ΚΟ ΝΤΙΒΕΣΑ σο υπαρχίντιβενας βασιλιάδες κο Ισραήλ ντα κο Ιούδας, ισινέ κάποιοι μπουτ σημαντικοί τζενέ, ο προφήτες. Οντουλά τζενέ τθερένας μπουτ πίστη ντα θάρρος ντα βακερένας ο λάφια ι Ντεβλέσκε. Ντικχέν σταρ σημαντικά πράγματα σο βακερντέ ι Ντεβλέσκε προφήτες.

1. Η Ιερουσαλήμ κα καταστραφίντιβελας. Ο προφήτες ι Ντεβλέσκε, ντα πιο μπουτ ο Ησαΐας ντα ο Ιερεμίας, αρχισάλε τι βακερέν μπουτ πιο τζανγκλέ ότι η Ιερουσαλήμ κα καταστραφίντιβελας ντα κα ατσσόλας χωρίς τζενέ. Οντουλέντζαρ σο βακερντέ, σικαντέ σόσκε ο Ντεβέλ κα καταστραφίνελας οντουβά τθεμ. Ο τζενέ σο μπεσένας κι Ιερουσαλήμ βακερένας ότι ισινέ ο λαός ι Ιεχωβάσκο, όμως σικαντέ ότι οντουβά να ισινέ μπαγιά επειδή πακιάνας ψεύτικε ντεβλέντε, κερένας μπέτι πράγματα ντα ισινέ άγριοι.​—2 Βασιλέων 21:​10-15· Ησαΐας 3:​1-8, 16-26· Ιερεμίας 2:​1–3:13.

2. Ο Ντεβέλ κα ανέλας πάλι ι αληθινή θρησκεία. Αφού ο λαός ι Ντεβλέσκο κα αβέλας 70 μπρεσά ντουρ πι τθεμέσταρ, ο Ιεχωβά κα ελευθερώνελας-λες κατά Βαβυλώνα. Κα βουρτίνενας πουμαρέ τθεμέστε ντα κα χτίνενας πάλι ο ναός ι Ιεχωβάσκο κι Ιερουσαλήμ. (Ιερεμίας 46:​27· Αμώς 9:​13-15) Περίπου 200 μπρεσά πριν τι αβέλ-πες ανταβά, ο Ησαΐας βακερντάς ότι οντουβά σο κα λέλας ο τθεμ της Βαβυλώνας κα βακέρντιβελας Κύρος. Ο Κύρος κα νικίνελας ι Βαβυλώνα ντα κα μουκχέλας ι Ντεβλέσκε λαός τι ανέλ πάλι ι αληθινή θρησκεία. Επίσης, ο Ησαΐας βακερντάς ακριβώς σο κα κερέλας ο Κύρος για τι λελ ο τθεμ της Βαβυλώνας.​—Ησαΐας 44:​24–45:3.

3. Ο Χριστός κα αβέλας κι πφουβ ντα οντουλά σο νακχλάς πι ζωγιάτε. Ο Χριστός κα μπιάντιβελας εκχέ γκαβέστε σο βακέρντιβελας Βηθλεέμ. (Μιχαίας 5:2) Κα αβέλας ταπεινός ντα κα τζάλας αντρέ κι Ιερουσαλήμ οπράλ εκχέ χχερέστε. (Ζαχαρίας 9:9) Παρόλο σο κα αβέλας ήρεμος ντα λατσσό, ο πιο μπουτ τζενέ να κα μανγκένας-λες. (Ησαΐας 42:​1-3· 53:1, 3) Κα μουνταρένας-λες με μπουτ μπέτι τρόπος. Μήπως αζομάν κα τελειώνελας λέσκι ζωή; Όχι, επειδή λέσκε θυσιάταρ κα μπορίνενας τι συγχωρίντιβεν ο αμαρτίες μπουτέ τζενένγκε. (Ησαΐας 53:4, 5, 9-12) Σάντε άμα κα αναστίντιβελας κα μπορίνελας τι αβέλ-πες ανταβά.

4. Ο Χριστός κα κυβερνίνελας ι πφουβ. Ο ατελείς τζενέ να μπορίνενα τι κυβερνίνεν πουμαρό νεαυτός με ειρήνη, αλλά ο Χριστός σο κα αβέλας Βασιλιάς κα βακέρντιβελας Άρχοντας Ειρήνης. (Ησαΐας 9:6, 7· Ιερεμίας 10:​23) Αζομάν σο κα κυβερνίνελας βοβ, σαρέ ο τζενέ κα τθερένας ειρήνη ο εκ ι γιαβερέσαρ, ατζέ-ντα σαρέ με το ζώα. (Ησαΐας 11:​3-7) Ο νασφαλίματα, δηλαδή ο πασλίματα, να κα υπαρχίντιβενας. (Ησαΐας 33:​24) Ατζέ-ντα ο μεριπέ κα εξαφανίντιβελας για πάντα. (Ησαΐας 25:8) Όταν κα κυβερνίνελας ο Χριστός, ο τζενέ σο μουλέας κα αναστίντιβενας για τι τζουβντιόν κι πφουβ.​—Δανιήλ 12:13.

​—Στηρίντιβελα κο βιβλία Ησαΐας, Ιερεμίας, Δανιήλ, Αμώς, Μιχαίας ντα Ζαχαρίας.