Ο Πρώτος Γράμμας σο Μπουτσσάντιλο κο Τιμόθεος 6:1-21
-
Οντουλά σο ισί δούλοι τι σεβάνεν πουμαρέ κυριόν (1, 2)
-
Οντουλά σο σικλιαρένα ψεύτικα πράγματα ντα η αγάπη ι λοβένγκε (3-10)
-
Οντουλά σο πρέπει τι κερέλ ο υπηρέτης ι Ντεβλέσκο (11-16)
-
Τι κερέν μπουτ πράγματα για τι αβέν χουλανέ κι Ντεβλέσκε γιακχά (17-19)
-
«Αράκχαβ οντουβά σο ντινάς-τουτ ο Ντεβέλ» (20, 21)
6 Οντουλά σο ισί δούλοι τι σεβάνεν σαρέ πουμαρέ γκίσαρ πουμαρέ κυριόν για μα τι βακέρντιβεν ποτές μπέτι λάφια ι Ντεβλέσκε ναβέσκε ντα ι πραγματένγκε σο σικλιαρέλα.
2 Οντουλά σο τθερένα κυριόν σο ισί Χριστιανοί μα τι τσσιναβέν τι σικαβέν λένγκε σεβασμός επειδή ισί πφραλά. Οκιά μπάνταρ, πρέπει τι υπηρετίνεν-λεν ατζέ πο λατσσές, σόσκε οντουλά σο βοηθίντιβενα κατά λατσσί υπηρεσία σο κερένα ισί πιστά ντα αγαπητά πφραλά.
Μα τι τσσιναβές τι σικλιαρές ανταλά πράγματα ντα τι ντες ανταλά συμβουλές.
3 Οντουβά τζενό σο σικλιαρέλα γιαβερά πράγματα ντα να συμφωνίνελα ούτε ι λατσσέ σικλιαριμάσαρ σο αβέλα αμαρέ Κυριόσταρ, κατά Ιησούς Χριστός, ούτε ι σικλιαριμάσαρ σο βακερέλα αμένγκε τι αβάς αφοσιωμέ κο Ντεβέλ,
4 ισί πφερντό μπαρικανιπέ ντα να αγαβέλα τίποτα. Τθερέλα πι γκοντιάτε σάντε τι τζαλ κόντρα ντα τι χαλ-πες λαφίνγκε.* Ανταλά πράγματα κερένα ι τζενέν τι τθερέν ζήλια πφερντί μίσος, τι χαν-πες, τι χαλαβέν ι γιαβερένγκο ναβ* ντα μα τι ντεν μπέσα ι γιαβερένγκε.
5 Ντα κερένα ι τζενέν σο τθερένα πφιρνικανί* γκοντί ντα σο τσσιναντέ τι αγαβέν ι αλήθεια τι χαν-πες συνέχεια λαφίντζαρ πραγματένγκε σο νανέ σημαντικά. Βον πακιάνα ότι αντράλ κατά αφοσίωση κο Ντεβέλ κα μπορίνεν τι κερδίνεν κάτι πουμαρέ νεαυτόσκε.
6 Ισί μπαγιά ότι άμα ισινάμ αφοσιωμέ κο Ντεβέλ ντα ερεσένα-αμέν οντουλά σο τθεράσα, κα κερδίνας μπερεκέτι λατσσέ πράγματα.
7 Κάνα μπιάντιβασα, να ανάσα τίποτα. Ντα κάνα μεράσα, ναστί λάσα τίποτα παλ’ αμέντε.
8 Οτθάρ, ερεσέλα-αμέν τι τθεράς χαμπέ ντα σέα.*
9 Όμως, οντουλά σο ισί αποφασισμέ τι χουλάνιβεν περένα κο πειρασμοί, κο παγίδες ντα μπουτέ πραγματέντε σο μανγκένα τι κερέν ντα ισί ντινιλικανέ ντα γκεραλέ.* Ανταλά πράγματα κερένα ι τζενέν τι καταστραφίντιβεν ντα τι μερέν.
10 Η αγάπη ι λοβένγκε ισί η ρίζα σαρέ ι γκεραλέ πραγματένγκι. Οτθάρ, μερικοί σο μανγκλέ ο λοβέ νασλέ κατά πίστη ντα αντέ πουμένγκε μπαρί ντουκχ σαρ τι ντινέ-πες* τσσουριάσαρ.
11 Τούι όμως, σο ισινάν υπηρέτης ι Ντεβλέσκο, τι νασές ανταλέ πραγματένταρ. Οκιά μπάνταρ, τι κερές ο πο λατσσό για τι αβές δίκαιος, αφοσιωμέ κο Ντεβέλ, πιστός, τι τθερές αγάπη, υπομονή ντα κοβλό γκι.
