Ο Πρώτος Γράμμας σο Μπουτσσάντιλο κο Θεσσαλονικείς 3:1-13
3 Οτθάρ, μανγκάας αζόμ μπουτ τι σικλιάς τουμένγκε σο σκεφτιντάμ ότι ο πο λατσσό κα αβέλας τι μπεσάς κορκορέ κι Αθήνα
2 ντα τι μπουτσσαβάς τουμένγκε ι Τιμοθεός, αμαρέ πφραλές, σο ισί υπηρέτης ι Ντεβλέσκο* ντα μουτθαβέλα ο λατσσέ αμπέρια σο τθερένα τι κερέν ι Χριστόσαρ. Μπουτσσαβάσα-λες τουμένγκε για τι κερέλ-τουμέν τι αβέν σταθεροί* ντα τι κοβλιαρέλ τουμαρί ντουκχ* ντα αντικάς τι κερέλ τουμαρί πίστη ζουρανί
3 για μα τι χασαρέλ καέκ πι ζορ ανταλέ στεναχωριένταρ. Επειδή τουμέν-ντα τζανένα ότι ναστί νασάσα ανταλέ προβληματένταρ.*
4 Κάνα ισινάμας τουμέντζαρ, βακεράας τουμένγκε ότι κα νακχάας στεναχώρια, ντα σαρ τζανένα, αβιλό-πες ντιπ ανταβά.
5 Άκ’ σόσκε, κάνα μανγκάβας τι σικλιάβ τουμένγκε, μπουτσσαντόμ ι Τιμοθεός για τι σικλιάβ καζόμ μπέσα ντένα κο Ντεβέλ, σόσκε νταράβας ότι μπορεί τι πελέν κο πειρασμοί κι Μπενγκέσκε ντα τι μαρντάμ-αμέν σινανέ.
6 Αλλά ο Τιμόθεος μόλις ακανά βουρτισάλο οτθάρ ντα αντάς αμένγκε λατσσέ αμπέρια τουμένγκε. Βακερντάς αμένγκε καζόμ μπέσα ντένα κο Ντεβέλ ντα καζόμ μπουτ μανγκένα ι γιαβερέν, ότι πάντα χαιρίνενα κάνα ανένα-αμέν τουμαρέ γκοντιάτε ντα ότι μανγκένα τι ντικχέν-αμέν σαρ αμέν-ντα μανγκάσα τι ντικχάς-τουμέν.
7 Οτθάρ, πφραλάλεν, παρόλο σο τθεράσα αζόμ ταλαιπωρία* ντα στεναχώρια, κοβλιλί αμαρί ντουκχ* χάρη τουμένταρ ντα κι μπέσα σο ντένα κο Ντεβέλ.
8 Ακανά σο τζανάσα ότι ατσσόνα σταθεροί κο Κύριος, λάσα μπαρί ζορ.*
9 Βακεράσα ευχαριστώ κο Ντεβέλ τουμένγκε, σόσκε ντένα-αμέν μπαρί χαρά.
10 Ντισάρα ντα ιράτ μολίνασα* ι Ντεβλές αντράλ αμαρέ γκίσταρ για τι ντικχάς-τουμέν ντα τι βοηθίνας-τουμέν σαρέ οντουλέντε σο χρειαζίντιβενα για τι αβέλ τουμαρί πίστη ατζέ πο ζουρανί.
11 Προσευχίντιβασα κο Ντεβέλ σο ισί αμαρό Ντατ τι πουτρέλ αμένγκε γιεκ ι Ιησούσαρ, αμαρέ Κυριόσαρ, ο ντρομ για τι αβάς τουμέντε.
12 Μανγκάσα τι κερέλ-τουμέν ο Κύριος τι μανγκέν ατζέ πο μπουτ ο εκ ι γιαβερές ντα σαριλέν, σαρ μανγκάσα-τουμέν αμέν.
13 Αντικάς, κα κερέλ-τουμέν τι αβέν σταθεροί, σωστοί ντα άγιοι κο γιακχά κι Ντεβλέσκε, αμαρέ Νταντέσκε, κάνα κα βουρτίνελ αμαρό Κύριος, ο Ιησούς, σαρέ πι αγιόντζαρ.
Υποσημειώσεις
^ Ή μπέκιμ «σο κερέλα μπουτί γιεκ ι Ντεβλέσαρ».
^ Γιαβέρσοϊ «για τι ντελ-τουμέν ζορ».
^ Γιαβέρσοϊ «ντα τι λοκχιαρέλ τουμαρό γκι».
^ Γιαβέρσοϊ «ότι τραμπίντιλαμ τι νακχάς-λες ανταβά».
^ Κι Πουρανί Μπαλαμανί βακέρντιβελας «ανάγκη».
^ Γιαβέρσοϊ «λοκχιλό αμαρό γκι».
^ Κι Πουρανί Μπαλαμανί βακέρντιβελας «τζουβντιάσα».
^ Κι Πουρανί Μπαλαμανί ισινέ ο λάφι «δέηση». Ισί εκ τατί προσευχή σο κερέλα εκ τζενό ντιπ αντράλ πι γκίσταρ ντα νικαβέλα μπουτ ζουρανέ συναισθήματα.
