Πράξεις ι Αποστολόνγκε 3:1-26
3 Κάνα ο Πέτρος ντα ο Ιωάννης νικλίνας κο ναός αζομάν σο αβέλας-πες η προσευχή, πασέ 3:00 κο μεσημέρι,*
2 μερικοί βάντενας εκχέ μουρσές σο μπιάντιλοας μπανγκό. Κάθε ντιβές τσσουβένας-λες πασέ κι ναόσκι πόρτα σο βακέρντιβελας Σουκάρ για τι μανγκέλ λοβέ κατά τζενέ σο τζάνας αντρέ κο ναός.
3 Κάνα ντικχλάς ι Πετρός ντα ι Ιωαννής τι τζαν αντρέ κο ναός, μανγκέλας λένταρ λοβέ.
4 Αλλά ο Πέτρος, γιεκ ι Ιωαννίσαρ, ντικχλάς-λες αντρέ κο γιακχά ντα βακερντάς: «Ντικχ-αμέν».
5 Βοβ να λέλας πο γιακχά οπρά-λένταρ, σόσκε μπεσέλας τι ντεν-λες κάτι.
6 Όμως, ο Πέτρος βακερντάς: «Ασήμι ντα χρυσάφι να τθεράβα, αλλά ντάβα-τουτ ανταβά σο τθεράβα. Κο ναβ κι Ιησού Χριστόσκο κατά Ναζαρέτ, ίστι ντα πφιρ!»
7 Αζομάν ασταρντάς-λες κατά δεξίς βας ντα βαντιντάς-λες. Οντιά στιγμή λέσκε πιντρέ αβιλέ λατσσές.
8 Ντα βοβ χουτλάς* ντα αρχισάλο τι πφιρέλ, ντα σαρ τζάλας γιεκ λέντζαρ αντρέ κο ναός, πφιρέλας ντα χουτέλας ντα ισαρέλας ι Ντεβλές.
9 Σαρό ο λαός ντικχλάς-λες τι πφιρέλ ντα τι ισαρέλ ι Ντεβλές.
10 Ντα αγαβένας ότι βοβ ισινέ οντουβά σο μανγκέλας λοβέ κι Σουκάρ Πόρτα κι ναόσκι, ντα ατσσιλέ πουταρντέ μόσαρ ντα σουκιλέ ανταλέσταρ σο αβιλό-πες λέσκε.
11 Καζόμ βοβ τζάλας παλάλ κο Πέτρος ντα κο Ιωάννης, σαρό ο λαός σο ατσσιλόας πουταρντέ μόσαρ τθαβντισάλο κάρινγκ λέντε κι Σολομωντάσκο Διάδρομος ι Κολονέντζαρ.
12 Κάνα ο Πέτρος ντικχλάς-λες ανταβά, βακερντάς κο λαός: «Μουρσάλεν κατά Ισραήλ, σόσκε σαστίνενα αζόμ μπουτ ντα σόσκε ντικχένα-αμέν αντικάς, σαρ τι κερντάμ-λες αμέν τι πφιρέλ αμαρέ ζοριάσαρ ή κατά αφοσίωση σο τθεράσα αμέν κο Ντεβέλ;
13 Ο Ντεβέλ ι Αβρααμίσκο ντα ι Ισαακίσκο ντα ι Ιακωβίσκο, ο Ντεβέλ αμαρέ παππουδένγκο, δοξαντάς πι Υπηρετής ι Ιησούς, σο ντινέν-λες τουμέν λέσκε ντουσμανίνγκε* βαστέντε ντα κερντέν-λες πέρα ανγκλάλ κο Πιλάτος, παρόλο σο βοβ αποφασιντάας τι μουκχέλ-λες.
14 Βα, κερντέν πέρα οντουλέ άγιε ντα δίκαιε τζενές, ντα μανγκλέν τι μουκχέλ τουμένγκε εκχές σο μουνταρντάς,
15 αλλά μουνταρντέν ι Αρχηγός ι ζωγιάκο. Όμως, ο Ντεβέλ τζουβντιαρντάς-λες κατά μουλέ, ντα αμέν ντικχλάμ-λες ανταβά.
16 Ντα αντράλ λέσκε ναβέσταρ, ντα αντράλ κατά πίστη σο τθεράσα λέσκε ναβέστε, αβιλό λατσσές ανταβά τζενό σο ντικχένα ντα τζανένα. Η πίστη σο τθεράσα λέστε κερντάς ανταλέ τζενές ντιπ λατσσές ανγκλάλ σαρέ τουμέντε.
17 Ντα ακανά, πφραλάλεν, αγαβάβα ότι ανταβά κερντέν-λες επειδή να τζανένας σο κερένας, σαρ τουμαρέ άρχοντες-ντα.
18 Αλλά αντικάς κερντάς ο Ντεβέλ τι νικιόν μπαγιά οντουλά σο βακερντάας αντράλ σαρέ κατά προφήτες, δηλαδή ότι λέσκο Χριστός κα τσσίντελας μπουτ.
19 »Οτθάρ, μετανιώνεν ντα αλλάνεν για τι νασέν ντιπ τουμαρέ αμαρτίες, ντα αντικάς τι αβέν ντιβεσά σο κα λοκχιαρέλ ο Ιεχωβά* τουμαρό γκι
20 ντα βοβ τι μπουτσσαβέλ ι Χριστός σο τραμπίντιλο τουμένγκε, ι Ιησούς.
21 Βοβ πρέπει τι ατσσόλ κο ουρανός μέχρι τι ερεσέλ ο βακίτι τι αβέν-πες σαρέ ο πράγματα σαρ ισινέ ανγκλέ, σο ανταλέ πραγματένγκε βακερντάς ο Ντεβέλ αντράλ πι άγιε προφητένταρ κο πουρανέ μπρεσά.
22 Ο Μωυσής βακερντάς: “Ο Ιεχωβά* τουμαρό Ντεβέλ κα τραμπίνελ τουμένγκε αντράλ τουμαρέ πφραλένταρ εκχέ προφητής σαρ ισινόμ με. Πρέπει τι ασουνέν σαρέ οντουλά σο κα βακερέλ τουμένγκε.
23 Ντα κον* να κα ασουνέλ οντουλέ Προφητής κα εξαφανίντιβελ αντράλ κατά λαός”.
24 Ντα σαρέ ο προφήτες κατά Σαμουήλ ντα σοράν, σαρέ οντουλά σο κερντέ λάφι, βον-ντα βακερντέ ανταλέ ντιβεσένγκε.
25 Τουμέν ισινέν ο τσσαβέ ι προφητένγκε ντα ι συμφωνιάκε σο κερντάς ο Ντεβέλ τουμαρέ παππουδέντζαρ κάνα βακερντάς κο Αβραάμ: “Αντράλ τι προσαγγονίσταρ κα ευλογίντιβεν σαρέ ο φαμιλιά ι πφουβιάκε”.
26 Ο Ντεβέλ τζουβντιαρντάς κατά μουλέ πι Υπηρετής ντα σοράν μπουτσσαντάς-λες πρώτα τουμέντε για τι κερέλ ι κάθε εκχές τουμένταρ τι μετανιώνελ ι μπέτι πραγματένγκε σο κερέλα. Ανταγιά ισί ευλογία τουμένγκε».
Υποσημειώσεις
^ Κι Πουρανί Μπαλαμανί ισινέ ο λάφι «ένατος σαάτι».
^ Γιαβέρσοϊ «τσογκντιντάς».
^ Γιαβέρσοϊ «εχθρόνγκε».
^ Γιαβέρσοϊ «καγιά ψυχή».
