Σο βακερένα μπουτ επιστήμονες; Σαρέ ο κύτταρα τθερένα ντούι βασικές ομάδες—οντουλά σο τθερένα πυρήνας ντα οντουλά σο να τθερένα. Ο κύτταρα κο τζενέ, κο ζώα ντα κο φυτά τθερένα πυρήνας. Ο κύτταρα κο βακτήρια να τθερένα πυρήνας. Ο κύτταρα σο τθερένα πυρήνας βακέρντιβενα ευκαρυωτικά ντα οντουλά σο να τθερένα βακέρντιβενα προκαρυωτικά. Αφού ο προκαρυωτικά κύτταρα ισί πο απλά κατά ευκαρυωτικά, μπουτ τζενέ πακιάνα ότι ο κύτταρα κο ζώα ντα κο φυτά αβιλέ-πες κατά κύτταρα σο ισί κο βακτήρια.

Μπουτ τζενέ σικλιαρένα ότι για εκατομμύρια μπρεσά μερικά «απλά» προκαρυωτικά κύτταρα «μπιλιαβένας» γιαβερά κύτταρα σο, αντίς τι μερέν, ατσσόνας αντρέ-λέντε τζουβντέ. Σαρ βακερέλα η θεωρία, η «φύση» αρακχλάς εκ τρόπος, εμ για τι αλλάνελ ο τρόπος σο κερένα μπουτί ο πφαντέ κύτταρα εμ για τι ατσσικιαρέλ ανταλά κύτταρα αντρέ κο κύτταρος σο «μπιλιαντάς-λεν» κάνα οντουβά κερέλας-πες αντιγραφή.⁹ a

Σο βακερέλα η Αγία Γραφή; Η Αγία Γραφή βακερέλα ότι η ζωή αβιλί κι πφουβ εκχέσταρ σο τθερέλα γκοντί. Ντικχ καζόμ ξεκάθαρα ντα λογικά βακερέλα-λες: «Σαρ τζανάσα, σαρέ ο κχερά κερντιόνα τζενένταρ, αλλά οντουβά σο κερντάς σαρέ ο πράγματα ισί ο Ντεβέλ». (Εβραίους 3:4) Γιαβερά εδάφια βακερένα: «Καζόμ μπουτ ισί οντουλά σο κερντάν, Ιεχωβά! Σαρέ με σοφία κερντάν-λεν. Η πφουβ ισί πφερντί οντουλέντζαρ σο κερντάν. . . . Ισί πφερντί χουρντέ ντα μπαρέ ζωόντζαρ σο ναστί γκιντιόνα».—Ψαλμός 104:24, 25.

Σο σικαβένα ο αποδείξεις; Η μικροβιολογία κερντάς μπαρί πρόοδος ντα μπορίνασα τι ντικχάς σαρ ισί κερντέ αντράλ ο πο απλά προκαρυωτικά κύτταρα σο τζανάσα. Ο επιστήμονες σο πακιάνα κι εξέλιξη βακερένα ότι ο πρώτα κύτταρα μάλλον ισινέ σαρ λέντε.¹⁰

Άμα η θεωρία σο κερέλα λάφι για την εξέλιξη ισί μπαγιά, πρέπει τι ντελ εκ απόδειξη σο σικαβέλα σαρ αβιλό κορκορό ο πρώτος «απλός» κύτταρος. Κατά γιαβέρ μπάντα, άμα η ζωή αβιλί κατά Ντεβέλ, πρέπει τι τθεράς αποδείξεις ότι κάποιος σο τθερέλα γκοντί σχεδιαντάς ατζέ-ντα ο πο χουρντέ πλάσματα. Κα μανγκέας τι ντικχές σαρ ισί κερντό εκ προκαρυωτικός κύτταρος; Καζόμ κα κεράς-λες ανταβά σκέφτινε άμα εκ ασακό κύτταρος αβέλα-πες τι κερντιόλ κορκορό.

