Πράξεις ι Αποστολόνγκε 21:1-40
21 Κάνα νασάας ισινάμας μπουτ στεναχωριμέ. Γκιλάμ καραβίσαρ ευθεία ντα ερεσλάμ κι Κω, ο γιαβέρ ντιβές κι Ρόδος, ντα οτθάρ κο Πάταρα.
2 Σοράν αρακχλάμ εκ καράβι σο κα νακχέλας οκιά μπάνταρ κι Φοινίκη, τσσουντάμ-αμέν αντρέ ντα νασλάμ.
3 Πο σοράν ντικχλάμ ι Κύπρος σο ισινέ κο αριστερά, μουκχλάμ-λα παλ’ αμέντε, γκιλάμ κάρινγκ κι Συρία ντα γουλίστιλαμ κι Τύρος, οτθέ σο κα γουλιαρένας ο πράγματα κατά καράβι.
4 Ροντιντάμ ντα αρακχλάμ ι μαθητέν ντα μπεσλάμ οτθέ εφτά ντιβεσά. Αλλά αντράλ κατά άγιος πνεύμας βον βακερένας παλάλ γιαβερέστε κο Παύλος μα τι τζαλ κι Ιερουσαλήμ.
5 Κάνα αβιλό ο σαάτι τι νασάς, νικίστιλαμ ντα λιντάμ αμαρό ντρομ. Ντα σαρέ βον, γιεκ ι τζουβλίντζαρ ντα ι τσσαβέντζαρ, γκερντέ-αμέν μέχρι αβρί κατά πόλη. Πελάμ κο κοτσά πασέ κι ντεριάβ, προσευχισάλαμ
6 ντα χαιρετιντάμ-λεν. Σοράν αμέν νικλιντάμ κο καράβι, ντα βον βουρτισάλε πουμαρέ κχερέντε.
7 Κάνα ερεσλάμ κατά Τύρος κι Πτολεμαΐδα, χαιρετιντάμ ι πφραλέν ντα μπεσλάμ λέντζαρ εκ ντιβές.
8 Ο γιαβέρ ντιβές, νασλάμ ντα γκιλάμ κι Καισάρεια ντα ντινάμ αντρέ κο κχερ κι Φιλιππόσκο σο μουτθαβέλας ο λατσσέ αμπέρια. Βοβ ισινέ εκ κατά εφτά μουρσά, ντα μπεσλάμ λέσαρ.
9 Ο Φίλιππος τθερέλας σταρέ μπίπαντριμε τσσαΐν* σο βακερένας προφητείες.
10 Αλλά αφού μπεσλάμας οτθέ μπερεκέτι ντιβεσά, γουλίστιλο κατά Ιουδαία εκ προφήτης σο βακέρντιβελας Άγαβος.
11 Ντα αβιλό αμέντε, λιντάς ι Παυλόσκι κουστίκ,* πφαντάς λάσαρ πο πιντρέ ντα πο βαστά ντα βακερντάς: «Άκ’ σο βακερέλα ο άγιος πνεύμας: “Αντικάς κα πφάντεν ο Ιουδαίοι κι Ιερουσαλήμ ι μουρσές σο ισί λέσκι ακαγιά κουστίκ ντα κα ντεν-λες κο βαστά κι τζενένγκε σο ισί γιαβερέ τθεμένταρ”».
12 Κάνα ασουντάμ-λες ανταβά, εμ αμέν εμ ο πφραλά σο μπεσένας οτθέ μολίναας-λες μα τι τζαλ κι Ιερουσαλήμ.
13 Αζομάν ο Παύλος βακερντάς : «Σο κερένα ακανά; Σόσκε ροβένα ντα κερένα-μαν τι χασαράβ μο κουράγιος; Τι τζανέν ότι ισινόμ έτοιμος, εμ τι πφαντιάβ, αλλά εμ τι μεράβ-ντα κι Ιερουσαλήμ ι Κυριόσκε ναβέσκε, ι Ιησούσκε».
14 Αγαντάμ ότι ναστί τσσιναβάας-λες, ντα οτθάρ να βακερντάμ τίποτα γιαβέρ αλλά σάντε ακαβά: «Τι αβέλ-πες οντουβά σο μανγκέλα ο Ιεχωβά».*
15 Σοράν ανταλέ ντιβεσένταρ, ετοιμαντάμ-αμέν ντα νασλάμ για τι τζας κι Ιερουσαλήμ.
