Πράξεις ι Αποστολόνγκε 7:1-60
7 Αζομάν ο αρχιερέας πουτσλάς: «Μπαγιά ισί οντουλά σο βακερντέ;»
2 Ο Στέφανος βακερντάς: «Πφραλάλεν ντα νταντάλεν, ασουνέν. Ο μπαρό Ντεβέλ* σικαντάς-πες αμαρέ παππούσκε κο Αβραάμ καζόμ βοβ ισινέ κι Μεσοποταμία, πριν τι μπεσέλ κι Χαρράν,
3 ντα βακερντάς λέσκε: “Νας τι τθεμέσταρ ντα τι τζενένταρ ντα τζα κο τθεμ σο κα σικαβάβ τούκε”.
4 Αζομάν βοβ νασλό οτθάρ σο μπεσένας ο Χαλδαίοι ντα μπεσλό κι Χαρράν. Ντα οτθέ, σοράν κατά μεριπέ λέσκε νταντέσκο, ο Ντεβέλ βακερντάς λέσκε τι μπεσέλ ανταλέ τθεμέστε σο μπεσένα τουμέν ακανά.
5 Ντα να ντινάς-λες καέκ κληρονομιά ανταλέ τθεμέστε, ούτε καζόμ ερεσέλα τι ισταβέλ εκ πιντρό. Αλλά ντινάς πο λάφι τι ντελ-λες λέστε, ντα σοράν λέσταρ λέσκε προσαγγονίντε, παρόλο σο μέχρι αζομάν να κερντάας τσσαβέν.
6 Ατζέκ, ο Ντεβέλ βακερντάς λέσκε ότι ο προσάγγονα λέσκε κα μπεσένας σαρ ξένοι εκχέ τθεμέστε σο να κα αβέλας λένγκο ντα ότι κα κερένας-λεν τι αβέν δούλοι ντα τι τσσίντεν μπουτ για 400 μπρεσά.
7 “Ντα με κα κρίναβ οντουλέ λαός σο κα κερέλ-λεν τι υπηρετίνεν σαρ δούλοι”, βακερντάς ο Ντεβέλ, “ντα σοράν σαρέ ανταλένταρ, κα νικιόν ντα κα ντεν-μαν άγια υπηρεσία ανταλέ τθανέστε”.
8 »Ντα κερντάς συμφωνία λέσαρ αντράλ κατά περιτομή. Ντα λέσταρ αβιλό ο Ισαάκ, ντα ο Αβραάμ κερντάς λέσκε περιτομή οπράλ κο οχτώ ντιβεσά, ντα κατά Ισαάκ αβιλό ο Ιακώβ, ντα κατά Ιακώβ ο αρχηγοί ι 12 φαρένγκε.
9 Ντα ο αρχηγοί ι φαρένγκε ζηλίνενας ι Ιωσηφίς ντα μπικιντέ-λες κι Αίγυπτος. Αλλά ο Ντεβέλ ισινέ λέσαρ
10 ντα σωντάς-λες σαρέ κατά στεναχώριες σο τθερέλας, κερντάς-λες τι αβέλ γκοντιαβέρ ντα τι ντικχέλ-λες λατσσιμάσαρ ο Φαραώ, ο βασιλιάς κι Αίγυπτος. Βοβ τσσουντάς-λες τι κερέλ κουμάντος κι Αίγυπτος ντα σαρέ λέσκε κχερέστε.
11 Αλλά πελί μποκχ σαρί κι Αίγυπτος ντα κι Χαναάν, βα, μπαρί στεναχώρια, ντα αμαρέ παππούδες να τθερένας τι χαν.
12 Αλλά ο Ιακώβ ασουντάς ότι ισινέ χαμπίματα κι Αίγυπτος ντα μπουτσσαντάς αμαρέ παππουδέν οτθέ ι πρώτη φαρ.
13 Ι δεύτερη φαρ ο Ιωσήφ βακερντάς πι πφραλένγκε ότι βοβ ισινέ, ντα αντικάς σικλιλό ο Φαραώ ι Ιωσηφίσκε φαμιλιάκε.
14 Οτθάρ, ο Ιωσήφ μπουτσσαντάς αμπέρι ντα ντινάς βίκος οντουλέ τθεμέσταρ πι νταντές ι Ιακωβίς ντα σαρέ πι τζενέν, σο σαρέ γιεκ ισινέ 75.*
15 Αντικάς, ο Ιακώβ γουλίστιλο κι Αίγυπτος ντα μουλό οτθέ, σαρ αμαρέ παππούδες-ντα.
