Πράξεις ι Αποστολόνγκε 25:1-27
25 Ο Φήστος ερεσλό κι Ιουδαία ντα αρχιντάς τι κερέλ κουμάντος ντα τριν ντιβεσά σοράν νικλιντάς κατά Καισάρεια κι Ιερουσαλήμ.
2 Ο μπαρέ ιερείς ντα ο μπαρέ σορέ ι Ιουδαιόνγκε βακερντέ κο Φήστος μπέτι λάφια ι Παυλόσκε. Ντα μολίνενας-λες
3 τι κερέλ λένγκο γκι ντα τι μπουτσσαβέλ ι Παυλός κι Ιερουσαλήμ. Αλλά βον μανγκένας τι μπεσέν λέσκε κο ντρομ ντα τι μουνταρέν-λες.
4 Όμως, ο Φήστος βακερντάς ότι ο Παύλος κα ατσσόλας πφαντό κι Καισάρεια ντα ότι βοβ κα βουρτίνελας σουγκό οτθέ.
5 Ντα βακερντάς: «Οτθάρ, οντουλά σο κερένα κουμάντος τουμέντε τι γουλίν μάντζαρ ντα τι κατηγορίνεν-λες, άμα μπαγιά κερντάς κάτι γκεραλό».*
6 Αφού μπεσλό λέντζαρ σάντε 8 ή 10 ντιβεσά, γουλίστιλο κι Καισάρεια. Ο γιαβέρ ντιβές, μπεσλό κι καρέκλα κι δικαστηριόσκι ντα ντινάς εντολή τι ανέν ι Παυλός.
7 Κάνα γκιλό αντρέ, ο Ιουδαίοι σο γουλίστιλεας κατά Ιερουσαλήμ ατσσιλέ ντονταλάι λέσταρ ντα τσσουβένας λέσκε μπερεκέτι πφαρέ λάφια αλλά να τθερένας κάτι για τι σικαβέν ότι ισί μπαγιά ανταλά.
8 Ο Παύλος για τι αρακχαβέλ πο νεαυτός βακερντάς: «Να αμαρτιντόμ κόντρα κο Νόμος κι Ιουδαιόνγκο ούτε κόντρα κο ναός ούτε κόντρα κο Καίσαρας».
9 Επειδή ο Φήστος μανγκέλας τι κερέλ ο γκι ι Ιουδαιόνγκο, βακερντάς ι Παυλόσκε: «Μανγκέσα τι αβές κι Ιερουσαλήμ ντα τι δικάντιβες οτθέ ανγκλά-μάντε ανταλέ πραγματένγκε;»
10 Ο Παύλος όμως βακερντάς: «Ατσσάβα ανγκλάλ κι καρέκλα κι δικαστηριόσκι σο μπεσέλα ο Καίσαρας, οτθέ σο πρέπει τι δικάντιβαβ. Να κερντόμ τίποτα γκεραλό κο Ιουδαίοι, σαρ αγαβέσα τούι-ντα μπουτ λατσσές.
11 Άμα μπαγιά κερντόμ κάτι γκεραλό ντα κάτι σο αξίνελα τι μεράβ, να βακεράβα μα τι μεράβ. Άμα όμως ο λάφια σο τσσουβένα μάνγκε βον νανέ μπαγιά, καέκ να τθερέλα ο δικαίωμας τι ντελ-μαν λένγκε βαστέντε σάντε για τι κερέλ λένγκο γκι. Κο Καίσαρας μανγκάβα τι τζαβ!»
12 Αζομάν ο Φήστος κερντάς λάφι ι γιαβερέ τζενέντζαρ οτθέ ντα σοράν βακερντάς: «Κο Καίσαρας μανγκλάν τι τζας, κο Καίσαρας κα τζας».
13 Σοράν χάνικ ντιβεσένταρ, ο βασιλιάς Αγρίππας ντα η Βερνίκη ερεσλέ κι Καισάρεια για τι τζαν τι ντικχέν ι Φηστός.
14 Μπεσλέ οτθέ μπερεκέτι ντιβεσά ντα ο Φήστος βακερντάς κο βασιλιάς σο αβιλό-πες ι Παυλόσαρ ακαλέ λαφίντζαρ:
«Ισί εκ τζενό σο ο Φήλικας μουκχλάς πφαντό κι φυλακή,
15 ντα κάνα ισινόμας κι Ιερουσαλήμ ο μπαρέ ιερείς ντα ο πρεσβύτεροι ι Ιουδαιόνγκε βακερντέ μάνγκε λέσκε ντα μανγκένας τι τιμωρίντιβελ.
