Ο Πρώτος Γράμμας σο Μπουτσσάντιλο κο Θεσσαλονικείς 5:1-28
5 Πφραλάλεν, να χρειαζίντιβελα τι γραφίνας τουμένγκε αμέν ι σαατίσκε ντα ι βακιτίσκε.
2 Επειδή τζανένα μπουτ λατσσές ότι ο ντιβές ι Ιεχωβάσκο* αβέλα ντιπ αντικάς σαρ αβέλα εκ τσορ* αντρέ κι ιράτ.
3 Κάνα ο τζενέ κα βακερέν: «Ακανά τθεράσα ειρήνη ντα ισινάμ αρακχαντέ!»* αζομάν κα καταστραφίντιβεν. Ανταβά κα αβέλ-πες λένγκε οτθέ σο να μπεκλεντίνενα-λες, σαρ ο ντουκχά ι μπιανιμάσκε σο τθερέλα εκ κχαμνί, ντα να κα γλιτώνεν.
4 Αλλά τουμέν, πφραλάλεν, να ισινέν κο καρανίκι για τι κερέλ-τουμέν ανταβά ντιβές τι σαστίνεν σαρ κα κερέλας ι τσορέν τι σαστίνεν,
5 σόσκε σαρέ τουμέν ισινέν τσσαβέ σο πφιρένα κο φως ντα κι ντισάρα. Να πφιράσα ούτε κο καρανίκι ούτε κι ιράτ.
6 Οντουλέσκε, μα τι σοβάς σαρ ο γιαβερά, αλλά τι ατσσάς τζανγκαντέ ντα γκοντιαβέρ.*
7 Οντουλά σο σοβένα, σοβένα αρατί, ντα οντουλά σο ματιόνα ισί ματέ αρατί.
8 Αμέν όμως σο πφιράσα κι ντισάρα, τι ατσσάς γκοντιαβέρ* ντα τι ιριάς ι πίστη ντα ι αγάπη σαρ εκ θώρακας σο αρακχαβέλα ο γκέσι* ντα ι ελπίδα σο τθεράσα τι σώντιβας σαρ εκ περικεφαλαία.
9 Ο Ντεβέλ να τραμπιντάς-αμέν για τι σικαβέλ αμένγκε πι μπαρί χολί, αλλά για τι σώντιβας αντράλ αμαρέ Κυριόσταρ, κατά Ιησούς Χριστός.
10 Βοβ μουλό αμένγκε, ντα αντικάς είτε σοβάσα* είτε να σοβάσα, τι τζουβντιάς γιεκ λέσαρ.
11 Οτθάρ, τι ντεν ζορ ο εκ ι γιαβερές* ντα τι βοηθίνεν ο εκ ι γιαβερές, αντικάς σαρ κερένα.
12 Πφραλάλεν, μολίνασα-τουμέν τι σεβάνεν οντουλέν σο μαρένα-πες τουμένγκε για τι βοηθίνεν-τουμέν, σο οδηγίνενα-τουμέν κι υπηρεσία κι Κυριόσκι ντα σο ντένα-τουμέν συμβουλές.
13 Τι σικαβέν λένγκε μπουτ μπαρί εκτίμηση ντα αγάπη οντουλένγκε σο κερένα. Τι τθερέν ειρήνη ο εκ ι γιαβερέσαρ.
14 Πφραλάλεν, εκτός σαρέ ανταλένταρ βακεράσα τουμένγκε τι προειδοποιήνεν* οντουλέν σο να ντένα καν, τι κοβλιαρέν τουμαρέ λαφίντζαρ ι ντουκχ οντουλένγκι σο τθερένα πφανγκό γκι,* τι βοηθίνεν οντουλέν σο ισί μπίζουρανε ντα τι κερέν υπομονή σαριλέντζαρ.
15 Καέκ τζενό μα τι κερέλ γκεραλιπέ* οντουλέσκε σο κερέλα λέσκε γκεραλιπέ, αλλά πάντα τι κερέν σο νακχέλα τουμαρέ βαστένταρ για τι κερέν ο λατσσιπέ κο πφραλά ντα σαρέ κο γιαβερά.
16 Πάντα τι χαιρίνεν.
17 Μα τσσιναβέν τι προσευχίντιβεν.
18 Τι κερέν προσευχή κο Ντεβέλ για τι βακερέν λέσκε ευχαριστώ ι κάθε πραγμάσκε. Ανταβά μανγκέλα ο Ντεβέλ τουμένγκε αντράλ κατά Χριστός Ιησούς.
19 Μα μουνταρέν ι γιακ* σο αβέλα κατά πνεύμας ι Ντεβλέσκο.
20 Τι τθερέν αξία τουμένγκε ο προφητείες.
21 Τι αβέν σίγουροι σαρέ ι πραγματένγκε. Τι ασταρέν ζουρανές σο-ντα ισί λατσσό.
22 Τι ατσσόν ντουρ κάθε πραγμάσταρ σο ισί γκεραλό.
23 Προσευχίντιβαβα κο Ντεβέλ σο ντέλα ειρήνη τι κερέλ-τουμέν τι αβέν ντιπ άγιοι. Ντα σαρί τουμαρί γκοντί,* τουμαρί ψυχή* ντα τουμαρό σώμας τι ατσσόν αρακχαντέ κο βουρτιπέ αμαρέ Κυριόσκο, κι Ιησού Χριστόσκο, χωρίς τι παθίνεν τίποτα.
24 Οντουβά σο τραμπιντάς-τουμέν* ισί πιστός, ντα σίγουρα κα κερέλ-λες ανταβά.
25 Πφραλάλεν, τι προσευχίντιβεν αμένγκε.
26 Χαιρετίνεν σαρέ ι πφραλέν αντράλ τουμαρέ γκίσταρ.*
27 Μολίναβα-τουμέν κο ναβ κι Κυριόσκο τι διαβάντιβελ ανταβά γράμμας σαρέ κο πφραλά.
28 Ο μπαρό λατσσιπέ αμαρέ Κυριόσκο, ι Ιησού Χριστόσκο, τι αβέλ τουμέντζαρ.
Υποσημειώσεις
^ Γιαβέρσοϊ «τσορνό».
^ Κι Πουρανί Μπαλαμανί βακέρντιβελας «Ειρήνη ντα ασφάλεια!»
^ Κι Πουρανί Μπαλαμανί βακέρντιβελας «ντα τι αβάς νερνέ».
^ Κι Πουρανί Μπαλαμανί βακέρντιβελας «τι αβάς νερνέ».
^ Γιαβέρσοϊ «κολίν».
^ Γιαβέρσοϊ «σοβάσα ο σοϊπέ ι μεριμάσκο».
^ Γιαβέρσοϊ «τι κοβλιαρέν ο εκ ι γιαβερέσκι ντουκχ».
^ Γιαβέρσοϊ «τι ντεν συμβουλές».
^ Γιαβέρσοϊ «σο χασαρντέ πουμαρί ζορ».
^ Γιαβέρσοϊ «μπίλατσσιπε, κακός».
^ Γιαβέρσοϊ «γιανγκ».
^ Κι Πουρανί Μπαλαμανί ισινέ ο λάφι «πνεύμας».
^ Γιαβέρσοϊ «σο ντέλα-τουμέν βίκος».
^ Κι Πουρανί Μπαλαμανί βακέρντιβελας «σαρέ ι πφραλέν άγιε τσσουμιντιμάσαρ».
