Πράξεις ι Αποστολόνγκε 5:1-42
-
Ανανίας ντα Σαπφείρα (1-11)
-
Ο απόστολοι κερένα μπουτ θαύματα (12-16)
-
Τσσουβντιόνα κι φυλακή ντα νικιόνα αβρί (17-21α)
-
Ανένα-λεν πάλι ανγκλάλ κο Σάνχεδριν (21β-32)
-
“Πρέπει τι ντας καν πρώτα ι Ντεβλές, όχι ι τζενέν” (29)
-
-
Η συμβουλή σο ντέλα ο Γαμαλιήλ (33-40)
-
Μουτθαβένα ο λατσσέ αμπέρια κχερ κχερέστε (41, 42)
5 Όμως, εκ τζενό σο βακερένας λέσκε Ανανία, γιεκ πι ρομνιάσαρ σο βακερένας λάκε Σαπφείρα, μπικιντάς εκ τθαν,
2 αλλά ατσσικιαρντάς αποτσοράλ μερικά κατά λοβέ σο λιντάς, ντα ανταβά τζανέλας-λες λέσκι ρομνί-ντα. Ο γιαβερά λοβέ ντινάς-λεν κο απόστολοι.
3 Αλλά ο Πέτρος βακερντάς: «Ανανία, σόσκε κερντάς-τουτ ο Μπενγκ τι μανγκές τι χουχαβές ο άγιος πνεύμας ντα τι ατσσικιαρές αποτσοράλ μερικά κατά λοβέ ι χωραφίσκε;
4 Τιρό να ισινέ ο χωράφι πριν τι μπικινές-λες; Ντα κάνα μπικιντάν-λες, ο λοβέ να ισινέ τι βαστέντε; Σόσκε νακχλό τι γκοντιάταρ τι κερές κάτι ασακό; Να γκιλάν τι χουχαβές ι τζενέν αλλά ι Ντεβλές».
5 Κάνα ο Ανανίας ασουντάς ανταλά λάφια, πελό τελέ ντα μουλό. Ντα σαρέ οντουλά σο ασουντέ ανταλέσκε πφερντιλέ μπαρί νταρ.
6 Αζομάν ο πο τερνέ ιστίντιλε, πακιαρντέ-λες κοτορέντζαρ, γκερντέ-λες αβρί ντα πραχουντέ-λες.
7 Πασέ τριν σαάτια σοράν, γκιλί αντρέ λέσκι ρομνί χωρίς τι τζανέλ σο αβιλόας-πες.
8 Ο Πέτρος πουτσλάς-λα: «Βάκερ μάνγκε, ανταλά λοβέ λιντέν κατά χωράφι;» Βόι βακερντάς: «Βα, ανταλά».
9 Οτθάρ, ο Πέτρος βακερντάς λάκε: «Σόσκε κερντέν-τουμέν λάφι τι δοκιμάνεν ο πνεύμας ι Ιεχωβάσκο* μπέτι τροπόσαρ; Ντικχ! Οντουλά σο πραχουντέ τι ρομές ισί κι πόρτα ντα κα γκερέν αβρί τουτ-ντα».
10 Οντιά στιγμή, βόι πελί ντα μουλί ανγκλάλ λέσκε πιντρέντε. Κάνα ο τερνέ γκιλέ αντρέ, αρακχλέ-λα μουλί ντα γκερντέ-λα αβρί ντα πραχουντέ-λα πασέ λάκε ρομέστε.
11 Ντα πελί μπαρί νταρ οπράλ σαρί κι κχανγκιρί ντα σαρέ οντουλέντε σο ασουνένας-λεν ανταλά.
12 Ατζέκ, αντράλ κατά απόστολοι συνεχίνενας τι αβέν-πες μπουτ σημάδια ντα θαύματα αντρέ κο λαός. Ντα γκιντίντιβενας σαρέ κι Σολομωντάσκο Διάδρομος ι Κολονέντζαρ.
13 Καέκ κατά γιαβερά να κοτίνελας τι ατσσόλ πασέ λέντε. Όμως, ο λαός ισαρέλας-λεν μπουτ.
14 Ντα καζόμ τζάλας πακιάνας κο Κύριος ατζέ πο μπουτ μουρσά ντα τζουβλιά.
