Ο Γράμμας σο Μπουτσσάντιλο κο Φιλιππήσιοι 2:1-30
2 Άμα ντένα ζορ ο εκ ι γιαβερές αντράλ κατά Χριστός, άμα λοκχιαρένα μανγκιμάσαρ ο εκ ι γιαβερέσκο γκι,* άμα πφαμπόνα ο εκ ι γιαβερέσκε,* άμα μανγκένα αντράλ τουμαρέ γκίσταρ ο εκ ι γιαβερές ντα αγαβένα ο εκ ι γιαβερέσκι ντουκχ,
2 κα ντεν-μαν μπαρί χαρά. Τι τθερέν ο ίδιος τρόπος σκέψης, τι μανγκέν ο εκ ι γιαβερές ντα τι αβέν ντιπ ενωμέ* οντουλέντε σο κερένα ντα σκεφτίνενα.
3 Τίποτα οντουλένταρ σο κερένα μα τι τθερέλ χολί ή μπαρικανιπέ,* αλλά τι αβέν ταπεινοί ντα τι πακιάν ότι ο γιαβερά ισί πο οπρέ τουμένταρ.
4 Μα τι ντικχέν σάντε τουμαρό λατσσιπέ, αλλά ι γιαβερένγκο-ντα.
5 Συνεχίνεν τι τθερέν ακαβά τρόπος σκέψης σο τθερέλας ο Χριστός Ιησούς:
6 Παρόλο σο ισινέ σαρ ο Ντεβέλ, να νακχλό λέσκε γκοντιάταρ τι λελ ι θέση ι Ντεβλέσκι ντα τι αβέλ ίσος λέσαρ.
7 Νάα! Αλλά μουκχλάς-λεν σαρέ* ντα δεχτιντάς τι αβέλ δούλος ντα αβιλό τζενό.
8 Ντα κάνα αβιλό σαρ τζενό, σικαντάς ότι ισί μπουτ ταπεινός ντα ντινάς καν μέχρι κο μεριπέ, βα, μεριπέ οπράλ κι ντουκχένγκο κας.*
9 Άκ’ σόσκε ο Ντεβέλ τσσουντάς-λες ατζέ πο οπρέ ντα ντινάς-λες λατσσιμάσαρ ο ναβ σο ισί πο οπρέ σαρέ κατά γιαβερά ναβά.
10 Κερντάς-λες ανταβά για τι περέν σαρέ τελέ κοτσίντζαρ ντα αντικάς τι σικαβέν σεβασμός κο ναβ κι Ιησούσκο, εμ οντουλά σο ισί κο ουρανός, εμ οντουλά σο ισί κι πφουβ εμ οντουλά σο ισί τελάλ κατά πφουβ.
11 Ντα σαρέ τι βακερέν ανγκλάλ κο γιαβερά ότι ο Ιησούς Χριστός ισί Κύριος για τι δοξάνελ ι Ντεβλές, αμαρέ Νταντές.
12 Πφραλάλεν, τουμέν πάντα ντένας καν κάνα ισινόμας οτθέ τουμέντζαρ, ντα ακανά σο να ισινόμ τουμέντζαρ ντένα καν ατζέ πο μπουτ. Οτθάρ, συνεχίνεν τι κερέν σο νακχέλα τουμαρέ βαστένταρ με μπουτ σεβασμός ντα νταρ για τι σώντιβεν.
13 Ο Ντεβέλ ισί οντουβά σο κερέλα μπουτί αντρέ τουμέντε για τι μπορίνεν τι κερέν λέσκο γκι, ντα κερέλα-τουμέν εμ τι μανγκέν εμ τι τθερέν ι ζορ τι κερέν-λες ανταβά.
14 Σο-ντα κερένα, μα γκρινιάνεν ντα μα χαν-τουμέν λαφίντζαρ,
15 για τι αβέν πάκι ντα αθώοι, τσσαβέ ι Ντεβλέσκε σο να τθερένα ελλάτωμας, παρόλο σο τζουβντιόνα ανταλέ βακιτίστε* τζενέντζαρ σο ισί γκεραλέ* ντα να κερένα ο σωστός. Αντρέ ανταλέ ντουνιάστε λένα-τουμέν σαρ φως
16 ντα ασταρένα ζουρανές ο λάφι ι Ντεβλέσκο σο ντέλα ζωή. Οτθάρ κο ντιβές κι Χριστόσκο κα τθεράβ λόγος τι χαιρίναβ, σόσκε τζανάβα ότι να τθαβντισάλομ σινανέ ούτε μαρντόμ-μαν σινανέ.
