Πράξεις ι Αποστολόνγκε 17:1-34
17 Νακχλέ κατά Αμφίπολη ντα κατά Απολλωνία ντα ερεσλέ κι Θεσσαλονίκη. Οτθέ ισινέ εκ συναγωγή ι Ιουδαιόνγκι.
2 Ντα σαρ κερέλας κάθε φαρ, ο Παύλος γκιλό οτθέ λέντε, ντα τριν Σάββατα κερέλας λέντζαρ λάφι γκοντιαβέρ τροπόσαρ αντράλ κατά Γραφή.
3 Ντέλας-λεν τι αγαβέν ντα σικαβέλας λένγκε οντουλένταρ σο ισινέ γραμμέ ότι ο Χριστός έπρεπε τι τσσίντελ μπουτ ντα τι ιστίλ κατά μουλέ. Ντα βακερέλας λένγκε: «Βοβ ισί ο Χριστός, ο Ιησούς σο λέσκε κεράβα τουμένγκε λάφι με».
4 Αντικάς, μερικοί πακιαντέ ντα ισινέ γιεκ ι Παυλόσαρ ντα ι Σιλάσαρ. Ανταβά κερντέ μπουτ Μπαλαμέ-ντα σο ντένας λατρεία ι Ντεβλές ντα μπερεκέτι τζουβλιά σο τθερένας μπαρό ναβ.
5 Αλλά ο Ιουδαίοι, πφερντέ ζήλια, λιντέ πουμέντζαρ μερικέ γκεραλέ* τζενέν σο πφιρένας σινανέ αντρέ κι αγορά, γκιντιντέ μπουτέ τζενέν ντα ανένας βαβούρα κι πόλη. Τσσουντέ-πες φοράσαρ αντρέ κο κχερ κι Ιασονάσκο ντα μανγκένας ι Παυλός ντα ι Σιλάς για τι ανέν-λεν ανγκλάλ κο τζενέ.
6 Κάνα να αρακχλέ-λεν, τσσιντιντέ ι Ιασονάς ντα μερικέ πφραλέν μέχρι κο άρχοντες κι πολιάκε, ντα ντένας βίκος ζουρανές: «Ανταλά τζενέ, σο αντέ βαβούρα σαρί κι πφουβ, αβιλέ ατθέ-ντα.
7 Ο Ιάσονας λιντάς-λεν πι κχερέστε. Ντα σαρέ ανταλά τζάνα κόντρα κο νόμοι κι Καισαράσκε ντα βακερένα ότι ισί εκ γιαβέρ βασιλιάς, ο Ιησούς».
8 Κάνα ο τζενέ ντα ο άρχοντες ι πολιάκε ασουντέ-λεν ανταλά, νταρασάλε.
9 Ντα αφού λιντέ ο λοβέ σο έπρεπε σαρ εγγύηση κατά Ιάσονας ντα κατά γιαβερά, μουκχλέ-λεν τι νασέν.
10 Κάνα αράτιλο, ο πφραλά μπουτσσαντέ ι Παυλός ντα ι Σιλάς κι Βέροια, ντα κάνα ερεσλέ, γκιλέ αντρέ κι συναγωγή κι Ιουδαιόνγκι.
11 Βον τθερένας πο πουταρντί γκοντί κατά Ιουδαίοι σο ισινέ κι Θεσσαλονίκη, σόσκε δεχτιντέ ο λάφι ντιπ αντράλ πουμαρέ γκίσταρ, ντα ρόντενας λατσσές κι Γραφή κάθε ντιβές για τι ντικχέν άμα ισινέ αντικάς ο πράγματα.
12 Αντικάς, μπουτ ανταλένταρ πακιαντέ, εμ μπερεκέτι Μπαλαμνιά σο τθερένας λατσσό ναβ εμ μπερεκέτι μουρσά.
13 Αλλά κάνα ο Ιουδαίοι κι Θεσσαλονίκη σικλιλέ ότι ο Παύλος μουτθαβέλας ι Ντεβλέσκο λάφι κι Βέροια-ντα, αβιλέ οτθέ για τι ανέν βαβούρα κο τζενέ ντα τι κερέν-λεν τι χολιάνεν.
14 Αζομάν ο πφραλά μπουτσσαντέ μπουτ σουγκό ι Παυλός μέχρι κι ντεριάβ, αλλά ο Σίλας ντα ο Τιμόθεος μπεσλέ οτθέ.
15 Όμως, οντουλά σο ισινέ ι Παυλόσαρ αντέ-λες μέχρι κι Αθήνα, ντα κάνα νασένας, ο Παύλος βακερντάς λένγκε τι τζαλ ο Σίλας ντα ο Τιμόθεος λέστε καζόμ πο σουγκό αβέλας-πες.
16 Καζόμ ο Παύλος μπεκλεντίνελας λένγκε κι Αθήνα, ναστί νταϊντίνελας τι ντικχέλ ι πόλη πφερντί είδωλα.
17 Οτθάρ, αρχισάλο τι κερέλ λάφι γκοντιαβέρ τροπόσαρ κι συναγωγή ι Ιουδαιόντζαρ ντα ι γιαβερέντζαρ σο ντένας λατρεία ι Ντεβλές ντα κάθε ντιβές κι αγορά οντουλέντζαρ σο ισινέ οτθέ.
