζομάν χολιασάλε μπουτ ο εκ ι γιαβερέσκε, ντα ο κάθε εκ λιντάς πο ντρομ. Ντα ο Βαρνάβας λιντάς ι Μαρκός ντα νασλό καραβίσαρ κι Κύπρος.
40 Ο Παύλος τραμπιντάς ι Σιλάς ντα νασλό, αφού πρώτα ο πφραλά μουκχλέ-λες κο βαστά κι Ιεχωβάσκε* για τι σικαβέλ λέσκε πο μπαρό λατσσιπέ.
41 Ντα νακχέλας κατά Συρία ντα κατά Κιλικία για τι ντελ ζορ κο κχανγκιριά.
Υποσημειώσεις
^ Γιαβέρσοϊ «κχερ».
^ Γιαβέρσοϊ «μι απόφαση, μι γνώμη ισί».
^ Δηλαδή μα τι χαν ζώα σο να τσσορντιλό ντιπ λένγκο ρατ.
^ Γιαβέρσοϊ «τι χουχαβέν τουμαρί ψυχή».
^ Γιαβέρσοϊ «ψυχή».
^ Δηλαδή μα χαν ζώα σο να τσσορντιλό ντιπ λένγκο ρατ.
^ Ή μπέκιμ «τι βουρτίνας σαρ-ντα τι αβέλ-πες».
