Πράξεις ι Αποστολόνγκε 18:1-28
18 Σοράν νασλό κατά Αθήνα ντα γκιλό κι Κόρινθος.
2 Ντα αρακχλάς εκχέ Ιουδαιός σο βακερένας λέσκε Ακύλα ντα αστάρντιβελας κατά Πόντος. Βοβ ντα λέσκι ρομνί η Πρίσκιλλα αβιλέας ακανά σουγκό κατά Ιταλία, σόσκε ο Κλαύδιος ντινάας εντολή σαρέ κο Ιουδαίοι τι νασέν κατά Ρώμη. Γκιλό λέντε,
3 μπεσλό λένγκε κχερέστε ντα κερέλας λέντζαρ μπουτί, σόσκε κερένας ι ίδια μπουτί, λατσσαρένας τσαντίρια.
4 Ντα κάθε Σάββατος κερέλας ομιλία* κι συναγωγή ντα κερέλας εμ Ιουδαιόν εμ Μπαλαμέν τι πακιάν.
5 Κάνα ο Σίλας ντα ο Τιμόθεος γουλίστιλε κατά Μακεδονία, ο Παύλος αρχισάλο τι ντελ ατζέ πο μπουτ πι σαατίσταρ για τι βακερέλ ο λάφι ι Ντεβλέσκο ντα κερέλας λάφι κο Ιουδαίοι για τι σικαβέλ ότι ο Ιησούς ισί ο Χριστός.
6 Αλλά βον τζάνας κόντρα λέσαρ ντα βακερένας μπέτι λάφια, οτθάρ βοβ τινιαντάς πο σέα ντα βακερντάς λένγκε: «Τουμαρό ρατ τι αβέλ οπράλ τουμαρέ σορέστε. Με ισινόμ πάκι. Ανταλέ ντιβεσέσταρ κα τζαβ οντουλέντε σο ισί γιαβερέ τθεμένταρ».
7 Ανταλέσκε-ντα νασλό οτθάρ* ντα γκιλό κο Τίτιος Ιούστος, εκχέ τζενέστε σο ντέλας λατρεία ι Ντεβλές ντα λέσκο κχερ ισινέ ντιπ πασέ κι συναγωγή.
8 Ο Κρίσπος ο σορό ι συναγωγιάκο πακιαντάς κο Κύριος, γιεκ σαρέ οντουλέντζαρ σο ισινέ λέσκε κχερέστε. Ντα μπουτ Κορίνθιοι σο ασουνένας πακιάνας ντα μπολντιόνας.
9 Εκ ιράτ ο Κύριος βακερντάς κο Παύλος εκχέ φαντασιάτε: «Μα ντάρα ντα μα τσσίναβ τι κερές λάφι,
10 σόσκε με ισινόμ τούσαρ ντα καέκ να κα κερέλ τούκε ζιάνι, σόσκε τθεράβα μπουτέ λαός ανταλέ πολιάτε».
11 Οτθάρ, μπεσλό οτθέ εκ μπρες ντα σιοβ μασεκά ντα σικλιαρέλας-λεν ο λάφι ι Ντεβλέσκο.
12 Κάνα ο Γαλλίωνας κερέλας κουμάντος κι Αχαΐα, ο Ιουδαίοι σαρέ γιεκ γκιλέ κόντρα κο Παύλος ντα γκερντέ-λες κο δικαστήριος
13 ντα βακερντέ: «Ακαβά κερέλα ι τζενέν τι ντεν λατρεία κο Ντεβέλ τροπόσαρ σο τζάλα κόντρα κο νόμος».
14 Αλλά κάνα ισινέ τι κερέλ λάφι ο Παύλος, ο Γαλλίωνας βακερντάς κο Ιουδαίοι: «Άμα ακαβά τζενό κερντάας κάτι γκεραλό* ή κάτι σο τζάλα κόντρα κο νόμος, κα ασουνάβας-τουμέν με υπομονή.
15 Αλλά άμα χάνα-τουμέν λαφίνγκε ντα ναβένγκε ντα τουμαρέ νομόσκε, αρακχέν-λεν τουμέν κορκορέ. Με να μανγκάβα τι αβάβ κριτής ανταλέ πραγματένγκε».
