1, 2. Μανγκέλα τι βακερέλ ότι να ασταρντάς αμαρό μπιαβ άμα τθεράσα προβλήματα; Εξηγίνεν.

 Ο ΜΠΙΑΒ ισί δώρος κατά Ιεχωβά. Μπορίνελα τι κερέλ εκχέ τζενές πιο ευτυχισμέ. Όμως, ο κάθε μπιαβ τθερέλα πο προβλήματα. Μπορεί τι ντικχίντιβελα ότι ο προβλήματα να κα νασέν ποτές ντα οτθάρ ο αντρόγυνος μα τι νιωθίνελ αζόμ πασέ σαρ ανγκλέ.

² Νανέ παράξενος τι νακχάς μπάζιμ δυσκολίες αμαρέ μπιαβέστε. Ανταβά όμως να μανγκέλα τι βακερέλ ότι να ασταρντάς αμαρό μπιαβ. Ατζέ-ντα αντρόγυνα σο τθερένας μπουτ μπαρέ προβλήματα αρακχλέ τρόπους για τι λατσσαρέν πάλι πουμαρό μπιαβ ντα τι κερέν-λες ζουρανό. Σαρ;

3, 4. Σο αβέλα-πες μπάζιμ αντρέ κο μπιαβ;

³ Ο μπιαβ ανέλα πασέ ντουέ τζενέν σο ισί διαφορετικοί ντα ο κάθε εκ μπεϊντίνελα, σκεφτίνελα ντα κερέλα διαφορετικά πράγματα. Επίσης, οντουλά σο ισί παντριμέ μπορεί τι τζουβντιλέ διαφορετικά ή τι τθερένα γιαβέρ κουλτούρα. Πρέπει τι νακχέλ χρόνος ντα τι μαρέν-πες για τι σικλιόν ντα τι αγαβέν λατσσές ο εκ ι γιαβερές.

⁴ Καζόμ νακχένα ο ντιβεσά, οντουλά σο ισί παντριμέ  μπορεί τι τθερέν αζόμ μπουτ πράγματα πουμαρέ σορέστε ντα αντικάς τι τσσίντεν-πες ντουρ ο εκ κατά γιαβέρ. Μπορεί τι ντικχίντιβελα ότι ο κάθε εκ τζουβντιόλα πέσκε. Σο κα βοηθίνελ-λεν τι αβέν πιο πασέ ο εκ κο γιαβέρ;

5. (α) Σο κα βοηθίνελ ι ρομές ντα ι ρομνιά τι αβέν πιο πασέ ο εκ κο γιαβέρ; (β) Σαρ πρέπει τι ντικχάς ο μπιαβ σαρ βακερέλα ο εδάφιος Εβραίους 13:4;

⁵ Ο Ιεχωβά ντέλα μπουτ λατσσέ συμβουλές σο βοηθίνενα ι ρομές ντα ι ρομνιά τι αβέν πιο πασέ Λέστε αλλά εμ ο εκ κο γιαβέρ. (Ψαλμός 25:4· Ησαΐας 48:​17, 18) Βακερέλα αμένγκε: «Ο μπιαβ τι τθερέλ μπαρί αξία σαριλένγκε». (Εβραίους 13:4) Εκ πράγμας σο τθερέλα μπαρί αξία ισί μπουτ σημαντικός. Αρακχαβάσα-λες ντα μαράσα-αμέν μα τι χασαράς-λες. Αντικάς μανγκέλα ο Ιεχωβά τι ντικχάς ο μπιαβ.

6. Σαρ ντικχέλα ο Ιεχωβά ο μπιαβ σαρ βακερένα αμένγκε ο εδάφια Ματθαίος 19:​4-6;

⁶ Ο Ιεχωβά κερντάς ο πρώτος μπιαβ. Λέσκο Τσσαβό, ο Ιησούς, βακερντάς: «Να διαβαντέν ότι οντουβά σο λατσσαρντάς-λεν κι αρχή κερντάς-λεν μουρς ντα τζουβέλ ντα βακερντάς: “Οτθάρ, ο τζενό κα μουκχέλ πι νταντές ντα πι νταγιά ντα κα ατσσόλ πασέ πι ρομνιάτε, ντα ο ντούι κα αβέν εκ σώμας”; Αντικάς, νανέ ντούι, αλλά εκ σώμας. Άρα, ανταβά σο ο Ντεβέλ κερντάς εκ, τζενό μα τι χωρίνελ-λες». (Ματθαίος 19:​4-6) Από την αρχή ο Ιεχωβά τθερέλας πι γκοντιάτε ο μπιαβ τι ατσσόλ για πάντα. Μανγκέλας ο φαμιλιά τι αβέν ζουρανέ, ευτυχισμέ, ντα τι χαιρίνεν ι ζωή γιεκ.

