Ο Δεύτερος Γράμμας σο Μπουτσσάντιλο κο Κορίνθιοι 2:1-17
2 Λιντόμ ι απόφαση μα τι στεναχωρίναβ-τουμέν πάλι κάνα κα αβάβ τουμέντε.
2 Άμα με στεναχωρίναβα τουμέν, κον κα κερέλ-μαν τι χαιρίναβ εκτός οντουλέσταρ σο στεναχωριντόμ;
3 Οντουβά σο γραφιντόμ γραφιντόμ-λες για μα τι στεναχωρίντιβαβ ιτιρί τουμένταρ κάνα κα αβάβ, αλλά τι χαιρίναβ. Ντα ισινόμ σίγουρος ότι ανταβά σο ανέλα χαρά μάνγκε ανέλα ι ίδια χαρά σαρέ τουμένγκε-ντα.
4 Κατά μπουτ στεναχώρια ντα κατά ντουκχ σο τθεράβας αντρέ μι γκίστε γραφιντόμ τουμένγκε μπουτ ροϊμάσαρ, όχι για τι στεναχωρίναβ-τουμέν, αλλά για τι σικαβάβ τουμένγκε καζόμ μπουτ μανγκάβα-τουμέν.
5 Άμα εκ τζενό αντάς στεναχώρια, να στεναχωριντάς μαν, αλλά σαρέ τουμέν εκχέ τροπόσαρ. Να μανγκάβα τι κεράβ μπουτ λάφι ανταλέσκε.
6 Η διόρθωση σο ντινέν ανταλέ τζενέστε ο πο μπουτ τουμένταρ ερεσέλα.
7 Ακανά όμως πρέπει τι συγχωρίνεν-λες λατσσιμάσαρ ντα τι κοβλιαρέν λέσκι ντουκχ* για μα τι χαλ-λες* η μπαρί στεναχώρια σο τθερέλα.
8 Οτθάρ, βακεράβα τουμένγκε τι σικαβέν λέσκε αντράλ τουμαρέ γκίσταρ ότι μανγκένα-λες.
9 Άκ’ σόσκε γραφιντόμ τουμένγκε: Για τι ντικχάβ άμα κα ντένας καν σαρέ κο πράγματα.
10 Άμα τουμέν συγχωρίνενα εκχέ τζενές εκχέ πραγμάσκε, συγχωρίναβα-λες με-ντα. Σο-ντα συγχωριντόμ, άμα συγχωριντόμ κάτι, ισινέ τουμένγκε, ντα ο Χριστός τζανέλα-λες ανταβά.
11 Ισί σημαντικός τι συγχωρίνας ο εκ ι γιαβερές για μα τι χουχαβέλ-αμέν ο Μπενγκ, σόσκε τζανάσα μπουτ λατσσές οντουλά σο μανγκέλα τι κερέλ.*
12 Κάνα ερεσλόμ κι Τρωάδα για τι μουτθαβάβ ο λατσσέ αμπέρια σο τθερένα τι κερέν ι Χριστόσαρ, ντα εκ πόρτα ισινέ πουταρντί μάνγκε για τι κεράβ ο έργος ι Κυριόσκο,
13 ισινόμας μπουτ αγχωμέ σόσκε να αρακχλόμ ι Τιτός μι πφραλές. Οτθάρ, χαιρετιντόμ ι πφραλέν οτθέ ντα νασλόμ για τι τζαβ κι Μακεδονία.
14 Όμως, βακεράσα ευχαριστώ κο Ντεβέλ σο οδηγίνελα αμέν ντα ι Χριστός σαρ τι ισινάμ σε εκ παρέλαση σο κερένα ο στρατιώτες για τι γιορτάνεν πουμαρί νίκη. Ο σικλιαριπέ ι Ντεβλέσκο ισί σαρ σουκάρ μυρωδιά, ντα βοβ αντράλ αμένταρ κερέλα ι τζενέν σαρέ κο τθανά τι ασουνγκέν-λα!*
15 Αμέν βακεράσα κο τζενέ ι Χριστόσκε, οτθάρ ισινάμ σαρ μυρωδιά σο κχάντελα μίσκι ι Ντεβλέσκε. Ανταγιά μυρωδιά ασουνγκένα-λα εμ οντουλά σο σώντιβενα εμ οντουλά σο κα χασάρντιβεν.
16 Οντουλένγκε σο κα χασάρντιβεν, ανταγιά μυρωδιά ανέλα μεριπέ, αλλά οντουλένγκε σο σώντιβενα, ανέλα ζωή. Κον μπορίνελα τι κερέλ ανταβά έργος;
17 Αμέν μπορίνασα τι κεράς-λες, σόσκε αμέν να νικαβάσα λοβέ κατά Ντεβλέσκο λάφι σαρ κερένα μπουτ τζενέ. Αλλά κάνα κεράσα λάφι, βακεράσα ι αλήθεια σαρ μαθητές ι Χριστόσκε. Βα, ισινάμ τζενέ σο μπουτσσάντιλε κατά Ντεβέλ ντα κεράσα-λες ανταβά ανγκλάλ κο Ντεβέλ.
Υποσημειώσεις
^ Γιαβέρσοϊ «τι λοκχιαρέν λέσκο γκι».
^ Γιαβέρσοϊ «για μα τι περαβέλ-λες».
^ Γιαβέρσοϊ «τζανάσα ο πφιρνικανέ (γκεραλέ, μπίλατσσε) πράγματα σο κερέλα για τι περάς λέσκε βαστέντε».
^ Γιαβέρσοϊ «τι μυρίνεν-λα».