Σο βακερένα μπουτ επιστήμονες; Μπουτ βιολόγοι ντα γιαβερά επιστήμονες πακιάνα ότι αντρέ εκατομμύριε μπρεσέντε αβιλέ τυχαία κάποια πράγματα χωρίς τι κερέλ-λεν καέκ, ντα αντικάς κερντιλό ο DNA ντα λέσκε οδηγίες. Βακερένα ότι νανέ αποδείξεις σο σικαβένα ότι κάποιος σχεδιαντάς ανταβά μόριος ούτε κο τρόπος σο ισί κερντό, ούτε κο πληροφορίες σο ντέλα, ούτε κο τρόπος σο κερέλα μπουτί.¹⁷

Σο βακερέλα η Αγία Γραφή; Η Αγία Γραφή βακερέλα ότι ο τρόπος σο ισί κερντέ ο μέρη σο τθερέλα αμαρό σώμας—ατζέ-ντα ο ντιβεσά σο χρειαζίντιβενα για τι κερντιόν—ισί γραμμέ εκχέ συμβολικέ βιβλιόστε σο αβέλα κατά Ντεβέλ. Ντικχ σαρ εξηγιντάς-λες ανταβά ι Ντεβλέσκε πνευμάσαρ ο βασιλιάς Δαβίδ, σο βακερντάς ι Ντεβλέσκε: «Το γιακχά ντικχλέ-μαν ατζέ-ντα κάνα ισινόμας αντρέ κο περ· σαρέ μι σωμάσκε πράγματα ισινέ γραμμέ τι βιβλιόστε, εμ ο ντιβεσά σο λιντέ για τι λατσσάρντιβεν, πριν τι αβέλ ατζέ-ντα εκ ανταλένταρ».—Ψαλμός 139:16.

Σο σικαβένα ο αποδείξεις; Άμα η θεωρία σο κερέλα λάφι για την εξέλιξη ισί μπαγιά, πρέπει τι σικαβέλ ότι κα μπορίνελας ο DNA τι κερντιόλ κορκορό κάνα αβιλέ τυχαία παλάλ γιαβερέστε μερικά πράγματα. Άμα ο λάφια σο βακερέλα η Αγία Γραφή ισί μπαγιά, ο DNA πρέπει τι ντελ μπαρέ αποδείξεις ότι κερντιλό εκχέσταρ σο τθερέλα μπαρί γκοντί.

Άμα κα μπεσάς τι κεράς λάφι για το DNA απλέ λαφίντζαρ, κα ντικχάς ότι μπορίνασα τι αγαβάς σαρ ισί κερντό ντα κα μπεϊντίνας οντουλά σο κα σικλιάς. Οτθάρ κα κεράς ατζέκ εκ ταξίδι αντρέ κο κύτταρος. Ανταγιά φαρ όμως, κα ντας αντρέ κι τζενέσκο κύτταρος. Βάκερ ότι τζάσα σε εκ μουσείος σο ισί κερντό για τι σικαβέλ τούκε σαρ κχελέλα εκ ασακό κύτταρος. Σαρό ανταβά μουσείος ισί σαρ εκ τζενέσκο κύτταρος, αλλά ισί 13.000.000 φαρ πο μπαρό. Ισί σαρ εκ μπουτ μπαρό γήπεδος σο τθερέλα 70.000 θέσεις.

Ντέσα αντρέ κο μουσείος ντα σαστίνεσα σο ντικχέσα ανταβά τθαν σο ισί πφερντό περίεργα σχήματα ντα πράγματα. Ο κύτταρος κο μασκάρ τθερέλα εκ πυρήνας, εκ κύκλος σο ισί αζόμ μπαρό καζόμ ισί εκ κτίριος σο τθερέλα 20 ορόφους. Ακανά τζάσα οτθέ.

