Ο Δεύτερος Γράμμας σο Μπουτσσάντιλο κο Τιμόθεος 2:1-26
-
Τι σικλιαρές οντουλά σο ασουντάν τζενέντε σο μπορίνενα βον-ντα τι σικλιαρέν (1-7)
-
Νταϊντίνασα σαρέ ο πράγματα χάρη ι λατσσέ αμπερίνγκε (8-13)
-
Τι χρησιμοποιήνες σωστά ο λάφι ι Ντεβλέσκο (14-19)
-
Τι νασές οντουλέ πραγματένταρ σο μανγκένα ο τερνέ (20-22)
-
Σαρ τι αντιμετωπίνες οντουλέν σο τζάνα κόντρα (23-26)
2 Οτθάρ τούι, μο τσσαβό, συνέχινε τι λες ζορ αντράλ κατά μπαρό λατσσιπέ σο σικαβέλα ο Χριστός Ιησούς.
2 Ντα οντουλά σο ασουντάν μάνταρ, σο μπουτ τζενέ βακερντέ ότι ισί μπαγιά, τι σικλιαρές-λεν πιστέ τζενέντε. Σοράν, κα μπορίνεν βον-ντα τι σικλιαρέν γιαβερέ-ντα τζενέν.
3 Σαρ λατσσό στρατιώτης ι Χριστόσκο, ι Ιησούσκο, τι αβές τούι-ντα έτοιμος τι τσσίντες μπουτ.
4 Καέκ τζενό σο αβιλό στρατιώτης να κερέλα* γιαβέρ μπουτί για τι νικαβέλ λοβέ,* σόσκε μανγκέλα τι κερέλ ο γκι οντουλέσκο σο κερντάς-λες στρατιώτης.
5 Ατζέ-ντα κο αγώνες, άμα εκ τζενό να κα κερέλ ο κανόνες, να λέλα στεφάνι.
6 Ο γεωργός σο μαρέλα-πες τι κερέλ πι μπουτί πρέπει βοβ τι χαλ πρώτος κατά καρποί σο νικαντάς.
7 Τι τθερές πάντα τι γκοντιάτε ανταλά σο βακερντόμ. Ο Κύριος κα κερέλ-τουτ τι αγαβές σαρέ ο πράγματα.
8 Τι ντες-τουτ γκοντί ότι ο Ιησούς Χριστός ιστίντιλο κατά μουλέ ντα ισινέ προσάγγονος ι Δαβιδίσκο, αντικάς σαρ βακερένα ο λατσσέ αμπέρια σο μουτθαβάβα.
9 Ανταλέ λατσσέ αμπερίνγκε τσσίνταβα μπουτ ντα ισινόμ πφαντό κι φυλακή σαρ εγκληματίας. Αλλά ο λάφι ι Ντεβλέσκο καέκ ναστί ατσσικιαρέλα-λες πφαντό.
10 Οτθάρ, νταϊντίναβα σαρέ ο πράγματα μάξους ι τραμπιμέ τζενένγκε, για τι σώντιβεν βον-ντα αντράλ κατά Χριστός Ιησούς ντα τι λεν ευλογίες* σο ατσσόνα για πάντα.
11 Ανταβά σο βακέρντιβελα ισί μπαγιά: Σίγουρα, άμα μουλάμ γιεκ λέσαρ, κα τζουβντιάς-ντα γιεκ λέσαρ.
12 Άμα νταϊντίνασα, κα αβάς βασιλιάδες-ντα γιεκ λέσαρ. Άμα αμέν κα βακεράς ότι να τζανάσα-λες, βοβ-ντα κα βακερέλ ότι να τζανέλα-αμέν.
13 Ατζέ-ντα άμα αμέν να κεράσα οντουβά σο βακερέλα ο Ντεβέλ, βοβ πάντα κερέλα οντουβά σο βακερέλα, σόσκε βοβ ναστί αβέλα κάτι γιαβέρ ανταλέσταρ σο ισί.
14 Τι ανές λένγκε γκοντιάτε ανταλά πράγματα ντα ανγκλάλ κο Ντεβέλ τι σικλιαρές-λεν* μα τι χαν-πες λαφίνγκε. Ανταβά να κερέλα καέκ λατσσιπέ σόσκε κερέλα ζιάνι οντουλένγκε* σο ασουνένα.
