1-3. (α) Καβά ισί εκ κατά λατσσέ δώρα σο ντινάς-αμέν ο Ιεχωβά; Σαρ κα χρησιμοποιήναας μπέτι τροπόσαρ ανταβά δώρος; (β) Σαρ πρέπει τι χρησιμοποιήνας αμαρί τσσιπ;

 ΕΚ ΝΤΑΤ ντέλα πι τερνέ τσσαβέστε εκ ποδήλατος. Χαιρίνελα μπουτ σο κερντάς πι τσσαβέσκε εκ ασακό σουκάρ δώρος. Άμα όμως λέσκο τσσαβό οδηγίνελα ο ποδήλατος χωρίς τι προσοχίνελ ντα ντινάς καέκ τζενές, σαρ κα αβέλ ανταβά ι νταντέσκε;

² Ο Ιεχωβά ντέλα-αμέν «σαρέ ο λατσσέ ντα τέλεια δώρα». (Ιακώβου 1:​17) Εκ ανταλέ σουκάρ δωρένταρ ισί αμαρί τσσιπ. Ανταβά δώρος βοηθίνελα-αμέν τι βακεράς οντουλά σο τθεράσα αμαρέ γκοντιάτε ντα αμαρέ γκίστε. Μπορίνασα τι βακεράς πράγματα σο βοηθίνενα ι γιαβερέν ντα κερένα-λεν τι νιωθίνεν σουκάρ. Αλλά οντουλά σο βακεράσα μπορίνενα επίσης τι κερέν ζιάνι ι γιαβερένγκε ντα τι ντουκχαβέν λένγκο γκι.

³ Η τσσιπ τθερέλα μπαρί ζορ, ντα ο Ιεχωβά σικλιαρέλα-αμέν σαρ τι χρησιμοποιήνας λατσσές ανταβά δώρος. Βακερέλα αμένγκε: «Κερνό λάφι μα τι νικιόλ τουμαρέ μόσταρ, αλλά σάντε λατσσό λάφι σο ντέλα ζορ ι γιαβερέν κάνα ισί ανάγκη, για τι κερέλ λατσσιπέ οντουλένγκε σο ασουνένα». (Εφεσίους 4:​29) Για τι ντικχάς σαρ μπορίνασα τι  χρησιμοποιήνας ανταβά δώρος κατά Ντεβέλ για τι κεράς λέσκο γκι ντα τι ντας ζορ κο γιαβερά.

4, 5. Σο σικλιάσα κατά Γραφιάκε παροιμίες ι ζοριάκε σο τθερένα ο λάφια;

⁴ Ο λάφια τθερένα ζορ, οτθάρ πρέπει τι προσοχίνας σο βακεράσα ντα σαρ βακεράσα-λες. Ο εδάφιος Παροιμίες 15:4 βακερέλα: «Ο κοβλό λάφι ισί δέντρος σο ντέλα ζωή, αλλά ο μπανγκέ λάφια καλιαρένα εκχέ τζενέσκο γκι». Σαρ εκ σουκάρ δέντρος λοκχιαρέλα ο γκι ντα ντέλα ζωή, αντικάς ο λατσσέ λάφια-ντα λοκχιαρένα ο γκι οντουλέσκο σο ασουνέλα-λεν. Οκιά μπάνταρ, όμως, ο πφαρέ λάφια ντουκχαβένα ι γιαβερέν ντα κερένα-λεν τι αισθάντιβεν μπέτι.​—Παροιμίες 18:21.

⁵ «Κάνα εκ τζενό κερέλα λάφι χωρίς τι σκεφτίνελ ισί σαρ τι ντέλα ι γιαβερέν τσσουριάσαρ», βακερέλα ο εδάφιος Παροιμίες 12:​18. Ο λάφια σο πφανγκένα ο γκι μπορίνενα τι ντουκχαβέν ι γιαβερέν ντα τι χαλαβέν σχέσεις. Μπορεί τουμέν-ντα τι ανένα τουμαρέ γκοντιάτε κάτι σο βακερντάς τουμένγκε εκ τζενό ντα πφανγκλάς τουμαρό γκι. Όμως, η ίδια παροιμία βακερέλα πιο σοράν: «Η τσσιπ ι γκοντιαβέρ τζενένγκι κερέλα λατσσιπέ». Ο γκοντιαβέρ λάφια μπορίνενα τι κερέν λατσσές εκ πφανγκό γκι ντα τι λατσσαρέν φιλίες σο χαλάντιλεας κατά παρεξηγήσεις. (Διάβανε Παροιμίες 16:​24) Άμα κα τθεράς αμαρέ γκοντιάτε ότι αμαρέ λάφια επηρεάνενα ι γιαβερέν, κα κεράς λάφι προσεκτικά.