Νακχέσα εκ πόρτα σο ισί κι μεμβράνη οπράλ κο πυρήνας ντα ντικχέσα ντονταλάι. Κο δωμάτιος ανταβά ισί 46 χρωμοσώματα. Ανταλά χρωμοσώματα ισί ζευγάρια ντα ο κάθε ζευγάρι ισί ίδιος, αλλά τθερένα διαφορετικός βουτσσιπέ. Ο ζευγάρι σο ισί πασέ τούτε ισί αζόμ μπαρό καζόμ ισί εκ κτίριος σο τθερέλα 12 ορόφους (1). Ο κάθε χρωμόσωμας ισί πφαντό σικίς κο μασκάρ, ντα οτθάρ ισί σαρ ντούι ενωμέ λουκάνικα, αλλά τθερένα ο τθουλιπέ εκχέ μπαρέ δεντρόσκο. Ντικχέσα μπουτ ζώνες τι πακιαρέν ο χρωμοσώματα. Καζόμ τζάσα πασέ, ντικχέσα ότι η κάθε ζώνη τθερέλα οπράλ κάθετες γραμμές. Ντα μασκαρέ κο γραμμές ανταλά τθερέλα γιαβερά πο χουρντέ γραμμές σο ισί οριζόντιες (2). Μήπως ισί βιβλία εκ οπράλ γιαβερέστε; Νάα. Ισί κόμπια σο ισί σικίς πφαντέ κι σειρά. Ταρτίνεσα ι άκρη κατά κόμπι ντα κάνα πουτάρντιβελα σαστίνεσα σο ντικχέσα ότι ο κόμπι αντρέ ισί πακιαρντό σαρ χουρντό ελατήριος σο τθερέλα πο χουρντέ στροφές (3), ντα ισί ανταλά-ντα σε εκ σειράς. Αντρέ κο στροφές ανταλά ισί ο πο σημαντικός πράγμας αντρέ κο μουσείος​—κάτι σο μοιάζελα εκχέ μπουτ μπαρέ σολέσαρ. Σο ισί ανταβά;

Για τι κεράς λάφι πο απλέ λαφίντζαρ κα μοιασκιαράς ανταβά κομμάτι σο τθερέλα ο χρωμόσωμας εκχέ σολέσαρ. Ανταβά σολό ισί τθουλό περίπου 2,5 εκατοστά. Ισί γκιντιντό σικίς σε μασούρια (4), σο βοηθίνενα ο σολό τι πακιάρντιβελ ντα τι κερέλ στροφές αντρέ κο στροφές. Ανταλά στροφές ισί κχουβντέ ντα αντικάς μπορίνενα τι ατσσόν σαρ ισί. Ανταβά σο ντικχέσα τθερέλα εκ ταμπέλα σο βακερέλα ότι ο σολό ισί πακιαρντό με εκ μπουτ ξεχωριστός τρόπος. Άμα κα λες ο σολό σο ισί κο κάθε χρωμόσωμας ντα κα ταρτίνες-λες σαρό, κα αβέλ αζόμ μπαρό σο κα πακιάρντιβελας η επκάς πφουβ! a

Εκ βιβλίος σο κερέλα λάφι για την επιστήμη βακερέλα ότι ανταβά ξεχωριστός πακιαριπέ ισί εκ «μπαρό κατόρθωμας κι μηχανική».¹⁸ Ισί λογικός τι βακεράς ότι ανταβά μπαρό κατόρθωμας να κερντάς-λες εκ μηχανικός; Άμα ανταβά μουσείος τθερέλας εκ μπουτ μπαρό μπακάλι σο μπικινέλας εκατομμύρια πράγματα ντα σαρέ ανταλά πράγματα κα μπορίνεας τι αρακχές-λεν εύκολα επειδή ισινέ εκχέ σειράτε, κα πακιάας ότι ανταγιά μπουτί να κερντάς-λα καέκ; Σίγουρα όχι! Όμως, κάτι ασακό ισί μπουτ απλός ανγκλάλ κο ξεχωριστός πακιαριπέ σο βακερντάμ πο οπρέ.