15 Ατζέ, νικαβένας ι νασφαλέν* κο μπαρέ ντρομά ντα τσσουβένας-λεν οτθέ κρεβατίντε. Αντικάς, κάνα κα νακχέλας ο Πέτρος, κα περέλας μπάριμα λέσκι βουτσσάλ οπράλ μερικέ νασφαλέντε.
16 Ντα γκιντίντιβενας μπουτ τζενέ κατά πόλεις ντονταλάι κατά Ιερουσαλήμ, σόσκε ανένας νασφαλέν ντα οντουλέν σο τσσίντενας μπουτ κατά δαίμονες, ντα σαρέ αβένας λατσσές.
17 Όμως, ο αρχιερέας* ντα σαρέ οντουλά σο ισινέ λέσαρ, ντα πακιάνας ο σικλιαριπέ ι Σαδδουκαιόνγκο, ιστίντιλε πφερντέ ζήλια
18 ντα ασταρντέ ι αποστολόν ντα τσσουντέ-λεν κι φυλακή.
19 Αλλά αντρέ κι ιράτ, άγγελος ι Ιεχωβάσκο* πουταρντάς ο πόρτες ι φυλακιάκε, νικαντάς-λεν αβρί ντα βακερντάς:
20 «Τζαν κο ναός, ντα μα τσσιναβέν τι βακερέν κο λαός σαρέ ο λάφια ανταλέ ζωγιάκε».
21 Αφού βον ασουντέ-λες ανταβά, γκιλέ αντρέ κο ναός κο ντίσιπε ντα σικλιαρένας.
Κάνα ερεσλό ο αρχιερέας ντα οντουλά σο ισινέ λέσαρ, γκιντιντέ ο Σάνχεδριν* ντα σαρέ ι πρεσβυτερόν ι Ισραηλίσκε τσσαβένγκε, ντα μπουτσσαντέ τι ανέν ι αποστολόν κατά φυλακή.
22 Αλλά κάνα οντουλά σο αρακχαβένας ο ναός γκιλέ οτθέ, να αρακχλέ-λεν κι φυλακή. Οντουλέσκε, βουρτισάλε ντα βακερντέ:
23 «Αρακχλάμ ι φυλακή κλειδωμέ ντα πφαντί, ντα οντουλά σο αρακχαβένας ισινέ κο πόρτες, αλλά κάνα πουταρντάμ, να αρακχλάμ καεκχές αντρέ».
24 Κάνα οντουβά σο κερέλας κουμάντος κο ναός ντα ο μπαρέ ιερείς ασουντέ ανταλά λάφια, πουτσένας ο εκ ι γιαβερές σο κα αβέλας-πες ανταλέσαρ.
25 Αλλά αβιλό εκ τζενό ντα βακερντάς λένγκε: «Ντικχέν! Ο μουρσά σο τσσουντέν κι φυλακή ισί κο ναός ντα σικλιαρένα ι λαός».
26 Αζομάν γκιλό οντουβά σο κερέλας κουμάντος γιεκ οντουλέντζαρ σο αρακχαβένας ο ναός ντα αντάς-λεν, αλλά χωρίς τι ζορισκιαρέν-λεν, σόσκε νταρένας μα τι φουρτίνελ λένγκε μπαρά ο λαός.
27 Αντέ-λεν ντα τσσουντέ-λεν ανγκλάλ κο Σάνχεδριν.* Σοράν ο αρχιερέας κερέλας λένγκε ερωτήσεις
28 ντα βακερντάς: «Ντινάμ-τουμέν εντολή μα τι σικλιαρέν ανταλέ ναβέσκε, αλλά τουμέν πφερντέν ι Ιερουσαλήμ τουμαρέ σικλιαριμάσαρ ντα μανγκένα τι ανέν ο ρατ ανταλέ τζενέσκο οπρ’ αμέντε».
29 Ο Πέτρος ντα ο γιαβερά απόστολοι βακερντέ: «Πρέπει τι ντας καν πρώτα ι Ντεβλές, σο ισί αμαρό άρχοντας, ντα όχι ι τζενέν.