7. Σαρ κα κερέν ο αντρόγυνα πουμαρό μπιαβ πιο ζουρανό;

⁷ Αμαρέ ντιβεσέντε όμως ο αντρόγυνα τθερένα πιο μπουτ άγχος ντα προβλήματα σαρέ κατά μπρεσά σο νακχλέ. Μπάζιμα, ο προβλήματα ισί αζόμ μπαρέ σο πακιάνα ότι λένγκο μπιαβ ναστί λατσσάρντιβελα, οτθάρ τσσιντιόνα. Όμως, κα βοηθίντιβας άμα κα αγαβάς σαρ ντικχέλα ο Ιεχωβά ο μπιαβ.​—1 Ιωάννη 5:3.

8, 9. (α) Κάνα πρέπει τι ασουνάς ο λάφια ι Ιεχωβάσκε σο τθερένα τι κερέν ι μπιαβέσαρ; (β) Σαρ σικαβάσα ότι τθερέλα μπαρί αξία αμένγκε αμαρό μπιαβ;

⁸ Ο λάφια ι Ιεχωβάσκε ισί πάντα αμαρέ λατσσιμάσκε. Σαρ ντικχλάμ, βοβ βακερέλα αμένγκε: «Ο μπιαβ τι τθερέλ μπαρί αξία». (Εβραίους 13:4· Εκκλησιαστής 5:4) Άμα ντάσα καν κο λάφια κι Ιεχωβάσκε ατζέ-ντα κάνα ζορίντιβασα, σίγουρα κα βοηθίντιβας.​—1 Θεσσαλονικείς 1:3· Εβραίους 6:10.

⁹ Επειδή αμαρό μπιαβ τθερέλα μπαρί αξία αμένγκε, να μανγκάσα τι κεράς ή τι βακεράς πράγματα σο κα κερένας λέσκε ζιάνι. Αλλά μανγκάσα τι αβάς πιο πασέ αμαρέ ρομέστε ντα αμαρέ ρομνιάτε. Σαρ κα κεράς-λες ανταβά;

10, 11. (α) Καβά μπαρό πρόβλημας υπαρχίντιβελα μερικέ μπιαβέντε; (β) Σόσκε ισί σημαντικός ο τρόπος σο κεράσα λάφι αμαρέ ρομέσκε ή αμαρέ ρομνιάκε;

¹⁰ Εκ αντρόγυνος κα μπορίνελας μπουτέ τροπόντζαρ τι ντουκχαβέλ ο εκ ι γιαβερές. Τζανάσα ότι ο Χριστιανοί σο-ντα τι αβέλ-πες δεν πρέπει τι νταπέν ο εκ ι γιαβερές ή τι κερέν ζιάνι κο σώμας ο εκ ι γιαβερέσκο. Μπορεί όμως τι ντουκχαβάς ο εκ ι γιαβερές αμαρέ λαφίντζαρ. Ο λάφια μπορεί τι αβέν σαρ τσσουριά. Εκ τζουβέλ βακερντάς: «Μο ρομ νταπέλα-μαν πι λαφίντζαρ. Μπορεί μα τι τθεράβ σημάδια, αλλά ο κερκέ λάφια σο βακερέλα μάνγκε συνέχεια, σαρ ισί “Καλιλό μο γκι τούταρ!” ντα “Ισινάν άχρηστη!”, μουκχλέ μάνγκε σημάδια αντρέ μι γκίστε». Εκ μουρς βακερντάς ότι λέσκι ρομνί συνέχεια ανέλα λέσκε λατζ ντα κερέλα λέσκε λάφια. Βοβ βακερντάς: «Λατζάβα τι βακεράβ ανγκλάλ κο γιαβερά ο λάφια σο βακερέλα μάνγκε. Οτθάρ ναστί μπεσάβα τι κεράβ λάσαρ λάφι ντα ατσσάβα μέχρι αργά κι μπουτί. Πιο λατσσές κι μπουτί παρά κχερέ». Ο κουσίματα, δηλαδή ο λάφια σο ισί πφαρέ ντα ανένα ντουκχ κο γκι, βακέρντιβενα μπουτ αμαρέ ντιβεσέντε.