Εκ γιαβέρ ταμπέλα σο ντικχέσα βακερέλα τούκε τι λες τι βαστέντε κατά εκ μπάντα ο σολό για τι ντικχές-λες πο λατσσές (5). Καζόμ ασταρέσα-λες, ντικχέσα ότι νανέ εκ σολό σαρ ο γιαβερά. Τθερέλα ντούι νήματα σο ισί πακιαρντέ ο εκ ι γιαβερέσαρ ντα τθερένα αντρέ μπουτ χουρντέ γραμμές. Ανταλά γραμμές τθερένα ι ίδια απόσταση η εκ ι γιαβεριάσαρ ντα ενώνενα ο νήματα. Σαστό ο σολό ισί σαρ εκ σολέσκι σκάλα σο ισί μπολντιντί. (6). Αζομάν αγαβέσα ότι ανταβά σο ασταρέσα τι βαστέντε ισί ακριβώς σαρ ο μόριος DNA​—εκ κατά πράγματα σο ναστί αγαβένα ο τζενέ!

Εκ μόριος DNA, γκιντιντό σικίς σε μασούρια ντα κχουβντό, ισί εκ χρωμόσωμας. Ο σκαλιά σο τθερέλα η σολέσκι σκάλα βακέρντιβενα ζευγάρια βάσεων (7). Σο μπουτί κερένα; Κάι χρειαζίντιβελα σαρό ανταβά; Εκ ταμπέλα σικαβέλα-λες απλέ λαφίντζαρ.

Η ταμπέλα βακερέλα ότι για τι αγαβάς ο DNA, πρέπει πρώτα τι αγαβάς ανταλά σκαλιά, ο γραμμές σο ισί αντρέ κι σολέσκι σκάλα. Αν τι γκοντιάτε ότι η σολέσκι σκάλα ισί ιλιαντί κο μασκάρ. Η κάθε μπάντα τθερέλα εκ κομμάτι κατά σκαλίς. Ισί σάντε σταρ διαφορετικά είδη ανταλένταρ. Ο επιστήμονες νικαντέ λένγκε ο ναβά A, T, G ντα C. Ντα ατσσιλέ πουταρντέ μόσαρ κάνα αγαντέ ότι η σειρά σο ισί τσσουβντέ ανταλά γράμματα γκερένα πληροφορίες σο ισί γκεραντέ σε εκ κώδικας.

Άμα τθερέσα ασουντό, ο κώδικας Μορς νικίστιλο περίπου κο 1840 για τι μπορίνεν ο τζενέ τι μπουτσσαβέν αμπέρια αντράλ κατά τηλέγραφος. Οντουβά κώδικας τθερέλας σάντε ντούι «γράμματα»​—εκ τελεία ντα εκ παύλα. Όμως λένταρ μπορίνενας τι λατσσάρντιβεν σο-ντα λέξεις ντα προτάσεις μανγκέλας εκ τζενό. Ο DNA τθερέλα εκ κώδικας σταρέ γραμματέντζαρ. Η σειρά σο νικιόνα ανταλά γράμματα​—ο A, ο T, ο G ντα ο C​—κερέλα «λέξεις» σο βακέρντιβενα κωδικόνια. Κατά κωδικόνια κερντιόνα «ιστορίες» σο βακέρντιβενα γονίδια. Ο κάθε γονίδιος τθερέλα περίπου 27.000 γράμματα. Ανταλά γονίδια ντα ο μπαρό τθαν σο τθερένα κο μασκάρ, ισί ο χρωμοσώματα, σο κα μπορίναας τι μοιασκιαράς-λεν με το κεφάλαια ι βιβλιόσκε. Χρειαζίντιβενα 23 χρωμοσώματα για τι κερντιόλ σαστό ο «βιβλίος»​—ο γονιδίωμας, δηλαδή σαρέ ο γενετικές πληροφορίες σο σικαβένα σαρ κα αβέλ ο κάθε τζενό. b

Άμα ο γονιδίωμας ισινέ μπαγιά εκ βιβλίος, κα αβέλας μπουτ μπαρό. Καζόμ πληροφορίες κα τθερέλας; Ι τζενέσκο γονιδίωμας τθερέλα περίπου τριν δισεκατομμύρια ζευγάρια βάσεων, δηλαδή σκαλιά, κι σολέσκι σκάλα σο τθερέλα ο DNA.¹⁹ Αν τι γκοντιάτε εκ εγκυκλοπαίδεια σο ο κάθε τόμος, ή γιαβέρτουλους βιβλίος, λάκο τθερέλα πο μπουτ από χίλιες σελίδες. Ο γωνιδίωμας κα πφερέλας 428 ασακέ τόμους. Άμα κα τσσουβές ντα ο αντίγραφος λέσκο σο ισί κο κάθε κύτταρος κα ερεσέλας 856 τόμους. Άμα κα γραφίνεας κορκορό σαρέ ο «λέξεις» σο τθερέλα ο γονιδίωμας, κα κερέας μπουτί 8 σαάτια κάθε ντιβές για 80 μπρεσά χωρίς τι μπεσές ούτε εκ ντιβές!

