Ο Πρώτος Γράμμας σο Μπουτσσάντιλο κο Θεσσαλονικείς 2:1-20
2 Πφραλάλεν, σίγουρα τζανένα ότι να αβιλάμ τουμέντε σινανέ.
2 Αφού πρώτα νακχλάμ μπουτ, ντα σαρ τζανένα, τσσιντικιαρντέ-αμέν μπουτ* κο Φίλιπποι, ο Ντεβέλ κερντάς-αμέν τι αβάς μπίνταρανε* για τι βακεράς τουμένγκε ο λατσσέ αμπέρια παρόλο σο τζάνας αμέντζαρ μπαρί κόντρα ο τζενέ.*
3 Οντουλά σο βακεράσα τουμένγκε τι κερέν νανέ λάθος, βακεράσα-λεν πάκι γκίσαρ ντα να μανγκάσα τι χουχαβάς-τουμέν.
4 Αλλά κεράσα λάφι σαρ τζενέ σο τραμπιντάς-λεν ο Ντεβέλ τι βακερέν ο λατσσέ αμπέρια. Να βακεράσα-λεν ανταλά για τι κεράς ο γκι ι τζενένγκο, αλλά ι Ντεβλέσκο, σο ρόντελα ντιπ λατσσές σο τθεράσα αντρέ αμαρέ γκίστε.
5 Τουμέν τζανένα ότι ποτές να ισαρντάμ-τουμέν ψεύτικε λαφίντζαρ ούτε κερντάμ ότι ισινάμ λατσσέ τζενέ για τι λας τουμένταρ κάτι. Ο Ντεβέλ τζανέλα-λες ανταβά μπουτ λατσσές!
6 Ούτε μανγκλάμ τι ισαρέν-αμέν ο τζενέ, είτε τουμέν είτε ο γιαβερά. Σαρ απόστολοι ι Χριστόσκε, κα μπορίναας τι μανγκάς τουμένταρ τι χαλαβέν λοβέ αμένγκε για τι τθεράς οντουλά σο χρειαζίντιβασα.
7 Οκιά μπάνταρ, σικαντάμ τουμένγκε μπουτ μπαρί αγάπη σαρ εκ ντάι σο παρβαρέλα ντα φροντίνελα πι μαξιμίς.
8 Οτθάρ, επειδή μανγκάσα-τουμέν μπουτ, ισινάμας έτοιμοι σαρέ αμαρέ γκίσαρ, όχι σάντε τι βακεράς τουμένγκε ο λατσσέ αμπέρια ι Ντεβλέσκε, αλλά τι ντας αμαρί ζωή-ντα* τουμένγκε.
9 Πφραλάλεν, σίγουρα ντένα-τουμέν γκοντί ο μπαρέ προσπάθειες σο κερντάμ ντα καζόμ μπουτ κχινίλαμ. Κάνα μουτθαντάμ τουμένγκε ο λατσσέ αμπέρια, κεράας μπουτί ντισάρα ντα ιράτ για τι τθεράς οντουλά σο χρειαζίντιβασα, ντα αντικάς μα τι μανγκάς καεκχέσταρ τι χαλαβέλ λοβέ αμένγκε.
10 Τουμέν σο ισινέν πιστοί τζανένα, αλλά εμ ο Ντεβέλ τζανέλα, ότι ισινάμας αφοσιωμέ, δίκαιοι ντα σωστοί τουμέντζαρ.
11 Τζανένα λατσσές ότι σικλιαράας-τουμέν, λοκχιαράας τουμαρό γκι* ντα ντάας συμβουλές ι κάθε εκχές τουμένταρ, σαρ κερέλα εκ ντατ πι τσσαβένγκε,
12 για τι τζουβντιόν αντικάς σαρ μανγκέλα ο Ντεβέλ σο ντέλα-τουμέν βίκος τι αβέν λέσκε Βασιλειάτε ντα κι δόξα σο τθερέλα.
13 Οτθάρ αμέν-ντα να τσσιναβάσα τι βακεράς ευχαριστώ κο Ντεβέλ, επειδή κάνα ασουντέν ο λάφι ι Ντεβλέσκο αμένταρ, να δεχτιντέν-λες σαρ ο λάφι τζενένγκο, αλλά αντικάς σαρ ισί μπαγιά, σαρ ο λάφι ι Ντεβλέσκο. Ανταβά λάφι κερέλα μπουτί αντρέ τουμέντε σο ισινέν πιστοί.
14 Ντα τουμέν, πφραλάλεν, νακχλέν ο ίδια πράγματα σο νακχλέ ι Ντεβλέσκε κχανγκιριά σο ισί κι Ιουδαία ντα ισί ενωμέ ι Χριστόσαρ, ι Ιησούσαρ. Οντουλά σο ισί τουμαρέ τθεμέσταρ κερντέ-τουμέν τι τσσίντεν ο ίδια πράγματα σο τσσίντενα βον κατά Ιουδαίοι,
15 σο μουνταρντέ ατζέ-ντα ι Κυριός Ιησούς, ντα ι προφητέν ντα γκιλέ κόντρα αμέντζαρ. Βον να κερένα ο γκι ι Ντεβλέσκο, αλλά κερένα ζιάνι σαρέ κο τζενέ.
16 Κάνα κεράσα λάφι κο τζενέ σο ισί γιαβερέ τθεμένταρ για τι σώντιβεν, ο Ιουδαίοι μανγκένα τι τσσιναβέν-αμέν. Αντικάς, αμαρτίνενα ατζέ πο μπουτ. Αλλά ατζεχάνικ η μπαρί χολί ι Ντεβλέσκι κα αβέλ οπρά-λέντε.
17 Πφραλάλεν, κάνα κερντέ-αμέν τι νασάς τουμένταρ, να μπορίναας τι ντικχάς-τουμέν αλλά να μπισταρντάμ-τουμέν. Κερντάμ σο νακχέλα αμαρέ βαστένταρ για τι ντικχάς-τουμέν επειδή μανγκάας-λες μπουτ.
18 Άκ’ ανταλέσκε μανγκλάμ τι αβάς οτθέ τουμέντε. Βα, με, ο Παύλος, μανγκάβας τι αβάβ τουμέντε όχι σάντε εκ φαρ αλλά ντούι φαρ. Όμως, ο Μπενγκ πφαντάς αμαρό ντρομ.
19 Καγιά ισί αμαρί ελπίδα, αμαρί χαρά ή ο στεφάνι σο ντέλα-αμέν μπαρί χαρά ανγκλάλ αμαρέ Κυριόστε κο Ιησούς κάνα κα βουρτίνελ; Τουμέν να ισινέν;
20 Σίγουρα τουμέν ισινέν αμαρί δόξα ντα αμαρί χαρά.
Υποσημειώσεις
^ Γιαβέρσοϊ «συμπεριφερισάλε αμένγκε μπέτι ντα άγρια».
^ Γιαβέρσοϊ «ο Ντεβέλ ντινάς-αμέν θάρρος».
^ Ή μπέκιμ «ο λατσσέ αμπέρια με μπαρό αγώνας».
^ Γιαβέρσοϊ «ψυχή-ντα».
^ Γιαβέρσοϊ «κοβλιαράας τουμαρί ντουκχ».