6. Σόσκε πρέπει τι μαράς-αμέν για τι κεράς κουμάντος οντουλά σο βακεράσα;

⁶ Εκ γιαβέρ λόγος για τι προσοχίνας σαρ κεράσα λάφι ισί ότι σαρέ ισινάμ ατελείς. «[Ι τζενέσκο] γκι τσσίντελα-λες τι κερέλ ο γκεραλιπέ», ντα αμαρέ λάφια μπουτ φαρ σικαβένα σο τθεράσα αμαρέ γκίστε. (Γένεση 8:​21· Λουκάς 6:​ 45) Πρέπει τι μαράς-αμέν μπουτ για τι κεράς κουμάντος οντουλά σο βακεράσα. (Διάβανε Ιακώβου 3:​2-4) Αλλά πρέπει τι προσπαθίνας συνέχεια για τι αβάς πιο λατσσέ ανταλέστε.

7, 8. Σαρ μπορίνενα αμαρέ λάφια τι επηρεάνεν αμαρί φιλία ι Ιεχωβάσαρ;

⁷ Πρέπει επίσης τι προσοχίνας σαρ κεράσα λάφι επειδή κα ντας λογαριασμός κο Ιεχωβά οντουλένγκε σο βακεράσα ντα για το τρόπος σο βακεράσα-λεν. Ο εδάφιος Ιακώβου 1:​26 βακερέλα: «Άμα εκ τζενό αμντίνελα ότι ντέλα λατρεία ι Ντεβλές αλλά να κερέλα κουμάντος πι τσσιπ, χουχαβέλα πο γκι, ντα σινανέ ντέλα λατρεία». Οτθάρ άμα να προσοχίνασα σαρ κεράσα λάφι, μπορεί τι κεράς ζιάνι κι φιλία σο τθεράσα ι Ιεχωβάσαρ, ή ατζέ-ντα τι χαλαβάς-λα ντιπ.​—Ιακώβου 3:​8-10.

⁸ Αγαβάσα μπουτ λατσσές ότι υπαρχίντιβενα σοβαροί λόγοι για τι προσοχίνας σο βακεράσα ντα σαρ βακεράσα-λες. Κάτι σο κα βοηθίνελ-αμέν τι χρησιμοποιήνας αμαρί  τσσιπ σαρ μανγκέλα ο Ιεχωβά ισί τι τζανάς καλέ λαφίνταρ πρέπει τι νασάς ντουρ.

9, 10. (α) Σαρ κερένα λάφι μπουτ τζενέ αβρί κο ντουνιάς; (β) Σόσκε αμέν να βακεράσα λουμνικανέ λάφια;

⁹ Αμαρέ μπρεσέντε ο τζενέ ισί σικλέ τι βακερέν λουμνικανέ, μαγαριμέ λάφια. Μπουτ τζενέ πακιάνα ότι πρέπει τι κουσέν ντα τι βακερέν λουμνικανέ λάφια για τι ντεν σημασία ο γιαβερά λένγκε λαφίντε. Ο ηθοποιοί μπουτ φαρ κερένα λουμνικανέ σακάδες ντα μπέτι λάφια για τι κερέν ι τζενέν τι ασάν. Όμως, ο απόστολος Παύλος βακερντάς: «Πρέπει τι νικαβέν-λεν σαρέ ακαλά: ο νεύρα, ι χολί, ο γκεραλιπέ, ο κουσίματα ντα ο λουμνικανέ λάφια τουμαρέ μόσταρ». (Κολοσσαείς 3:8) Βακερντάς επίσης ότι ο αληθινοί Χριστιανοί δεν πρέπει τι κερέν «λουμνικανέ σακάδες».​—Εφεσίους 5:3, 4.