Όμως σινανέ κα κερέας σαρί ανταγιά μπουτί. Σαρ αβέλα-πες τι ερεσέν 856 μπαρέ τόμοι κο κάθε εκ κατά 100 τρισεκατομμύρια χουρντέ κύτταρα σο τθερέσα; Καέκ τζενό ναστί τσσουβέλα αζόμ μπουτ πληροφορίες εκχέ αζόμ χουρντέ τθανέστε.

Εκ καθηγητής κι μοριακή βιολογία ντα κι επιστήμη σο τθερέλα τι κερέλ με το υπολογιστές βακερντάς: «Εκ γραμμάριος DNA άμα ισινέ ντιπ σουκό κα αβέλας μπουτ χουρντό, περίπου εκ κυβικός εκατοστός. Ανταβά γραμμάριος DNA λέλα αζόμ μπουτ πληροφορίες σο αμέν για τι γκίντας-λεν κα μανγκάας περίπου εκ τρισεκατομμύριος CD [σιντιά]».²⁰ Σο σικαβέλα ανταβά; Ντεν-τουμέν γκοντί ότι ο DNA τθερέλα ο γονίδια, δηλαδή ο οδηγίες για τι λατσσάρντιβελ εκ σώμας τζενέσκο. Κάθε κύτταρος τθερέλα αντρέ σαρέ ο οδηγίες. Κο DNA ερεσένα αζόμ μπουτ πληροφορίες σο άμα κα τσσουβάας-λεν σε εκ χουρντί ρόι κα τθεράας ο οδηγίες για τι λατσσάρντιβεν 350 φαρ σαρέ ο τζενέ σο τζουβντιόνα αντιβές σαρί κι πφουβ! Ο DNA σο χρειαζίντιβελα για τι λατσσάρντιβεν ο εφτά δισεκατομμύρια τζενέ σο ισί οπράλ κι πφουβ ίσα ίσα σο κα μακχέλας οπράλ ι ρόι.²¹

Παρόλο σο τζάλα ανγκλάλ η επιστήμη σο τθερέλα σχέση με την μικρογράφηση, καέκ συσκευή σο κερντέ ο τζενέ για τι τσσουβέν αντρέ πληροφορίες να τθερέλα αζόμ μπαρί μνήμη σαρ τθερέλα ο DNA. Όμως, εκ παράδειγμας σο κα βοηθίνελ-αμέν τι αγαβάς-λες ανταβά πο λατσσές ισί ο σιντίς (CD). Άμα κα σκεφτίνες πο λατσσές σαρ ισί εκ σιντίς ντα σαρ κχελέλα κα σαστίνες. Ντικχάσα ξεκάθαρες αποδείξεις σο σικαβένα ότι λατσσάρντιλο τζενένταρ σο τθερένα μπαρί γκοντί. Ντα πακιάσα-λες ανταβά ατζέ πο μπουτ άμα ο σιντίς, να τθερέλα αντρέ σο τ’ αβέλ, αλλά τθερέλα πληροφορίες ντα οδηγίες σο σικαβένα με λεπτομέρειες σαρ τι κερντιόν μπαρέ μηχανήματα ντα σαρ τι λατσσάρντιβεν άμα κα τθερέν εκ πρόβλημας! Ανταλά πληροφορίες να κερένα ο σιντίς ούτε πο πφαρό ούτε πο μπαρό. Όμως, ισί ο πο σημαντικός πράγμας σο τθερέλα. Να κερένα-τουτ σίγουρος, ότι για τι αβέν-πες σαρέ ανταλά οδηγίες, πρέπει τι κερντάς μπουτί εκ τζενό σο τθερέλα μπαρί γκοντί; Να πακιάσα τούι-ντα ότι για τι γραφίντιβελ κάτι, πρέπει τι γραφίνελ-λες κάποιος;

