Πράξεις ι Αποστολόνγκε 9:1-43
9 Αλλά ο Σαύλος, σο ατζέ ατζέ μανγκέλας τι νταραβέλ ντα τι μουνταρέλ ι Κυριόσκε μαθητέν, γκιλό κο αρχιερέας
2 ντα μανγκλάς λέσταρ γράμματα για τι σικαβέλ-λεν κο συναγωγές κι Δαμασκός ντα αντικάς τι ανέλ πφαντέ κι Ιερουσαλήμ οντουλέν σο ισινέ κο Ντρομ κι Ντεβλέσκο, εμ μουρσέν εμ τζουβλίν.
3 Καζόμ ερεσέλας πασέ κι Δαμασκός, οτθέ σο να μπεκλεντίνελας-λες, λιντάς-πες ντονταλάι λέσταρ εκ φως κατά ουρανός,
4 ντα βοβ πελό τελέ ντα ασουντάς ακαλά λάφια: «Σαούλ, Σαούλ, σόσκε τζάσα μάντζαρ κόντρα;»
5 Βοβ πουτσλάς: «Κον ισινάν, Κύριε;» Βοβ βακερντάς: «Ισινόμ ο Ιησούς, σο τζάσα λέσαρ κόντρα τούι.
6 Όμως, ίστι ντα τζα αντρέ κι πόλη, ντα οτθέ κα βακερέν τούκε σο πρέπει τι κερές».
7 Ντα καζόμ αβένας-πες ανταλά, ο μουρσά σο ισινέ γιεκ λέσαρ σαστισάλε ντα ναστί κερένας λάφι, σόσκε ασουνένας κάτι αλλά να ντικχένας καεκχές.
8 Αζομάν ο Σαύλος ιστίντιλο οπρέ, ντα παρόλο σο λέσκε γιακχά ισινέ πουταρντέ, να ντικχέλας τίποτα. Οτθάρ, λιντέ-λες κατά βας ντα γκερντέ-λες κι Δαμασκός.
9 Ντα τριν ντιβεσά να ντικχέλας τίποτα, ντα ούτε χαλάς ούτε πιλάς.
10 Κι Δαμασκός ισινέ εκ μαθητής σο βακέρντιβελας Ανανίας, ντα ο Κύριος βακερντάς λέσκε εκχέ φαντασιάτε: «Ανανία!» Βοβ βακερντάς: «Ασουνάβα, Κύριε!»
11 Ο Κύριος βακερντάς λέσκε: «Ίστι, τζα κο ντρομ σο βακέρντιβελα Ευθεία ντα μανγκ κατά κχερ ι Ιουδάσκο εκχές σο βακέρντιβελα Σαύλος κατά Ταρσός. Βοβ ακανά κερέλα προσευχή,
12 ντα εκχέ φαντασιάτε ντικχλάς εκχέ μουρσές σο βακέρντιβελα Ανανίας τι τζαλ αντρέ ντα τι τσσουβέλ οπρά-λέστε πο βαστά για τι ντικχέλ πάλι».
13 Αλλά ο Ανανίας βακερντάς: «Κύριε, ασουντόμ μπουτέ τζενένταρ ανταλέ τζενέσκε, ότι κερντάς μπαρό ζιάνι τι αγιόνγκε κι Ιερουσαλήμ.
14 Ντα μπουτσσαντέ-λες ατθέ ο μπαρέ ιερείς για τι ασταρέλ* σαρέ οντουλέν σο ντένα μπέσα τι ναβέστε».
15 Ο Κύριος όμως βακερντάς λέσκε: «Τζα, σόσκε τραμπιντόμ-λες με για τι ανέλ μο ναβ κο τζενέ σο ισί γιαβερέ τθεμένταρ, αλλά εμ κο βασιλιάδες ντα κο τσσαβέ κι Ισραηλίσκε.
16 Σόσκε κα σικαβάβ λέσκε ντιπ λατσσές σαρέ οντουλά σο πρέπει τι τσσίντελ μι ναβέσκε».
