Ο Πρώτος Γράμμας σο Μπουτσσάντιλο κο Θεσσαλονικείς 4:1-18
4 Πφραλάλεν, τζουβντιόνα τροπόσαρ σο κερέλα ο γκι ι Ντεβλέσκο αντικάς σαρ σικλιαρντάμ-τουμέν. Αλλά ακανά κο ναβ κι Κυριόσκο, κι Ιησούσκο, βακεράσα τουμένγκε ντα μολίνασα-τουμέν τι κερέν-λες ανταβά ατζέ πο μπουτ.
2 Επειδή τζανένα οντουλά σο σικλιαρντάμ-τουμέν* αντράλ κατά Κύριος Ιησούς.
3 Οντουβά σο μανγκέλα ο Ντεβέλ ισί τι αβέν άγιοι ντα τι ατσσόν ντουρ κατά λουμνιπέ.*
4 Ο κάθε εκ τουμένταρ πρέπει τι τζανέλ σαρ τι κερέλ κουμάντος πο σώμας για τι αβέλ άγιος ντα τι κερέλ ο γκι ι Ντεβλέσκο.*
5 Μα τι αβέν σαρ ο τζενέ σο ισί γιαβερέ τθεμένταρ ντα σο να τζανένα ι Ντεβλές, σόσκε βον μανγκένα μπουτ τι κερέν λουμνικανέ πράγματα ντα νανέ ποτές ικανοποιημέ.*
6 Καέκ δεν πρέπει τι κερέλ ανταλά πράγματα ντα τι κερέλ ζιάνι πι πφραλέσκε, σόσκε ο Ιεχωβά* ανέλα τιμωρία σαρέ ανταλέ πραγματένγκε, αντικάς σαρ βακερντάμας τουμένγκε ντα ντινάμ-τουμέν τι αγαβέν ντιπ λατσσές.
7 Ο Ντεβέλ να ντινάς-αμέν βίκος για τι τθεράς εκ μαγαριμέ ζωή, αλλά για τι αβάς άγιοι.
8 Οτθάρ, κον κερέλα πέρα ανταλά πράγματα, να κερέλα πέρα τζενές αλλά ι Ντεβλές, σο ντέλα-τουμέν πο άγιος πνεύμας.
9 Όμως, να χρειαζίντιβελα τι γραφίνας τουμένγκε αμέν τι μανγκέν ο εκ ι γιαβερές σαρ μανγκένα τουμαρέ πφραλέν, σόσκε ο Ντεβέλ σικλιαρντάς-τουμέν τι μανγκέν ο εκ ι γιαβερές.
10 Ντα μπαγιά μανγκένα σαρέ ι πφραλέν σαρί κι Μακεδονία. Βακεράσα τουμένγκε όμως, πφραλάλεν, τι κερέν-λες ανταβά ατζέ πο μπουτ.
11 Προσπαθίνεν τι τζουβντιόν ήσυχα, τι ντικχέν τουμαρί μπουτί ντα τι κερέν μπουτί τουμαρέ βαστέντζαρ, σαρ βακερντάμας τουμένγκε.
12 Αντικάς ο τζενέ σο νανέ κατά κχανγκιρί κα ντικχέν ότι πφιρένα σωστά, ντα να κα λειπίνελ τουμένταρ τίποτα.
13 Ντα μανγκάσα, πφραλάλεν, τι τζανέν σο κα αβέλ-πες οντουλέντζαρ σο σοβένα ο σοϊπέ ι μεριμάσκο για μα τι πφαμπόλ τουμαρό-ντα γκι σαρ οντουλένγκο σο να τθερένα ελπίδα.
14 Άμα πακιάσα ότι ο Ιησούς μουλό ντα ιστίντιλο, πακιάσα-ντα ότι ο Ντεβέλ κα γκίντελ ι μαθητέν ι Ιησούσκε, σο σοτέ ο σοϊπέ ι μεριμάσκο, για τι αβέν γιεκ λέσαρ.
15 Ανταβά σο βακεράσα τουμένγκε ακανά ισί αντράλ κατά λάφι ι Ιεχωβάσκο:* Αμέν σο ατσσάσα τζουβντέ μέχρι κο βουρτιπέ κι Κυριόσκο να κα τζας κο ουρανός πο τζανγκλέ οντουλένταρ σο σοτέ ο σοϊπέ ι μεριμάσκο.
16 Αμαρό Κύριος κα γουλίλ κατά ουρανός. Κα ντελ εντολές με φωνή αρχαγγελόσκι, κα ασταρέλ ι σάλπιγγα ι Ντεβλέσκι ντα ο μαθητές ι Χριστόσκε σο μουλέ κα ιστίν πρώτοι.
17 Σοράν, αμέν σο ατσσάσα τζουβντέ κα καπτίντιβας αντρέ κο σύννεφα γιεκ λέντζαρ για τι συναντίνας ι Κυριός κο ουρανός. Αντικάς, κα αβάς πάντα ι Κυριόσαρ.
18 Οτθάρ, τι λοκχιαρέν ο εκ ι γιαβερέσκο γκι* ανταλέ λαφίντζαρ.
Υποσημειώσεις
^ Γιαβέρσοϊ «τζανένα ο εντολές σο ντινάμ-τουμέν».
^ Γιαβέρσοϊ «ντα τι σεβάνεν-λες ο τζενέ».
^ Γιαβέρσοϊ «ντα να τσαλιόλα ποτές λένγκι γιακχ».
^ Γιαβέρσοϊ «τι κοβλιαρέν ο εκ ι γιαβερέσκι ντουκχ».