¹¹ Κάνα ο ρομ ντα η ρομνί βακερένα πφαρέ λάφια ο εκ κο γιαβέρ, ντουκχαβένα πουμαρό γκι ντα ανταγιά ντουκχ να νακχέλα σουγκό. Αγαβάσα μπουτ λατσσές ότι ο Ιεχωβά να μανγκέλα ο ρομ ντα η ρομνί τι κερέν ασακέ πράγματα. Όμως, μπορεί τι ντουκχαβέν ο γκι τουμαρέ ρομέσκο ή τουμαρέ ρομνιάκο χωρίς τι αγαβέν-λες. Τουμέν μπορεί τι αμντίνενα ότι συμπεριφερίντιβενα σουκάρ, αλλά σαρ νιωθίνελα βοβ ή βόι; Άμα βακερντέν κάτι σο αντάς ντουκχ τουμαρέ ρομέσκε ή τουμαρέ ρομνιάκε, ισινέν έτοιμοι τι αλλάνεν;​—Γαλάτες 5:​15· διάβανε Εφεσίους 4:31.

12. Σο μπορεί τι επηρεάνελ ι φιλία σο τθερέλα ι Ιεχωβάσαρ εκ παντριμέ τζενό;

 ¹² Ο τρόπος σο κερένα λάφι τουμαρέ ρομέσκε ή τουμαρέ ρομνιάκε, είτε ανγκλάλ κο γιαβερά είτε κάνα ισινέν κορκορέ, τθερέλα σημασία ι Ιεχωβάσκε. (Διάβανε 1 Πέτρου 3:7) Ο εδάφιος Ιακώβου 1:​26 βακερέλα: «Άμα εκ τζενό αμντίνελα ότι ντέλα λατρεία ι Ντεβλές αλλά να κερέλα κουμάντος πι τσσιπ, χουχαβέλα πο γκι, ντα σινανέ ντέλα λατρεία».

13. Καλέ γιαβερέ τροπόσαρ κα μπορίνελας εκ τζενό τι ντουκχαβέλ ο γκι πι ρομέσκο ή πι ρομνιάκο;

¹³ Οντουλά σο ισί παντριμέ πρέπει τι κερέν γιαβερά-ντα πράγματα για τι σικαβέν ότι πφαμπόνα ο εκ ι γιαβερέσκε. Για παράδειγμας, σαρ κα αβέλας τουμαρέ ρομέσκε ή τουμαρέ ρομνιάκε άμα κα αρχίνενας τι ντεν μπουτ τουμαρέ  σαατίσταρ εκχέ γιαβερέ τζενέστε; Παρόλο σο μπορεί τι κερένα κάτι λατσσό, σαρ ισί τι νικιόν κο έργος ή τι βοηθίνεν εκχέ προβλημάστε, μήπως ανταβά κα ντουκχαβέλας ο γκι τουμαρέ ρομέσκο ή τουμαρέ ρομνιάκο; Εκ παντριμέ πφεν βακερντάς: «Κάνα ντικχάβα μι ρομές τι ντελ αζόμ μπουτ σαάτι ντα προσοχή εκχέ γιαβερέ πφενιάτε κι κχανγκιρί ανταβά ντουκχαβέλα-μαν. Κερέλα-μαν τι νιωθίναβ ότι να τθεράβα αξία».

14. (α) Καγιά σημαντική αλήθεια σικλιάσα κατά εδάφιος Γένεση 2:​24; (β) Σο πρέπει τι πουτσάς αμαρό νεαυτός;

¹⁴ Αμέν σαρ Χριστιανοί, τθεράσα ι υποχρέωση τι ντικχάς αμαρέ νταντές ντα αμαρέ νταγιά εμ αμαρέ πφραλέν κι κχανγκιρί. Όμως, κάνα παντρίνασα, η πιο μπαρί υποχρέωση τθεράσα-λα αμαρέ ρομέστε ή αμαρέ ρομνιάτε. Ο Ιεχωβά βακερντάς ότι ο ρομ «κα ατσσόλ πασέ πι ρομνιάτε». (Γένεση 2:​24) Οντουλά σο αισθάντιβελα αμαρό ρομ ή αμαρί ρομνί πρέπει τι αβέν μπουτ σημαντικά αμένγκε. Πουτσέν τουμαρό νεαυτός: “Ντάβα μι ρομέστε ή μι ρομνιάτε ο σαάτι, ι προσοχή ντα ι αγάπη σο αξίνελα-ντα τθερέλα ανάγκη;”

15. Σόσκε δεν πρέπει ο παντριμέ Χριστιανοί τι αβέν μπουτ πασέ εκχέ τζενέσαρ σο νανέ λένγκο ρομ ή λένγκι ρομνί;

¹⁵ Άμα κα αβάς μπουτ πασέ εκχέ τζενέσαρ σο νανέ αμαρό ρομ ή αμαρί ρομνί, κα τθεράς πρόβλημας αμαρέ μπιαβέστε. Μπορεί τι τθεράς οντουλέ τζενές αντρέ αμαρέ γκίστε ντα τι τσσουβάς λέσκε μεράκι. (Ματθαίος 5:​28) Ανταλά αισθήματα μπορεί τι αβέν πιο ζουρανέ ντα τι τσσίντεν-αμέν τι κεράς κάτι σο κα ανέλ λατζ αμαρέ μπιαβέστε.

