Ο Γράμμας σο Μπουτσσάντιλο κο Φιλιππήσιοι 1:1-30
-
Πρώτα λάφια (1, 2)
-
Ο Παύλος βακερέλα ευχαριστώ κο Ντεβέλ. Λέσκι προσευχή (3-11)
-
Ο λατσσέ αμπέρια μουτθάντιβενα ατζέ πο μπουτ παρόλο σο ισί προβλήματα (12-20)
-
«Άμα τζουβντιάβα, τζουβντιάβα ι Χριστόσκε, ντα άμα κα μεράβ, κα αβέλ μι λατσσιμάσκε» (21-26)
-
Τι τζουβντιόν τροπόσαρ σο σικαβέλα ότι ισινέν τζενέ σο μουτθαβένα ο λατσσέ αμπέρια (27-30)
1 Με ο Παύλος ντα ο Τιμόθεος, σο ισινάμ δούλοι ι Χριστόσκε, ι Ιησούσκε, μπουτσσαβάσα ανταβά γράμμας σαρέ κο άγιοι κο Φίλιπποι σο ισί μαθητές ι Χριστόσκε, ι Ιησούσκε, γιεκ ι πρεσβυτερόντζαρ* ντα ι διακονικέ υπηρετόντζαρ:
2 Προσευχίντιβαβα τι τθερέν μπαρό λατσσιπέ ντα ειρήνη κατά Ντεβέλ αμαρέ Νταντέσταρ ντα κατά Κύριος Ιησούς Χριστός.
3 Βακεράβα πάντα ευχαριστώ κο Ντεβέλ κάνα σκεφτίναβα-τουμέν.
4 Κάθε φαρ σο μολίναβα* ι Ντεβλές σαρέ τουμένγκε, κεράβα-λες ανταβά χαράσαρ,
5 σόσκε βοηθιντέν τι μουτθάντιβεν ο λατσσέ αμπέρια κατά πρώτος ντιβές σο ασουντέν-λεν μέχρι ακανά.
6 Ισινόμ σίγουρος ότι, μέχρι κο ντιβές κι Ιησού Χριστόσκο, ο Ντεβέλ κα μπιτισκιαρέλ ι λατσσί μπουτί σο αρχιντάς τι κερέλ αντρέ τουμέντε.
7 Ισί μπουτ σωστός μάνγκε τι σκεφτίναβ-λες ανταβά τουμένγκε, αφού τθεράβα-τουμέν αντρέ μι γκίστε ντα λιντέν γιεκ μάντζαρ μπαρό λατσσιπέ κατά Ντεβέλ. Σαρέ βοηθιντέν-μαν εμ ακανά σο ισινόμ κι φυλακή εμ κάνα κεράβας λάφι κο τζενέ σο κυβερνίνενα για τι λαβ ο δικαίωμας τι μουτθαβάβ ο λατσσέ αμπέρια.
8 Ο Ντεβέλ τζανέλα καζόμ μπουτ μανγκάβα τι ντικχάβ-τουμέν σαριλέν. Μι αγάπη τουμένγκε ισί σαρ οντιά σο τθερέλα τουμένγκε ο Χριστός Ιησούς.
9 Ντα συνεχίναβα τι προσευχίντιβαβ τι μπαριόλ ατζέ πο μπουτ τουμαρί αγάπη ντα τι σικλιόν ντα τι αγαβέν ντιπ λατσσές ατζέ πο μπουτ πράγματα
10 για τι αβέν σίγουροι καλά ισί ο πο σημαντικά πράγματα. Αντικάς κα αβέν ντιπ πάκι, να κα κερέν ι γιαβερέν τι χασαρέν πουμαρί πίστη* μέχρι κο ντιβές κι Χριστόσκο
11 ντα κα μπορίνεν τι κερέν μπερεκέτι λατσσέ πράγματα* χάρη κο Ιησούς Χριστός για τι ντιντιόλ δόξα ντα ισαριπέ κο Ντεβέλ.
12 Πφραλάλεν, μανγκάβα τι τζανέν ότι ο πράγματα σο αβιλέ-πες μάνγκε βοηθιντέ μπαγιά τι μουτθάντιβεν ο λατσσέ αμπέρια ατζέ πο μπουτ,
13 σόσκε σαρέ οντουλά σο αρακχαβένα ι βασιλιάς* ντα σαρέ ο γιαβερά σικλιλέ ότι ισινόμ κι φυλακή σαρ υπηρέτης ι Χριστόσκο.
14 Ντα ο πο μπουτ πφραλά σο υπηρετίνενα ι Κυριός λιντέ μπουτ ζορ επειδή ισινόμ κι φυλακή ντα μουτθαβένα ατζέ πο μπουτ ο λάφι ι Ντεβλέσκο χωρίς τι νταρέν.
15 Ισί μπαγιά ότι μερικοί μουτθαβένα ο λατσσέ αμπέρια ι Χριστόσκε επειδή τθερένα ζήλια πφερντί μίσος ντα χάνα-πες, αλλά γιαβερά κερένα-λες ανταβά λατσσέ γκίσαρ.
16 Μουτθαβένα ο αμπέρια σο τθερένα τι κερέν ι Χριστόσαρ επειδή τθερένα αγάπη. Τζανένα ότι ο Ντεβέλ τραμπιντάς-μαν τι μουτθαβάβ ο λατσσέ αμπέρια.