¹⁰ Ο λουμνικανέ λάφια πφανγκένα ο γκι ι Ιεχωβάσκο ντα οντουλένγκο σο μανγκένα-λες. Ισί μαγαριμέ. Κι Γραφή ο «μαγαριπέ» ισί αντρέ κο «πράγματα σο κερέλα ο σώμας». (Γαλάτες 5:​19-21) Ο «μαγαριπέ» τθερέλα τι κερέλ μπουτέ αμαρτιέντζαρ, ντα εκ μαγαριμέ συνήθεια μπορεί τι γκερέλ εκχέ γιαβεριάτε. Άμα εκ τζενό ισί σικλό τι βακερέλ μπουτ μαγαριμέ, λουμνικανέ λάφια ντα να μανγκέλα τι τσσιναβέλ, ανταβά κα μπορίνελας τι σικαβέλ ότι ναστί ατσσόλα κι κχανγκιρί.​—2 Κορινθίους 12:​21· Εφεσίους 4:​19· ντικχ ι Σημείωση 23 κο παλαϊνέ σελίδες.

11, 12. (α) Σο ισί ο κουτσομπολιός; (β) Σόσκε δεν πρέπει τι βακεράς χουχαΐματα σο χαλαβένα ι γιαβερένγκο ναβ;

¹¹ Πρέπει επίσης τι νασάς ντουρ κατά κουτσομπολιός. Ισί φυσιολογικός τι πφαμπάς ι γιαβερένγκε ντα τι κεράς λάφι για το αμπέρια αμαρέ αμαλένγκε ντα αμαρέ τζενένγκε. Κο πρώτος αιώνας-ντα, ο Χριστιανοί μανγκένας τι τζανέν  σαρ ισινέ λένγκε πφραλά ντα σο μπορίνενας τι κερέν για τι βοηθίνεν-λεν. (Εφεσίους 6:​21, 22· Κολοσσαείς 4:8, 9) Αλλά κάνα κεράσα λάφι γιαβερένγκε ισί εύκολος τι αβέλ κουτσομπολιός. Άμα εκ κουτσομπολιός σο ασουντάμ βακεράσα-λες αμέν-ντα γιαβερτθέ, μπορεί τι βακεράς πράγματα σο νανέ μπαγιά ή σο δεν έπρεπε τι μουτθάντιβεν. Άμα να προσοχιντάμ, μπορεί ατζέ-ντα τι βακεράς χουχαΐματα σο χαλαβένα ι γιαβερένγκο ναβ. Ο Φαρισαίοι κερντέ-λες ανταβά κάνα κατηγοριντέ ι Ιησούς πραγματένγκε σο να κερντάας. (Ματθαίος 9:​32-34· 12:​22-24) Ασακέ χουχαΐματα σο χαλαβένα ο ναβ εκχέ τζενέσκο, κερένα ι τζενέν τι χαν-πες, ντουκχαβένα γκιά ντα χαλαβένα φιλίες.​—Παροιμίες 26:20.

¹² Ο Ιεχωβά μανγκέλα τι βακεράς λάφια για τι βοηθίνας ντα τι ντας ζορ, όχι για τι κεράς ι αμαλέν ντουσμάνια. Ο Ιεχωβά μισίνελα οντουλέν σο “κερένα ι πφραλέν τι χαν-πες”. (Παροιμίες 6:​16-19) Οντουβά σο βακερντάς ο πρώτος ψέμας ισινέ ο Σατανάς ο Διάβολος, σο κατηγοριντάς ι Ντεβλές. (Αποκάλυψη 12:9, 10) Κο ντουνιάς σο τζουβντιάσα, ντικχάσα μπουτέν σο ισί σικλέ τι βακερέν κο τζενέ ψέματα ι γιαβερένγκε. Αλλά ανταβά δεν πρέπει τι αβέλ-πες αντρέ κι Χριστιανική κχανγκιρί. (Γαλάτες 5:​19-21) Οτθάρ, πρέπει τι προσοχίνας σο βακεράσα ντα πάντα τι σκεφτίνας πριν τι κεράς λάφι. Πριν τι βακερέν γιαβερένγκε κάτι σο ασουντέν εκχέ τζενέσκε, πουτσέν τουμαρό νεαυτός: “Ισί μπαγιά ανταβά σο κα βακεράβ; Σικαβέλα λατσσιπέ; Κα βοηθίνελ; Κα μανγκάβας τι ασουνέλ οντουβά τζενό ο λάφι σο βακεράβα; Σαρ κα αισθάντιβαβας με άμα κα βακερένας-λες μάνγκε;”​—Διάβανε 1 Θεσσαλονικείς 4:11.