16. Καγιά εντολή ντέλα η Γραφή ι μπιαβέσκε;

¹⁶ Σοράν κατά συμβουλή: «Ο μπιαβ τι τθερέλ μπαρί αξία», η Γραφή βακερέλα: «Ο κρεβάτι ι ρομέσκο ντα ι ρομνιάκο  μα τι αβέλ μαγαριμέ, σόσκε ο Ντεβέλ κα κρίνελ ι λουμνέν ντα οντουλέν σο τζάνα γιαβερέντζαρ ενώ ισί παντριμέ». (Εβραίους 13:4) Ατθέ ο λάφι «ο κρεβάτι ι ρομέσκο ντα ι ρομνιάκο» μανγκέλα τι βακερέλ για το σεξουαλικές σχέσεις σο τθερένα ο αντρόγυνα. (Παροιμίες 5:​18) Σαρ μπορίνασα τι σικαβάς σέβαση ανταλέ πραγμάσκε ντα μα τι μαγαρίνας-λες;

17. (α) Σαρ ντικχένα μπουτ τζενέ αντιβές οντουλέν σο τζάνα γιαβερέντζαρ ενώ ισί παντριμέ; (β) Σαρ πρέπει τι ντικχέν-λες ανταβά ο Χριστιανοί;

¹⁷ Μερικά τζενέ αντιβές πακιάνα ότι νανέ κακός τι τζαν γιαβερέντζαρ ενώ ισί παντριμέ. Αμέν όμως δεν πρέπει τι μουκχάς αμαρό νεαυτός τι σκεφτίνελ αντικάς. Ο Ιεχωβά βακερέλα ξεκάθαρα ότι να μανγκέλα ιτς ο λουμνιπέ εμ τζενένταρ σο ισί παντριμέ εμ οντουλένταρ σο νανέ. (Διάβανε Ρωμαίους 12:9· Εβραίους 10:​31· 12:​29) Άμα κα τζάας εκχέ γιαβερέ τζενέσαρ σο νανέ αμαρό ρομ ή αμαρί ρομνί, κα μαγαρίναας αμαρό μπιαβ. Κα σικαβάας ότι να σεβάνασα ι Ιεχωβάσκε κανόνες ντα κα χαλαβάας αμαρί φιλία λέσαρ. Οτθάρ, δεν πρέπει τι κεράς ούτε ο πρώτος πράγμας σο κα γκερέλας-αμέν κο λουμνιπέ. Ανταβά μανγκέλα τι βακερέλ μα τι κεράς λουμνικανέ σκέψεις εκχέ γιαβερέ τζενέσκε.​—Ιώβ 31:1.

18. (α) Σόσκε οντουλά σο ισί παντριμέ ντα τζάνα γιαβερέντζαρ ισί σαρ τι πακιάνα ψεύτικε ντεβλέντε; (β) Σαρ ντικχέλα-λες ανταβά ο Ιεχωβά;

¹⁸ Κο πουρανό Ισραήλ, κο Νόμος κι Μωυσίσκο, άμα παντριμέ τζενέ τζάνας γιαβερέντζαρ, ανταβά ισινέ μπουτ μπαρί αμαρτία, ισινέ σαρ τι πακιάνας ψεύτικε ντεβλέντε. Η τιμωρία ι ντουέ-ντα αμαρτιένγκε ισινέ μεριπέ. (Λευιτικό 20:2, 10) Σαρ μοιάζενας ανταλά ντούι αμαρτίες; Άμα εκ Ισραηλίτης πακιάλας ψεύτικε ντεβλέντε, να ατσσικιαρέλας πο λάφι τι αβέλ πιστός κο Ιεχωβά. Άμα κα τζάλας γιαβεράσαρ ενώ ισινέ παντριμέ, να ατσσικιαρέλας πο λάφι τι  αβέλ πιστός πι ρομνιάτε. (Έξοδος 19:5, 6· Δευτερονόμιο 5:9· διάβανε Μαλαχίας 2:​14) Αγαβάσα μπουτ λατσσές ότι κο πουρανέ μπρεσά ισινέ μπαρί αμαρτία κι Ιεχωβάσκε γιακχά τι τζαν παντριμέ τζενέ γιαβερέντζαρ.

