1, 2. Καλά πράγματα πρέπει τι τζανάς λατσσές ι Μπενγκέσκε ντα ι δαιμονένγκε;

 Η ΖΩΗ κι Ιεχωβάσκο νεβό ντουνιάς κα αβέλ μπουτ σουκάρ. Αζομάν, κα τζουβντιάς σαρ μανγκέλας ο Ντεβέλ. Όμως ακανά, τζουβντιάσα εκχέ ντουνιάστε σο κερέλα-λες κουμάντος ο Μπενγκ ντα λέσκε δαίμονες. (2 Κορινθίους 4:4) Παρόλο σο ναστί ντικχάσα-λεν, βον τζουβντιόνα ντα ισί μπουτ ζουρανέ.

² Ανταλέ κεφαλαιόστε, κα ντικχάς σαρ τι ατσσάς πασέ κο Ιεχωβά ντα σαρ τι αρακχαβάς-αμέν κατά Μπενγκ. Ο Ιεχωβά ντέλα πο λάφι ότι κα αβέλ αμέντζαρ. Ισί σημαντικός όμως τι τζανάς σο κερένα ο Μπενγκ ντα ο δαίμονες για τι χουχαβέν-αμέν ντα τι τσσουβέν-λεν αμέντζαρ.

3. Σο μανγκέλα τι κερέλ αμένγκε ο Μπενγκ;

³ Ο Μπενγκ βακερέλα ότι ο τζενέ σο ντένα λατρεία ι Ιεχωβάς κερένα-λες σάντε για τι λεν κάτι παλάλ, ντα ότι κάνα ο πράγματα να κα τζαν αζόμ λατσσές, κα τσσιναβάς τι υπηρετίνας-Λες. (Διάβανε Ιώβ 2:4, 5) Κάνα εκ τζενό σικαβέλα ότι μανγκέλα τι σικλιόλ ι Ιεχωβάσκε, ο Μπενγκ ντα ο δαίμονες τσσουβένα σημασία ντα κερένα σο νακχέλα λένγκε βαστένταρ για τι τσσιναβέν-λες. Χολιάνενα κάνα εκ τζενό ντέλα πο λάφι κο Ιεχωβά τι τζουβντιόλ λέσκε ντα μπολντιόλα. Η Αγία Γραφή βακερέλα ότι ο Μπενγκ ισί σαρ «μποκχαλό  λιοντάρι σο ρόντελα τι χαλ καέκ τζενές». (1 Πέτρου 5:8) Ο Μπενγκ μανγκέλα τι χαλαβέλ αμαρί φιλία ι Ιεχωβάσαρ.​—Ψαλμός 7:1, 2· 2 Τιμόθεο 3:12.

4, 5. (α) Σο ναστί κερέλα ο Μπενγκ; (β) Σαρ “τζάσα κόντρα κο Μπενγκ”;

⁴ Να χρειαζίντιβελα όμως τι νταράς κατά Μπενγκ ντα λέσκε δαιμονένταρ. Ο Ιεχωβά να μουκχέλα-λεν τι κερέν αμένγκε σο μανγκένα βον. Ντέλα πο λάφι ότι «εκ μπαρό πλήθος» αληθινέ Χριστιανόνγκο κα τζουβντιόν κατά «μπαρί στεναχώρια». (Αποκάλυψη 7:9, 14) Ο Μπενγκ ναστί κα τσσιναβέλ-λες ανταβά, επειδή ο Ιεχωβά αρακχαβέλα πι λαός.

 ⁵ Άμα αμέν ατσσάσα πασέ κο Ιεχωβά, ο Μπενγκ ναστί χαλαβέλα αμαρί φιλία Λέσαρ. Ο Λάφι ι Ντεβλέσκο βακερέλα αμένγκε: «Ο Ιεχωβά κα αβέλ τουμέντζαρ καζόμ τουμέν ατσσόνα λέσαρ». (2 Χρονικών 15:2· διάβανε 1 Κορινθίους 10:​13) Μπουτ πιστά μουρσά ντα τζουβλιά κο πουρανέ μπρεσά, σαρ ο Άβελ, ο Ενώχ, ο Νώε, η Σάρρα ντα ο Μωυσής, ατσσιλέ πασέ κο Ιεχωβά ντα αντικάς γκιλέ κόντρα ι Μπενγκέσαρ. (Εβραίους 11:​4-40) Μπορίνασα αμέν-ντα τι κεράς-λες ανταβά. Ο Λάφι ι Ντεβλέσκο βακερέλα: «Τζαν κόντρα κο Μπενγκ, ντα βοβ κα νασέλ τουμένταρ».​—Ιακώβου 4:7.

