Γράμμας σο Μπουτσσάντιλο κο Ρωμαίοι 8:1-39
-
Ζωή ντα ελευθερία αντράλ κατά άγιος πνεύμας (1-11)
-
Ο πνεύμας σο κερέλα-αμέν τσσαβέ ι Ντεβλέσκε κερέλα-αμέν τι αβάς σίγουροι (12-17)
-
Οντουλά σο λατσσαρντάς ο Ντεβέλ μπεσένα τι ελευθερώντιβεν ο τσσαβέ ι Ντεβλέσκε (18-25)
-
«Λάσα βοήθεια κατά άγιος πνεύμας» (26, 27)
-
Τραμπιμέ κατά Ντεβέλ (28-30)
-
Νικίνασα αντράλ κατά αγάπη ι Ντεβλέσκι (31-39)
8 Οτθάρ, οντουλά σο ισί ενωμέ ι Χριστόσαρ, ι Ιησούσαρ, να καταδικάντιβενα.
2 Ο νόμος ι άγιε πνευμάσκο σο ντέλα ζωή οντουλέντε σο ισί ενωμέ ι Χριστόσαρ, ι Ιησούσαρ, ελευθερωντάς-τουμέν κατά νόμος ι αμαρτιάκο ντα ι μεριμάσκο.
3 Ο Νόμος ι Μωυσίσκο ναστί ελευθερώνελας-τουμέν, επειδή ο τζενέ ισί μπίζουρανε ντα αμαρτωλοί. Αλλά ανταβά κερντάς-λες ο Ντεβέλ κάνα μπουτσσαντάς πι Τσσαβές σαρ τζενό για τι νασκιαρέλ ι αμαρτία. Αντικάς, ο Ντεβέλ καταδικαντάς ι αμαρτία σο ισί κο σώμας
4 για τι μπορίνας, αμέν σο να πφιράσα σαρ μανγκέλα ο σώμας αλλά σαρ μανγκέλα ο πνεύμας, τι κεράς ο δίκαια πράγματα σο τθερέλα ο Νόμος.
5 Οντουλά σο τζουβντιόνα σαρ μανγκέλα ο σώμας τθερένα πουμαρί γκοντί κο πράγματα κι σωμάσκε, αλλά οντουλά σο τζουβντιόνα σαρ μανγκέλα ο άγιος πνεύμας κο πράγματα κι άγιε πνευμάσκε.
6 Άμα εκ τζενό τθερέλα πι γκοντί κο σώμας, ο αποτέλεσμας κα αβέλ μεριπέ, αλλά άμα τθερέλα πι γκοντί κο άγιος πνεύμας, ο αποτέλεσμας κα αβέλ ζωή ντα ειρήνη.
7 Άμα εκ τζενό τθερέλα πι γκοντί κο σώμας, αβέλα ντουσμάνι* ι Ντεβλέσκο, σόσκε ο σώμας να ντέλα καν κο νόμος κι Ντεβλέσκο αλλά ούτε μπορίνελα τι κερέλ-λες ανταβά.
8 Οτθάρ, οντουλά σο τζουβντιόνα σαρ μανγκέλα ο σώμας ναστί κερένα ι Ντεβλέσκο γκι.
9 Όμως, τουμέν να τζουβντιόνα σαρ μανγκέλα ο σώμας. Άμα ι Ντεβλέσκο πνεύμας ισί μπαγιά αντρέ τουμέντε, αζομάν τζουβντιόνα σαρ μανγκέλα ο άγιος πνεύμας. Αλλά οντουλά σο να τθερένα ο πνεύμας ι Χριστόσκο, νανέ λέσκε.
10 Άμα όμως ο Χριστός ισί ενωμέ τουμέντζαρ, ο σώμας ισί μουλό ιτιρί κατά αμαρτία, αλλά ο πνεύμας ντέλα ζωή ιτιρί κατά δικαιοσύνη.
11 Ντα άμα ο πνεύμας οντουλέσκο σο ιστικιαρντάς ι Ιησούς κατά μουλέ ισί αντρέ τουμέντε, οντουβά σο ιστικιαρντάς ι Χριστός Ιησούς κατά μουλέ κα τζουβντιαρέλ αντράλ πι πνευμάσταρ σο ισί αντρέ τουμέντε τουμαρό-ντα σώμας σο μερέλα.