16 Αμέντζαρ αβιλέ μερικοί μαθητές-ντα κατά Καισάρεια για τι γκερέν-αμέν κο Μνάσονας κο Κύπριος, σο ισινέ εκ κατά πρώτοι μαθητές ντα σο κα λέλας-αμέν πι κχερέστε.
17 Κάνα ερεσλάμ κι Ιερουσαλήμ, ο πφραλά δεχτιντέ-αμέν χαράσαρ.
18 Ο γιαβέρ ντιβές, ο Παύλος αβιλό αμέντζαρ κο Ιάκωβος, ντα οτθέ ισινέ σαρέ ο πρεσβύτεροι.
19 Χαιρετιντάς-λεν ντα αρχισάλο τι βακερέλ ντιπ λατσσές οντουλά σο κερντάς ο Ντεβέλ κο γιαβερά τθεμά αντράλ λέσκε εργόσταρ.
20 Κάνα ασουντέ-λεν ανταλά, δοξαντέ ι Ντεβλές, αλλά βακερντέ λέσκε: «Σαρ ντικχέσα, πφραλ, χιλιάδες Ιουδαίοι πακιαντέ ντα σαρέ ντένα καν κο Νόμος σαρέ πουμαρέ γκίσαρ.
21 Αλλά ασουντέ τι βακέρντιβελ ότι τούι σικλιαρέσα σαρέ ι Ιουδαιόν σο ισί γιαβερέ τθεμέντε τι τζαν κόντρα κο Νόμος κι Μωυσίσκο, κάνα βακερέσα λένγκε μα τι κερέν περιτομή πουμαρέ τσσαβένγκε ντα μα τι κερέν ο έθιμα.
22 Ντα σο πρέπει τι αβέλ-πες; Σίγουρα κα ασουνέν ότι αβιλάν.
23 Οτθάρ, κερ ακαβά: Ισί σταρ μουρσά αμένταρ σο ντινέ πουμαρό λάφι κο Ντεβέλ.
24 Λε-λεν ντα κερ γιεκ λέντζαρ σο βακερέλα ο Νόμος για τι αβέν πάκι, ντα πόκινε τούι λένγκε για τι μοραβέν πουμαρό σορό. Αζομάν σαρέ κα αγαβέν ότι οντουλά σο βακέρντιβενα τούκε νανέ μπαγιά, αλλά ότι πφιρέσα σωστά ντα κερέσα τούι-ντα ο Νόμος.
25 Ντα οντουλένγκε σο πακιαντέ ντα ισί γιαβερέ τθεμένταρ, αμέν μπουτσσαντάμ εκχέ γραμμάσαρ αμαρί απόφαση ότι πρέπει τι αρακχαβέν-πουμέν κατά πράγματα σο θυσιαντέ-λεν κο είδωλα, ντα κατά ρατ, κατά τασαντέ ζώα* ντα κατά λουμνιπέ».*
26 Ο γιαβέρ ντιβές, ο Παύλος λιντάς ι μουρσέν ντα κερντάς οντουβά σο βακερέλα ο Νόμος για τι αβέν πάκι. Γκιλό αντρέ κο ναός για τι δηλώνελ κάνα κα μπιτίνενας ο εφτά ντιβεσά σο βακερέλας ο Νόμος για τι αβέν πάκι, ντα αντικάς τι αβέλ-πες θυσία ι κάθε εκχέσκε αζομάν.
27 Κάνα τζάνας τι μπιτίνεν ο εφτά ντιβεσά, ο Ιουδαίοι κατά Ασία ντικχλέ-λες κο ναός, οτθάρ κερντέ σαρέ ι τζενέν τι χολιάνεν λέσκε ντα καπτιντέ-λες,
28 ντα ντένας βίκος: «Μουρσάλεν κατά Ισραήλ, βοηθίνεν-αμέν! Ανταβά ισί ο τζενό σο σικλιαρέλα σαριλέν σαρέ κο τθεμά τι τζαν κόντρα αμαρέ λαόστε ντα κο Νόμος σο τθεράσα ντα ακαλέ τθανέστε. Ντα να κερντάς σάντε ανταβά, αλλά αντάς Μπαλαμέν-ντα αντρέ κο ναός ντα μαγαριντάς ακαβά άγιος τθαν».