Νανέ περίεργος σο μοιασκιαράσα ο DNA εκχέ σιντίσαρ ή εκχέ βιβλιόσαρ. Εκ βιβλίος σο κερέλα λάφι για το γονιδίωμας βακερέλα: «Άμα κα ντικχάς σαρ κχελέλα ο γονιδίωμας να μοιάζελα εκχέ βιβλιόσαρ, αλλά ισί εκ βιβλίος. Εκ βιβλίος τθερέλα αντρέ πληροφορίες σο ισί γραμμέ με ψηφία . . . Ο ίδιος αβέλα-πες με το γονιδίωμας». Ατζέκ βακερέλα: «Ο γονιδίωμας ισί εκ μπουτ έξυπνος βιβλίος, επειδή μπορίνελα . . . εμ τι νικαβέλ φωτοτυπίες πο νεαυτός εμ τι διαβάνελ-πες».²² Ανταβά κερέλα-αμέν τι σκεφτίνας κάτι γιαβέρ-ντα σο κερέλα ο DNA.

Καζόμ μπεσέσα αντρέ κο μουσείος, τθερέλα μπουτ ησυχία ντα σκεφτίνεσα άμα κο πυρήνας-ντα, σο τθερέλα ο κύτταρος, αβέλα-πες ο ίδιος. Αζομάν ντικχέσα κάτι γιαβέρ-ντα. Οπράλ σε εκ γυάλινος κουτίς σο τθερέλα αντρέ εκ κομμάτι σολό κατά DNA ισί εκ ταμπέλα σο βακερέλα: «Ιστάβ ο Κουμπίς ντα Ντικχ ι Οθόνη». Ισταβέσα ντα εκ τζενό εξηγίνελα: «Ο DNA κερέλα ντούι μπουτ σημαντικά μπουτιά. Η πρώτη βακέρντιβελα αντιγραφή. Ο DNA πρέπει τι κερέλ-πες αντιγραφή για τι τθερέλ κάθε νεβό κύτταρος εκ αντίγραφος σο τθερέλα σαρέ ο γενετικές πληροφορίες σο σικαβένα σαρ κα αβέλ ο κάθε τζενό. Ντικχέν σαρ αβέλα-πες ανταβά».

Κι οθόνη ντικχέσα ότι πουτάρντιβελα εκ πόρτα κι άκρη ντα νικιόλα εκ μηχάνημας σο ισί δύσκολος τι αγαβές σαρ κχελέλα. Κι πραγματικότητα ισί μπουτ ρομπότ μαζί σο ισί ενωμέ ντα κερένα μπουτί γιεκ. Ανταβά μηχάνημας τζάλα κο DNA, ντα τθάβντελα οπρά-λέστε σαρ εκ τρένος τθάβντελα οπράλ κο γραμμές. Τθάβντελα μπουτ σουγκό ντα να ερεσαβέσα τι ντικχές λατσσές σο κερέλα, αλλά ντικχέσα ακανά ότι παλά-λέστε νανέ εκ «σολό», αλλά ντούι σαστέ «σολέ» DNA.

Ο τζενό σο κερέλα λάφι βακερέλα: «Ντικχέσα εκχέ μπουτ απλέ τροπόσαρ σο αβέλα-πες κάνα κερέλα-πες αντιγραφή ο DNA. Εκ ομάδα μόρια, σο ισί σαρ μηχανήματα ντα βακέρντιβενα ένζυμα, τθάβντελα οπράλ κο DNA, ιλιαβέλα-λες κο ντούι ντα σοράν λέλα ο κάθε κομμάτι σο ατσσόλα για τι κερέλ εκ νεβό, σαστό «σολό». Ναστί σικαβάσα σαρέ οντουλά σο αβένα-πες οτθέ​—σαρ ισί για παράδειγμας η μπουτ χουρντί συσκευή σο ισί ανγκλάλ κατά μηχάνημας ντα τσσινέλα ο DNA κατά εκ μπάντα για τι μπορίνελ τι ντελ ντονταλάι ελεύθερα, ντα μα τι πακιάρντιβελ μπουτ σικίς. Ούτε μπορίνασα τι σικαβάς τούκε, σο αβέλα-πες κο DNA για τι αρακχίντιβεν ο λάθη σο μπορεί τι αβιλέ-πες. Ντα ανταλά λάθη πάντα αρακχίντιβενα ντα διορθώντιβενα μπουτ λατσσέ τροπόσαρ».​—Ντικχ ι φωτογραφία κο  σελίδες 16 ντα 17.

