ΣΟΣΚΕ αβιλό ο Ιησούς κι πφουβ; Βοβ βακερντάς: «Πρέπει τι βακεράβ ο λατσσέ αμπέρια για τη βασιλεία ι Ντεβλέσκι, επειδή οντουλέσκε μπουτσσάντιλομ». (Λουκάς 4:​43) Ο πιο σημαντικός πράγμας σο σικλιαρντάς ο Ιησούς ι τζενέν ισινέ η Βασιλεία ι Ντεβλέσκι. Ντικχέν πιο τελέ σταρ πράγματα σο βακερντάς ανταλέ Βασιλειάκε.

1. Ο Ιησούς ισινέ οντουβά σο βακερντάας ο Ντεβέλ ότι κα αβέλας Βασιλιάς. Ο Ιησούς βακερντάς ξεκάθαρα ότι βοβ ισινέ ο Μεσσίας, δηλαδή ο Χριστός, σο βακερντάας ο Ντεβέλ ότι κα αβέλας. (Ιωάννης 4:​25, 26) Επίσης, σικαντάς ότι ισινέ ο Βασιλιάς σο ντικχλάας εκχέ σουνέστε ο προφήτης Δανιήλ. Ο Ιησούς βακερντάς πι μαθητένγκε ότι κα αβέλας ο ντιβές σο κα μπεσέλας σε εκ «δοξασμέ θρόνος» ντα ότι βον-ντα κα μπεσένας σε θρόνους. (Ματθαίος 19:​28) Βακερντάς οντουλέ τζενένγκε σο κα κυβερνίνενας λέσαρ «χουρντό ποίμνιος». Κάτι γιαβέρ σο βακερντάς ισινέ ότι τθερέλας «γιαβερέ-ντα μπρακέν» σο να ισινέ οντουλέ τζενένταρ.​—Λουκάς 12:​32· Ιωάννης 10:16.

2. Η Βασιλεία ι Ντεβλέσκι κα ανέλας ι αληθινή δικαιοσύνη. Ο Ιησούς σικαντάς ότι η Βασιλεία κα εξαφανίνελας ι πιο μπαρί αδικία, ντα αντικάς κα αγιάνελας ο ναβ ι Ιεχωβάσκο ντα κα νασκιαρέλας ο ψεύτικα λάφια σο βακερντάς ο Μπενγκ από αζομάν σο γκιλό κόντρα ι Ντεβλέσαρ κο κήπος της Εδέμ. (Ματθαίος 6:9, 10) Επίσης, ο Ιησούς σικαβέλας κάθε ντιβές ότι να ξεχωρίνελας ι τζενέν. Για παράδειγμας, κερέλας λάφι ι Ντεβλέσκε σαριλέντε, σικλιαρέλας τζουβλιέν, μουρσέν, χουλανέν ντα τσορορέν, χωρίς τι ξεχωρίνελ-λεν. Παρόλο σο αβιλόας κι πφουβ πιο μπουτ για τι σικλιαρέλ ι Ισραηλιτέν, βοηθίνελας επίσης ι τζενέν σο ισινέ Σαμαρείτες ντα οντουλέν σο ισινέ γιαβερέ τθεμένταρ, δηλαδή ι τζενέν σο να ισινέ Ιουδαίοι. Ο Ιησούς ποτές να ξεχωρίνελας ι τζενέν ούτε βοηθίνελας σάντε οντουλέν σο μανγκέλας, σαρ κερένας ο παπάζια σο τζουβντιόνας αζομάν.

3. Η Βασιλεία ι Ντεβλέσκι να κα κερέλας ο πράγματα ανταλέ ντουνιάσκε. Ο Ιησούς τζουβντιλό ντιβεσέντε σο ισινέ μπουτ δύσκολα ο πράγματα. Κο τθεμ σο τζουβντιόλας κερέλας κουμάντος εκ γιαβέρ βασιλιάς. Όμως, όταν ο τζενέ προσπαθιντέ τι ανακατούνεν-λες κο πολιτικά πράγματα, βοβ νασλό λένταρ. (Ιωάννης 6:​14, 15) Βακερντάς εκχέ τζενέσκε σο κυβερνίνελας: «Μι βασιλεία να κερέλα ο πράγματα ανταλέ ντουνιάσκε». (Ιωάννης 18:​36) Πι μαθητένγκε, βακερντάς: «Να κερένα ο πράγματα σο κερέλα ο ντουνιάς». (Ιωάννης 15:​19) Να μουκχέλας-λεν τι χρησιμοποιήνεν όπλα, ούτε για τι βοηθίνεν-λες.​—Ματθαίος 26:​51, 52.

4. Ο Χριστός κα κυβερνίνελας με αγάπη. Ο Ιησούς ντινάς πο λάφι ότι κα ντέλας ζορ ι τζενέν, ότι κα βοηθίνελας-λεν τι αντιμετωπίνεν πουμαρέ προβλήματα. (Ματθαίος 11:​28-30) Ντα οντουβά κερντάς. Ντινάς-λεν λατσσέ συμβουλές σο κα βοηθίνενας-λεν. Για παράδειγμας, βακερντάς λένγκε σο τι κερέν για μα τι ανησυχίνεν, σαρ τι τθερέν-λεν λατσσές ι γιαβερέ τζενέντζαρ, σο τι κερέν για μα τι μανγκέν μπουτ πράγματα πουμαρέ νεαυτόσκε ντα σαρ τι αρακχέν ευτυχία. (Ματθαίος, κεφάλαια 5-7) Επειδή σικαβέλας αγάπη, σαρέ ο τζενέ μπορίνενας τι πλησιάνεν-λες. Ατζέ-ντα οντουλά τζενέ σο τθερένας μπουτ προβλήματα, τζάνας λέστε ντα ισινέ σίγουροι ότι βοβ κα σικαβέλας λένγκε λατσσιπέ ντα σεβασμός. Σο λατσσό Βασιλιάς κα αβέλ ο Ιησούς!

Ο Ιησούς σικλιαρντάς ι τζενέν για τη Βασιλεία ι Ντεβλέσκι με εκ γιαβέρ-ντα τρόπος. Κερντάς μπουτ θαύματα. Σόσκε; Ελάν τι ντικχάς.

​—Στηρίντιβελα κο βιβλία Ματθαίος, Μάρκος, Λουκάς ντα Ιωάννης.