Για τι ντικχές σαρ ισί εκ προκαρυωτικός κύτταρος, κα χρειαζίντιβελας τι αβές εκατοντάδες φαρ πο χουρντό κατά τελεία σο ντικχέσα ακατέ. Άμα κα μανγκέας τι ντες αντρέ κο κύτταρος ναστί κα ντέας επειδή κα τσσιναβέλας-τουτ, εκ κοβλί ντα σικίς μεμβράνη σο αρακχαβέλα ο κύτταρος σαρ εκ μάντρα αρακχαβέλα εκ εργοστάσιος. Ανταγιά μεμβράνη ισί αζόμ σανί σο κα χρειαζίντιβελας τι τσσουβάς 10.000 μεμβράνες, η εκ οπράλ κι γιαβέρ, για τι ερεσέλ κο τθουλιπέ σο τθερέλα εκ χαρτίς. Όμως, νανέ αζόμ απλά κερντί σαρ ισί εκ μάντρα. Σόσκε βακεράσα-λες ανταβά;

Σαρ η μάντρα εκχέ εργοστασιόσκι, η μεμβράνη σο τθερέλα ο κύτταρος αρακχαβέλα-λες κατά πράγματα σο κα μπορίνενας τι κερέν λέσκε ζιάνι. Η μεμβράνη, μουκχέλα χουρντέ μόρια, σαρ οντουλά σο τθερέλα ο οξυγόνος, τι ντεν αντρέ λέστε ντα τι νικιόν. Αλλά, τσσιναβέλα τι ντεν αντρέ λέστε γιαβερά μόρια σο νανέ αζόμ απλά ντα σο κα μπορίνενας τι κερέν λέσκε ζιάνι. Η μεμβράνη επίσης να μουκχέλα ο λατσσέ μόρια τι νασέν κατά κύτταρος. Σαρ κερέλα-λεν σαρέ ανταλά;

Σκέφτινε πάλι ο παράδειγμας ι εργοστασιόσκο. Ο εργοστάσιος μπέκιμ τθερέλα φύλακες κο πόρτες για τι ντικχέν σο ντέλα αντρέ ντα σο νικιόλα αβρί. Αντικάς-ντα, η μεμβράνη σο ισί κο κύτταρος τθερέλα αντρέ πρωτεΐνες σο κερένα μπουτί σαρ ο πόρτες ντα ο φύλακες κο εργοστάσιος.

Ανταλά πρωτεΐνες νανέ σαρέ ίδιες. Μερικές (1) ισί πουταρντέ κο μασκάρ ντα μουκχένα σάντε συγκεκριμέ μόρια τι ντεν ντα τι νικιόν κατά κύτταρος. Γιαβερά πρωτεΐνες ισί πουταρντέ κατά εκ μπάντα (2) ντα πφαντέ κατά γιαβέρ. Τθερένα ο (3) σχήμας σο τθερέλα η ουσία-ντα σο ντέλα αντρέ. Κάνα αβέλα ανταγιά ουσία, η πρωτεΐνη πουτάρντιβελα κατά γιαβέρ μπάντα ντα νικαβέλα ι ουσία αντράλ κατά μεμβράνη (4). Σαρέ ανταλά πράγματα αβένα-πες αβριάλ ατζέ-ντα κατά πο χουρντό κύτταρος.

Σκέφτινε ότι ο «φύλακες» μουκχλέ-τουτ τι νακχές αντρέ κο κύτταρος. Ο προκαρυωτικός κύτταρος αντράλ ισί πφερντό με υγρός, σο ισί σαρ πανί, ντα τθερέλα μπουτ θρεπτικές ουσίες, άλατα ντα γιαβερά συστατικά. Ο κύτταρος λέλα ανταλά βασικά συστατικά για τι λατσσαρέλ ο πράγματα σο χρειαζίντιβελα εκ κύτταρος. Αλλά ανταγιά μπουτί να αβέλα τυχαία, ισί οργανωμέ. Ο κύτταρος, σαρ εκ λατσσό εργοστάσιος, κερέλα κουμάντος χιλιάδες χημικές αντιδράσεις για τι αβέν σαρέ εκχέ σειράσαρ ντα κο σωστός σαάτι.

