Σο βακερένα μπουτ επιστήμονες; Μπουτ επιστήμονες σο πακιάνα κι εξέλιξη κα βακερέν τούκε ότι, πριν από δισεκατομμύρια μπρεσά, η ζωή αρχισάλι κι άκρη εκχέ πουρανέ λενιάκι σο σουκιόλας ντα πφερντιόλας πανί ή ντιπ αχόρτ κι ντεριάβ. Πακιάνα ότι εκχέ ασακέ τθανέστε, γκιντισάλε κορκορέ χάνικ χημικές ουσίες σο, κάνα ενωσάλε, αβιλέ σαρ χουρντέ φούσκες ντα λένταρ κερντιλέ πολύπλοκα μόρια σο κορκορέ αρχισάλε τι αβέν ατζέκ πο μπουτ ντα σαρέ ισινέ ίδια. Πακιάνα ότι σο-ντα τζουβντιόλα οπράλ κι πφουβ αβιλό τυχαία κατά εκ ή πο μπουτ «απλά» κύτταρα σο κερντιλέ κι αρχή.

Γιαβερά επιστήμονες σο τθερένα μπαρό ναβ, ντα πακιάνα βον-ντα κι εξέλιξη, να τθερένα ι ίδια άποψη. Βακερένα ότι ο πρώτα κύτταρα ή λένγκε βασικά συστατικά αβιλέ κι πφουβ κατά διάστημας. Σόσκε; Επειδή ο επιστήμονες, παρόλο σο μανγκένα μπουτ, ναστί σικαβένα ότι η ζωή μπορίνελα τι αβέλ κατά μόρια σο να τζουβντιόνα. Κο 2008 ο καθηγητής βιολογίας Αλεξάντρ Μενέζ σικαντάς ι δυσκολία τι αγαβάς σαρ αβιλί η ζωή. Βακερντάς ότι κο τελευταία 50 μπρεσά «να τθεράσα αποδείξεις σο βασίντιβενα σε πειράματα ούτε καέκ ντικχλάς τι αβέλ κορκορί η ζωή κι Πφουβ κατά μόρια σο να τζουβντιόνα, ντα καέκ σημαντική πρόοδος κι επιστήμη να σικαβέλα-λες ανταβά».¹

Σο σικαβένα ο αποδείξεις; Η απάντηση κι ερώτηση: «Κατάρ αβένα ο μαξίμια;» ντιντιλί με αποδείξεις ντα καέκ να βακερέλα ότι νανέ αντικάς. Η ζωή πάντα αβέλα κατά ζωή. Ανταβά ισί εκ βασικός νόμος. Άμα όμως κα τζας παλάλ κο πουρανέ μπρεσά, ισί λογικός τι πακιάς ότι έστω εκ φαρ να αβιλό-πες μπαγιά ανταβά νόμος; Αβέλα-πες κορκορί η ζωή τι αβιλί κατά χημικές ουσίες σο να τζουβντιόνα; Καζόμ εύκολος ισί τι αβιλό-πες κάτι ασακό;

Ο τζενέ σο ρόντενα-λες ανταβά αγαντέ ότι, για τι ατσσόλ τζουβντό εκ κύτταρος, χρειαζίντιβελα τι κερέν μπουτί γιεκ ο πο χάνικ τριν διαφορετικά μόρια σο νανέ απλά.​—ο DNA (δεσοξυριβονουκλεϊνικό οξύ), ο RNA (ριβονουκλεϊνικό οξύ) ντα ο πρωτεΐνες. Αντιβές, χάνικ επιστήμονες κα βακερένας ότι εκ σαστό κύτταρος αβιλό-πες κορκορό κάνα μερικές χημικές ουσίες σο να τζουβντιόνα, αβιλέ γιεκ. Αβέλα-πες όμως τι λατσσάρντιλε κορκορέ ο RNA ή ο πρωτεΐνες; a