12 Άρα, πφραλάλεν, αμέν να ισινάμ υποχρεωμέ κο σώμας για τι τζουβντιάς σαρ μανγκέλα ο σώμας.
13 Άμα τουμέν τζουβντιόνα σαρ μανγκέλα ο σώμας, σίγουρα κα μερέν. Αλλά άμα κα μουνταρέν αντράλ κατά άγιος πνεύμας ο πράγματα σο κερέλα ο σώμας, κα τζουβντιόν.
14 Σαρέ οντουλά σο σικαβέλα λένγκε ο πνεύμας ι Ντεβλέσκο κάι τι τζαν ισί μπαγιά τσσαβέ ι Ντεβλέσκε.
15 Επειδή τουμέν να λιντέν πνεύμας σο κερέλα-τουμέν δούλοι ντα σο ανέλα τουμένγκε πάλι νταρ, αλλά λιντέν πνεύμας σο κερέλα-αμέν τσσαβέ ι Ντεβλέσκε.* Αντράλ ανταλέ πνευμάσταρ ντάσα βίκος: «Αββά,* Ντάντε!»
16 Ο πνεύμας ι Ντεβλέσκο κερέλα-αμέν τι αβάς σίγουροι* ότι ισινάμ τσσαβέ ι Ντεβλέσκε.
17 Άμα ισινάμ τσσαβέ ι Ντεβλέσκε, λάσα ι κληρονομιά σο ντέλα. Ντα κα ντελ-αμέν ι κληρονομιά σο ντιντιόλα κο Χριστός-ντα. Αλλά πρέπει τι τσσίντας-ντα μπουτ γιεκ λέσαρ για τι δοξάντιβας γιεκ λέσαρ.
18 Πακιάβα ότι ανταλά σο τσσίντασα ακανά νανέ τίποτα ανγκλάλ κι δόξα σο κα σικάντιβελ αντράλ αμένταρ.
19 Σαρέ οντουλά σο λατσσαρντάς ο Ντεβέλ μπεσένα σαρ σαρ τι σικαβέλ ο Ντεβέλ πι τσσαβέν.
20 Σαρέ οντουλά σο λατσσαρντάς ο Ντεβέλ αναγκασάλε τι τζουβντιόν σινανέ, όχι επειδή μανγκένας-λες βον, αλλά επειδή μανγκέλας-λες ο Ντεβέλ για τι τθερέν ακαγιά ελπίδα:
21 ότι οντουλά σο λατσσαρντάς Βοβ κα τσσιναβέν τι αβέν δούλοι κι αμαρτία ντα κο μεριπέ ντα κα τθερέν ι μπαρί ελευθερία ι Ντεβλέσκε τσσαβένγκι.
22 Επειδή τζανάσα ότι σαρέ οντουλά σο λατσσαρντάς ο Ντεβέλ τσσίντενα γκίσαρ ντα τθερένα ντουκχ μέχρι ακανά.
23 Αλλά αμέν-ντα σο λιντάμ ο άγιος πνεύμας, δηλαδή ο πρώτος πράγμας* οντουλένταρ σο κα αβέν, τσσίντασα γκίσαρ καζόμ μπεσάσα σαρ σαρ τι κερέλ-αμέν ο Ντεβέλ πο τσσαβέ.* Αζομάν ισί σο κα ελευθερώντιβας αμαρέ σωμάσταρ αντράλ κατά λύτρος.
24 Κάνα σωσάλαμ, λιντάμ ανταγιά ελπίδα. Αλλά ελπίδα σο ντικχίντιβελα νανέ ελπίδα. Κάνα εκ τζενό ντικχέλα εκ πράγμας, μήπως τθερέλα ελπίδα ανταλέσκε;
25 Αλλά άμα τθεράσα ελπίδα οντουλέσκε σο να ντικχάσα, συνεχίνασα τι μπεσάς λέσκε με υπομονή.
26 Ατζέκ, ο άγιος πνεύμας βοηθίνελα-αμέν κάνα ισινάμ μπίζουρανε. Τζανάσα ότι πρέπει τι προσευχίντιβας, αλλά μπάζιμα να τζανάσα καλέ πραγματένγκε πρέπει τι προσευχίντιβας. Ατζέ-ντα άμα νανέ-αμέν λάφια για τι βακεράς σο ισί αντρέ αμαρέ γκίστε, λάσα βοήθεια κατά άγιος πνεύμας.