30 Ο Ντεβέλ αμαρέ παππουδένγκο τζουβντιαρντάς ι Ιησούς, σο τουμέν μουνταρντέν κάνα ιμπλαντέν-λες κο κας.*
31 Ο Ντεβέλ βαντιντάς ι Ιησούς δεξιά πέσταρ ντα τσσουντάς-λες τι αβέλ Αρχηγός ντα τι σώνελ ι τζενέν, για τι ντελ κο Ισραήλ ι ευκαιρία τι μετανιώνελ ντα τι συγχωρίντιβεν λέσκε αμαρτίες.
32 Αμέν ντικχλάμ ανταλά πράγματα. Ντα ο άγιος πνεύμας, σο ντινάς ο Ντεβέλ οντουλέντε σο ντένα-λες καν, βοηθίνελα-αμέν τι μουτθαβάς-λεν ανταλά».
33 Κάνα ασουντέ-λες ανταβά, χολιασάλε μπουτ ντα μανγκένας τι μουνταρέν-λεν.
34 Αλλά ιστίντιλο κο Σάνχεδριν* εκ Φαρισαίος σο βακέρντιβελας Γαμαλιήλ. Βοβ σικλιαρέλας ο Νόμος, ντα σεβάνελας-λες σαρό ο λαός, ντα ντινάς εντολή τι νικαβέν ι τζενέν αβρί για χάνικ.
35 Σοράν βακερντάς λένγκε: «Μουρσάλεν κατά Ισραήλ, προσοχίνεν ανταβά σο τζάνα τι κερέν ανταλέ τζενένγκε.
36 Για παράδειγμας, πριν χάνικ βακίτι ισινέ ο Θευδάς σο κερέλας-πες μπουτ σημαντικός, ντα πασέ 400 μουρσά γκιλέ παλά-λέστε. Αλλά λες μουνταρντέ-λες, ντα σαρέ οντουλά σο τσσίντενας λέσταρ τρουγισάλε ντα χασάρντιλε.
37 Σοράν λέσταρ, ισινέ ο Ιούδας ο Γαλιλαίος κο ντιβεσά σο δηλώνενας-πες ο τζενέ ντα κερντάς μπουτέν τι τζαν παλά-λέστε. Βοβ-ντα χασάρντιλο, ντα σαρέ οντουλά σο τσσίντενας λέσταρ τρουγισάλε.
38 Οτθάρ, αντικάς σαρ ισί ακανά ο πράγματα, βακεράβα τουμένγκε: Ατσσόν ντουρ ανταλέ τζενένταρ ντα μουκχέν-λεν. Επειδή, άμα ανταβά σχέδιος ή ανταβά έργος ισί τζενένταρ, κα τσσινάντιβελ.
39 Αλλά άμα ισί κατά Ντεβέλ, ναστί κα τσσιναβέν-λεν. Γιαβέρσοϊ, μπορεί ατζέ-ντα τι τζαν κόντρα τουμέν κο Ντεβέλ».
40 Αζομάν ασουντέ-λες ντα βακερντέ τι αβέν ο απόστολοι, νταπλέ-λεν, ντινέ-λεν ι εντολή μα τι κερέν λάφι ι Ιησούσκε ναβέσκε ντα μουκχλέ-λεν τι νασέν.
41 Βον νασλέ κατά Σάνχεδριν* χαρούμενοι, σόσκε κο γιακχά κι Ντεβλέσκε ισινέ άξιοι τι τσσίντεν-λεν σαρέ ανταλά μάξους ι Ιησούσκε ναβέσκε.
42 Ντα κάθε ντιβές κο ναός ντα κχερ κχερέστε συνεχιντέ, χωρίς τι ατσσόν, τι σικλιαρέν ντα τι μουτθαβέν ο λατσσέ αμπέρια σο τθερένα τι κερέν ι Χριστόσαρ, ι Ιησούσαρ.
Υποσημειώσεις
^ Γιαβέρσοϊ «πασλέ, αμπορεμέ τζενέν».
^ Ισινέ ο πο μπαρό δικαστήριος ι Ιουδαιόνγκο.
^ Ντικχ εδάφιος Πράξ. 5:21, υποσημείωση.
^ Ντικχ εδάφιος Πράξ. 5:21, υποσημείωση.
^ Ντικχ εδάφιος Πράξ. 5:21, υποσημείωση.