Μπουτ επιστήμονες πακιάνα ότι η ζωή κα μπορίνελας τι αβέλ κορκορί ντα ανταβά βασίνενα-λες σε εκ πείραμας σο αβιλό-πες πρώτη φαρ κο 1953. Οντουβά μπρες, ο Στάνλει Λ. Μίλερ μπορισάλο τι λατσσαρέλ μερικά αμινοξέα, ο χημικές ενώσεις σο λένταρ κερντιόνα ο πρωτεΐνες. Βοβ τσσουντάς γιεκ διάφορα αέρια, σο βακέρντιβελα ότι λένταρ ισινέ κερντί η ατμόσφαιρα κάνα κερντιλί η πφουβ, ντα κερντάς ηλεκτρική εκκένωση. Από αζομάν, αρακχίντιλε αμινοξέα σε μετεωρίτη-ντα. Σικαβένα ανταλά πράγματα σο αρακχλέ ότι σαρέ ο βασικές ουσίες σο λένταρ κερντιόλα η ζωή κα μπορίνενας εύκολα τι κερντιόν κορκορέ;

Ο Ρόμπερτ Σαπίρο, εκ καθηγητής χημείας σο σικλιαρέλας κο Πανεπιστήμιος κι Νέα Υόρκη, βακερέλα: «Μερικοί συγγραφείς αμντισάλε ότι, σαρέ ο βασικές ουσίες σο λένταρ κερντιόλα η ζωή, κα μπορίνενας τι λατσσάρντιβεν εύκολα άμα κα κερένας πειράματα σο μοιάζενας οντουλέντζαρ σο κερντάς ο Μίλερ ντα ότι ανταλά ουσίες υπαρχίντιβενας αντρέ κο μετεωρίτες-ντα. Ανταβά σο βακερένα όμως νανέ μπαγιά».² b

Ντικχέν για παράδειγμας ο μόριος RNA. Ισί κερντό κατά γιαβερά μόρια σο ισί πο χουρντέ ντα βακέρντιβενα νουκλεοτίδια. Ο νουκλεοτίδιος ισί διαφορετικός μόριος κατά αμινοξύ σο ισί χάνικ πο απλά κερντό. Ο Σαπίρο βακερέλα ότι «ποτές καέκ να βακερντάς ότι λατσσαρντάς εκ είδος κατά νουκλεοτίδια σε πειράματα ηλεκτρικής εκκένωσης ή ότι αρακχλάς-λεν σε μετεωρίτες».³ Βακερέλα επίσης ότι η πιθανότητα τι λατσσάρντιβελ κορκορό εκ μόριος RNA κάνα αβένα γιεκ χημικές ενώσεις «ισί αζόμ χουρντί σο κα αβάας μπουτ μπαχταλέ άμα ανταβά κα αβέλας-πες ατζέ-ντα σάντε εκ φαρ σαρό κο σύμπαν».⁴

Για τι ντικχάς ακανά ο μόρια σο βακέρντιβενα πρωτεΐνες. Για τι κερντιόν ανταλά, χρειαζίντιβενα από 50 μέχρι μπερεκέτι χιλιάδες αμινοξέα, σο ισί ενωμέ ο εκ ι γιαβερέσαρ με εκ μπουτ συγκεκριμέ σειρά. Ο πο μπουτ φαρ η κάθε πρωτεΐνη σο ισί σε εκ “απλός” κύτταρος τθερέλα 200 αμινοξέα. Όμως, ατζέ-ντα ανταλά απλά κύτταρα τθερένα χιλιάδες διαφορετικά είδη κατά πρωτεΐνες. Η πιθανότητα τι λατσσάρντιβελ κορκορί κι πφουβ ατζέ-ντα εκ πρωτεΐνη σο τθερέλα αντρέ σάντε 100 αμινοξέα ισί μπουτ χουρντί, περίπου 1 κο 1 τετράκις εκατομμύριος.