Ο κύτταρος ντέλα μπουτ πι σαατίσταρ για τι λατσσαρέλ πρωτεΐνες. Σαρ κερέλα-λες ανταβά; Πρώτα, λατσσαρέλα περίπου 20 διαφορετικές βασικές ουσίες σο βακέρντιβενα αμινοξέα. Ανταλά βασικές ουσίες μπουτσσάντιβενα κο ριβοσώματα (5), σο κα μπορίναας τι μοιασκιαράς-λεν με αυτόματα μηχανήματα σο κερένα τι αβέν γιεκ ο αμινοξέα εκχέ συγκεκριμέ σειράσαρ για τι λατσσάρντιβελ εκ συγκεκριμέ πρωτεΐνη. Σαρ ο μπουτιά κο εργοστάσιος μπορεί τι κερντιόνα εκχέ σειράσαρ με εκ κεντρικός ηλεκτρονικός πρόγραμμας, αντικάς-ντα μπουτ μπουτιά σο κερέλα ο κύτταρος κερντιόνα εκχέ σειράσαρ με εκ «ηλεκτρονικός πρόγραμμας», ή γιαβέρτουλους κώδικας, σο βακέρντιβελα DNA (6). Κατά DNA, ο ριβόσωμας λέλα συγκεκριμέ οδηγίες σο σικαβένα καγιά πρωτεΐνη τι λατσσαρέλ ντα σαρ τι λατσσαρέλ-λα (7).

Ανταβά σο αβέλα-πες καζόμ λατσσάρντιβελα η πρωτεΐνη κερέλα-αμέν τι ατσσάς πουταρντέ μόσαρ! Κάθε πρωτεΐνη πακιάρντιβελα ντα λέλα εκ ξεχωριστός τρισδιάστατος σχήμας (8). Ανταβά σχήμας σικαβέλα καγιά μπουτί κα κερέλ η πρωτεΐνη. b Σκέφτινε ότι εκχέ εργοστασιόστε πρέπει τι λατσσάρντιβελ εκ μηχάνημας. Για τι κχελέλ λατσσές ο μηχάνημας πρέπει κάποιος τι τσσουβέλ σαρέ ο κομμάτια σο τθερέλα εκχέ σειράσαρ. Αντικάς-ντα άμα εκ πρωτεΐνη να λατσσάρντιβελα ντα να πακιάρντιβελα σωστά για τι λελ πο σχήμας, αζομάν να κα κχελέλ λατσσές ντα μπέκιμ τι κερέλ ζιάνι κο κύτταρος.

Σαρ αρακχέλα η πρωτεΐνη πο ντρομ για τι γκερέλ-πες οτθάρ σο λατσσάρντιβελα κο τθαν σο πρέπει τι τζαλ; Κάθε πρωτεΐνη σο λατσσαρέλα ο κύτταρος τθερέλα αντρέ πέστε εκ «ταμπέλα» σο βακερέλα κατέ τζάλα, για τι αβέλ σίγουρος ότι κα τζαλ κο σωστός τθαν. Παρότι χιλιάδες πρωτεΐνες λατσσάρντιβενα ντα μπουτσσάντιβενα κάθε λεπτός, σαρέ ερεσένα κο σωστός τθαν.

Σόσκε τθερένα σημασία ανταλά στοιχεία; Ο πολύπλοκα μόρια σο ισί κο πο απλός τζουβντό οργανισμός ναστί αβγατίντιβενα κορκορέ. Αβρί κατά κύτταρος, μερένα. Αντρέ κο κύτταρος, ναστί αβγατίντιβενα χωρίς τι λεν βοήθεια κατά γιαβερά μόρια σο νανέ απλά. Για παράδειγμας, για τι λατσσάρντιβελ εκ ξεχωριστός μόριος σο ντέλα ενέργεια, η τριφωσφορική αδενοσίνη (ΑΤΡ), πρέπει τι αβέν ένζυμα, αλλά για λατσσάρντιβεν ο ένζυμα-ντα πρέπει τι αβέλ ενέργεια κατά τριφωσφορική αδενοσίνη. Αντικάς-ντα, ο DNA (ανταβά μόριος κα ντικχάς-λες κι ερώτηση 3) ισί απαραίτητος για τι λατσσάρντιβεν ο ένζυμα, αλλά ο ένζυμα-ντα ισί απαραίτητα για τι λατσσάρντιβελ ο DNA. Γιαβερά-ντα πρωτεΐνες μπορίνενα τι λατσσάρντιβεν σάντε κατά κύτταρος, αλλά ο κύτταρος-ντα μπορίνελα τι λατσσάρντιβελ σάντε με πρωτεΐνες. c