12 Τι κερές αγώνας για τι αρακχαβές ι Χριστιανική πίστη. Τι ασταρές ζουρανές ι ζωή σο κα ατσσικιαρέλ για πάντα. Ο Ντεβέλ τραμπιντάς-τουτ τι λες ανταγιά ζωή, ντα κερντάν λάφι ανταλέ ζωγιάκε ανγκλάλ μπουτέ τζενέντε.
13 Βακεράβα τούκε ανγκλάλ κο Ντεβέλ, σο ατσσικιαρέλα σαρέ ο πράγματα κι ζωή, ντα ανγκλάλ κο Χριστός Ιησούς, σο κερντάς λάφι ι Ντεβλέσκε Βασιλειάκε ανγκλάλ κο Πόντιος Πιλάτος,
14 τι ντες καν κο εντολές ντα τι ατσσός πάκι ντα χωρίς τι κατηγορίνελ-τουτ καέκ μέχρι τι σικαβέλ πι ζορ αμαρό Κύριος,* ο Ιησούς Χριστός.
15 Ο ευτυχισμέ ντα Ζουρανό Αρχηγός κα σικαβέλ πι ζορ κάνα κα αβέλ ο βακίτι. Βοβ ισί ο Βασιλιάς οντουλένγκο σο κερένα κουμάντος σαρ βασιλιάδες ντα ο Κύριος οντουλένγκο σο κερένα κουμάντος σαρ κύριοι,
16 ο μόνος σο ναστί μερέλα. Μπεσέλα εκχέ τθανέστε σο τθερέλα αζόμ μπουτ φως σο καέκ ναστί τζάλα οτθέ πασέ. Καέκ τζενό να ντικχλάς-λες ούτε-ντα μπορίνελα τι ντικχέλ-λες. Λέστε τι σικάντιβελ σεβασμός, ντα λέσκι ζορ τι ατσσόλ για πάντα. Αμήν.
17 Τι σικλιαρές* οντουλέν σο ισί χουλανέ ανταλέ ντουνιάστε* μα τι πακιάν ότι ισί πο οπρέ κατά γιαβερά* ντα μα τι ντεν μπέσα κο χουλανιπέ σο χασάρντιβελα, αλλά κο Ντεβέλ, σο ντέλα-αμέν σαρέ οντουλά σο απολαμβάνασα.
18 Τι βακερές λένγκε τι κερέν σο-ντα ισί λατσσό, βα, τι κερέν μπουτ πράγματα για τι αβέν χουλανέ κι Ντεβλέσκε γιακχά, τι ντεν αντράλ πουμαρέ γκίσταρ ντα τι αβέν έτοιμοι τι ντεν πουμαρέ πραγματένταρ.
19 Αντικάς, κα γκίντεν πουμένγκε εκ θησαυρός σο αβέλα κατά Ντεβέλ. Ανταβά μανγκέλα τι βακερέλ ότι κα τθερέν εκ λατσσό θεμέλιος ανγκλά-πουμέντε για τι ασταρέν ζουρανές ι ζωή σο ντέλα ο Ντεβέλ.
20 Τιμόθεε, αράκχαβ οντουβά σο ντινάς-τουτ ο Ντεβέλ. Νας ντουρ λαφίνταρ σο να τθερένα αξία ντα τζάνα κόντρα κο Ντεβέλ ντα ψεύτικε πραγματένταρ σο τζανένα ο τζενέ ντα κερένα-λεν τι βακερέν λάφια σο τζάνα κόντρα κι αλήθεια.
21 Μερικά τζενέ σικαβένας κο γιαβερά ότι τζανένας ασακέ πράγματα ντα οτθάρ νασλέ κατά πίστη.
Ο μπαρό λατσσιπέ ι Ντεβλέσκο τι αβέλ τουμέντζαρ.
Υποσημειώσεις
^ Γιαβέρσοϊ «Μερέλα αζόμ μπουτ τι τζαλ κόντρα ντα τι χαλ-πες λαφίνγκε ντα ισί κολλημέ οτθέ».
^ Γιαβέρσοϊ «τι βακερέν μπέτι λάφια».
^ Γιαβέρσοϊ «γκεραλί, μπίλατσσι».
^ Κι Πουρανί Μπαλαμανί ισινέ ο λάφι σκεπάσματα. Ανταβά λάφι ντικχίντιβελα ότι βακέρντιβελα πο μπουτ ι σεΐνγκε, αλλά μπορεί τι μανγκέλα τι βακερέλ γιαβερά-ντα πράγματα σο αρακχαβένα-αμέν σαρ ισί εκ κχερ.
^ Γιαβέρσοϊ «μπίλατσσε, κακά».
^ Γιαβέρσοϊ «ντουντιλέ-πες».
^ Κι Πουρανί Μπαλαμανί βακέρντιβελας «μέχρι τι σικάντιβελ αμαρό Κύριος».
^ Γιαβέρσοϊ «Τι ντες εντολή».
^ Γιαβέρσοϊ «μα τι αβέν μπαρικανέ».