17 Όμως, ατζέ-ντα άμα τσσορντιάβα σαρ μολ οπράλ κι θυσία ντα κι άγια υπηρεσία σο ντένα πιστά κο Ντεβέλ, χαιρίναβα μπουτ γιεκ σαρέ τουμέντζαρ.
18 Αντικάς τουμέν-ντα πρέπει τι χαιρίνεν μπουτ γιεκ μάντζαρ.
19 Πακιάβα ότι, άμα μανγκέλα ο Κύριος Ιησούς, κα μπουτσσαβάβ τουμένγκε ακανά σουγκό ι Τιμοθεός, για τι λαβ ζορ κάνα κα σικλιάβ τουμένγκε.
20 Να τθεράβα καεκχέ γιαβερές σαρ λέστε σο κα πφαμπόλ μπαγιά τουμένγκε.
21 Σαρέ ο γιαβερά ντικχένα σάντε πουμαρό λατσσιπέ, να ντικχένα σο μανγκέλα ο Ιησούς Χριστός.
22 Αλλά σαρ τζανένα τουμέν, ο Τιμόθεος σικαντάς ότι σαρ εκ τσσαβό πι νταντέσαρ υπηρετιντάς σαρ δούλος μάντζαρ για τι μουτθάντιβεν ατζέ πο μπουτ ο λατσσέ αμπέρια.
23 Άρα, λες μανγκάβα τι μπουτσσαβάβ κάνα κα ντικχάβ σο κα αβέλ-πες μάντζαρ.
24 Ισινόμ σίγουρος ότι ο Κύριος κα μουκχέλ-μαν τι αβάβ ακανά σουγκό οτθέ.
25 Ακανά όμως πακιάβα ότι ισί σημαντικός τι αβέλ τουμέντε ο Επαφρόδιτος, σο ισί μο πφραλ, μο συνεργάτης ντα στρατιώτης ι Χριστόσκο γιεκ μάντζαρ. Λες μπουτσσαντένας για τι υπηρετίνελ-μαν.
26 Ακανά μπουτσσαβάβα-λες τουμένγκε, αφού μανγκέλα μπουτ τι ντικχέλ-τουμέν σαριλέν ντα τθερέλα πφανγκό γκι σόσκε ασουντέν ότι νασφάλιλοας.*
27 Ισί μπαγιά ότι ισινέ αζόμ νασφαλό σο γκιλό τι μερέλ. Αλλά ο Ντεβέλ τζιτζισάλο* λέσκε, αλλά εμ μάνγκε, για μα τι νακχάβ ι εκ στεναχώρια σοράν κατά γιαβέρ.
28 Άκ’ σόσκε μπουτσσαβάβα-λες καζόμ πο σουγκό αβέλα-πες για τι χαιρίνεν πάλι κάνα κα ντικχέν-λες, ντα με μα τι αγχώναβ αζόμ μπουτ τουμένγκε.
29 Οτθάρ, καλωσορίνεν-λες χαράσαρ σαρ κερένα κο μαθητές κι Κυριόσκε, ντα σικαβέν εκτίμηση τζενένγκε σαρ ισί βοβ,
30 σόσκε ερεσλό πασέ κο μεριπέ για τι υπηρετίνελ ι Χριστός,* ντα τσσουντάς πι ζωή* σε κίνδυνος μάνγκε, αφού τουμέν ναστί αβένας ατθέ για τι βοηθίνεν-μαν.
Υποσημειώσεις
^ Γιαβέρσοϊ «άμα κοβλιαρένα μανγκιμάσαρ ο εκ ι γιαβερέσκι ντουκχ».
^ Κι Πουρανί Μπαλαμανί βακέρντιβελας «άμα υπαρχίντιβελα συμμετοχή κο πνεύμας».
^ Γιαβέρσοϊ «ενωμέ κι ψυχή».
^ Γιαβέρσοϊ «εγωισμός».
^ Κι Πουρανί Μπαλαμανί βακέρντιβελας «Αλλά τσουτσαρντάς πο νεαυτός».
^ Κι Πουρανί Μπαλαμανί βακέρντιβελας «ανταλέ γενιάτε».
^ Γιαβέρσοϊ «μπίλατσσε, κακοί».
^ Γιαβέρσοϊ «πασλιλόας, αμπορεψάλοας».
^ Ή μπέκιμ «ι Κυριός».
^ Γιαβέρσοϊ «ψυχή».
