Γράμμας σο Μπουτσσάντιλο κο Ρωμαίοι 13:1-14
13 Σαρέ ο τζενέ* τι ντεν καν οντουλέντε σο κερένα κουμάντος, σόσκε σο-ντα ζορ τθερένα τι κερέν κουμάντος αβέλα κατά Ντεβέλ. Οντουλά σο κερένα κουμάντος ακανά ισί πουμαρέ θεσιέντε σόσκε ο Ντεβέλ μουκχέλα-λεν τι αβέν οτθέ.
2 Άμα αμέν τζάσα κόντρα οντουλέντε σο κερένα κουμάντος, τζάσα κόντρα κο Ντεβέλ, σο βοβ τσσουντάς ο πράγματα εκχέ σειράτε. Οντουλά σο τζάνα κόντρα ανταλέ σειράτε κα κρίντιβεν.
3 Οντουλά σο κερένα κουμάντος να ανένα νταρ οντουλένγκε σο κερένα λατσσέ πράγματα, αλλά οντουλένγκε σο κερένα γκεραλέ* πράγματα. Μανγκέσα μα τι νταρές οντουλένταρ σο κερένα κουμάντος; Κερ ο λατσσιπέ, ντα βον κα ισαρέν-τουτ.
4 Βον υπηρετίνενα ι Ντεβλές τι λατσσιμάσκε. Αλλά άμα κα κερές ο γκεραλιπέ, τι νταρές, σόσκε να τθερένα σινανέ ο σπαθίς οπρά-πουμέντε. Ισί υπηρέτες ι Ντεβλέσκε ντα λένα εκδίκηση για τι σικαβέν μπαρί χολί οντουλένγκε* σο κερένα ο γκεραλιπέ.
5 Οτθάρ, τουμέν ισί ανάγκη τι ντεν καν, εμ για τι νασέν ντουρ λένγκε χολιάταρ, αλλά εμ για τι τθερέν τουμαρί συνείδηση* πάκι.
6 Οντουλέσκε τουμέν ποκινένα φόρους-ντα, σόσκε βον ισί υπηρέτες ι Ντεβλέσκε σο κερένα συνέχεια ανταγιά μπουτί.
7 Τι ντεν σαριλέντε οντουλά σο πρέπει τι ντεν-λεν: οντουλέστε σο μανγκέλα ο φόρος, ο φόρος. Οντουλέστε σο μανγκέλα ο τέλη, ο τέλη. Οντουλέστε σο μανγκέλα ι νταρ, ι νταρ. Οντουλέστε σο μανγκέλα ο σεβασμός, ο σεβασμός.
8 Μα τθερέν καέκ χρέος καεκχέ τζενέσκε εκτός ακαλέσταρ: τι μανγκέν ο εκ ι γιαβερές. Κον μανγκέλα ι γιαβερέν κερντάς οντουβά σο βακερέλα ο νόμος.
9 Ο Νόμος σο βακερέλα: «Μα κερ λουμνιπέ οπράλ τι μπιαβέστε, μα μούνταρ, μα τσορ, μα μανγκ τι τθερές οντουβά σο ισί ι γιαβερέσκο», ντα σαρέ ο γιαβερά εντολές βακέρντιβενα ακαλέ χάνικ λαφίντζαρ: «Μανγκ ι γιαβερέν* σαρ μανγκέσα τουτ».
10 Ο τζενό σο μανγκέλα ι γιαβερέν να κερέλα ζιάνι κο γιαβερά.* Άρα, ο τζενό σο μανγκέλα ι γιαβερέν κερέλα οντουβά σο βακερέλα ο Νόμος.
11 Τι κερέν-λες ανταβά επειδή τζανένα καλέ βακιτίστε τζουβντιάσα, ότι αβιλό ο σαάτι τι ιστίν κατά σοϊπέ. Κάνα πακιαντάμ ισινέ πασέ ο ντιβές σο κα σώντιβαας, αλλά ακανά ισί ατζέ πο πασέ.
12 Η ιράτ νακχέλα ντα η ντισάρα ισί πασέ. Οτθάρ, τι τσσιναβάς τι κεράς ο πράγματα σο ισί κο καρανίκι, αλλά τι ιριάς ο όπλα σο ισί κο φως.
13 Τι πφιράς σωστά σαρ πφιρένα ο τζενέ κάνα ισί ντισάρα. Μα τι γλεντίνας χωρίς όρια ντα μα τι ματιάς, μα τι κεράς λουμνιπέ ντα μπίλατζανε πράγματα,* μα τι χας-αμέν ντα μα τι ζηλίνας.
14 Οκιά μπάνταρ, τι μοιάζας κο Κύριος Ιησούς Χριστός καζόμ πο λατσσές αβέλα-πες* ντα μα τι σκεφτίνας πο τζανγκλέ σαρ κα κεράς οντουλά σο μανγκέλα ο σώμας.
Υποσημειώσεις
^ Γιαβέρσοϊ «ψυχές».
^ Γιαβέρσοϊ «μπίλατσσε, κακά».
^ Γιαβέρσοϊ «για τι τιμωρίνεν οντουλέν».
^ Κι Πουρανί Μπαλαμανί βακέρντιβελας «ι τζενές σο ισί πασέ τούτε». Ανταβά λάφι να μανγκέλας τι σικαβέλ σάντε οντουλέν σο μπεσένας πασέ εκχέ τζενέστε, αλλά ι κάθε τζενές.
^ Κι Πουρανί Μπαλαμανί βακέρντιβελας «Αλλά ιρίν ι Κυριός, ι Ιησού Χριστός».
