Ο Πρώτος Γράμμας σο Μπουτσσάντιλο κο Τιμόθεος 4:1-16
4 Όμως, ο λάφι ι Ντεβλέσκο* βακερέλα ότι ανγκλ’ αμέντε κα αβέλ σίγουρα εκ βακίτι σο μερικοί κα νασέν κατά πίστη, επειδή ντένα προσοχή λαφίντε σο νανέ μπαγιά ντα ντικχίντιβενα ότι ισί κατά Ντεβέλ* ντα ασουνένα ο σικλιαριπέ ι δαιμονένγκο.
2 Ανταβά αβέλα-πες αντράλ κατά τζενέ σο ισί ντουέ μουένγκε ντα βακερένα ψέματα. Η συνείδηση* ανταλέ τζενένγκι να αγαβέλα τίποτα.*
3 Βον να μουκχένα ι τζενέν τι παντρίνεν ντα βακερένα λένγκε μα τι χαν χαμπίματα σο κερντάς ο Ντεβέλ για τι χαν-λεν ντα τι βακερέν Λέσκε ευχαριστώ οντουλά σο τθερένα πίστη ντα τζανένα ντιπ λατσσές ι αλήθεια.
4 Σο-ντα λατσσαρντάς ο Ντεβέλ ισί λατσσό, ντα πρέπει τι δεχτίνας-λες, άμα κερντάμ προσευχή για τι βακεράς ευχαριστώ κο Ντεβέλ σο τθεράσα-λες.
5 Ο χαμπέ αγιάντιβελα αντράλ κατά λάφι ι Ντεβλέσκο ντα κατά προσευχή σο αβέλα-πες ανταλέσκε.
6 Άμα κα ντες ανταλά συμβουλές κο πφραλά, κα αβές λατσσό υπηρέτης ι Χριστόσκο, ι Ιησούσκο. Κα αβές τζενό σο σικλιλό κατά λάφια της πίστης ντα σο ντινάς καν κο λατσσό σικλιαριπέ σο λιντάς.
7 Αλλά μα τι ασουνές ο ψεύτικες ιστορίες σο τζάνα κόντρα κο Ντεβέλ, σαρ ο ιστορίες σο βακερένα μερικά πφουριά. Οκιά μπάνταρ, τι γυμνάνες το νεαυτός ντα τι τθερές ο στόχος τι σικαβές αφοσίωση κο Ντεβέλ.
8 Η γυμναστική σο κερέλα εκ τζενό για τι αβέλ ζουρανό λέσκο σώμας ανέλα χάνικ λατσσιπέ. Αλλά η αφοσίωση κο Ντεβέλ βοηθίνελα εκχέ τζενές σαρέ κο πράγματα, σόσκε ανέλα ευλογίες εμ ακανά εμ κο ντιβεσά σο κα αβέν ανγκλ’ αμέντε.
9 Ανταλά λάφια ισί μπαγιά ντα μπορίνασα τι πακιάς-λεν σαρέ αμαρέ γκίσαρ.
10 Άκ’ σόσκε μαράσα-αμέν ντα κεράσα σο νακχέλα αμαρέ βαστέσταρ, επειδή ντινάμ μπέσα* κο τζουβντό Ντεβέλ. Βοβ σώνελα σαβέ τι μανγκές τζενέν, ντα πο μπουτ οντουλέν σο ισί πιστοί.
11 Συνέχινε τι ντες ντα τι σικλιαρές ανταλά εντολές.
12 Καέκ μα τι πακιάλ ότι να τθερέσα αξία επειδή ισινάν τερνό. Οκιά μπάνταρ, τι αβές ι πιστέ τζενένγκε λατσσό παράδειγμας κο λάφια, κι συμπεριφορά, κι αγάπη, κι πίστη ντα κι πάκι ζωή.
13 Μέχρι τι αβάβ, τι κερές ο πο λατσσό κάνα διαβάνεσα ανγκλάλ κο γιαβερά, κάνα βακερέσα ι γιαβερένγκε τι κερέν οντουβά σο ισί λατσσό ντα κάνα σικλιαρέσα.
14 Μα μουκχ ι ικανότητα* σο ντινάς-τουτ ο Ντεβέλ. Ανταγιά ικανότητα ντιντιλί-τουτ αντράλ εκχέ προφητειάταρ κάνα ο πρεσβύτεροι* τσσουντέ πουμαρέ βαστά οπρά-τούτε.
15 Τι σκεφτίνες μπουτ λατσσές ανταλά πράγματα. Τι αβές αφοσιωμέ ανταλέντε. Αντικάς, κα ντικχίντιβελ σαριλέντε ότι ισινάν πνευματικά ζουρανό.*
16 Τι τθερές τι γκοντί κο τρόπος σο τζουβντιόσα ντα σικλιαρέσα. Τι ατσσός σταθερός ανταλέ πραγματέντε, σόσκε άμα κα κερές-λες ανταβά κα σώνες εμ τουτ εμ οντουλέν σο ασουνένα-τουτ.
Υποσημειώσεις
^ Κι Πουρανί Μπαλαμανί βακέρντιβελας «ο πνεύμας».
^ Γιαβέρσοϊ «ντένα προσοχή κο πνεύματα σο χουχαβένα».
^ Γιαβέρσοϊ «ισί καυτηριασμέ, πφαμπαρντί».
^ Κι Πουρανί Μπαλαμανί ισινέ ο λάφι «ελπίδα».
^ Γιαβέρσοϊ «ο δώρος». Κι Πουρανί Μπαλαμανί βακέρντιβελας «ο χάρισμας».
^ Δηλαδή εκ ομάδα πρεσβυτερόνγκι.
^ Γιαβέρσοϊ «ισινάν ώριμος Χριστιανός».