Ο τζενό σο κερέλα λάφι βακερέλα κάτι ατζέκ: «Ανταβά σο μπορίνασα τι σικαβάς τούκε ισί καζόμ σουγκό τθάβντελα. Σίγουρα ντικχλάν ότι ανταβά ρομπότ τθάβντελα μπουτ σουγκό οπράλ κο DNA. Ανταλά ένζυμα, σο βακερντάμ ότι ισί σαρ μηχανήματα, τζάνα αζόμ σουγκό σο νακχαβένα σε εκ δευτερόλεπτος 100 σκαλοπάτια, δηλαδή ζευγάρια βάσεων.²³ Άμα ο σολό κατά DNA ισινέ αζόμ μπαρό καζόμ ισί ο γραμμές ι τρενόσκε, ανταλά «μηχανήματα» κα νασένας με περίπου 80 χιλιόμετρα κι ώρα. Κο βακτήρια, ανταλά χουρντέ μηχανήματα σο κερένα αντιγραφή μπορίνενα τι τθάβντεν ντες φαρ πο σουγκό! Κο κάθε κύτταρος κι τζενέσκο ισί εκατοντάδες ασακέ μηχανήματα σο κερένα αντιγραφή σε μπουτ σημεία οπράλ κο DNA. Σάντε αντρέ οχτώ σαατίντε μπορίνενα τι κερέν αντιγραφή σαρό ο γονιδίωμας».²⁴ (Ντικχ ο πλαίσιος « Εκ Μόριος σο Διαβάνελα-πες ντα Κερέλα-πες Αντιγραφή», κι σελίδα 20.)

Ο ρομπότ σο κερένα αντιγραφή ο DNA νασένα. Ακανά αβέλα εκ γιαβέρ μηχάνημας. Ανταβά-ντα ισί οπράλ κο DNA, αλλά να τθάβντελα αζόμ σουγκό. Ντικχέσα ο «σολό» κατά DNA τι τσσουβέλ-πες αντρέ κο μηχάνημας κατά εκ μπάντα ντα τι νικιόλ κατά γιαβέρ μπάντα χωρίς τι αβέλ-πες καέκ αλλαγή. Όμως, εκ γιαβέρ νεβό σολό, σο τθερέλα εκ νήμας, νικιόλα τελάλ κατά μηχάνημας, σαρ εκ πορί σο μπαριόλα. Σο αβέλα-πες;

Πάλι ο τζενό σο κερέλα λάφι βακερέλα: «Η δεύτερη μπουτί σο κερέλα ο DNA βακέρντιβελα μεταγραφή. Ο DNA ισί αρακχαντό αντρέ κο πυρήνας ντα να νασέλα ποτές οτθάρ. Σαρ όμως, αβέλα-πες τι διαβάντιβεν ντα τι χρησιμοποιήντιβεν λέσκε γονίδια​—ο οδηγίες για τι κερντιόν σαρέ ο πρωτεΐνες αμαρέ σωμάστε; Ανταβά μηχάνημας, ο ένζημος, αρακχέλα εκ σημείος κο DNA σο μπουτσσάντιβενα χημικά σήματα σε εκ γονίδιος αβριάλ κατά πυρήνας. Σοράν ανταβά μηχάνημας λέλα εκ μόριος σο βακέρντιβελα RNA (ριβονουκλεϊνικό οξύ) για τι κερέλ αντιγραφή ανταβά γονίδιος. Ο RNA μοιάζελα μπουτ κο εκ νήμας κατά σολό σο τθερέλα ο DNA, αλλά να κερέλα ι ίδια μπουτί. Η μπουτί λέσκι ισί τι λελ ο πληροφορίες σο ισί γκεραντέ κο γονίδια. Ο RNA λέλα ανταλά πληροφορίες κάνα νακχέλα κατά ένζυμα, σοράν νικιόλα κατά πυρήνας ντα τζάλα σε εκ κατά ριβοσώματα, σο κα ντελ ο πληροφορίες για τι κερντιόλ εκ πρωτεΐνη».