16 Αλλά με βακερντόμ λένγκε ότι ο νόμος ι Ρωμαιόνγκο να μουκχέλα τι ντιντιόλ εκ τζενό κο βαστά κι γιαβερένγκε σάντε για τι αβέλ λένγκο γκι. Πρέπει πρώτα ο τζενό τι ντικχέλ-πες μούι μουέσαρ ι τζενέντζαρ σο τσσουντέ λέσκε λάφια ντα τι ντιντιόλ λέστε η ευκαιρία τι αρακχαβέλ πο νεαυτός ανταλέσκε σο κατηγορισάλο.
17 Οτθάρ, κάνα αβιλέ ατθέ, να χασαρντόμ σαάτι, αλλά ο γιαβέρ ντιβές μπεσλόμ κι καρέκλα κι δικαστηριόσκι ντα ντινόμ διαταγή τι ανέν-λες ανγκλά-μάντε.
18 Κάνα αβιλέ οντουλά σο τσσουβένας λέσκε λάφια, να βακερντέ ότι κερντάς καέκ κατά γκεραλέ πράγματα σο αμντίναβας με ότι κερντάας.
19 Απλά χάνας-πες λέσαρ πουμαρέ θρησκειάκε ντα εκχέσκε σο βακερένας λέσκε Ιησού σο μουλόας, αλλά ο Παύλος βακερέλας ότι ισί τζουβντό.
20 Επειδή να τζανάβας σο τι κεράβ λέντζαρ σο χάνας-πες, πουτσλόμ-λες άμα μανγκέλας τι τζαλ κι Ιερουσαλήμ ντα τι δικάντιβελ οτθέ ανταλέ πραγματένγκε.
21 Αλλά κάνα ο Παύλος μανγκλάς τι ατσσόλ κι φυλακή για τι λελ ι απόφαση ο Καίσαρας,* ντινόμ διαταγή τι ατσσόλ πφαντό μέχρι τι μπουτσσαβάβ-λες λέστε».
22 Αζομάν ο Αγρίππας βακερντάς κο Φήστος: «Κα μανγκάβας τι ασουνάβ με-ντα ανταλέ τζενές». Βοβ βακερντάς: «Γιαβίν κα ασουνές-λες».
23 Ο γιαβέρ ντιβές, ο Αγρίππας ντα η Βερνίκη αβιλέ μπαρικανιμάσαρ ντα ντινέ αντρέ κι αίθουσα γιεκ οντουλέντζαρ σο κερένας κουμάντος κο στρατός ντα ι μουρσέντζαρ σο τθερένας μπαρό ναβ κι πόλη. Ντα κάνα ο Φήστος ντινάς ι εντολή, αντέ ι Παυλός αντρέ.
24 Ο Φήστος βακερντάς: «Βασιλιά Αγρίππα ντα σαρέ τουμέν σο ισινέν ατθέ αμέντζαρ, ακαβά ισί ο τζενό σο ιτιρί λέσταρ σαρέ ο Ιουδαίοι αβιλέ μάντε, εμ κι Ιερουσαλήμ εμ ακατέ, ντα ντένας βίκος μα τι τζουβντιόλ γιαβέρ.
25 Με όμως αγαντόμ ότι να κερντάας τίποτα για τι αξίνελ τι μερέλ. Κάνα βοβ μανγκλάς τι τζαλ κο Καίσαρας,* λιντόμ ι απόφαση τι μπουτσσαβάβ-λες λέστε.
26 Αλλά να αρακχάβα κάτι σο τθερέλα τι κερέλ λέσαρ για τι γραφίναβ μι Κυριόστε. Οτθάρ, αντόμ-λες ανγκλάλ σαρέ τουμέντε, ντα πο μπουτ ανγκλά-τούτε, βασιλιά Αγρίππα. Αντικάς, κάνα κα κερέν λέσκε ερωτήσεις, κα τθεράβ κάτι τι γραφίναβ,
27 σόσκε ισί ντινιλιπέ μάνγκε τι μπουτσσαβάβ εκχέ φυλακισμέ τζενές άμα να γραφιντόμ καλέ πραγματένγκε κατηγορισάλο».
Υποσημειώσεις
^ Γιαβέρσοϊ «μπίλατσσο, κακός».
^ Γιαβέρσοϊ «Αύγουστος». Ανταβά τίτλος τθερέλας-λες ο Ρωμαίος αυτοκράτορας.
^ Γιαβέρσοϊ «Αύγουστος».
