Ο Δεύτερος Γράμμας σο Μπουτσσάντιλο κο Τιμόθεος 1:1-18
1 Ανταβά γράμμας μπουτσσάντιβελα μάνταρ κατά Παύλος, σο ισινόμ απόστολος ι Χριστόσκο, ι Ιησούσκο, σαρ μανγκέλα ο Ντεβέλ, για τι βακεράβ ι ζωγιάκε σο ντινάς πο λάφι ο Ντεβέλ τι τθερέν οντουλά σο ισί ενωμέ ι Χριστόσαρ, ι Ιησούσαρ.
2 Γραφίναβα κο Τιμόθεος, μι αγαπημέ τσσαβέσκε:
Προσευχίντιβαβα τι τθερές μπαρό λατσσιπέ κατά Ντεβέλ αμαρέ Νταντέσταρ ντα κατά Χριστός Ιησούς αμαρέ Κυριόσταρ, βον τι τζιτζίνεν* τούκε ντα τι ντεν-τουτ ειρήνη.
3 Τθεράβα μπαρί εκτίμηση ι Ντεβλέσκε, σο λέστε ντάβα άγια υπηρεσία με πάκι συνείδηση* σαρ κερντέ μο παππούδες. Οτθάρ, πάντα ανάβα-τουτ μι γκοντιάτε κάνα μολίναβα* ι Ντεβλές ντισάρα ντα ιράτ.
4 Επειδή ντάβα-μαν γκοντί το δάκρυα, μανγκάβα μπουτ τι ντικχάβ-τουτ για τι πφερντιάβ χαρά.
5 Ανάβα μι γκοντιάτε τι αληθινή πίστη, σο τθερέλας-λα πρώτα τι μπάμπα, η Λωίδα, ντα τι ντάι, η Ευνίκη. Ισινόμ σίγουρος ότι συνεχίνεσα τι τθερές ανταγιά πίστη.
6 Οντουλέσκε-ντα, μα μπίσταρ τι χρησιμοποιήνες σαρέ τι γκίσαρ ι ικανότητα* σο ντινάς-τουτ ο Ντεβέλ κάνα τσσουντόμ μο βαστά οπρά-τούτε.
7 Ο άγιος πνεύμας σο ντέλα-αμέν ο Ντεβέλ να κερέλα-αμέν τι νταράς, αλλά κερέλα-αμέν τι τθεράς ζορ, τι σικαβάς αγάπη ντα τι αβάς γκοντιαβέρ.
8 Οτθάρ, μα λάτζα τι μουτθαβές κο γιαβερά αμαρέ Κυριόσκε ούτε τι λατζάς μάνγκε, σο ισινόμ κι φυλακή λέσκε. Αλλά, ι Ντεβλέσκε ζοριάσαρ, τι αβές τούι-ντα έτοιμος τι τσσίντες μπουτ ι λατσσέ αμπερίνγκε.
9 Βοβ σωντάς-αμέν ντα ντινάς-αμέν βίκος τι αβάς άγιοι, όχι χάρη οντουλένταρ σο κεράσα αμέν, αλλά χάρη οντουλέσταρ σο τθερέλα βοβ πι γκοντιάτε τι κερέλ ντα λέσκε μπαρέ λατσσιμάσταρ. Σικαντάς αμένγκε ανταβά λατσσιπέ αντράλ κατά Χριστός Ιησούς πριν μπουτ βακίτι.
10 Αλλά ακανά ντικχίντιβελα πο λατσσές κάνα σικάντιλο Οντουβά σο σώνελα-αμέν, ο Χριστός Ιησούς. Βοβ σταματιντάς ο μεριπέ ντα σικαντάς αμένγκε αντράλ κατά λατσσέ αμπέρια σαρ τι τθεράς ζωή ντα εκ σώμας σο να κερνιόλα.
11 Ο Ντεβέλ τραμπιντάς-μαν τι μουτθαβάβ ο λατσσέ αμπέρια, τι αβάβ απόστολος ντα δάσκαλος.
12 Άκ’ σόσκε τσσίνταβα-λεν σαρέ ανταλά. Αλλά να λατζάβα, σόσκε τζανάβα Οντουλές σο πακιαντόμ λέστε, ντα ισινόμ σίγουρος ότι μπορίνελα τι αρακχαβέλ σο-ντα ντινόμ λέστε μέχρι οντουβά ντιβές.
13 Τι ακολουθίνες ο παράδειγμας* ι λατσσέ σικλιαριμάσκο σο ασουντάν μάνταρ ντα τι συνεχίνες τι σικαβές πίστη ντα αγάπη σαρ τζενό σο ισί ενωμέ ι Χριστόσαρ, ι Ιησούσαρ.
14 Αντράλ κατά άγιος πνεύμας, σο ισί αντρ’ αμέντε, αράκχαβ ανταβά θησαυρός σο ντιντιλό τούτε.
15 Σαρ τζανέσα, σαρέ ο τζενέ κι Ασία* νασλέ ντουρ μάνταρ, εμ ο Φύγελος εμ ο Ερμογένης.
16 Μακάρι τι τζιτζίνελ* ο Κύριος οντουλένγκε σο ισί κο κχερ σο τθερέλα ο Ονησίφορος, σόσκε βοβ μπουτ φαρ ντινάς-μαν ζορ ντα να λατζασάλο σο ισινόμας πφαντό τζαντζιρίντζαρ.*
17 Οκιά μπάνταρ, κάνα ισινέ κι Ρώμη, ροντιντάς μάνγκε λατσσές ντα αρακχλάς-μαν.
18 Μακάρι ο Κύριος Ιεχωβά* τι τζιτζίνελ* λέσκε οντουβά ντιβές. Ντα τζανέσα μπουτ λατσσές σαρέ οντουλά σο κερντάς για τι βοηθίνελ-μαν κι Έφεσος.
Υποσημειώσεις
^ Κι Πουρανί Μπαλαμανί ισινέ ο λάφι «δέηση». Ισί εκ τατί προσευχή σο κερέλα εκ τζενό ντιπ αντράλ πι γκίσταρ ντα νικαβέλα μπουτ ζουρανέ συναισθήματα.
^ Γιαβέρσοϊ «ο δώρος». Κι Πουρανί Μπαλαμανί βακέρντιβελας «ο χάρισμας».
^ Γιαβέρσοϊ «ο σχέδιος».
^ Ντικχ εδάφιος 2 Τιμ. 1:2, υποσημείωση.
^ Γιαβέρσοϊ «αλυσιδέντζαρ».
^ Ντικχ εδάφιος 2 Τιμ. 1:2, υποσημείωση.