Ανταβά σο ντικχλάν κερέλα-τουτ τι σαστίνες. Ατσσιλάν πουταρντέ μόσαρ κατά μουσείος ντα κατά μπαρί γκοντί σο τθερένα οντουλά τζενέ σο λατσσαρντέ ανταλά μηχανήματα. Αλλά σο κα αβέλας-πες, άμα σαρέ ανταλά πράγματα σο ντικχέσα αντρέ κο μουσείος, κα κχελένας κο ίδιος σαάτι για τι σικαβέν τούκε ο χιλιάδες μπουτιά σο αβένα-πες κι τζενέσκο κύτταρος; Σο μπαρί μπουτί κα αβέλας ανταγιά!

Αγαβέσα όμως, ότι σαρέ ανταλά μπουτιά σο κερντιόνα κατά χουρντέ, πολύπλοκα μηχανήματα αβένα-πες ανταγιά στιγμή κατά 100 τρισεκατομμύρια κύτταρα σο τθερέσα! Το DNA διαβάνελα-πες ντα ντέλα οδηγίες για τι κερντιόν ο εκατοντάδες χιλιάδες διαφορετικές πρωτεΐνες σο ισί τι σωμάστε​—σαρ ισί ο ένζυμα, ο ιστοί ντα ο όργανα. Αντρέ τι σωμάστε ακανά το DNA κερέλα-πες αντιγραφή ντα ρόντελα τι διορθώνελ ο λάθη σο μπορεί τι αβιλέ-πες για τι τθερέλ κάθε νεβό κύτταρος σαρέ ο οδηγίες.

Ατζέκ εκ φαρ πουτς-τουτ: «Κατάρ αβιλέ σαρέ ανταλά οδηγίες;» Η Γραφή σικαβέλα ότι ανταβά «βιβλίος» ντα σαρέ οντουλά σο τθερέλα αντρέ, γραφισάλε Εκχέσταρ σο νανέ τζενό. Μήπως ανταβά ισί κάτι σο πακιάνας-λες κο πουρανέ μπρεσά ή τζάλα κόντρα κι επιστήμη;

Σκέφτινε: Κα μπορίνενας τζενέ τι λατσσαρέν ανταβά μουσείος; Σίγουρα κα τθερένας μπαρέ δυσκολίες. Μπουτ πράγματα σο τθερένα τι κερέν με το γονιδίωμας ι τζενέσκο ντα ι τροπόσαρ σο κχελέλα ατζέκ ναστί αγαβάσα-λεν λατσσές. Ο επιστήμονες ρόντενα τι αγαβέν πο λατσσές κάι ισί σαρέ ο γονίδια ντα σο μπουτί κερένα. Ντα ο γονίδια ισί κάτι μπουτ χουρντό αντρέ κο σολό σο τθερέλα ο DNA. Αντρέ κο DNA ισί μπαρέ τθανά σο να τθερένα γονίδια, Σο κα βακεράας λένγκε; Ο επιστήμονες βακερντέας ότι ανταλά τθανά ισί «άχρηστος DNA», αλλά ακανά τελευταία να πακιάνα-λες ανταβά. Ανταλά τθανά κερένα κουμάντος σαρ κα κερέν μπουτί ο γονίδια ντα καζόμ μπουτί κα κερέν. Αλλά ατζέ-ντα άμα κα μπορίνενας ο επιστήμονες τι λατσσαρέν ανταβά μουσείος σο μοιάζελα κο DNA ντα ο μηχανισμοί σο κερένα αντιγραφή ντα διορθώνενα ο λάθη, κα μπορίνενας τι κερέν-λες τι κχελέλ σαρ ο DNA;