19. Σο κα βοηθίνελ-αμέν τι αβάς αποφασισμέ μα τι τζας εκχέ γιαβερέσαρ σο νανέ αμαρό ρομ ή αμαρί ρομνί;

¹⁹ Σο αβέλα-πες αμαρέ ντιβεσέντε; Παρόλο σο αμέν να ισινάμ τελάλ κατά Μωυσίσκο Νόμος, ι Ιεχωβάσκε ατζέ ατζέ ισί μπαρί αμαρτία τι τζαν παντριμέ τζενέ γιαβερέντζαρ. Σαρ να κα ντάας ποτές λατρεία ψεύτικε ντεβλέντε, αντικάς να κα τζάας ποτές εκχέ γιαβερέσαρ σο νανέ αμαρό ρομ ή αμαρί ρομνί. (Ψαλμός 51:1, 4· Κολοσσαείς 3:5) Άμα κα κεράας-λες ανταβά, κα ανάας λατζ αμαρέ μπιαβέστε ντα αμαρέ Ντεβλέστε, κο Ιεχωβά.​—Ντικχ ι Σημείωση 26 κο παλαϊνέ σελίδες.

20. Σαρ βοηθίνασα αμαρό μπιαβ κάνα ισινάμ γκοντιαβέρ;

²⁰ Σαρ κα κερέν τουμαρό μπιαβ πιο ζουρανό; Ο Λάφι ι Ντεβλέσκο βακερέλα: «Γκοντιάσαρ κερέλα ο τζενό πο κχερ ντα κάνα αγαβέλα ο πράγματα σο ισί αχόρτ ατσσικιαρέλα-λες πι τθανέστε». (Παροιμίες 24:3) Εκ κχερ μπορίνελα τι αβέλ σουρντό ντα τσουτσό ή τατό, μπαρό ντα αρακχαντό. Ο ίδιος αβέλα-πες ι μπιαβέσαρ-ντα. Οντουλά σο ισί γκοντιαβέρ κερένα σο νακχέλα λένγκε βαστέσταρ για τι αβέν αρακχαντέ, τι νακχέν σουκάρ ντα τι χαιρίνεν αντρέ πουμαρέ μπιαβέστε.

21. Σαρ μπορίνελα ο σικλιαριπέ τι κερέλ τουμαρό μπιαβ πιο ζουρανό;

²¹ Η Γραφή συνεχίνελα ντα κερέλα λάφι ανταλέ κχερέσκε: «Αντράλ κατά σικλιαριπέ λέσκε δωμάτια πφερντιόνα σαβέ τι μανγκές πααλίς ντα σουκάρ θησαυρόντζαρ». (Παροιμίες 24:4) Ο πράγματα σο σικλιόνα κατά Ντεβλέσκο Λάφι μπορίνενα τι κερέν πιο λατσσό τουμαρό μπιαβ. (Ρωμαίους 12:2· Φιλιππησίους 1:9) Κάνα διαβάνενα γιεκ ι Γραφή ντα αμαρέ  έντυπα, τι συζητίνεν σαρ μπορίνενα τι κερέν οντουλά σο σικλιόνα. Τι ρόντεν τρόπους για τι σικαβέν λατσσιπέ ντα ότι μανγκένα, σεβάνενα ντα σκεφτίνενα ο εκ ι γιαβερές. Τι μανγκέν κατά Ιεχωβά βοήθεια για τι μπαριαρέν ιδιότητες σο κα κερέν τουμαρό μπιαβ πιο ζουρανό ντα κα κερέν τουμαρέ ρομές ή τουμαρέ ρομνιά τι μανγκέλ-τουμέν ατζέ πιο μπουτ.​—Παροιμίες 15:​16, 17· 1 Πέτρου 1:7.

22. Σόσκε πρέπει τι σικαβάς ότι μανγκάσα ντα σεβάνασα αμαρέ ρομές ή αμαρέ ρομνιά;

²² Πρέπει τι κεράς σο νακχέλα αμαρέ βαστέσταρ για τι σικαβάς ότι μανγκάσα ντα σεβάνασα αμαρέ ρομές ή αμαρέ ρομνιά. Αζομάν κα αβάς ατζέ πιο πασέ ο εκ κο γιαβέρ ντα αμαρό μπιαβ κα αβέλ πιο ζουρανό. Ντα ο πιο σημαντικός, κα ντας χαρά κο Ιεχωβά.​—Ψαλμός 147:​11· Ρωμαίους 12:10.