Ο ερευνητής Χούμπερτ Π. Γιόκεϊ, σο πακιάλα κι εξέλιξη, βακερντάς κάτι ατζέκ: «Κάνα σκεφτίνασα σαρ αβιλί η ζωή, ναστί αβέλα-πες τι κερντιλέ “πρώτα ο πρωτεΐνες”».⁵ Ο πρωτεΐνες ναστί κερντιόνα χωρίς RNA, αλλά ο RNA-ντα ναστί κερντιόλα χωρίς πρωτεΐνες. Όμως, παρόλο σο ισί μπουτ χάνικ πιθανότητες, μουκχ τι βακεράς ότι εμ ο πρωτεΐνες εμ ο μόρια RNA κερντιλέ κορκορέ κο ίδιος τθαν ντα κο ίδιος σαάτι. Καζόμ πιθανότητες πακιάνα ότι ισί τι κερένας μπουτί γιεκ για τι λατσσάρντιβελ εκ είδος ζωής σο κα ατσσόλας τζουβντό ντα κα αβγατίντιβελας κορκορό; «Η πιθανότητα τι αβέλ ανταβά κορκορό (κάνα αβένα γιεκ πρωτεΐνες ντα RNA) ισί αζόμ χουρντί σο μπορίνασα τι βακεράς ότι να υπαρχίντιβελα», βακερέλα η Δρ Κάρολ Κλέλαντ, c σο ισί κο Αστροβιολογικός Ινστιτούτος κι NASA. Επίσης βακερέλα: «Παρόλα αυτά, ο πο μπουτ ερευνητές αμντίνενα ότι αν κα μπορίνεν τι αγαβέν σαρ λατσσάρντιλε κορκορέ ο πρωτεΐνες ντα ο RNA κο μπρεσά σο λατσσάρντιλι η πφουβ, κα αγαντίντιβελ σαρ κερντέ μπουτί γιεκ ανταλά μόρια». Επίσης, βόι βακερέλα για το θεωρίες σο βακέρντιλε αμαρέ ντιβεσέντε ντα βακερένα σαρ αβιλέ κορκορέ ο βασικές ουσίες σο λένταρ κερντιόλα η ζωή: «Καέκ θεωρία να σικαβέλα αμένγκε λατσσές σαρ αβιλό-πες ανταβά».⁶

Σόσκε τθερένα σημασία ανταλά στοιχεία; Σκέφτινε ι δυσκολία σο τθερένα ο ερευνητές σο πακιάνα ότι η ζωή αβιλί-πες κορκορί. Βον αρακχλέ μερικά αμινοξέα σο ισί κο κύτταρα-ντα. Κο εργαστήρια σο τθερένα, κερντέ προσεκτικά σχεδιασμέ πειράματα συγκεκριμέ τροπόσαρ ντα λατσσαρντέ γιαβερά-ντα μόρια σο νανέ αζόμ απλά. Πακιάνα ότι κα λατσσαρέν σαρέ οντουλά σο χρειαζίντιβενα για τι κερντιόλ εκ «απλός» κύτταρος. Ανταβά σο κερένα κα μπορίναας τι μοιασκιαράς-λες με εκ επιστήμονας σο λέλα πράγματα κατά φύση ντα λένταρ λατσσαρέλα ατσάλι, πλαστικός, σιλικόνη ντα καλώδια, ντα κερέλα εκ ρομπότ. Σοράν τσσουβέλα εκ πρόγραμμας λέσκε για τι μπορίνελ τι κερέλ ο ρομπότ κορκορό γιαβερά-ντα ρομπότ. Σο κα μπορίνελας τι σικαβέλ ανταλέσαρ; Σάντε ότι εκ τζενό σο τθερέλα μπουτ γκοντί μπορίνελα τι λατσσαρέλ εκ μπουτ λατσσό μηχάνημας.

Αντικάς-ντα, άμα εκ ντιβές ο επιστήμονες κα λατσσαρέν εκ κύτταρος, κα αβέλας μπαγιά μπαρί μπουτί​—όμως κα σικαβέν ότι ο κύτταρος λατσσάρντιλο κορκορό; Σίγουρα κα σικαβένας ο αντίθετος, αντικάς νανέ;

Τούι σο βακερέσα; Σαρέ ο στοιχεία σο τθερένα ο επιστήμονες αμαρέ ντιβεσέντε σικαβένα ότι η ζωή μπορίνελα τι αβέλ σάντε κατά ζωή. Για τι πακιάλ εκ τζενό ότι εκ «απλός» κύτταρος αβιλό κορκορό κατά χημικές ουσίες σο να τζουβντιόνα, σικαβέλα ότι πακιάλα εύκολα σο-ντα ασουνέλα.

Όμως, τούι σο κα κερές; Κα πακιάς σο-ντα ασουνέσα; Προτού τι ντες ι απάντηση, ντικχ χάνικ πο λατσσές σαρ ισί κερντό ο κύτταρος. Ανταβά κα βοηθίνελ-τουτ τι αγαβές άμα ο θεωρίες σο βακερένα μερικοί επιστήμονες για τι σικαβέν σαρ αβιλί η ζωή ισί σωστές ή άμα ισί σαρ ο μασάλια σο βακερένα ο νταντά ντα ο νταγιά πουμαρέ τσσαβένγκε για τι εξηγίνεν λένγκε κατάρ αβένα ο μαξίμια.