16 Γκερντέ-λεν κι Συχέμ ντα τσσουντέ-λεν κο μεζάρι* σο κιντάας ο Αβραάμ κι Συχέμ κατά τσσαβέ σο τθερέλας ο Εμμώρ.
17 »Καζόμ ερεσέλας ο βακίτι τι νικιόλ μπαγιά ο λάφι σο ντινάας ο Ντεβέλ κο Αβραάμ, ο λαός αβγατίντιβελας μπουτ κι Αίγυπτος,
18 μέχρι σο αβιλό εκ γιαβέρ βασιλιάς κο τθεμ ντα να τζανέλας ι Ιωσηφίς.
19 Βοβ σικαντάς πφιρνιπέ* αμαρέ παππουδένγκε ντα ζορισκιαρντάς ι νταντέν τι μουκχέν πουμαρέ μαξιμίν τι μερέν.
20 Οντουβά βακίτι μπιάντιλο ο Μωυσής, ντα ισινέ μπουτ σουκάρ.* Ντα ισινέ τριν μασεκά κο κχερ πι νταντέσκο.
21 Αλλά κάνα μουκχλέ-λες, λιντάς-λες η τσσάι ι Φαραώσκι ντα μπαριαρντάς-λες σαρ τι αβέλας λάκο τσσαβό.
22 Αντικάς, ο Μωυσής λιντάς ο πο λατσσό σικλιαριπέ ι Αιγυπτιόνγκο.* Ντα τθερένας ζορ οντουλά σο βακερέλας ντα κερέλας.
23 »Ντα κάνα αβιλό 40 μπρεσένγκο, μανγκλάς αντρέ πι γκίστε* τι τζαλ τι ντικχέλ σαρ τζουβντιόνα λέσκε πφραλά, ι Ισραηλίσκε τσσαβέ.
24 Κάνα ντικχλάς εκχές ανταλένταρ τι αδικίντιβελ ντα τι τσσίντελ μπουτ, τσσιντιντάς λέσταρ ντα λιντάς εκδίκηση λέσκε, ντα μουνταρντάς ι Αιγυπτιός.
25 Αμντίνελας ότι λέσκε πφραλά κα αγαβένας ότι ο Ντεβέλ σώνελας-λεν αντράλ λέσταρ, αλλά βον να αγαντέ-λες.
26 Ο γιαβέρ ντιβές, γκιλό λέντε κάνα χάνας-πες ντα προσπαθιντάς τι ηρεμίνελ-λεν ακαλέ λαφίντζαρ: “Μουρσάλεν, τουμέν ισινέν πφραλά. Σόσκε χάνα-τουμέν;”
27 Αλλά οντουβά σο χάλας-πες πι πφραλέσαρ ταρτιντάς* ι Μωυσής ντα βακερντάς: “Κον τσσουντάς-τουτ τι κερές-αμέν κουμάντος ντα τι κρίνες-αμέν;
28 Μα τι μανγκέσα τι μουνταρές-μαν σαρ μουνταρντάν ίτζι ι Αιγυπτιός;”
29 Κάνα ο Μωυσής ασουντάς-λες ανταβά, νασλό τθαβντιμάσαρ ντα τζουβντιλό σαρ ξένος κο τθεμ Μαδιάμ, ντα οτθέ κερντάς ντουέ τσσαβέν.
30 »Σαράντα μπρεσά σοράν, σικαντάς-πες λέσκε άγγελος κι έρημος κο βες Σινά αντρέ εκχέ καντραλέ θαμνόστε σο πφαμπόλας.
31 Κάνα ο Μωυσής ντικχλάς-λες ανταβά, ατσσιλό πουταρντέ μόσαρ. Ντα σαρ τζάλας πο πασέ για τι ντικχέλ σο αβέλας-πες, ασούντιλε ο λάφια ι Ιεχωβάσκε:*
32 “Με ισινόμ ο Ντεβέλ τι παππουδένγκο, ο Ντεβέλ ι Αβρααμίσκο ντα ι Ισαακίσκο ντα ι Ιακωβίσκο”. Ι Μωυσής λιντάς-λες ιζρανί ντα νταρέλας τι ντικχέλ οτθέ.