6. Σαρ τσσουβέλα-λεν αμέντζαρ ο Μπενγκ;

⁶ Παρόλο σο ο Μπενγκ τζανέλα ότι ο Ιεχωβά να μουκχέλα-λες τι κερέλ αμένγκε σο μανγκέλα, κα κερέλ σο νακχέλα λέσκε βαστέσταρ για τι κερέλ αμαρί φιλία ι Ντεβλέσαρ μπίζουρανι. Αντιβές, ο Μπενγκ τσσουβέλα-λεν αμέντζαρ σαβέ τι μανγκές τροπόντζαρ ντα κερέλα ο ίδια πφιρνικανέ πράγματα χιλιάδες μπρεσά. Καλά ισί μερικά ανταλένταρ;

7. Σόσκε ο Μπενγκ τσσουβέλα-λεν ι Ιεχωβάσκε λαόσαρ;

⁷ Ο απόστολος Ιωάννης γραφιντάς: «Σαρέ ι ντουνιάς κερέλα-λες κουμάντος ο πφιρνό». (1 Ιωάννη 5:​19) Ο Μπενγκ κερέλα κουμάντος ανταλέ ντουνιάς ντα κα μανγκέλας τι κερέλ κουμάντος ι Ιεχωβάσκε λαός-ντα. (Μιχαίας 4:1· Ιωάννης 15:​19· Αποκάλυψη 12:​12, 17) Ο Μπενγκ τζανέλα ότι τθερέλα χάνικ σαάτι ανγκλά-πέστε, οτθάρ κερέλα σο νακχέλα λέσκε βαστένταρ για μα τι ατσσόλ καέκ αμένταρ πιστός κο Ντεβέλ. Μπάζιμ τσσουβέλα-λεν αμέντζαρ ντα αγαβάσα αμέσως ότι βοβ ισί παλάλ, ενώ γιαβερά φαρ τσσουβέλα-λεν αμέντζαρ πφιρνιμάσαρ ντα να αγαβάσα-λες αζόμ ξεκάθαρα.

8. Σο πρέπει τι αγαβέλ κάθε Χριστιανός;

⁸ Κο εδάφιος Εφεσίους 6:​12 διαβάνασα: «Κεράσα τζένγκι  [«ουσαράσα», υποσημείωση] κόντρα . . . κο δαίμονες σο ισί κο ουρανός». Ο κάθε εκ Χριστιανός κερέλα τζένγκι ι Μπενγκέσαρ ντα ι δαιμονέντζαρ. Πρέπει τι αγαβάς ότι σαρέ ο τζενέ σο ντένα πουμαρό λάφι κο Ιεχωβά τι τζουβντιόν λέσκε τσσουβένα-πες βον-ντα ανταλέ τζενγκίστε. Κι επιστολή σο γραφιντάς ο απόστολος Παύλος κο πφραλά κι Έφεσος, βακερντάς τριν φαρ κο Χριστιανοί τι «ατσσόν σταθεροί».​—Εφεσίους 6:​11, 13, 14.

9. Σο προσπαθίνενα τι κερέν αμένγκε ο Μπενγκ ντα λέσκε δαίμονες;