13, 14. (α) Σο μπορεί τι κερέν ο κουσίματα; (β) Σόσκε εκ τζενό σο ισί σικλό τι κουσέλ τσσουβέλα πο νεαυτός σε κίνδυνος;

¹³ Μπάζιμ, σαρέ βακεράσα πράγματα σο μετανιώνασα λένγκε σοράν. Όμως, δεν πρέπει τι αβάς σικλέ τι κρίνας ι  γιαβερέν, τι βακεράς λάφια σο να σικαβένα λατσσιπέ ή ντουκχαβένα ι γιαβερέν. Ο κουσίματα δεν πρέπει τι νικιόν ιτς αμαρέ μόσταρ. Ο Παύλος βακερντάς: «Τι νασκιαρέν τουμένταρ σο-ντα κερκιπέ τθερένα κο γκι, ι χολί, ο νεύρα, ο βίκος, ο κουσίματα». (Εφεσίους 4:​31) Γιαβερά μεταφράσεις ι Γραφιάκε, οτθέ σο ισί ο λάφι «κουσίματα», τθερένα «μπέτι λάφια» ντα «λάφια σο χολιασκιαρένα ι γιαβερέν». Ο κουσίματα ανένα λατζ κο τζενέ ντα κερένα-λεν τι αισθάντιβεν ότι να τθερένα αξία. Ι χουρντένγκο γκι πφανγκιόλα ατζέ πιο εύκολα, οτθάρ πρέπει τι προσοχίνας μπουτ μα τι ντουκχαβάς-λεν αμαρέ λαφίντζαρ.​—Κολοσσαείς 3:21.

¹⁴ Η Γραφή βακερέλα αμένγκε εκχέ πραγμάσκε σο ισί ατζέ πιο σοβαρός​—εκ τζενό τι αβέλ σικλό τι κουσέλ, δηλαδή τι βακερέλ συνέχεια μπέτι λάφια για τι ντουκχαβέλ ι γιαβερέν. Σο μπέτι κα αβέλας τι κερέλας-λες ανταβά εκ ρομ πι ρομνιάκε ή εκ ρομνί πι ρομέσκε ή πουμαρέ τσσαβένγκε! Η αλήθεια ισί ότι, άμα εκ τζενό να μανγκέλα τι τσσιναβέλ-λες ανταβά, ναστί ατσσόλα κι κχανγκιρί. (1 Κορινθίους 5:​11-13· 6:9, 10) Σαρ σικλιλάμ, άμα βακεράσα πράγματα σο ισί λουμνικανέ, ψεύτικα ή σο να σικαβένα λατσσιπέ, κα χαλαβάς αμαρί φιλία ι Ιεχωβάσαρ αλλά εμ ι γιαβερέντζαρ.

15. Καλά λάφια ανένα ι τζενέν πιο πασέ;

¹⁵ Σαρ μπορίνασα τι χρησιμοποιήνας αμαρί τσσιπ σαρ μανγκέλα ο Ιεχωβά; Η Γραφή να σικαβέλα αμένγκε ντιπ σο πρέπει ή σο δεν πρέπει τι βακεράς, όμως σικαβέλα αμένγκε τι βακεράς «σάντε λατσσό λάφι σο ντέλα ζορ ι γιαβερέν». (Εφεσίους 4:​29) Ο λάφια σο ντένα ζορ ισί πάκι, σικαβένα λατσσιπέ ντα ισί μπαγιά. Ο Ιεχωβά μανγκέλα τι ντας ζορ ντα τι βοηθίνας ι γιαβερέν αμαρέ λαφίντζαρ. Ανταβά μπορεί τι αβέλ δύσκολος. Ισί πιο εύκολος εκχέ τζενέσκε τι  κερέλ λάφι σκληρά ντα χωρίς τι σκεφτίνελ παρά τι βακερέλ λατσσέ λάφια. (Τίτο 2:8) Για τι ντικχάς σαρ κα ντας ζορ ι γιαβερέν οντουλέντζαρ σο βακεράσα.

