Ο Πρώτος Γράμμας σο Μπουτσσάντιλο κο Κορίνθιοι 1:1-31
1 Ανταβά γράμμας μπουτσσάντιβελα μάνταρ κατά Παύλος, σο ντινάς-μαν βίκος ο Χριστός Ιησούς για τι αβάβ απόστολος αντικάς σαρ μανγκέλα ο Ντεβέλ, ντα κατά Σωσθένης αμαρέ πφραλέσταρ.
2 Γραφίναβα ι Ντεβλέσκε κχανγκιριάκε κι Κόρινθος, τουμένγκε σο αγιάντιλεν σαρ μαθητές ι Χριστόσκε, ι Ιησούσκε. Ο Ντεβέλ τραμπιντάς-τουμέν για τι αβέν άγιοι, γιεκ σαρέ οντουλέντζαρ σο ντένα μπέσα κο ναβ αμαρέ Κυριόσκο, κι Ιησού Χριστόσκο, κάι-ντα τι αβέν. Βοβ ισί Κύριος εμ λένγκο εμ αμαρό:
3 Προσευχίντιβαβα τι τθερέν μπαρό λατσσιπέ ντα ειρήνη κατά Ντεβέλ αμαρέ Νταντέσταρ ντα κατά Κύριος Ιησούς Χριστός.
4 Βακεράβα μι Ντεβλέσκε πάντα ευχαριστώ ι μπαρέ λατσσιμάσκε σο σικαντάς τουμένγκε αντράλ κατά Χριστός Ιησούς.
5 Τουμέν τθερένα μπαρί ευλογία επειδή ισινέν ενωμέ λέσαρ, ντα κερντάς-τουμέν τι μπορίνεν τι μουτθαβέν ντιπ λατσσές ο λάφι ι Ντεβλέσκο ντα τι τζανέν ντιπ λατσσές ο πράγματα.
6 Αντικάς, ο αμπέρια ι Χριστόσκε κερντέ-τουμέν σταθερούς.
7 Να λειπίνελα τουμένταρ καέκ ικανότητα* σο ντέλα ο Ντεβέλ, καζόμ μπεσένα σαρ σαρ τι σικάντιβελ αμαρό Κύριος ο Ιησούς Χριστός.
8 Βοβ κα κερέλ-τουμέν τι αβέν σταθεροί μέχρι κο τέλος για μα τι κατηγορίνελ-τουμέν καέκ κο ντιβές αμαρέ Κυριόσκο, κι Ιησού Χριστόσκο.
9 Ο Ντεβέλ ισί πιστός ντα ντινάς-τουμέν βίκος για τι αβέν ενωμέ λέσκε Τσσαβέσαρ, ι Ιησού Χριστόσαρ, αμαρέ Κυριόσαρ.
10 Βακεράβα τουμένγκε, πφραλάλεν, αντράλ κατά ναβ αμαρέ Κυριόσκο, ι Ιησού Χριστόσκο, τι συμφωνίνεν σαρέ τουμέν οντουλέντε σο βακερένα ντα μα τι τθερέν διχόνοια, αλλά τι αβέν ντιπ ενωμέ ντα τι τθερέν ι ίδια γκοντί ντα ο ίδιος τρόπος σκέψης.
11 Πφραλάλεν, μερικοί κατά κχερ σο τθερέλα η Χλόη βακερντέ μάνγκε ότι χάνα-τουμέν.
12 Μανγκάβα τι βακεράβ ότι ο κάθε εκ τουμένταρ βακερέλα: «Με τσσίνταβα κατά Παύλος», «Με όμως τσσίνταβα κατά Απολλώς», «Με όμως τσσίνταβα κατά Κηφάς»,* «Με όμως τσσίνταβα κατά Χριστός».
13 Ιλιάντιλι ομαδέντε η κχανγκιρί ι Χριστόσκι; Μήπως ο Παύλος ιμπλάντιλο κο κας τουμένγκε; Ή μπολντιλέν κο ναβ κι Παυλόσκο;
14 Βακεράβα ευχαριστώ κο Ντεβέλ σο να μπολντόμ καεκχές τουμένταρ εκτός κατά Κρίσπος ντα κατά Γάιος,
15 για μα τι βακερέλ καέκ ότι μπολντιλέν μι ναβέστε.
16 Βα, μπολντόμ οντουλέν-ντα σο ισί κο κχερ σο τθερέλα ο Στεφανάς. Να ντάβα-μαν γκοντί άμα μπολντόμ καεκχέ γιαβερές.
17 Επειδή ο Χριστός να μπουτσσαντάς-μαν τι μπολάβ, αλλά τι μουτθαβάβ ο λατσσέ αμπέρια. Ντα να κερντόμ-λες ανταβά λαφίντζαρ σο βακερένα ο γκοντιαβέρ τζενέ, για μα τι χασαρέλ πι αξία ο μεριπέ ι Χριστόσκο οπράλ κι ντουκχένγκο κας.*
18 Ο αμπέρια για το κας ι ντουκχένγκο* ισί ντινιλιπέ οντουλένγκε σο κα χασάρντιβεν, όμως αμένγκε σο σώντιβασα ισί ζορ ι Ντεβλέσκι.