29 Βακερντέ-λεν ανταλά σόσκε ντικχλέας λέσαρ κι πόλη ι Τροφιμός, σο ισινέ κατά Έφεσος, ντα αμντίνενας ότι ο Παύλος αντάας-λες αντρέ κο ναός-ντα.
30 Αβιλί-πες μπαρί βαβούρα σαρί κι πόλη, ντα ο τζενέ τθαβντισάλε σαρέ γιεκ, καπτιντέ ι Παυλός, ταρτιντέ-λες αβρί κατά ναός ντα ο πόρτες πφαντιλέ οντιά στιγμή.
31 Σαρ τζάνας τι μουνταρέν-λες, οντουβά σο κερέλας κουμάντος κο στρατός λιντάς αμπέρι ότι σαρέ κι Ιερουσαλήμ ισινέ οπράλ κο πιντρέ.
32 Οτθάρ, λιντάς σουγκό στρατιωτέν ντα λένγκε αρχηγόν ντα τθαβντισάλο κάρινγκ λέντε. Κάνα βον ντικχλέ οντουλές σο κερέλας κουμάντος κο στρατός ντα ι στρατιωτέν, τσσιναντέ τι νταπέν ι Παυλός.
33 Αζομάν οντουβά σο κερέλας κουμάντος κο στρατός γκιλό πασέ ντα ασταρντάς-λες ντα ντινάς διαταγή τι πφάντεν-λες ντουέ τζαντζιρίντζαρ.* Σοράν αρχισάλο τι πουτσέλ κον ισινέ ντα σο κερντάας.
34 Ο τζενέ ντένας βίκος, αλλά γιαβερά βακερέλας ο εκ ντα γιαβερά ο γιαβέρ. Κατά μπουτ βίκος ναστί σικλιόλας σο αβέλας-πες, οτθάρ ντινάς εντολή τι ανέν-λες οτθέ σο μπεσένας ο στρατιώτες.
35 Όμως, κάνα ερεσλό κο σκαλιά, ο τζενέ μανγκένας τι κερέν λέσκε αζόμ μπαρό ζιάνι σο ο στρατιώτες βαντιντέ-λες για τι λεν-λες οτθάρ,
36 σόσκε μπουτ τζενέ κατά λαός τζάνας παλάλ ντα ντένας βίκος ζουρανές: «Μουνταρέν-λες!»
37 Σαρ ετοιμάνενας-πες για τι γκερέν-λες οτθέ αντρέ σο μπεσένας ο στρατιώτες, ο Παύλος βακερντάς οντουλέσκε σο κερέλας κουμάντος κο στρατός: «Μπορίναβα τι βακεράβ τούκε κάτι;» Βοβ πουτσλάς: «Τζανέσα μπαλαμανές;
38 Τούι να ισινάν ο Αιγύπτιος σο κερντάς χάνικ βακίτι πο τζανγκλέ ι λαός τι τζαλ κόντρα κο μπαρέ σορέ κι τθεμέσκε ντα γκερντάς κι έρημος ι σταρέ χιλιάδες μουρσέν σο ασταρένας τσσουριά;»
39 Αζομάν ο Παύλος βακερντάς: «Με ισινόμ Ιουδαίος ντα μπιάντιλομ κι Ταρσός σο ισί κι Κιλικία ντα ισί σημαντική πόλη. Οτθάρ, μολίναβα-τουτ τι μουκχές-μαν τι κεράβ λάφι κο λαός».
40 Αζομάν βοβ μουκχλάς-λες, ντα ο Παύλος ατσσιλό κο σκαλιά ντα κερντάς νόημας πι βαστέσαρ κο λαός. Κάνα τσσιναντέ τι ντεν βίκος, κερντάς λένγκε λάφι κι εβραϊκή τσσιπ ντα βακερντάς λένγκε:
Υποσημειώσεις
^ Ο πουρανό μπαλαμανό λάφι μανγκέλα τι σικαβέλ εκχέ τζουβλιά σο να σοτάς μουρσέσαρ.
^ Γιαβέρσοϊ «μπουγλό καΐσι, μπουγλί ζώνη».
^ Δηλαδή μα τι χαν ζώα σο να τσσορντιλό ντιπ λένγκο ρατ.
^ Γιαβέρσοϊ «αλυσιδέντζαρ».