15 Κερ ο πο λατσσό σο μπορίνεσα για τι κερές ι Ντεβλέσκο γκι, για τι κερές λατσσές τι μπουτί χωρίς καέκ λατζ ντα για τι χρησιμοποιήνες σωστά ο λάφι ι Ντεβλέσκο.*
16 Αλλά μα τι ασουνές λάφια σο να τθερένα αξία ντα τζάνα κόντρα κο Ντεβέλ, σόσκε ανταλά* κα κερέν ατζέ πο μπουτ ι τζενέν μα τι σεβάνεν ι Ντεβλές.
17 Λένγκε λάφια κα πφιρντιόν σαρ γάγγραινα.* Ο Υμέναιος ντα ο Φιλητός ισί οντουλένταρ σο πφιραβένα ασακέ λάφια.
18 Βον νασλέ κατά αλήθεια, σόσκε βακερένα ότι ο μουλέ ιστίντιλε, ντα καταστραφίνενα ι πίστη μερικέ τζενένγκι.
19 Αλλά ο Ντεβέλ τσσουντάς ο ζουρανό θεμέλιος σο ατσσόλα σταθερός, ντα οπράλ τθερέλα ακαλά λάφια σαρ σφραγίδα: «Ο Ιεχωβά* τζανέλα οντουλέν σο ισί λέσκε» ντα «Κον ντέλα μπέσα κο ναβ κι Ιεχωβάσκο* τι μουκχέλ ο πράγματα σο νανέ δίκαια».
20 Εκχέ μπαρέ κχερέστε να υπαρχίντιβενα σάντε χρυσά ντα ασημένια σκεύη, αλλά σκεύη-ντα σο ισί κερντέ καστέσταρ ντα τσικάταρ. Μερικά χρησιμοποιήντιβενα σημαντικέ πραγματένγκε ντα γιαβερά πραγματένγκε σο νανέ σημαντικά.
21 Άμα εκ τζενό ατσσόλα ντουρ ανταλένταρ σο νανέ σημαντικά, κα αβέλ σαρ σκεύος* σο χρησιμοποιήντιβελα σημαντικέ πραγματένγκε, κα αγιάντιβελ, κα αβέλ λατσσό σκεύος οντουλέσκε σο τθερέλα-λες ντα κα αβέλ έτοιμος τι κερέλ κάθε λατσσό πράγμας.
22 Οτθάρ, τι νασές οντουλέ πραγματένταρ σο μανγκένα ο τερνέ, αλλά τι κερές ο πο λατσσό για τι αβές δίκαιος, πιστός, τι τθερές αγάπη ντα ειρήνη, γιεκ οντουλέντζαρ σο ντένα μπέσα κο Κύριος ντα τθερένα πάκι γκι.
23 Ντα τι νασές λαφίνταρ σο ισί ντινιλικανέ ντα σο να τθερένα αξία, αφού τζανέσα ότι ανταλά κερένα ι τζενέν τι χαν-πες.
24 Ο δούλος ι Κυριόσκο δεν πρέπει τι χαλ-πες, αλλά τι αβέλ ήρεμος* σαριλέντζαρ, τι τθερέλ ι ικανότητα τι σικλιαρέλ, τι ατσσικιαρέλ-πες κάνα αδικίνενα-λες,
25 τι σικλιαρέλ κοβλέ γκίσαρ οντουλέν σο να συμφωνίνενα οντουλέντζαρ σο βακερέλα. Αντικάς, ο Ντεβέλ μπορεί τι μουκχέλ-λεν τι μετανιώνεν ντα τι σικλιόν ντιπ λατσσές ι αλήθεια
26 για τι αγαβέν ντα τι νασέν κατά παγίδα ι Μπενγκέσκι, αφού αστάρντιλε τζουβντέ λέσταρ για τι κερέν σο μανγκέλα βοβ.
Υποσημειώσεις
^ Κι Πουρανί Μπαλαμανί ισινέ ο λάφι «ανακατούντιβελα».
^ Ή μπέκιμ «γιαβερά πράγματα σο κερένα ο τζενέ κάθε ντιβές».
^ Κι Πουρανί Μπαλαμανί ισινέ ο λάφι «δόξα».
^ Γιαβέρσοϊ «ντα τι μουτθαβές λένγκε ντιπ λατσσές».
^ Γιαβέρσοϊ «καταστραφίνελα οντουλέν».
^ Κι Πουρανί Μπαλαμανί βακέρντιβελας «ι αληθειάκο».
^ Ή μπέκιμ «βον».
^ Ισί εκ νασφαλιπέ σο κερέλα ο σώμας τι κερνιόλ. Ο λάφι «νασφαλιπέ» βακέρντιβελα εμ «πασλιπέ» εμ «αμπόρια».
^ Γιαβέρσοϊ «εργαλείος».
^ Γιαβέρσοϊ «λατσσό».
