Ο Γράμμας σο Μπουτσσάντιλο κο Τίτος 2:1-15
2 Τούι όμως τι βακερές πράγματα σο συμφωνίνενα ι λατσσέ σικλιαριμάσαρ.
2 Ο πφουρέ μουρσά τι αβέν ισορροπημέ σαρέ κο πράγματα, σοβαροί, γκοντιαβέρ ντα ζουρανέ κι πίστη, κι αγάπη ντα κι υπομονή.
3 Ο πφουρέ τζουβλιά-ντα τι συμπεριφερίντιβεν τροπόσαρ σο σικαβέλα ότι σεβάνενα ι Ντεβλές, μα τι τσσουβέν ψεύτικα λάφια καεκχέσκε ντα μα τι αβέν σικλέ τι πιν μπουτ μολ. Τι αβέν τζενιά σο σικλιαρένα ο λατσσιπέ,
4 ντα αντικάς τι ντεν συμβουλές* ι πο τερνέ τζουβλίν τι μανγκέν πουμαρέ ρομές, τι μανγκέν πουμαρέ τσσαβέν,
5 τι αβέν γκοντιαβέρ, πάκι κι γκοντί ντα οντουλέντε σο κερένα, μπουτιαρνέ κο κχερ,* λατσσέ, τι ντεν καν πουμαρέ ρομές, ντα αντικάς καέκ μα τι τθερέλ τι βακερέλ κάτι μπέτι ι Ντεβλέσκε λαφίσκε.
6 Τι βακερές ι τερνέ μουρσένγκε-ντα τι αβέν γκοντιαβέρ,
7 ντα τι αβές λατσσό παράδειγμας σαρέ κο λατσσέ πράγματα σο κερέσα τι ζωγιάτε. Τι σικλιαρές λατσσές σο-ντα ισί πάκι.*
8 Τι κερές-λες ανταβά ι λατσσέ σικλιαριμάσαρ, για μα τι μπορίνελ καέκ τι κρίνελ-τουτ. Αντικάς, οντουλά σο τζάνα αμέντζαρ κόντρα κα λατζάντιβεν, σόσκε να κα τθερέν τι βακερέν τίποτα μπέτι αμένγκε.
9 Οντουλά σο ισί δούλοι τι ντεν καν πουμαρέ κυριόν σαρέ κο πράγματα ντα τι προσπαθίνεν τι κερέν λένγκο γκι, μα τι τζαν λέντζαρ κόντρα πουμαρέ λαφίντζαρ
10 ντα μα τι τσορέν λένταρ. Αλλά τι σικαβέν ότι αξίνενα πουμαρέ κυριόνγκι μπέσα, ντα αντικάς τι κερέν πο σουκάρ ο σικλιαριπέ αμαρέ Ντεβλέσκο σο σώνελα-αμέν.
11 Σικάντιλο ι Ντεβλέσκο μπαρό λατσσιπέ,* σο σώνελα σαβέ τι μανγκές τζενέν.
12 Ανταβά λατσσιπέ σικλιαρέλα-αμέν τι κεράς πέρα ο πράγματα σο τζάνα κόντρα κο Ντεβέλ ντα ο πράγματα σο μανγκέλα ο ντουνιάς. Σικλιαρέλα-αμέν τι τζουβντιάς γκοντιαβέρ τροπόσαρ, τι αβάς δίκαιοι ντα αφοσιωμέ κο Ντεβέλ καζόμ ισινάμ ανταλέ ντουνιάστε,*
13 καζόμ μπεσάσα τι νικιόλ μπαγιά αμαρί σουκάρ ελπίδα ντα τι σικαβέλ πι ζορ αμαρό μπαρό Ντεβέλ ντα Οντουβά σο σώνελα-αμέν, ο Ιησούς Χριστός.
14 Βοβ ντινάς πι ζωή αμένγκε για τι ελευθερώνελ-αμέν σαβέ τι μανγκές γκεραλέ* πραγματένταρ ντα τι αγιάνελ εκχέ λαός σο ισί σάντε λέσκο ντα σο κερέλα λατσσέ πράγματα σαρέ πι γκίσαρ.
15 Τι βακερές ανταλά πράγματα, τι ντες ζορ ντα τι διορθώνες, αφού ανταλέσκε μπουτσσάντιλαν. Καέκ μα τι πακιάλ ότι να τθερέσα αξία.
Υποσημειώσεις
^ Γιαβέρσοϊ «τι σικλιαρέν».
^ Γιαβέρσοϊ «τι φροντίνεν πουμαρό κχερ».
^ Ή μπέκιμ «λατσσές πάκι τροπόσαρ».
^ Γιαβέρσοϊ «μπίλατσσε, κακέ».
