Ο Πρώτος Γράμμας σο Μπουτσσάντιλο κο Κορίνθιοι 6:1-20
6 Άμα εκ τζενό τουμένταρ τθερέλα κάτι εκχέ γιαβερέσαρ, σαρ αβέλα-πες τι τζαλ κο δικαστήριος ανγκλάλ άδικε τζενέντε ντα μα τι τζαλ ανγκλάλ κο άγιοι;
2 Ή να τζανένα ότι ο άγιοι κα κρίνεν ι ντουνιάς; Ντα άμα τουμέν κα κρίνεν ι ντουνιάς, να μπορίνενα τι λύνεν μπουτ χουρντέ προβλήματα;
3 Να τζανένα ότι κα κρίνας αγγελόν; Σόσκε μα τι λύνας χουρντέ προβλήματα σο ισί ανταλέ ζωγιάτε;
4 Οτθάρ, άμα τθερένα τι λύνεν προβλήματα ανταλέ ζωγιάτε, σόσκε τσσουβένα τζενέν σο νανέ κατά κχανγκιρί τι κρίνεν-τουμέν;
5 Βακεράβα-λεν τουμένγκε ανταλά για τι λατζάν. Νανέ καέκ γκοντιαβέρ τζενό τουμένταρ σο μπορίνελα τι λύνελ ο προβλήματα πι πφραλένγκε;
6 Οκιά μπάνταρ, πφραλ γκερέλα πφραλές κο δικαστήριος, ανγκλάλ κο άπιστα τζενέ!
7 Μπαγιά, ανένα λατζ οπρά-τουμέντε κάνα γκερένα ο εκ ι γιαβερές κο δικαστήριος. Σόσκε να μουκχένα τι αδικίντιβεν τουμαρέ πφραλένταρ; Σόσκε να μουκχένα τι αβέλ-πες τουμένγκε ζιάνι;
8 Αλλά τουμέν αδικίνενα τουμαρέ πφραλέν ντα κερένα λένγκε ζιάνι!
9 Ή να τζανένα ότι ο άδικα τζενέ να κα νακχέν* κι Βασιλεία κι Ντεβλέσκι; Μα χουχάντιβεν. Οντουλά σο κερένα λουμνιπέ,* σο ντένα λατρεία κο είδωλα, σο κερένα λουμνιπέ οπράλ πουμαρέ μπιαβέστε,* ο μουρσά σο μουκχένα ι γιαβερέ μουρσέν τι σοβέν λέντζαρ, ο μουρσά σο σοβένα μουρσέντζαρ,
10 ο τσορά,* οντουλά σο ισί μπίτσαλε γιακχάκε, οντουλά σο ματιόνα, οντουλά σο βακερένα μπέτι λάφια* ντα οντουλά σο χουχαβένα* ι γιαβερέν για τι λεν λένγκε πράγματα να κα νακχέν κι Βασιλεία κι Ντεβλέσκι.
11 Όμως, ασακέ τζενέ ισινένας μερικοί τουμένταρ. Αλλά αβιλέν πάκι ντα άγιοι, βακέρντιλεν δίκαιοι κο ναβ κι Κυριόσκο, κι Ιησού Χριστόσκο, ντα αμαρέ Ντεβλέσκε πνευμάσαρ.
12 Σαρέ ο πράγματα ισί σωστά μάνγκε, αλλά να κερένα σαρέ λατσσιπέ. Σαρέ ο πράγματα ισί σωστά μάνγκε, αλλά να κα μουκχάβ τίποτα τι κερέλ-μαν κουμάντος.
13 Ο χαμπέ ισί ι περέσκε, ντα ο περ ι χαμπέσκε, ο Ντεβέλ όμως κα κερέλ τι χασάρντιβεν ο ντούι-ντα. Ο σώμας νανέ λουμνιμάσκε* αλλά ι Κυριόσκε, ντα ο Κύριος ισί ι σωμάσκε.
14 Ο Ντεβέλ όμως τζουβντιαρντάς ι Κυριός ντα κα τζουβντιαρέλ αμέν-ντα αντράλ πι ζοριάταρ.
15 Να τζανένα ότι τουμαρέ σώματα ισί ι Χριστόσκε; Τι λαβ οντουβά σο ισί ι Χριστόσκο ντα τι ενώναβ-λες εκχέ λουμνιάσαρ; Σίγουρα όχι!
16 Να τζανένα ότι κον ενώντιβελα εκχέ λουμνιάσαρ αβέλα εκ σώμας λάσαρ; Σόσκε ο Ντεβέλ βακερέλα: «Ο ντούι κα αβέν εκ σώμας».
17 Αλλά κον ισί ενωμέ ι Κυριόσαρ τθερέλα ο ίδιος τρόπος σκέψης* λέσαρ.
18 Νασέν κατά λουμνιπέ!* Σαρέ ο γιαβερά αμαρτίες σο μπορεί τι κερέλ εκ τζενό ισί αβριάλ λέσκε σωμάσταρ, αλλά κον κερέλα λουμνιπέ κερέλα ζιάνι* πι ίδιε πι σωμάστε.
19 Να τζανένα ότι τουμαρό σώμας ισί ο ναός ι άγιε πνευμάσκο σο ισί αντρέ τουμέντε; Ανταβά πνεύμας ισί κατά Ντεβέλ. Ισινέν ι Ντεβλέσκε,
20 σόσκε ποκιντάς μπουτ για τι κινέλ-τουμέν. Άρα, δοξάνεν ι Ντεβλές τουμαρέ σωμάσαρ.
Υποσημειώσεις
^ Κι Πουρανί Μπαλαμανί ισινέ ο λάφι «κληρονομίνεν».
^ Γιαβέρσοϊ «τσορνέ».
^ Γιαβέρσοϊ «σο κερένα ζιάνι κο γιαβερά πουμαρέ λαφίντζαρ».
^ Γιαβέρσοϊ «νταραβένα».
^ Κι Πουρανί Μπαλαμανί ισινέ ο λάφι «πνεύμας».
^ Κι Πουρανί Μπαλαμανί βακέρντιβελας «αμαρτίνελα κόντρα».