⁹ Ο Μπενγκ ντα λέσκε δαίμονες προσπαθίνενα τι χουχαβέν-αμέν σαβέ τι μανγκές τροπόντζαρ. Ατζέ-ντα άμα γκιλάμ κόντρα εκχέ πφιρνικανέ πραγμάστε σο κερντάς ο Μπενγκ, ανταβά να μανγκέλα τι βακερέλ ότι να κα περαβέλ-αμέν εκχέ γιαβερέ πφιρνιμάσαρ. Ο Μπενγκ κερέλα σο νακχέλα λέσκε βαστέσταρ για τι αρακχέλ κάι ισινάμ μπίζουρανε ντα τι τραμπίνελ καλά παγίδες κα τσσουβέλ αμένγκε. Ανταβά όμως να μανγκέλα τι βακερέλ ότι σο-ντα τι αβέλ-πες κα περάς λέντε, επειδή η Γραφή βακερέλα αμένγκε καλά ισί ο παγίδες ι Μπενγκέσκε. (2 Κορινθίους 2:​11· ντικχ ι Σημείωση 31 κο παλαϊνέ σελίδες) Εκ ανταλέ παγιδένταρ ισί ο μπενγκαλέ πράγματα.

10. (α) Σο ισί ο μπενγκαλέ πράγματα; (β) Σαρ ντικχέλα-λεν ο Ιεχωβά;

¹⁰ Μπενγκαλέ πράγματα ισί ο πράγματα σο τθερένα τι κερέν ι δαιμονέντζαρ σαρ ισί τι ντορικιαρέλ εκ τζενό, τι κερέλ μάγια, τι γητίνελ ή τι προσπαθίνελ τι κερέλ λάφι ι μουλέντζαρ. Η Γραφή βακερέλα αμένγκε ότι ανταλά πράγματα ισί “τζουνγκαλέ” ντα ότι ναστί αβέλα-πες τι τθεράς σχέση λέντζαρ άμα μανγκάσα τι ντας λατρεία ι Ιεχωβάς. (Δευτερονόμιο 18:​10-12· Αποκάλυψη 21:8) Ο Χριστιανοί πρέπει τι νασέν μπουτ ντουρ σαρέ ανταλέ πραγματένταρ.​—Ρωμαίους 12:9.

11. Κάι κα μπορίνελας τι γκερέλ-αμέν η περιέργεια ι μπενγκαλέ πραγματένγκε;

 ¹¹ Ο Μπενγκ τζανέλα ότι άμα ταρτίνενα-αμέν ο μπενγκαλέ πράγματα, κα αβέλ λέσκε εύκολος τι γκερέλ-αμέν πι ντρομέστε. Σο-ντα σχέση τι τθεράας ι μπενγκαλέ πραγματέντζαρ κα χαλαβέλας αμαρί φιλία ι Ιεχωβάσαρ.

12. Σαρ προσπαθίνελα ο Μπενγκ τι χουχαβέλ-αμέν;

¹² Ο Μπενγκ προσπαθίνελα τι χουχαβέλ ι τζενέν. Τσσουβέλα σιγά σιγά αμφιβολίες, μέχρι ο τζενέ τι πακιάν ότι «ο λατσσό ισί γκεραλό ντα ο γκεραλό ισί λατσσό». (Ησαΐας 5:​20) Ο Μπενγκ νακχαβέλα ι άποψη ότι ο συμβουλές ι Γραφιάκε να κερένα αμένγκε λατσσιπέ ντα ότι κα αβάας πιο ευτυχισμέ άμα να κα ασουνάας ο κανόνες ι Ντεβλέσκε.

13. Σαρ προσπαθιντάς ο Μπενγκ τι τσσουβέλ αμφιβολίες;

¹³ Ο αμφιβολίες ισί εκ κατά παγίδες ι Μπενγκέσκε σο ασταρένα πιο μπουτ σαριλένταρ. Χρησιμοποιήνελα-λεν κατά πουρανέ μπρεσά. Κο κήπος της Εδέμ, προσπαθιντάς τι τσσουβέλ αμφιβολίες κι Εύα κάνα πουτσλάς-λα: «Μπαγιά βακερντάς ο Ντεβέλ ότι δεν πρέπει τι χαν από κάθε δέντρος σο ισί κο κήπος;» (Γένεση 3:1) Πιο σοράν, κάνα τζουβντιόλας ο Ιώβ, πουτσλάς ι Ιεχωβάς ανγκλάλ κο άγγελοι: «Άμα ο Ιώβ να μπεκλεντίνελας τι λελ κάτι παλάλ, κα νταρέλας κατά Ντεβέλ;» (Ιώβ 1:9) Ο Μπενγκ μανγκλάς τι τσσουβέλ ι Ιησούς κο πειρασμός σοράν λέσκε μπολντιμάσταρ, κάνα βακερντάς λέσκε: «Άμα ισινάν ι Ντεβλέσκο τσσαβό, βάκερ ακαλέ μπαρένγκε τι αβέν μαντρέ».​—Ματθαίος 4:3.