33 Ο Ιεχωβά* βακερντάς λέσκε: “Νίκαβ ο τεραχά* τι πιντρένταρ, σόσκε ο τθαν σο ισταβέσα ισί άγιος.
34 Ντικχλόμ σαρ ζορισκιαρένα μι λαός σο ισί κι Αίγυπτος ντα ασουντόμ-λεν τι τσσίντεν γκίσαρ ντα γουλίστιλομ τι σώναβ-λεν. Οτθάρ ακανά έλα! Κα μπουτσσαβάβ-τουτ κι Αίγυπτος”.
35 Ι Μωυσής, σο κερντέ-λες πέρα ντα βακερντέ λέσκε: “Κον τσσουντάς-τουτ τι κερές κουμάντος ντα τι κρίνες;” λες μπουτσσαντάς ο Ντεβέλ εμ τι κερέλ-λεν κουμάντος εμ τι ελευθερώνελ-λεν, αντράλ κατά άγγελος σο σικαντάς-πες λέσκε κο καντραλό θάμνος.
36 Βοβ γκερντάς-λεν αβρί ντα κερέλας θαύματα ντα σικαβέλας σημάδια κι Αίγυπτος ντα κι Ερυθρά Θάλασσα ντα κι έρημος 40 μπρεσά.
37 »Ανταβά ισί ο Μωυσής σο βακερντάς κο τσσαβέ κι Ισραηλίσκε: “Ο Ντεβέλ κα τραμπίνελ τουμένγκε αντράλ τουμαρέ πφραλένταρ εκχέ προφητής σαρ ισινόμ με”.
38 Ανταβά τζενό ισινέ γιεκ ι Ισραηλιτέντζαρ, κι έρημος, γιεκ ι αγγελόσαρ σο κερντάς λέσαρ λάφι κο βες Σινά ντα αμαρέ παππουδέντζαρ, ντα λιντάς τζουβντέ λάφια κατά Ντεβέλ για τι ντελ-λεν αμέντε.
39 Αμαρέ παππούδες να μανγκλέ τι ντεν καν λέστε. Αλλά κερντέ-λες πέρα, ντα αντρέ πουμαρέ γκίστε βουρτισάλε κι Αίγυπτος.
40 Βακερντέ κο Ααρών: “Λάτσσαρ αμένγκε ντεβλέν για τι τζαν ανγκλ’ αμέντε. Σόσκε να τζανάσα σο αβιλό-πες οντουβά Μωυσής, σο γκερντάς-αμέν αβρί κατά Αίγυπτος”.
41 Οτθάρ, λατσσαρντέ εκχέ γκουρουβές οντουλά ντιβεσά ντα αντέ θυσία οντουλέ αγαλμάστε ντα νακχένας λατσσές οντουλέντζαρ σο κερντέ πουμαρέ βαστέντζαρ.
42 Αζομάν ο Ντεβέλ τσσιντιντάς-πες ντουρ λένταρ ντα μουκχλάς-λεν τι ντεν λατρεία κο πράγματα σο ισί κο ουρανός, σαρ ισί γραμμέ κο βιβλίος κι Προφητένγκο: “Τουμέν, Ισραηλίτες, μάνγκε τσσινένας ζώα ντα κερένας θυσίες 40 μπρεσά κι έρημος;
43 Ο τσαντίρι ι ντεβλέσκο Μολόχ ντα η τσεργάν ι ντεβλέσκι Ρεφάν βαντιντέν οπρέ. Ανταλά κερντέν-λεν για τι ντεν-λεν λατρεία. Οτθάρ, κα νασκιαράβ-τουμέν πο ντουρ κατά Βαβυλώνα”.
44 »Αμαρέ παππούδες τθερένας ο άγιος τσαντίρι* κι έρημος. Ο Ντεβέλ βακερντάς κο Μωυσής τι κερέλ-λες αντικάς σαρ σικαντάας λέσκε.
45 Ντα λιντέ-λες λένγκε τσσαβέ. Βον ντα ο Ιησούς του Ναυή αντέ-λες κο τθεμ κι λαόνγκο σο νασκιαρντάς ο Ντεβέλ ανγκλά-λένταρ. Ατθέ ατσσιλό μέχρι κο ντιβεσά κι Δαβιδίσκε.
46 Βοβ κερντάς ο γκι ι Ντεβλέσκο ντα μανγκλάς τι τθερέλ ι ευλογία τι κερέλ κχερ Λέσκε, σο ισί ο Ντεβέλ ι Ιακωβίσκο.