16, 17. (α) Σόσκε πρέπει τι ισαράς ι γιαβερέν; (β) Κας μπορίνασα τι ισαράς;

¹⁶ Εμ ο Ιεχωβά αλλά εμ ο Ιησούς ισαρένα σαρέ πουμαρέ γκίσαρ ι γιαβερέν. Αμέν πρέπει τι μοιάζας λέντε. (Ματθαίος 3:​17· 25:​19-23· Ιωάννης 1:​47) Για τι ντας μπαγιά ζορ εκχέ τζενέστε αμαρέ ισαριμάσαρ, πρέπει τι τθεράς-λες αμαρέ γκοντιάτε ντα τι σικαβάς ότι πφαμπάσα λέσκε. «Καζόμ λατσσό ισί ο λάφι σο βακέρντιβελα οπράλ κο σαάτι!» βακερέλα ο εδάφιος Παροιμίες 15:​23. Λάσα ζορ κάνα εκ τζενό ισαρέλα-αμέν αντράλ πι γκίσταρ αμαρέ πφαρέ μπουτιάκε ή σικαβέλα εκτίμηση εκχέ πραγμάσκε σο κερντάμ.​—Διάβανε Ματθαίος 7:​12· ντικχ ι Σημείωση 27 κο παλαϊνέ σελίδες.

¹⁷ Άμα κα σικλιόν τι ντικχέν ο λατσσίματα ι γιαβερένγκε, κα αβέλ τουμένγκε πιο εύκολος τι ισαρέν-λεν αντράλ τουμαρέ γκίσταρ. Για παράδειγμας, μπορεί τι ντικχέν ότι εκ τζενό κι κχανγκιρί ετοιμάνελα λατσσές πο ομιλίες ή μαρέλα-πες τι ντελ απαντήσεις κι συνάθροιση. Μπορεί εκ τερνό τι κερέλ λάφι μπίνταρανες ι αληθειάκε κο σχολείος ή εκ πφουρό τι τζαλ μπουτ φαρ κο έργος. Τουμαρέ λατσσέ λάφια μπορεί τι αβέν ντιπ οντουβά σο τθερένα ανάγκη. Κάτι γιαβέρ σο ισί σημαντικός ισί τι βακερέλ ο ρομ πι ρομνιάκε ότι μανγκέλα-λα ντα ότι εκτιμίνελα-λα. (Παροιμίες 31:​10, 28) Σαρ ο φυτά μανγκένα φως ντα πανί, αντικάς ο τζενέ-ντα μανγκένα τι νιωθίνεν ότι ο γιαβερά εκτιμίνενα-λεν. Ανταβά ισί σημαντικός πιο μπουτ ι χουρντέ τσσαβένγκε ντα τσσαΐνγκε. Τι ρόντεν ευκαιρίες για τι ισαρέν-λεν ι λατσσιματένγκε σο τθερένα ντα ι λατσσέ πραγματένγκε σο κερένα. Ο ισαριπέ ντέλα κο τσσαβέ θάρρος, κερέλα-λεν  τι πακιάν πουμαρέ νεαυτόστε ντα τι μαρέν-πες ατζέ πιο μπουτ τι κερέν ο σωστός.

18, 19. Σόσκε πρέπει τι κεράς ο πιο λατσσό για τι ντας ζορ ντα τι λοκχιαράς ι γιαβερένγκο γκι; Σαρ κα κεράς-λες ανταβά;

¹⁸ Κάνα ντάσα ζορ ντα λοκχιαράσα ι γιαβερένγκο γκι, κεράσα αμέν-ντα οντουβά σο κερέλα ο Ιεχωβά. Βοβ πφαμπόλα μπουτ ι “ταπεινόνγκε” ντα οντουλένγκε σο «τθερένα πφανγκό γκι». (Ησαΐας 57:​15) Ο Ιεχωβά μανγκέλα “τι ενθαρρύνας ο εκ ι γιαβερές” ντα “τι λοκχιαράς αμαρέ λαφίντζαρ οντουλέν σο τθερένα πφανγκό γκι”. (1 Θεσσαλονικείς 5:​11, 14) Κάνα μαράσα-αμέν τι κεράς-λες ανταβά, βοβ ντικχέλα-λες ντα εκτιμίνελα-λες.