17 Οτθάρ, ο Ανανίας νασλό, γκιλό αντρέ κο κχερ, τσσουντάς οπρά-λέστε πο βαστά ντα βακερντάς: «Σαούλ, πφραλ, ο Κύριος Ιησούς, σο σικαντάς-πες τούκε κο ντρομ, μπουτσσαντάς-μαν για τι ντικχές πάλι ντα τι πφερντιός άγιος πνεύμας».
18 Ντα οντιά στιγμή κάτι σαρ λέπια πελέ λέσκε γιακχίνταρ ντα ντικχλάς πάλι. Σοράν ιστίντιλο ντα μπολντιλό,
19 ντα χαλάς ντα λιντάς ζορ.
Μπεσλό χάνικ ντιβεσά ι μαθητέντζαρ κι Δαμασκός,
20 ντα μπουτ σουγκό αρχισάλο τι βακερέλ κο συναγωγές ότι ο Ιησούς ισί ο Τσσαβό ι Ντεβλέσκο.
21 Αλλά σαρέ οντουλά σο ασουνένας-λες σαστίνενας ντα βακερένας: «Βοβ να τζάλας μπαρί κόντρα κι Ιερουσαλήμ οντουλέντζαρ σο ντένα μπέσα ανταλέ ναβέστε; Ντα να αβιλό ατθέ για τι ασταρέλ-λεν ντα τι γκερέλ-λεν* κο μπαρέ ιερείς;»
22 Αλλά ο Σαύλος, καζόμ τζάλας λέλας πο μπουτ ζορ ντα μουκχέλας πουταρντέ μόσαρ ι Ιουδαιόν κι Δαμασκός κάνα σικαβέλας λένγκε ντιπ λατσσές ότι ο Ιησούς ισί ο Χριστός.
23 Νακχλέ μπουτ ντιβεσά, ντα ο Ιουδαίοι κερντέ-πες λάφι για τι μουνταρέν-λες.
24 Αλλά ο Σαύλος σικλιλό σο τθερένας πουμαρέ γκοντιάτε τι κερέν. Βον αρακχαβένας ο μπαρέ πόρτες-ντα, εμ ντισάρα εμ ιράτ, για τι μουνταρέν-λες.
25 Οτθάρ, λέσκε μαθητές λιντέ-λες ιράτ, τσσουντέ-λες αντρέ εκχέ σεβλιάτε* ντα γουλιαρντέ-λες εκχέ γουρνάταρ σο ισινέ κο βουτσσέ ντουβάρια.
26 Κάνα ερεσλό κι Ιερουσαλήμ, κερντάς σο νακχέλας λέσκε βαστένταρ για τι αβέλ γιεκ ι μαθητέντζαρ, όμως σαρέ νταρένας λέσταρ, σόσκε να πακιάνας ότι ισί μαθητής.
27 Οτθάρ, ο Βαρνάβας γκιλό τι βοηθίνελ-λες ντα γκερντάς-λες κο απόστολοι. Ντα βακερντάς λένγκε σαρ ντικχλάας ο Σαύλος κο ντρομ ι Κυριός σο κερντάας λέσκε λάφι, ντα σαρ κερντάας λάφι κι Δαμασκός μπίνταρανες κο ναβ κι Ιησούσκο.
28 Οτθάρ, ατσσιλό λέντζαρ ντα τζάλας κάι μανγκέλας κι Ιερουσαλήμ ντα κερέλας λάφι μπίνταρανες κο ναβ κι Κυριόσκο.
29 Κερέλας λάφι ι Ιουδαιόντζαρ σο κερένας λάφι μπαλαμανές ντα βακερέλας λένγκε οντουλένγκε σο πακιάλας, αλλά βον τζάνας τι μουνταρέν-λες.
30 Κάνα σικλιλέ-λες ο πφραλά, γουλιαρντέ-λες κι Καισάρεια ντα μπουτσσαντέ-λες κι Ταρσός.
31 Οντουβά βακίτι, ο πφραλά κατά κχανγκιρί σαρί κι Ιουδαία ντα κι Γαλιλαία ντα κι Σαμάρεια τθερένας ειρήνη ντα αβένας ζουρανέ. Ντα καζόμ νταρένας κατά Ιεχωβά* ντα λοκχιόλας λένγκο γκι* κατά άγιος πνεύμας, να τσσιναβένας τι αβγατίντιβεν.