Ο μικροβιολόγος Ράντου Πόπα να πακιάλα κο λάφια σο βακερέλα η Γραφή για τη δημιουργία. Όμως, κο 2004 πουτσλάς: «Άμα αμέν, σο μπορίνασα τι αλλάνας ο συνθήκες κο πειράματα σο κεράσα ναστί λατσσαράσα ι ζωή, σαρ αβέλα-πες η φύση τι κερέλ-λες ανταβά κορκορί;»¹³ Επίσης βακερντάς: «Ο μπουτιά σο πρέπει τι αβέν-πες για τι κχελέλ εκ κύτταρος ισί αζόμ μπουτ ντα αζόμ δύσκολα τι αβέν, σο να αβέλα-πες σαρέ ανταλά τι κερντιόν κο ίδιος σαάτι κορκορέ».¹⁴

Τούι σο βακερέσα; Η θεωρία σο κερέλα λάφι για την εξέλιξη βακερέλα ότι η ζωή κι πφουβ αβιλί-πες κορκορί χωρίς τι τσσουβέλ πο βας ο Ντεβέλ. Όμως, καζόμ πο μπουτ πράγματα αρακχένα ο επιστήμονες ι ζωγιάκε, αζόμ πο μπουτ ντικχίντιβελα ότι η ζωή να αβιλί-πες κορκορί. Για μα τι τθερέν ανταβά πρόβλημας μερικοί επιστήμονες σο πακιάνα κι εξέλιξη, μανγκένα τι σικαβέν ότι γιαβέρ ισί η ερώτηση «κατάρ αβιλί η ζωή;» ντα γιαβέρ ισί η θεωρία σο κερέλα λάφι για την εξέλιξη. Αλλά ισί τούκε λογικός ανταβά;

Η θεωρία σο κερέλα λάφι για την εξέλιξη βασίντιβελα κι σκέψη ότι για μπουτ βακίτι πράγματα σο αβιλέ τυχαία παλάλ γιαβερέστε κερντέ τι αβέλ η ζωή. Σοράν βακερέλα ότι αβιλέ τυχαία γιαβερά-ντα πράγματα κορκορέ σο κερντέ σαρέ ο πράγματα σο τθερένα ζωή τι αβέν μπουτ διαφορετικά ντα μπουτ πολύπλοκα. Άμα όμως ανταγιά θεωρία να τθερέλα θεμέλιος, σο αβέλα με το γιαβερά θεωρίες σο βασίντιβενα λάτε; Σαρ εκ μπαρό κτίριος κα περέλας άμα να κα τθερέλας θεμέλιος, αντικάς-ντα εκ θεωρία σο κερέλα λάφι για την εξέλιξη, ναστί ατσσόλα άμα να μπορίνελα τι εξηγίνελ κατάρ αβιλί η ζωή.

Ακανά σο ντικχλάμ χάνικ λαφίντζαρ σαρ ισί κερντό ντα σαρ κχελέλα εκ «απλός» κύτταρος, σο ντικχέσα τούι​—στοιχεία σο σικαβένα ότι η ζωή αβιλί κορκορί ή αποδείξεις σο σικαβένα ότι κάποιος κερντάς ι ζωή; Άμα να ισινάν ατζέ σίγουρος, ντικχ πο λατσσές ο «κεντρικός πρόγραμμας» σο κερέλα τι κχελέν λατσσές σαρέ ο κύτταρα.