Ο Δεύτερος Γράμμας σο Μπουτσσάντιλο κο Κορίνθιοι 3:1-18
3 Πρέπει τι βακεράς τουμένγκε πάλι κον ισινάμ, σαρ μα τι τζανένα-αμέν; Μερικά τζενέ χρειαζίντιβενα τι ντεν-τουμέν γράμματα σο ισαρένα-λεν ή τι ντεν-λεν τουμέν ασακέ γράμματα. Αμέντζαρ-ντα πρέπει τι αβέλ-πες ανταβά;
2 Τουμέν ισινέν αμαρό γράμμας, σο ισί γραμμέ αμαρέ γκίστε, ντα σαρέ ο τζενέ τζανένα-λες ντα διαβάνενα-λες.
3 Ντικχίντιβελα λατσσές ότι τουμέν ισινέν γράμμας ι Χριστόσκο γραμμέ αμένταρ σο ισινάμ υπηρέτες ι Ντεβλέσκε. Ανταβά γράμμας νανέ γραμμέ μελανίσαρ, αλλά ι πνευμάσαρ σο τθερέλα ο τζουβντό Ντεβέλ, ντα νανέ γραμμέ μπαρέντε, αλλά γκιέντε.
4 Αντράλ κατά Χριστός, ο Ντεβέλ κερντάς-αμέν τι αβάς σίγουροι ανταλέσκε.
5 Αμέν ναστί κεράσα ο έργος ι Ντεβλέσκο αμαρέ ζοριάσαρ, αλλά ο Ντεβέλ ισί οντουβά σο βοηθίνελα-αμέν τι κεράς ανταβά έργος.
6 Βοβ βοηθίνελα-αμέν τι αβάς υπηρέτες σο ντένα καν κι νεβί συμφωνία. Ανταγιά συμφωνία νανέ γραμμέ κο Νόμος αλλά αβέλα κατά πνεύμας ι Ντεβλέσκο. Ο Νόμος ανέλα μεριπέ, αλλά ο πνεύμας ι Ντεβλέσκο ντέλα ζωή.
7 Κάνα ο Νόμος σο ανέλα μεριπέ ντα σο γραφίντιλο οπράλ μπαρέντε ντιντιλό μπαρέ δοξάσαρ σο κα χασάρντιβελας, ο μούι ι Μωυσίσκο λέλας-πες αζόμ μπουτ σο ναστί ντικχένας-λες ο Ισραηλίτες.
8 Άρα, άμα ο Νόμος ντιντιλό μπαρέ δοξάσαρ, σόσκε ο πνεύμας ι Ντεβλέσκο μα τι ντιντιόλ ατζέ πο μπαρέ δοξάσαρ;
9 Άμα ο Νόμος σο ανέλα μεριπέ τθερέλας δόξα, καζόμ πο μπαρί δόξα κα τθερέλ ο έργος σο βοηθίνελα ι τζενέν τι αβέν δίκαιοι!
10 Ο Νόμος χασαρντάς πι δόξα, σόσκε η δόξα σο τθερέλα η νεβί συμφωνία ισί πο μπαρί.
11 Άρα, άμα ο Νόμος σο κα χασάρντιβελας ντιντιλό δοξάσαρ, η νεβί συμφωνία τθερέλα ατζέ πο μπαρί δόξα!
12 Αφού τθεράσα ασακί σιγουριά,* κεράσα λάφι χωρίς τι νταράς
13 ντα να ισινάμ σαρ ο Μωυσής σο ιτσσαρέλας πο μούι εκχέ κοτορέσαρ για μα τι ντικχέν ο Ισραηλίτες ι δόξα ανταλέσκι σο κα χασάρντιβελας.
14 Λένγκι γκοντί ισινέ πφαντί. Ντα μέχρι αντιβές, υπαρχίντιβελα ο ίδιος κοτόρ κάνα διαβάντιβελα η πουρανί συμφωνία. Ανταβά κοτόρ μπορίνελα τι νικιόλ σάντε άμα κα πακιάν κο Χριστός.
15 Αλλά μέχρι αντιβές εκ κοτόρ ιτσσαρέλα λένγκο γκι, οτθάρ ναστί αγαβένα οντουλά σο γραφιντάς ο Μωυσής.
16 Κάνα όμως εκ τζενό αλλάνελα ντρομ για τι υπηρετίνελ ι Ιεχωβάς,* ανταβά κοτόρ νικιόλα.
17 Ο Ιεχωβά* ισί Πνεύμας,* ντα οτθέ σο ισί ο άγιος πνεύμας ι Ιεχωβάσκο,* υπαρχίντιβελα ελευθερία.
18 Σαρέ αμέν νικαντάμ ο κοτόρ σο ιτσσαρέλα αμαρό μούι ντα ισινάμ σαρ ανιάδες* σο σικαβένα ι δόξα ι Ιεχωβάσκι.* Ντα αλλάνασα αμαρό νεαυτός για τι αβάς σαρ ο Ντεβέλ, ντα αντικάς τι σικάντιβελ αντράλ αμένταρ η δόξα ι Ντεβλέσκι ατζέ πο μπουτ. Ανταβά αβέλα-πες κατά Ιεχωβά,* σο ισί Πνεύμας.*
Υποσημειώσεις
^ Κι Πουρανί Μπαλαμανί βακέρντιβελας «ελπίδα».
^ Γιαβέρσοϊ «Ι Ιεχωβάς ναστί ντικχάσα-λες».
^ Γιαβέρσοϊ «καθρέφτες».
^ Ή μπέκιμ «κατά πνεύμας ι Ιεχωβάσκο». Ι λαφίσκε «Πνεύμας» ντικχ εδάφιος 2 Κορ. 3:17, υποσημείωση κο λάφι «Πνεύμας».