¹⁹ Μπορεί τι ντικχέν ότι εκ τζενό κι κχανγκιρί χασαρντάς  πι ζορ ή τθερέλα πφανγκό γκι. Σο μπορίνενα τι βακερέν για τι βοηθίνεν-λες; Ίσως ναστί νασκιαρένα ο πρόβλημας, αλλά μπορίνενα τι σικαβέν ότι πφαμπόνα λέσκε. Για παράδειγμας, μπορίνενα τι κανονίνεν τι κερέν χάνικ παρέα. Μπορίνενα τι διαβάνεν λέσκε εκ εδάφιος σο κα ντελ-λες ζορ ή ατζέ-ντα τι πουτσέν-λες άμα κα μανγκέλας τι κερέν λέσαρ προσευχή. (Ψαλμός 34:​18· Ματθαίος 10:​29-31) Τι ντεν ανταλέ τζενέν τι αγαβέν ότι λένγκε πφραλά ντα λένγκε πφενιά κι κχανγκιρί μανγκένα-λεν. (1 Κορινθίους 12:​12-26· Ιακώβου 5:​14, 15) Ντα τουμαρέ λάφια τι σικαβέν ότι νιωθίνενα ντα πακιάνα μπαγιά οντουλά σο βακερένα.​—Διάβανε Παροιμίες 12:25.

20, 21. Κάνα ισί αμένγκε πιο εύκολος τι δεχτίνας εκ συμβουλή;

²⁰ Επίσης, ντάσα ζορ κο γιαβερά κάνα ντάσα λατσσέ  συμβουλές. Επειδή ισινάμ ατελείς, σαρέ μπάζιμ μανγκάσα συμβουλές. Ο εδάφιος Παροιμίες 19:​20 βακερέλα: «Τι ασουνές συμβουλή ντα τι μανγκές ι διόρθωση, για τι αβές γκοντιαβέρ κο ντιβεσά σο κα αβέν». Νανέ σάντε ι πρεσβυτερόνγκι μπουτί τι ντεν συμβουλές ή τι διορθώνεν. Ο ντατ ντα η ντάι πρέπει τι ντεν συμβουλές πουμαρέ τσσαβέν. (Εφεσίους 6:4) Επίσης, ο πφενιά μπορίνενα τι ντεν λατσσέ συμβουλές η εκ κι γιαβέρ. (Τίτο 2:​3-5) Επειδή μανγκάσα αμαρέ πφραλέν ντα αμαρέ πφενίν, πρέπει τι κεράς σο νακχέλα αμαρέ βαστέσταρ για τι ντας συμβουλές τροπόσαρ σο να κα κερέν-λεν τι νιωθίνεν μπέτι. Σο κα βοηθίνελ-αμέν τι κεράς-λες ανταβά;

²¹ Μπορεί τι ντινέ-τουμέν εκ συμβουλή σουκάρ τροπόσαρ ντα οτθάρ τι αβέλας εύκολος τι δεχτίνεν-λα. Σόσκε η συμβουλή ισινέ αζόμ λατσσί; Σίγουρα νιωσάλεν ότι ο τζενό σο ντινάς-τουμέν ι συμβουλή πφαμπόλας τουμένγκε μπαγιά. Ή μπορεί τι κερντάς τουμένγκε λάφι λατσσιμάσαρ ντα μανγκιμάσαρ. (Κολοσσαείς 4:6) Μπορεί η συμβουλή τι ισινέ αντράλ κατά Γραφή. (2 Τιμόθεο 3:​16) Είτε βακεράσα αβριάλ ο λάφια ι Γραφιάκε είτε διαβάνασα-λεν, πρέπει σαρέ αμαρέ συμβουλές τι αβέν αντράλ κατά Γραφή. Καέκ δεν πρέπει τι μανγκέλ τι κερέν ο γιαβερά ζορίσαρ οντουλά σο πακιάλα βοβ ούτε τι χρησιμοποιήνελ με λάθος τρόπος εδάφια για τι νικαβέλ σωστές πο ιδέες. Κάνα ανένα τουμαρέ γκοντιάτε σαρ ντιντιλί-τουμέν εκ συμβουλή ανταβά κα βοηθίνελ-τουμέν κάνα ντένα τουμέν-ντα συμβουλή κο γιαβερά.

22. Σαρ κα μανγκένας τι χρησιμοποιήνεν τουμαρί τσσιπ;

²² Η τσσιπ ισί δώρος κατά Ντεβέλ. Η αγάπη σο τθεράσα λέσκε πρέπει τι κερέλ-αμέν τι χρησιμοποιήνας σωστά ανταβά δώρος. Τι ντεν-τουμέν γκοντί ότι ο λάφια μπορίνενα είτε τι κερέν ζιάνι είτε τι ντεν ζορ. Οτθάρ, τι κεράς ο πιο λατσσό για τι ντεν αμαρέ λάφια ζορ ντα θάρρος κο γιαβερά.