32 Καζόμ ο Πέτρος τζάλας σαρό κο τθεμ, γουλίστιλο κο άγιοι-ντα σο μπεσένας κι Λύδδα.
33 Οτθέ αρακχλάς εκχέ τζενές σο βακερένας λέσκε Αινέα. Βοβ ισινέ κο κρεβάτι οχτώ μπρεσά, επειδή ισινέ μπανγκό.
34 Ο Πέτρος βακερντάς λέσκε: «Αινέα, ο Ιησούς Χριστός κερέλα-τουτ λατσσές. Ίστι ντα λάτσσαρ το κρεβάτι». Ντα βοβ ιστίντιλο οντιά στιγμή.
35 Κάνα ντικχλέ-λες σαρέ οντουλά σο μπεσένας κι Λύδδα ντα κο Σαρών, πακιαντέ κο Κύριος.
36 Κι Ιόππη ισινέ εκ μαθήτρια ι ναβέσαρ Ταβιθά, σο μανγκέλα τι βακερέλ «Δορκάδα».* Βόι κερέλας μπερεκέτι λατσσέ πράγματα ντα σικαβέλας λατσσιπέ ι τσορορένγκε.
37 Αλλά οντουλά ντιβεσά νασφάλιλι* ντα μουλί. Οτθάρ, τθοντέ-λα ντα τσσουντέ-λα εκχέ οπραϊνέ δωματιόστε.
38 Επειδή η Λύδδα ισινέ πασέ κι Ιόππη, κάνα ο μαθητές ασουντέ ότι ο Πέτρος ισινέ οτθέ, μπουτσσαντέ λέσκε ντουέ μουρσέν τι βακερέν λέσκε: «Μολίνασα-τουτ, έλα αμέντε σουγκό».
39 Αζομάν ο Πέτρος ιστίντιλο ντα γκιλό λέντζαρ. Κάνα ερεσλό, γκερντέ-λες κο οπραϊνό δωμάτιος. Ντα σαρέ ο χήρες αβιλέ ανγκλά-λέστε ροϊμάσαρ ντα σικαβένας λέσκε μπουτ σέα σο κερντάας η Δορκάδα καζόμ βακίτι ισινέ λέντζαρ.
40 Ο Πέτρος νικαντάς-λεν σαριλέν αβρί, πελό κοτσίντζαρ ντα προσευχισάλο. Σοράν, μπολντιντάς-πες κάρινγκ κο σώμας ντα βακερντάς: «Ταβιθά, ίστι!» Βόι πουταρντάς πο γιακχά, ντα σο ντικχλάς ι Πετρός, ιστίντιλι.
41 Βοβ ντινάς-λα πο βας, ιστικιαρντάς-λα οπρέ, ντινάς βίκος ι αγιόν ντα ι χηρέν ντα σικαντάς-λα λένγκε τζουβντί.
42 Ανταβά λιντιλό αμπέρι σαρί κι Ιόππη, ντα μπουτ τζενέ πακιαντέ κο Κύριος.
43 Ντα ο Πέτρος μπεσλό μπερεκέτι ντιβεσά κι Ιόππη κο Σίμωνας σο λατσσαρέλας δέρματα.
Υποσημειώσεις
^ Κι Πουρανί Μπαλαμανί βακέρντιβελας «τι πφάντελ».
^ Κι Πουρανί Μπαλαμανί βακέρντιβελας «τι γκερέλ-λεν πφαντέ».
^ Γιαβέρσοϊ «κοφινάτε».
^ Γιαβέρσοϊ «κοβλιόλας λένγκι ντουκχ».
^ Ο μπαλαμανό ναβ Δορκάδα ντα ο αραμαϊκός ναβ Ταβιθά μανγκένα τι βακερέν ο ντούι-ντα «γαζέλα».
^ Γιαβέρσοϊ «πασλιλί, αμπορεψάλι».