19 Σόσκε ισί γραμμέ: «Κα κεράβ τι χασάρντιβεν ο γκοντιαβέρ λάφια σο βακερένα ο γκοντιαβέρ τζενέ, ντα κα κεράβ πέρα ο τρόπος σο σκεφτίνενα ο έξυπνα τζενέ».
20 Κάι ισί ο γκοντιαβέρ τζενό; Κάι ισί ο γραμματέας;* Κάι ισί ο φιλόσοφος ανταλέ ντουνιάσκο;* Να κερντάς ο Ντεβέλ τι ντικχίντιβεν ντινιλιπέ ο γκοντιαβέρ λάφια ι ντουνιάσκε;
21 Ο ντουνιάς να σικλιλό ι Ντεβλέσκε, σόσκε ντέλα μπέσα πιρέ γκοντιάτε. Αλλά ο Ντεβέλ σικαντάς ότι ισί γκοντιαβέρ, σόσκε μανγκλάς τι σώνελ οντουλέν σο πακιαντέ ο αμπέρια σο ντικχίντιβενα ντινιλιπέ κο γιαβερά.
22 Ο Ιουδαίοι μανγκένα τι ντικχέν σημάδια ντα ο Μπαλαμέ ρόντενα γκοντιαβέρ λαφίνγκε.
23 Αμέν όμως μουτθαβάσα ότι ο Χριστός ιμπλάντιλο κο κας. Ο Ιουδαίοι προσβαλίντιβενα ανταλέ αμπερίνταρ,* ντα ι τζενένγκε σο ισί γιαβερέ τθεμένταρ ντικχίντιβενα ντινιλιπέ.
24 Αλλά ο Ντεβέλ ντινάς βίκος εμ Ιουδαιόν εμ Μπαλαμέν, ντα αντράλ κατά Χριστός σικάντιβελα λένγκε ότι ο Ντεβέλ ισί ζουρανό ντα γκοντιαβέρ.
25 Ο πράγματα ι Ντεβλέσκε σο ντικχίντιβενα ντινιλιπέ ι τζενένγκε ισί πο γκοντιαβέρ λένταρ, ντα ο πράγματα ι Ντεβλέσκε σο ντικχίντιβενα μπίζουρανε ι τζενένγκε ισί πο ζουρανέ λένταρ.
26 Πφραλάλεν, ντικχένα ότι ο Ντεβέλ να ντινάς βίκος μπουτέν σο ισί γκοντιαβέρ κο γιακχά κι τζενένγκε ούτε μπουτέν σο ισί ζουρανέ ούτε μπουτέν σο αστάρντιβενα βασιλιάσκε φαράταρ.*
27 Αλλά ο Ντεβέλ τραμπιντάς οντουλά σο ντικχίντιβενα ντινιλιπέ ι ντουνιάσκε για τι ανέλ λατζ ι γκοντιαβέρ τζενένγκε. Ντα ο Ντεβέλ τραμπιντάς οντουλά σο ντικχίντιβενα μπίζουρανε ι ντουνιάσκε για τι ανέλ λατζ κο ζουρανέ.
28 Ο Ντεβέλ τραμπιντάς οντουλά σο νανέ σημαντικά ι ντουνιάσκε ντα οντουλά σο κερένα πέρα ο τζενέ, οντουλά σο να τθερένα ιτς αξία κο γιακχά κι τζενένγκε, για τι καταστραφίνελ οντουλά σο ντικχίντιβελα ότι τθερένα αξία.
29 Κερντάς-λες ανταβά για μα τι ισαρέλ-πες καέκ ανγκλάλ κο Ντεβέλ.
30 Αλλά βοβ κερέλα-τουμέν τι αβέν ενωμέ ι Χριστόσαρ, ι Ιησούσαρ, σο αντάς αμένγκε σοφία κατά Ντεβέλ. Αντράλ κατά Χριστός, ο Ντεβέλ κερέλα-αμέν τι αβάς δίκαιοι ντα άγιοι ντα αντράλ κατά λύτρος ελευθερωντάς-αμέν.
31 Σαρ ισί γραμμέ: «Οντουβά σο ισαρέλα-πες τι ισαρέλ-πες ι Ιεχωβάσκε».*
Υποσημειώσεις
^ Γιαβέρσοϊ «δώρος». Κι Πουρανί Μπαλαμανί βακέρντιβελας «χάρισμας».
^ Βακέρντιβελας Πέτρος-ντα.
^ Δηλαδή οντουβά σο τζανέλα λατσσές ο Νόμος.
^ Γιαβέρσοϊ «Ανταλά αμπέρια κερένα ι Ιουδαιόν τι περέν».
^ Γιαβέρσοϊ «σημαντικέ φαμιλίνταρ».