Εκ επιστήμονας σο τθερέλα μπαρό ναβ, ο Ρίτσαρντ Φέινμαν, γραφιντάς εκχέ πινακάστε προτού τι μερέλ ακαλά λάφια: «Οντουβά σο ναστί λατσσαράβα, να αγαβάβα-λες».²⁵ Ανταβά ταπεινός επιστήμονας μπεϊντίνελας τι βακερέλ ι αλήθεια, ντα σίγουρα ο λάφια λέσκε ισί μπαγιά για το DNA. Ο επιστήμονες ναστί λατσσαρένα ο DNA ντα σαρέ ο μηχανισμοί σο τθερέλα για τι κερέλ-πες αντιγραφή ντα μεταγραφή, ούτε μπορίνενα τι αγαβέν-λες λατσσές. Όμως, μερικοί επιστήμονες βακερένα ότι βον τζανένα λατσσές ότι σαρέ ανταλά αβιλέ τυχαία, χωρίς τι κερέλ-λεν καέκ. Αλλά σικαβένα-λες μπαγιά ανταβά ο στοιχεία σο ντικχλάν;

Μερικά μορφωμέ τζενέ αγαντέ ότι ο στοιχεία σικαβένα ο αντίθετος. Για παράδειγμας, ο Φράνσις Κρικ, εκ επιστήμονας σο βοηθιντάς τι αρακχίντιβελ ο διπλός σολό σο τθερέλα ο DNA, πακιάλα ότι ανταβά μόριος ισί αζόμ οργανωμέ σο να κα μπορίνελας τι κερντιόλ κορκορό κατά πράγματα σο αβιλέ τυχαία. Βοβ βακερντάς, ότι εξωγήινοι σο τθερένα μπαρί γκοντί, μπέκιμ τι μπουτσσαντέ ο DNA κι πφουβ για τι αβέλ η ζωή ακατέ-ντα.²⁶

Ο τελευταία μπρεσά, ο μπαρό φιλόσοφος Άντονι Φλιου, σο υποστηρίνελας για 50 μπρεσά ότι να υπαρχίντιβελα Ντεβέλ, αλλαντάς ντιπ πι άποψη. Κάνα αβιλό 81 μπρεσένγκο αρχισάλο τι πακιάλ ότι κάποιος σο τθερέλα μπαρί γκοντί λατσσαρντάς ι ζωή. Σόσκε κερντάς ανταγιά αλλαγή; Ροντιντάς λατσσές ο DNA. Κάνα πουτσλέ-λες, σαρ κα λεν-λες ο γιαβερά επιστήμονες, σο να τθερένα ι ίδια άποψη λέσαρ, βακέρντιβελα ότι απαντιντάς: «Ανταβά κα αβέλας μπουτ μπέτι. Σαρέ μι ζωγιάτε τθεράβας ανταγιά αρχή . . . [τι] μουκχάβ ο αποδείξεις τι σικαβέν μάνγκε ο ντρομ ντα τι τζαβ κάι-ντα γκερένα-μαν».²⁷

Τούι σο βακερέσα; Κάι γκερένα ο αποδείξεις; Αν τι γκοντιάτε ότι κο μασκάρ σε εκ εργοστάσιος, ντικχέσα εκ δωμάτιος σο τθερέλα αντρέ εκ μπαρό υπολογιστής. Ο υπολογιστής σο ισί οτθέ τθερέλα εκ περίπλοκος πρόγραμμας σο κερέλα κουμάντος σαρέ ο μπουτιά σο αβένα κο εργοστάσιος. Επίσης, ανταβά πρόγραμμας μπουτσσαβέλα συνέχεια οδηγίες σο σικαβένα σαρ τι κερντιόν σαρέ ο μηχανήματα ντα σαρ τι λατσσάρντιβεν άμα κα τθερέν εκ πρόβλημας, ντα κι ίδια στιγμή κερέλα-πες αντιγραφή ντα ρόντελα για τι αρακχίντιβεν ο λάθη σο μπορεί τι αβιλέ-πες. Σο κα βακερέας αφού ντικχλάν ανταλά στοιχεία; Ότι ο υπολογιστής ντα ο πρόγραμμας σο τθερέλα λατσσάρντιλε κορκορέ ή λατσσάρντιλε τζενένταρ σο τθερένα μπαρί γκοντί; Ο στοιχεία ντένα κορκορέ ι απάντηση.