Ο Γράμμας σο Μπουτσσάντιλο κο Τίτος 1:1-16
1 Ανταβά γράμμας μπουτσσαβάβα-λες με ο Παύλος σο ισινόμ δούλος ι Ντεβλέσκο ντα απόστολος ι Ιησού Χριστόσκο. Τθεράβα ι ίδια πίστη οντουλέντζαρ σο τραμπιντάς ο Ντεβέλ ντα τζανάβα ντιπ λατσσές ι αλήθεια σο σικαβέλα σαρ τι αβέλ εκ τζενό αφοσιωμέ κο Ντεβέλ.
2 Σαρέ ανταλά βασίντιβενα κι ελπίδα σο τθεράσα τι τζουβντιάς για πάντα. Ανταγιά ελπίδα ισί σο ντινάς πο λάφι ο Ντεβέλ πριν μπουτ βακίτι, ντα ο Ντεβέλ ναστί βακερέλα ψέματα.
3 Αλλά κάνα αβιλό ο βακίτι, μουτθαντάς πο λάφι αντράλ κατά λατσσέ αμπέρια, σο τραμπίντιλομ με για τι βακεράβ-λεν αντικάς σαρ ντινάς εντολή αμαρό Ντεβέλ σο σώνελα-αμέν.
4 Γραφίναβα κο Τίτος, σο ισί εκ αληθινός τσσαβό κι πίστη σο τθεράσα αμέν-ντα:
Προσευχίντιβαβα τι τθερές μπαρό λατσσιπέ ντα ειρήνη κατά Ντεβέλ αμαρέ Νταντέσταρ ντα κατά Χριστός Ιησούς σο σώνελα-αμέν.
5 Μουκχλόμ-τουτ κι Κρήτη για τι τακτοποιήνες ο πράγματα σο πρέπει τι διορθώντιβεν ντα τι διορίνες πρεσβυτερόν κι κάθε πόλη, αντικάς σαρ ισί ο οδηγίες σο ντινόμ-τουτ:
6 Εκ πρεσβύτερος πρέπει τι αβέλ τζενό σο καέκ να κατηγορίνελα-λες, τι τθερέλ σάντε εκχέ ρομνιά ντα πιστέ τσσαβέν σο να κατηγορίντιβενα ότι κερένα μπέτι πράγματα* ή ότι τζάνα κόντρα.
7 Σαρ υπηρέτης ι Ντεβλέσκο, εκ πρεσβύτερος* πρέπει τι αβέλ τζενό σο καέκ να κατηγορίνελα-λες, μα τι αβέλ πφαρέ σορέσκο, μα τι χολιάνελ εύκολα, μα τι ματιόλ, μα τι κερέλ ζιάνι κο γιαβερά, μα τι μανγκέλ τι κερδίνελ πράγματα πι νεαυτόσκε μπέτι τροπόσαρ.
8 Αλλά τι αβέλ φιλόξενος,* τι μανγκέλ ο λατσσιπέ, τι αβέλ γκοντιαβέρ,* δίκαιος ντα αφοσιωμέ, τι ατσσικιαρέλ πο νεαυτός,
9 τι ατσσόλ σταθερός κο πιστός λάφι* σαρ λατσσό δάσκαλος, ντα αντικάς τι μπορίνελ εμ τι ντελ ζορ πι λατσσέ σικλιαριμάσαρ εμ τι διορθώνελ οντουλέν σο τζάνα κόντρα ανταλέ σικλιαριμάστε.
10 Υπαρχίντιβενα μπουτ τζενέ σο τζάνα κόντρα, σο να κερένα λατσσιπέ πουμαρέ λαφίντζαρ ντα σο χουχαβένα ι γιαβερέν. Μπουτ λένταρ βακερένα ότι πρέπει τι αβέλ-πες περιτομή.
11 Πρέπει τι πφάντες ο μούι ανταλέ τζενένγκο, επειδή καταστραφίνενα ι πίστη σαστέ φαμιλίνγκι κάνα σικλιαρένα πράγματα σο ισί λάθος για τι κερδίνεν πράγματα πουμαρέ νεαυτόσκε μπέτι τροπόσαρ.
12 Εκ τζενό λένταρ, προφήτης λένγκο, βακερντάς: «Ο Κρητικοί ισί πάντα ψεύτες, σαρ άγρια ζώα, τεμπέληδες ντα μερένα χαμπέσκε».
13 Ανταλά λάφια ισί μπαγιά. Οτθάρ, τι διορθώνες-λεν αυστηρά για τι αβέλ λένγκι πίστη ζουρανί
14 ντα για μα τι ντεν προσοχή κο ψεύτικες ιστορίες σο βακερένα ο Ιουδαίοι ντα κο εντολές τζενένγκε σο νασένα ντουρ κατά αλήθεια.
15 Ι πάκι τζενένγκε σαρέ ο πράγματα ισί πάκι. Αλλά ι μαγαριμέ τζενένγκε σο να τθερένα πίστη τίποτα νανέ πάκι, σόσκε εμ λένγκι γκοντί εμ λένγκι συνείδηση* μαγαρισάλε.
16 Βον βακερένα ανγκλάλ κο τζενέ ότι τζανένα ι Ντεβλές, αλλά οντουλέντζαρ σο κερένα σικαβένα ότι να τζανένα-λες, σόσκε κερένα τζουνγκαλέ πράγματα, να ντένα καν ντα να χρησιμοποιήντιβενα καεκχέ λατσσέ πραγμάσκε.
Υποσημειώσεις
^ Γιαβέρσοϊ «ότι κερένα πράγματα χωρίς όρια».
^ Κι Πουρανί Μπαλαμανί βακέρντιβελας «επίσκοπος».
^ Γιαβέρσοϊ «τι σικαβέλ λατσσιπέ κο ξένοι».
^ Γιαβέρσοϊ «λογικός».
^ Γιαβέρσοϊ «κο λάφι σο μπορίνασα τι ντας λέσκε μπέσα».