16 Ντα παλντιντάς-λεν κατά δικαστήριος.
17 Αζομάν σαρέ καπτιντέ ι Σωσθενής, σο ισινέ ο σορό ι συναγωγιάκο, ντα νταπένας-λες ανγκλάλ κι καρέκλα κι δικαστηριόσκι. Αλλά ο Γαλλίωνας να μανγκέλας ιτς τι ανακατούντιβελ.
18 Ο Παύλος μπεσλό οτθέ μπερεκέτι ντιβεσά ατζέ ντα σοράν χαιρετιντάς ι πφραλέν ντα νασλό καραβίσαρ για τι τζαλ κι Συρία. Γκιλέ παλά-λέστε η Πρίσκιλλα ντα ο Ακύλας. Κο Κεγχρεές τσσιντάς πο μπαλά, σόσκε ντινάας πο λάφι κο Ντεβέλ.
19 Ερεσλέ κι Έφεσος, ντα μουκχλάς-λεν οτθέ, αλλά βοβ γκιλό αντρέ κι συναγωγή ντα κερντάς λάφι γκοντιαβέρ τροπόσαρ ι Ιουδαιόντζαρ.
20 Μανγκένας λέσταρ τι μπεσέλ πο μπουτ βακίτι, αλλά βοβ να δεχτιντάς.
21 Χαιρετιντάς-λεν ντα βακερντάς λένγκε: «Κα βουρτίναβ πάλι τουμέντε, άμα μανγκέλα ο Ιεχωβά».* Ντα νασλό καραβίσαρ κατά Έφεσος
22 ντα γουλίστιλο κι Καισάρεια. Ντα νικλιντάς* ντα χαιρετιντάς ι πφραλέν κι κχανγκιρί. Σοράν γουλίστιλο κι Αντιόχεια.
23 Μπεσλό οτθέ χάνικ βακίτι ντα σοράν νασλό ντα τζάλας τθαν τθανέστε κι Γαλατία ντα κι Φρυγία. Οτθέ ντέλας ζορ σαρέ ι μαθητέν.
24 Ερεσλό κι Έφεσος εκ Ιουδαίος σο αστάρντιβελας κατά Αλεξάνδρεια ντα βακέρντιβελας Απολλώς. Βοβ κερέλας μπουτ σουκάρ λάφι ντα τζανέλας λατσσές ι Γραφή.
25 Ανταβά μουρς σικλιλόας ο ντρομ ι Ιεχωβάσκο,* ντα καζόμ ο πνεύμας ι Ντεβλέσκο πφαμπόλας σαρ γιακ* αντρέ λέστε, κερέλας λάφι ντα σικλιαρέλας ντιπ λατσσές ι Ιησούσκε, αλλά τζανέλας σάντε ο μπολντιπέ ι Ιωαννίσκο.
26 Αρχισάλο τι κερέλ λάφι μπίνταρανες κι συναγωγή, ντα κάνα η Πρίσκιλλα ντα ο Ακύλας ασουντέ-λες, λιντέ-λες πουμέντζαρ ντα ντινέ-λες τι αγαβέλ πο λατσσές ο ντρομ ι Ντεβλέσκο.
27 Ντα επειδή μανγκέλας τι νακχέλ κι Αχαΐα, ο πφραλά γραφιντέ κο μαθητές τι δεχτίνεν-λες λατσσιμάσαρ. Κάνα γκιλό οτθέ, βοηθιντάς μπουτ οντουλέν σο πακιαντέας αντράλ κατά μπαρό λατσσιπέ ι Ντεβλέσκο,
28 σόσκε σικαβέλας κατά Γραφή ανγκλάλ σαριλέντε ντα μπίνταρανες ότι ο Ιουδαίοι κερένας λάθος ντα ότι ο Ιησούς ισί ο Χριστός.
Υποσημειώσεις
^ Γιαβέρσοϊ «κερέλας λέντζαρ λάφι γκοντιαβέρ τροπόσαρ».
^ Δηλαδή κατά συναγωγή.
^ Γιαβέρσοϊ «μπίλατσσο, κακός».
^ Ντικχίντιβελα ότι νικλιντάς κι Ιερουσαλήμ.
^ Γιαβέρσοϊ «γιανγκ».