47 Αλλά οντουβά κχερ κερντάς-λες λέσκε ο Σολομώντας.
48 Όμως, Οντουβά σο Ισί Πο Οπρέ Σαριλένταρ να μπεσέλα κχερέντε σο ισί κερντέ τζενένγκε βαστένταρ, σαρ βακερέλα ο προφήτης:
49 “Ο ουρανός ισί μο θρόνος ντα κι πφουβ τσσουβάβα μο πιντρέ. Σο κχερ κα κερέν μάνγκε; βακερέλα ο Ιεχωβά.* Ή κάι ισί ο τθαν σο κα μπεσάβ;
50 Να κερντάς-λεν μο βας σαρέ ανταλά;”
51 »Ισινέν πφαρέ σορέσκε, σουκέ γκίσκε ντα πφαντέ κανένγκε. Τουμέν πάντα τζάνα κόντρα κο άγιος πνεύμας. Σαρ τουμαρέ παππούδες, αντικάς κερένα τουμέν-ντα.
52 Ισί καέκ προφήτης σο να γκιλέ λέσαρ κόντρα τουμαρέ παππούδες; Βα, μουνταρντέ οντουλέν σο βακερντέ ότι κα αβέλας ο δίκαιος, σο ακανά προδοντέν-λες ντα μουνταρντέν-λες τουμέν,
53 τουμέν σο λιντέν ο Νόμος, αντικάς σαρ ντιντιλό κατά άγγελοι, αλλά να κερντέν-λες».
54 Κάνα ασουντέ-λεν ανταλά, χολιασάλε μπουτ ντα σικίνενας πουμαρέ ντανά λέσκε.
55 Αλλά ο Στέφανος, σο ισινέ πφερντό άγιος πνεύμας, βαντιντάς πο γιακχά κο ουρανός ντα ντικχλάς ι δόξα ι Ντεβλέσκι ντα ι Ιησούς τι αβέλ δεξιά κατά Ντεβέλ,
56 ντα βακερντάς: «Άκ’! Ντικχάβα ο ουρανός πουταρντό ντα ι τζενέσκε Τσσαβές τι αβέλ δεξιά κατά Ντεβέλ».
57 Αζομάν βον ντινέ βίκος ζουρανές, πφαντέ πουμαρέ κανά πουμαρέ βαστέντζαρ ντα γκιλέ ούρια οπρά-λέστε σαρέ γιεκ.
58 Νικαντέ-λες αβρί κατά πόλη ντα φουρτίνενας λέσκε μπαρά. Ντα ο τζενέ σο τσσουντέας λέσκε λάφια μουκχλέ πουμαρέ αβραϊνέ σέα κο πιντρέ εκχέ τερνέσκε σο βακέρντιβελας Σαύλος.
59 Κάνα φουρτίνενας μπαρά κο Στέφανος, βοβ μολιντάς ι Ιησούς ακαλέ λαφίντζαρ: «Κύριε Ιησού, δέχτινε μι ζωή».*
60 Σοράν, πελό κοτσίντζαρ ντα ντινάς βίκος ζουρανές: «Ιεχωβά,* μα τιμώρινε-λεν ανταλέ αμαρτιάκε». Ντα κάνα βακερντάς-λες ανταβά, σοτάς ο σοϊπέ ι μεριμάσκο.
Υποσημειώσεις
^ Κι Πουρανί Μπαλαμανί βακέρντιβελας «Ο Ντεβέλ ι δοξάκο».
^ Γιαβέρσοϊ «75 ψυχές».
^ Γιαβέρσοϊ «λιμόρι».
^ Γιαβέρσοϊ «γκεραλιπέ, μπίλατσσιπε».
^ Γιαβέρσοϊ «ισινέ σουκάρ κο γιακχά κι Ντεβλέσκε».
^ Κι Πουρανί Μπαλαμανί βακέρντιβελας «(λιντάς) σαρί ι σοφία ι Αιγυπτιόνγκι».
^ Γιαβέρσοϊ «αποφασιντάς».
^ Γιαβέρσοϊ «ντινάς σπιλί».
^ Κι Πουρανί Μπαλαμανί βακέρντιβελας «σανδάλια».
^ Γιαβέρσοϊ «ι σκηνή της μαρτυρίας».
^ Κι Πουρανί Μπαλαμανί βακέρντιβελας «μο πνεύμας».