27 Ο Ντεβέλ ρόντελα αντρέ κο γκι ντα αγαβέλα σο βακερέλα ο πνεύμας, σόσκε οντουλά σο βακερέλα ισί αντικάς σαρ μανγκέλα ο Ντεβέλ ντα βοηθίνενα ι αγιόν.
28 Τζανάσα ότι σο-ντα κερέλα ο Ντεβέλ ισί κερντό εκχέ σειράσαρ για τι ανέλ λατσσιπέ οντουλένγκε σο μανγκένα-λες, οντουλένγκε σο ντινάς-λεν βίκος για τι κερέν σο τθερέλα πι γκοντιάτε.
29 Βοβ κατά αρχή ντινάς-λεν σημασία ντα λιντάς ι απόφαση πο ανγκλέ ότι βον κα αβένας ντιπ σαρ λέσκο Τσσαβό. Αντικάς, λέσκο Τσσαβό κα αβέλας ο πρώτος Τσσαβό αντρέ μπουτέ πφραλέντε.
30 Σοράν, ντινάς βίκος οντουλέν σο τραμπιντάας. Οντουλέν σο ντινάς βίκος βακερντάς ότι ισί δίκαιοι. Ντα οντουλά σο βακέρντιλε δίκαιοι δοξάντιλε λέσταρ.
31 Οτθάρ, σο κα βακεράς ανταλέ πραγματένγκε; Άμα ο Ντεβέλ ισί αμέντζαρ, κον κα τζαλ αμέντζαρ κόντρα;
32 Αφού βοβ να τζιτζισάλο ατζέ-ντα πι Τσσαβέσκε, αλλά ντινάς-λες για τι μερέλ σαρέ αμένγκε, να κα ντελ-αμέν λατσσιμάσαρ γιεκ λέσαρ σαρέ ο γιαβερά-ντα πράγματα;
33 Κον κα κατηγορίνελ οντουλέν σο τραμπιντάς ο Ντεβέλ; Ο Ντεβέλ ισί Οντουβά σο βακερέλα ότι ισί δίκαιοι.
34 Κον κα καταδικάνελ-λεν; Ο Χριστός Ιησούς ισί οντουβά σο μουλό λένγκε ντα οντουβά σο ιστίντιλο κατά μουλέ. Βοβ ισί δεξιά κατά Ντεβέλ ντα τσσίντελα αμένταρ.
35 Κον κα τσσιναβέλ-αμέν κατά αγάπη ι Χριστόσκι; Μήπως ο προβλήματα, η στεναχώρια, οντουλά σο τζάνα αμέντζαρ κόντρα, η μποκχ, ο νανγκιπέ, ο κίνδυνος, ο σπαθίς;
36 Σαρ ισί γραμμέ: «Τούκε ερεσάσα κο μεριπέ σαρό ο ντιβές. Ο τζενέ ντικχένα-αμέν σαρ μπρακέ σο γκερένα-λεν τι τσσινέν-λεν».
37 Όμως, σαρέ ανταλέντε νικίνασα αντράλ οντουλέσταρ σο μανγκλάς-αμέν.
38 Σόσκε ισινόμ ντιπ σίγουρος ότι ούτε ο μεριπέ ούτε η ζωή ούτε ο άγγελοι ούτε οντουλά σο κερένα κουμάντος ούτε ο πράγματα σο αβένα-πες ακανά ούτε οντουλά σο κα αβέν-πες ούτε καέκ ζορ
39 ούτε ο πράγματα σο ισί οπρέ ούτε ο πράγματα σο ισί τελέ ούτε καέκ γιαβέρ πράγμας σο λατσσάρντιλο ναστί τσσιναβέλα-αμέν κατά αγάπη ι Ντεβλέσκι, σο σικάντιβελα αντράλ κατά Χριστός Ιησούς αμαρέ Κυριόσταρ.
Υποσημειώσεις
^ Γιαβέρσοϊ «εχθρός».
^ Γιαβέρσοϊ «υιοθετιμέ τσσαβέ».
^ Εβραϊκός ή αραμαϊκός λάφι σο μανγκέλα τι βακερέλ «Ντάντε!»
^ Κι Πουρανί Μπαλαμανί βακέρντιβελας «ντέλα μαρτυρία γιεκ αμαρέ πνευμάσαρ».
^ Κι Πουρανί Μπαλαμανί ισινέ ο λάφι «πρώτοι καρποί».
^ Γιαβέρσοϊ «υιοθετιμέ τσσαβέ».