18 Μερικοί όμως κατά Επικούρειοι ντα κατά Στωικοί φιλόσοφοι γκιλέ λέσαρ κόντρα, ντα μερικοί βακερένας: «Σο μανγκέλα χάι τι βακερέλ ακαβά τσσιμπαλό;» Γιαβερά βακερένας: «Ντικχίντιβελα ότι βακερέλα γιαβερέ ντεβλένγκε». Ντα ανταβά αβέλας-πες σόσκε μουτθαβέλας ο λατσσέ αμπέρια σο τθερένα τι κερέν ι Ιησούσαρ ντα ι μουλέντζαρ σο κα ιστίν.
19 Οτθάρ, ασταρντέ-λες ντα γκερντέ-λες κο Άρειος Πάγος ακαλέ λαφίντζαρ: «Μπορίνασα τι σικλιάς καλέ νεβέ σικλιαριμάσκε βακερέσα;
20 Ο λάφια σο βακερέσα να ασουντάμ-λεν ατζέκ φαρ, ντα μανγκάσα τι σικλιάς σο μανγκένα τι βακερέν».
21 Σαρέ ο Αθηναίοι ντα ο ξένοι σο μπεσένας* οτθέ βακερένας ή ασουνένας κάτι νεβό κάνα ατσσόλας-λεν σαάτι.
22 Οτθάρ, ο Παύλος ατσσιλό κο μασκάρ κο Άρειος Πάγος ντα βακερντάς: «Μουρσάλεν κατά Αθήνα, ντικχάβα ότι σαρέ κο πράγματα τουμέν, πο μπουτ κατά γιαβερά, νταρένα ι ντεβλένταρ.
23 Σαρ νακχάβας ντα ντικχάβας λατσσές καλέ πραγματέντε πακιάνα,* αρακχλόμ εκ θυσιαστήριος-ντα σο οτθέ ισί γραμμέ “Ι Ντεβλέσκε σο να Τζανάσα”. Οτθάρ, βακεράβα τουμένγκε οντουλέσκε σο ντένα-λες λατρεία χωρίς τι τζανέν-λες.
24 Ο Ντεβέλ σο κερντάς ι ντουνιάς ντα σαρέ οντουλά σο ισί λέστε, επειδή ισί Κύριος ι ουρανόσκο ντα ι πφουβιάκο, να μπεσέλα ναόντε κερντέ τζενένγκε βαστένταρ,
25 ούτε χρειαζίντιβελα ι τζενένγκι βοήθεια, επειδή βοβ ντέλα σαριλέντε ι ζωή ντα ι ανάσα ντα σαρέ ο πράγματα.
26 Ντα λατσσαρντάς εκχέ τζενέσταρ σαρέ ι τζενέν για τι μπεσέν οπράλ σαρί κι πφουβ, κερντάς τι αβέν-πες ο πράγματα πουμαρέ βακιτίστε ντα βακερντάς κατέ τι μπεσέν ο τζενέ,
27 για τι ρόντεν ι Ντεβλέσκε. Άμα κα μαρέν-πες τι αρακχέν-λες, κα αρακχέν-λες. Σόσκε βοβ νανέ ντουρ κατά κάθε εκ αμένταρ.
28 Λέσταρ τζουβντιάσα, πφιράσα ντα υπαρχίντιβασα, σαρ βακερντέ μερικοί ποιητές τουμένταρ-ντα: “Σόσκε ισινάμ λέσκε τσσαβέ-ντα”.*
29 »Αφού ισινάμ ι Ντεβλέσκε τσσαβέ,* δεν πρέπει τι αμντίνας ότι ο Ντεβέλ ισί σαρ χρυσάφι ή ασήμι ή μπαρ, σαρ κάτι σο λατσσαρντάς ντα νικαντάς πι γκοντιάταρ ο τζενό.
30 Ισί μπαγιά ότι κο βακίτια σο νακχλέ, ο τζενέ κερένας ανταλά πράγματα χωρίς τι τζανέν, αλλά ο Ντεβέλ να ντινάς σημασία, ακανά όμως μουτθαβέλα σαρέ κο τζενέ, κατέ-ντα τι μπεσένα, ότι πρέπει τι μετανιώνεν.
31 Επειδή τσσουντάς ο ντιβές για τι κρίνελ ι πφουβ δίκαια αντράλ εκχέ μουρσέσταρ σο τραμπιντάς, ντα σικαντάς σαριλένγκε ότι ανταβά ντιβές σίγουρα κα αβέλ σόσκε τζουβντιαρντάς ανταλέ μουρσές κατά μουλέ».
32 Κάνα ασουντέ ότι κα τζουβντιόν ο μουλέ, μερικοί αρχισάλε τι πρασάν-λες, αλλά γιαβερά βακερντέ: «Κα ασουνάς-τουτ πάλι ανταλέσκε».
33 Αζομάν ο Παύλος νασλό,
34 αλλά ισινέ τζενέ σο γκιλέ παλά-λέστε ντα πακιαντέ. Αντρέ ανταλέντε ισινέ ο Διονύσιος, σο ισινέ δικαστής κο Άρειος Πάγος, εκ τζουβέλ σο βακέρντιβελας Δάμαρις ντα γιαβερά-ντα.
Υποσημειώσεις
^ Γιαβέρσοϊ «μπίλατσσε, κακέ».
^ Γιαβέρσοϊ «σο γκιλέας».
^ Γιαβέρσοϊ «ντένα λατρεία».
^ Γιαβέρσοϊ «λέσκι γενιά-ντα».
^ Γιαβέρσοϊ «ι Ντεβλέσκι γενιά».