17 Αλλά οντουλά σο μουτθαβένα-λεν επειδή ζηλίνενα ντα χάνα-πες να κερένα-λες ανταβά πάκι γκίσαρ, ντα μανγκένα τι ανέν μάνγκε προβλήματα καζόμ ισινόμ κι φυλακή.
18 Καβά ισί ο αποτέλεσμας; Ο τζενέ ασουνένα ο αμπέρια ι Χριστόσκε είτε μουτθάντιβενα πάκι γκίσαρ είτε όχι. Χαιρίναβα ανταλέσκε, ντα κα συνεχίναβ τι χαιρίναβ,
19 σόσκε τζανάβα ότι κα σώντιβαβ χάρη κο προσευχές* σο κερένα ντα κο άγιος πνεύμας σο ντέλα-αμέν ο Ιησούς Χριστός.
20 Ισινόμ σίγουρος ντα πακιάβα ότι να κα λατζάβ καεκχέ πραγμάσκε. Αλλά επειδή κεράβα λάφι μπίνταρανες, δοξάναβα ι Χριστός ακανά, σαρ δοξάναβας-λες ανγκλέ-ντα. Κα δοξάναβ-λες* είτε μι ζωγιάσαρ είτε μι μεριμάσαρ.
21 Άμα τζουβντιάβα, τζουβντιάβα ι Χριστόσκε, ντα άμα κα μεράβ, κα αβέλ μι λατσσιμάσκε.
22 Άμα κα συνεχίναβ τι τζουβντιάβ κι πφουβ,* κα κεράβ πο μπουτ πράγματα κι υπηρεσία κι Χριστόσκι. Όμως, νανέ ότι βακεράβα σο κα τραμπίναβας.
23 Να τζανάβα καβά κατά ντούι κα τραμπίναβας, σόσκε μανγκάβα μπαγιά τι ελευθερώντιβαβ ανταλέ σωμάσταρ ντα τι αβάβ γιεκ ι Χριστόσαρ. Σίγουρα, ανταβά ισί μπουτ πο λατσσό.
24 Όμως, ισί τουμαρέ λατσσιμάσκε τι συνεχίναβ τι τζουβντιάβ κι πφουβ.
25 Αφού ισινόμ σίγουρος ανταλέσκε, τζανάβα ότι κα συνεχίναβ τι αβάβ σαρέ τουμέντζαρ για τι τζαν-λεν λατσσές ντα τι λεν χαρά κατά πίστη.
26 Κάνα κα αβάβ πάλι τουμέντε, τουμαρί μπέσα κο Χριστός Ιησούς κα μπαριόλ πο μπουτ χάρη μάνταρ.
27 Οντουβά σο μανγκάβα τουμένταρ σάντε ισί τι τζουβντιόν τροπόσαρ σο σικαβέλα ότι ισινέν τζενέ σο μουτθαβένα ο λατσσέ αμπέρια ι Χριστόσκε. Αντικάς, είτε κα αβάβ οτθέ τι ντικχάβ-τουμέν είτε να κα αβάβ, τι ασουνάβ λατσσέ πράγματα τουμένγκε ντα τι σικλιάβ ότι σαρέ γιεκ* ισινέν σταθεροί ντα ενωμέ,* καζόμ κερένα μπουτί γιεκ για τι ατσσικιαρέν τουμαρί πίστη κο λατσσέ αμπέρια.
28 Ποτές μα νταρέν οντουλένταρ σο τζάνα τουμέντζαρ κόντρα. Αντικάς σικάντιβελα ότι βον κα καταστραφίντιβεν, αλλά τουμέν κα σώντιβεν. Ανταβά ισί κατά Ντεβέλ.
29 Επειδή ντιντιλί-τουμέν η ευκαιρία, όχι σάντε τι τθερέν πίστη κο Χριστός, αλλά τι τσσίντεν-ντα μπουτ λέσκε.
30 Τσσίντενα ο ίδιες δυσκολίες σο ντικχλέν τι τσσίνταβ με-ντα, ντα σαρ ασουνένα, συνεχίναβα τι τσσίνταβ ασακέ δυσκολίες.
Υποσημειώσεις
^ Κι Πουρανί Μπαλαμανί ισινέ ο λάφι «επίσκοπος».
^ Κι Πουρανί Μπαλαμανί ισινέ ο λάφι «δέηση». Ισί εκ τατί προσευχή σο κερέλα εκ τζενό ντιπ αντράλ πι γκίσταρ ντα νικαβέλα μπουτ ζουρανέ συναισθήματα.
^ Γιαβέρσοϊ «τι περέν».
^ Γιαβέρσοϊ «μπερεκέτι δίκαιος καρπός».
^ Γιαβέρσοϊ «σαρί η Πραιτωριανή Φρουρά».
^ Κι Πουρανί Μπαλαμανί ισινέ ο λάφι «δέηση». Ντικχ εδάφιος Φιλιπ. 1:4, υποσημείωση.
^ Κι Πουρανί Μπαλαμανί βακέρντιβελας «Μο σώμας (κα δοξάνελ-λες)».
^ Γιαβέρσοϊ «κο σώμας».
^ Γιαβέρσοϊ «ότι εκχέ ψυχιάσαρ».
^ Κι Πουρανί Μπαλαμανί βακέρντιβελας «εκχέ πνευμάσαρ».
