Πράξεις ι Αποστολόνγκε 22:1-30
22 «Πφραλάλεν ντα νταντάλεν, ασουνέν-μαν ακανά. Κα βακεράβ τουμένγκε σο αβιλό-πες».
2 Κάνα ασουντέ ότι κερέλας λένγκε λάφι κι εβραϊκή τσσιπ, ηρεμισάλε ατζέ πο μπουτ, ντα βοβ βακερντάς:
3 «Με ισινόμ Ιουδαίος, μπιάντιλομ κι Ταρσός κι Κιλικία. Σπουδαντόμ ανταλέ πολιάτε ντα λιντόμ σικλιαριπέ κατά Γαμαλιήλ, σικλιλόμ τι κεράβ σο-ντα βακερέλα αμαρέ παππουδένγκο Νόμος ντα υπηρετίναβα σαρέ μι γκίσαρ ι Ντεβλές σαρ κερένα αντιβές σαρέ τουμέν.
4 Τζάβας κόντρα οντουλέντζαρ σο ισί ανταλέ Ντρομέστε μέχρι τι μερέν, πφάνταβας μουρσέν ντα τζουβλίν ντα γκεράβας-λεν κο φυλακές.
5 Ανταβά μπορίνελα τι βακερέλ-λες τουμένγκε εμ ο αρχιερέας εμ ο πρεσβύτεροι σαρέ. Λένταρ λιντόμ γράμματα-ντα για τι ασταράβ αμαρέ πφραλέν κι Δαμασκός, ντα τζάβας τι ανάβ πφαντέ κι Ιερουσαλήμ οντουλέν σο ισινέ οτθέ για τι τιμωρίντιβεν.
6 »Αλλά καζόμ ερεσάβας πασέ κι Δαμασκός κο μεσημέρι, οτθέ σο να μπεκλεντίναβας-λες, λιντάς-πες ντονταλάι μάνταρ εκ ζουρανό φως κατά ουρανός,
7 ντα πελόμ τελέ ντα ασουντόμ ακαλά λάφια: “Σαούλ, Σαούλ, σόσκε τζάσα μάντζαρ κόντρα;”
8 Με βακερντόμ: “Κον ισινάν, Κύριε;” Ντα βοβ βακερντάς μάνγκε: “Ισινόμ ο Ιησούς ο Ναζωραίος, σο τζάσα λέσαρ κόντρα τούι”.
9 Ο μουρσά σο ισινέ μάντζαρ ντικχλέ ο φως, αλλά να ασουντέ οντουλές σο κερέλας μάντζαρ λάφι.
10 Αζομάν βακερντόμ: “Σο τι κεράβ, Κύριε;” Ο Κύριος βακερντάς μάνγκε: “Ίστι, τζα αντρέ κι Δαμασκός, ντα οτθέ κα βακερέν τούκε σαρέ οντουλά σο πρέπει τι κερές”.
11 Αλλά επειδή να ντικχάβας τίποτα ιτιρί κατά μπαρό φως, οντουλά σο ισινέ μάντζαρ λιντέ-μαν κατά βας ντα γκερντέ-μαν κι Δαμασκός.
12 »Σοράν, ο Ανανίας, εκ τζενό σο νταρέλας κατά Ντεβέλ σαρ βακερέλα ο Νόμος ντα τθερέλας λατσσό ναβ σαρέ κο Ιουδαίοι σο τζουβντιόνας οτθέ,
13 αβιλό πασέ μάντε ντα βακερντάς μάνγκε: “Σαούλ, πφραλ, ντικχ πάλι!” Οντιά στιγμή βαντιντόμ μο γιακχά ντα ντικχλόμ-λες.
14 Βοβ βακερντάς: “Ο Ντεβέλ αμαρέ παππουδένγκο τραμπιντάς-τουτ για τι σικλιός σο μανγκέλα ντα τι ντικχές Οντουλές σο ισί Δίκαιος ντα τι ασουνές λέσκι φωνή,
15 σόσκε βοβ τραμπιντάς-τουτ για τι βακερές σαρέ κο τζενέ οντουλένγκε σο ντικχλάν ντα ασουντάν λέσταρ.
16 Ντα ακανά σόσκε χασαρέσα σαάτι; Τζα τι μπολντιός ντα κα συγχωρίντιβεν το αμαρτίες επειδή ντέσα μπέσα λέσκε ναβέστε”.
