Ο Πρώτος Γράμμας σο Μπουτσσάντιλο κο Τιμόθεος 1:1-20
1 Ανταβά γράμμας μπουτσσάντιβελα μάνταρ κατά Παύλος, σο ισινόμ απόστολος ι Χριστόσκο, ι Ιησούσκο, αντικάς σαρ ντινάς εντολή ο Ντεβέλ σο σώνελα-αμέν ντα ο Χριστός Ιησούς σο ισί αμαρί ελπίδα.
2 Γραφίναβα κο Τιμόθεος,* σο ισί εκ αληθινός τσσαβό κι πίστη:
Προσευχίντιβαβα τι τθερές μπαρό λατσσιπέ κατά Ντεβέλ αμαρέ Νταντέσταρ ντα κατά Χριστός Ιησούς αμαρέ Κυριόσταρ, βον τι τζιτζίνεν* τούκε ντα τι ντεν-τουτ ειρήνη.
3 Κάνα ισινέ τι τζαβ κι Μακεδονία, βακερντόμ τούκε τι μπεσές κι Έφεσος. Ντα ανταβά βακεράβα ακανά-ντα, για τι ντες εντολή μερικέ τζενέντε μα τι σικλιαρέν γιαβερά πράγματα
4 ντα μα τι ντεν προσοχή ψεύτικε ιστοριέντε ντα κατάρ αστάρντιβελα εκ τζενό. Ασακέ πράγματα να κερένα καέκ λατσσιπέ, αλλά κερένα ι τζενέν τι βακερέν πράγματα σο νικαβένα-λεν πουμαρέ γκοντιάταρ. Ανταλά πράγματα νανέ κατά Ντεβέλ ντα να κερένα πο ζουρανί αμαρί πίστη.
5 Ο λόγος σο ντάβα ανταλά οδηγίες* ισί τι τθεράς αγάπη σο αβέλα κατά πάκι γκι, κατά πάκι συνείδηση* ντα κατά αληθινή πίστη.
6 Ισί τζενέ σο νασλέ ντα λιντέ γιαβέρ ντρομ, οτθάρ βακερένα λάφια σο να τθερένα αξία.
7 Βον μανγκένα τι σικλιαρέν ο νόμος ι Ντεβλέσκο, αλλά να αγαβένα ούτε οντουλά σο βακερένα ούτε οντουλά σο σικλιαρένα ντα ισί αζόμ σίγουροι ανταλένγκε.
8 Τζανάσα ότι ο Νόμος ισί λατσσό άμα εκ τζενό ακολουθίνελα-λες σωστά.
9 Μα μπίσταρ ότι ο νόμος νανέ ι δίκαιε τζενέσκε, αλλά οντουλένγκε σο να ντένα καν κο νόμος ντα τζάνα κόντρα, σο να σεβάνενα ι Ντεβλές ντα ισί αμαρτωλοί, σο νανέ αφοσιωμέ* ντα κερένα πέρα ο άγια πράγματα, σο μουνταρένα πουμαρέ νταντές ντα πουμαρέ νταγιά ή γιαβερέ τζενέν,
10 σο κερένα λουμνιπέ,* μουρσένγκε σο σοβένα μουρσέντζαρ, τζενένγκε σο καπτίνενα ντα τσορένα γιαβερέν, σο χουχαβένα, σο τσσουβένα ψεύτικα λάφια ι γιαβερένγκε* ντα σο κερένα σο-ντα τζάλα κόντρα κο λατσσό σικλιαριπέ.
11 Ανταβά σικλιαριπέ ισί κατά ευτυχισμέ Ντεβέλ, σαρ βακερένα ο μπουτ σουκάρ* λατσσέ αμπέρια σο ντιντιλέ μάντε.
12 Τθεράβα μπαρί εκτίμηση ι Χριστόσκε, ι Ιησούσκε, αμαρέ Κυριόσκε σο ντινάς-μαν ζορ, σόσκε ντινάς μάνγκε μπέσα κάνα ντινάς-μαν εκ υπηρεσία,
13 παρόλο σο ανγκλέ βακεράβας λάφια σο τζάνας κόντρα κο Ντεβέλ, τζάβας κόντρα λέσκε λαόστε ντα ισινόμας μπαρικανό. Όμως, ο Χριστός τζιτζισάλο* μάνγκε, σόσκε να τζανάβας σο κεράβας ντα να τθεράβας πίστη.
14 Αλλά αμαρό Κύριος σικαντάς μάνγκε μπερεκέτι μπαρό λατσσιπέ, ντα ο Χριστός Ιησούς βοηθιντάς-μαν τι τθεράβ πίστη ντα μανγκλάς-μαν μπουτ.
15 Ανταβά σο βακεράβα ισί μπαγιά ντα μπορίνασα τι πακιάς-λες σαρέ αμαρέ γκίσαρ: Ο Χριστός Ιησούς αβιλό κο ντουνιάς για τι σώνελ αμαρτωλέ τζενέν. Ανταλέ τζενένταρ, ο πο μπαρό αμαρτωλός ισινόμ με.
16 Αλλά ο Χριστός τζιτζισάλο* μάνγκε, ντα αντικάς αντράλ μάνταρ σο ισινόμ ο πο μπαρό αμαρτωλός, ο Χριστός Ιησούς τι σικαβέλ σαρί πι υπομονή ντα τι ντελ παράδειγμας οντουλέντε σο κα τθερέν πίστη λέστε για τι λεν ζωή για πάντα.
17 Ο σεβασμός ντα η δόξα τι αβέλ για πάντα Οντουλέστε σο ισινέ ντα κα συνεχίνελ τι αβέλ Βασιλιάς για πάντα, σο ναστί μερέλα, ναστί ντικχάσα-λες ντα σάντε βοβ ισί ο Ντεβέλ. Αμήν.
18 Ντάβα-τουτ ανταγιά οδηγία,* μο τσσαβό Τιμόθεε, σο ταιριάνελα ι προφητειέντζαρ σο τθερένας τι κερέν τούσαρ, ντα αντικάς χάρη λένταρ τι αβές σαρ εκ στρατιώτης σο τζανέλα τι πολεμίνελ λατσσές.
19 Καζόμ κερέσα-λες ανταβά, τι ατσσικιαρές τι πίστη ντα τι πάκι συνείδηση. Μερικοί κερντέ-λα πέρα ντα αντικάς λένγκι πίστη καταστραφισάλι σαρ εκ καράβι σο βουλιαξάλο.
20 Ντούι λένταρ ισί ο Υμέναιος ντα ο Αλέξανδρος, ντα με ντινόμ-λεν κο βαστά κι Μπενγκέσκε για τι σικλιόν αντράλ κατά διόρθωση μα τι βακερέν λάφια σο τζάνα κόντρα κο Ντεβέλ.
Υποσημειώσεις
^ Μανγκέλα τι βακερέλ «οντουβά σο σικαβέλα σεβασμός ι Ντεβλέσκε».
^ Γιαβέρσοϊ «εντολές».
^ Γιαβέρσοϊ «σο να τθερένα αφοσιωμέ αγάπη».
^ Γιαβέρσοϊ «σο χάνα σοβέλ ντα να ατσσικιαρένα-λα».
^ Γιαβέρσοϊ «ο δοξασμέ».
^ Ντικχ εδάφιος 1 Τιμ. 1:2, υποσημείωση κο λάφι «τζιτζίνεν».
^ Ντικχ εδάφιος 1 Τιμ. 1:2, υποσημείωση κο λάφι «τζιτζίνεν».
^ Γιαβέρσοϊ «εντολή».
