Ο Γράμμας σο Μπουτσσάντιλο κο Τίτος 3:1-15
3 Τι ανές λένγκε γκοντιάτε ότι πρέπει τι ντεν καν κο κυβερνήσεις ντα οντουλέντε σο κερένα κουμάντος, τι αβέν έτοιμοι τι κερέν κάθε λατσσό πράγμας,
2 μα τι βακερέν μπέτι λάφια καεκχέσκε ντα μα τι χαν-πες. Αλλά τι αβέν λογικοί ντα τι αβέν πάντα κοβλέ γκίσκε σαρέ ι τζενέντζαρ.
3 Αμέν-ντα ανγκλέ να ισινάμας γκοντιαβέρ, να ντάας καν, χουχάντιλαμας κατά γιαβερά, ισινάμας δούλοι διάφορε πραγματέντε σο μανγκάας ντα ντικχάας σάντε ο απολαύσεις, τζουβντιάας τροπόσαρ σο ισινέ γκεραλό* ντα πφερντό ζήλια,* κεράας τζουνγκαλέ πράγματα ντα μισίναας ο εκ ι γιαβερές.
4 Αλλά αμαρό Ντεβέλ σο σώνελα-αμέν σικαντάς κο τζενέ πο λατσσιπέ ντα πι αγάπη.
5 Να σωντάς-αμέν επειδή κερντάμ δίκαια πράγματα, αλλά επειδή τζιτζισάλο* αμένγκε. Βοβ σωντάς-αμέν κάνα τθοντάς-αμέν πανίσαρ σο κερντάς-αμέν τι λας ζωή ντα κάνα χρησιμοποιηντάς πο άγιος πνεύμας για τι κερέλ-αμέν νεβέ τζενέ.
6 Αντράλ κατά Ιησούς Χριστός σο σωντάς-αμέν, πφερντάς-αμέν πι πνευμάσαρ
7 για τι αβάς τζενέ σο τθερένα ι ελπίδα τι λεν* ζωή για πάντα χάρη κο μπαρό λατσσιπέ σο σικαβέλα αμένγκε ντα σο κερέλα-λες τι ντικχέλ-αμέν σαρ δίκαια τζενέ.
8 Ανταλά λάφια ισί μπαγιά, ντα μανγκάβα τι βακερές ότι ισί μπουτ σημαντικά, ντα αντικάς οντουλά σο πακιαντέ κο Ντεβέλ τι τθερέν πουμαρέ γκοντιάτε τι κερέν λατσσέ πράγματα. Ανταλά πράγματα ισί λατσσέ ντα βοηθίνενα ι τζενέν.
9 Τι ατσσός ντουρ λαφίνταρ σο ισί ντινιλικανέ, μα τι ρόντες κατάρ αστάρντιβελα εκ τζενό ντα μα τι χας-τουτ πραγματένγκε σο τθερένα τι κερέν με το Νόμος, σόσκε ανταλά να τθερένα αξία ντα να κερένα λατσσιπέ.
10 Άμα εκ τζενό σικλιαρέλα ψεύτικα πράγματα, πρέπει τι προειδοποιήνες-λες. Αλλά άμα προειδοποιηντάν-λες* ντούι φαρ, ντα να ασουντάς-τουτ, δεν πρέπει τι τθερές καέκ σχέση λέσαρ,
11 σόσκε τζανέσα ότι εκ ασακό τζενό νασλό ντουρ κατά σωστός ντρομ ντα κρίντιλο πι αμαρτιένταρ.
12 Κάνα κα βακεράβ τι αβέλ τούτε ο Αρτεμάς ή ο Τυχικός, κερ ο πο λατσσό για τι αβές μάντε κι Νικόπολη, σόσκε αποφασιντόμ τι μπεσάβ σαρό ο βεν* οτθέ.
13 Κερ σο μπορίνεσα για τι ντες βοήθεια κο Ζηνάς, σο τζανέλα λατσσές ο Νόμος, ντα κο Απολλώς, για μα τι λειπίνελ λένταρ τίποτα κο ταξίδι.
14 Ντα πρέπει τι σικλιόν αμαρέ πφραλά-ντα τι συνεχίνεν τι κερέν λατσσέ πράγματα για τι βοηθίνεν κάνα-ντα ισί ανάγκη. Αντικάς πάντα κα κερέν λατσσέ πράγματα.
15 Κερένα τούκε σελιάμι* σαρέ οντουλά σο ισί μάντζαρ. Κερ σελιάμι οντουλένγκε σο ισί κι πίστη ντα μανγκένα-αμέν αντράλ πουμαρέ γκίσταρ.
Ο μπαρό λατσσιπέ ι Ντεβλέσκο τι αβέλ σαρέ τουμέντζαρ.
Υποσημειώσεις
^ Γιαβέρσοϊ «μπίλατσσο, κακός».
^ Γιαβέρσοϊ «ζήλια πφερντί μίσος».
^ Κι Πουρανί Μπαλαμανί ισινέ ο λάφι «κληρονόμοι».
^ Γιαβέρσοϊ «άμα ντινάν-λες συμβουλή».
^ Γιαβέρσοϊ «χειμώνας».
^ Γιαβέρσοϊ «Μπουτσσαβένα τούκε χαιρετίσματα».