17 »Κάνα βουρτισάλομ κι Ιερουσαλήμ, ντα καζόμ προσευχίντιβαβας κο ναός, ντικχλόμ εκχέ φαντασιάτε
18 ι Κυριός τι βακερέλ μάνγκε: “Σίγκιαρ ντα νας σουγκό κατά Ιερουσαλήμ, επειδή να κα δεχτίνεν το λάφια σο τθερένα τι κερέν μάντζαρ”.
19 Ντα με βακερντόμ: “Κύριε, βον τζανένα λατσσές ότι με τζάβας κι εκ συναγωγή παλάλ κατά γιαβέρ ντα τσσουβάβας κι φυλακή ντα νταπάβας οντουλέν σο πακιάνα τούτε.
20 Ντα κάνα τσσορντιόλας ο ρατ ι Στεφανόσκο σο κερέλας λάφι τούκε κο τζενέ, με μπεσάβας οτθέ πασέ ντα τσσίνταβας οντουλένταρ σο μουνταρένας-λες ντα αρακχαβάβας λένγκε αβραϊνέ σέα”.
21 Βοβ όμως βακερντάς μάνγκε: “Τζα, επειδή κα μπουτσσαβάβ-τουτ τθεμέντε σο ισί ντουρ”».
22 Ασουνένας-λες μέχρι σο βακερντάς ανταλά λάφια. Αζομάν βακερντέ βικόσαρ: «Μουνταρέν-λες, σόσκε εκ ασακό τζενό δεν πρέπει τι τζουβντιόλ!»
23 Επειδή ντένας βίκος ζουρανές ντα φουρτίνενας πουμαρέ αβραϊνέ σέα ντα ο πράχος οπρέ κι μπαρμπάλ,
24 οντουβά σο κερέλας κουμάντος κο στρατός ντινάς εντολή τι ανέν ι Παυλός οτθέ σο μπεσένας ο στρατιώτες ντα βακερντάς τι νταπέν-λες βουρδαλόσαρ* μέχρι τι μουτθαβέλ σο κερντάς, για τι σικλιόλ σόσκε ντένας βίκος αντικάς λέσκε.
25 Αλλά κάνα πφαντέ-λες για τι νταπέν-λες βουρδαλόσαρ, ο Παύλος βακερντάς κο αρχηγός κι στρατόσκο σο ισινέ οτθέ: «Ισί σωστός τι νταπέν βουρδαλόσαρ εκχέ Ρωμαιός χωρίς τι αβέλ-πες δικαστήριος λέσκε;»
26 Κάνα ο αρχηγός ασουντάς-λες ανταβά, γκιλό οντουλέστε σο κερέλας κουμάντος κο στρατός ντα βακερντάς: «Σο τζάσα τι κερές; Ανταβά τζενό ισί Ρωμαίος».
27 Οτθάρ, γκιλό πασέ κο Παύλος ντα βακερντάς λέσκε: «Βάκερ μάνγκε, ισινάν Ρωμαίος;» Βοβ βακερντάς: «Βα».
28 Οντουβά σο κερέλας κουμάντος κο στρατός βακερντάς: «Με ντινόμ μπουτ λοβέ για τι αβάβ Ρωμαίος». Ο Παύλος βακερντάς: «Με όμως ισινόμ από αζομάν σο μπιάντιλομ».
29 Οντιά στιγμή ο μουρσά σο κα νταπένας-λες για τι μουτθαβέλ σο κερντάς τσσιντιντέ-πες ντουρ λέσταρ. Ντα οντουβά σο κερέλας κουμάντος κο στρατός νταρασάλο κάνα αγαντάς ότι πφαντάας τζαντζιρίντζαρ* εκχέ Ρωμαιός.
30 Ο γιαβέρ ντιβές, επειδή μανγκέλας τι σικλιόλ μπαγιά σόσκε κατηγορίνενας-λες ο Ιουδαίοι, πουταρντάς-λες ντα ντινάς διαταγή τι γκιντίντιβεν ο μπαρέ ιερείς ντα σαρό ο Σάνχεδριν.* Σοράν γουλιαρντάς ι Παυλός ντα τσσουντάς-λες τι ατσσόλ ανγκλά-λέντε.
Υποσημειώσεις
^ Γιαβέρσοϊ «μαστιγιόσαρ».
^ Γιαβέρσοϊ «αλυσιδέντζαρ».
^ Ισινέ ο πο μπαρό δικαστήριος ι Ιουδαιόνγκο.