14. Σαρ κερέλα ο Μπενγκ ι τζενέν μα τι αβέν σίγουροι άμα ο μπενγκαλέ πράγματα κερένα ζιάνι;

¹⁴ Αντιβές, ο Μπενγκ να τσσιναβέλα τι τσσουβέλ αμφιβολίες. Βακερέλα ότι κάποια πράγματα σο τθερένα σχέση  ι δαιμονέντζαρ να κερένα ζιάνι ντα αντικάς κερέλα ι τζενέν τι πακιάν ότι ο μπενγκαλέ πράγματα νανέ αζόμ γκεραλέ. Ατζέ-ντα μερικοί Χριστιανοί να ντικχένα καζόμ ζιάνι κερένα ο μπενγκαλέ πράγματα. (2 Κορινθίους 11:3) Σο κα κεράς αμέν για τι αρακχαβάς-αμέν; Σο κα κεράς για μα τι χουχάντιβας κατά Μπενγκέσκε πφιρνικανέ πράγματα; Κα ντικχάς ντούι πράγματα σο κα μπορίνενας τι χουχαβέν-αμέν: ι διασκέδαση ντα κάνα ρόντασα σαρ τι αβάς λατσσές.

15. Σαρ κα μπορίναας τι περάς κι δαιμονένγκε βαστά αντράλ κατά διασκέδαση;

¹⁵ Αντιβές, μπουτ σινεμάδες, βίντεα, πράγματα κι τηλεόραση, παιχνίδια ντα σελίδες κο Ίντερνετ σικαβένα δαιμονέν, μαγεία ντα γιαβερά ασακέ πράγματα. Μπουτ τζενέ πακιάνα ότι σαρέ ανταλά να κερένα ζιάνι ντα να αγαβένα ότι αντικάς μπορεί τι μουκχέν ι δαιμονέν τι ντεν αντρέ λένγκε ζωγιάτε. Επίσης, μπορεί εκ τζενό τι περέλ κι δαιμονένγκε βαστά άμα κερέλα πράγματα σαρ ισί τι μελετίνελ ο τσεργανιά, τι διαβάνελ ο βας, τι τσσουβέλ κολιτσίνα για τι βακερέλ ι μοίρα ντα τι ντικχέλ σο κα αβέλ-πες αντράλ κατά κρυστάλλινες σφαίρες. Ο Μπενγκ γκεραβέλα ο ζιάνι ντα προσπαθίνελα τι σικαβέλ ότι ασακέ πράγματα ισί σουκάρ ντα ότι νακχέσα λέντζαρ λατσσές. Εκ τζενό μπορεί ατζέ-ντα τι αμντίνελ ότι νανέ κακός τι ντικχέλ κάτι σο τθερέλα τι κερέλ μπενγκαλέ πραγματέντζαρ άμα να κερέλα βοβ οντουλά σο ντικχέλα. Σόσκε ισί επικίνδυνος ανταβά;​—1 Κορινθίους 10:12.

16. Σόσκε δεν πρέπει τι διασκεδάνας μπενγκαλέ πραγματέντζαρ;

¹⁶ Ο Μπενγκ ντα ο δαίμονες ναστί ντικχένα σο τθεράσα αμαρέ γκοντιάτε. Μπορίνενα όμως τι σικλιόν σο μανγκάσα  ντα σαρ σκεφτίνασα κάνα τσσουβένα σημασία οντουλά σο τραμπίνασα αμένγκε ντα αμαρέ φαμιλιάκε, εμ οντουλά σο τραμπίνασα για τι διασκεδάνας. Άμα τραμπίνασα σινεμάδες, γκιλιά ή βιβλία σο κερένα λάφι τζενένγκε σο ντορικιαρένα, σο γητίνενα, σο χαλαβένα-πες, μαγισσένγκε, τζατζιένγκε ή γιαβερέ ασακέ πραγματένγκε, ο Μπενγκ ντα λέσκε δαίμονες κα αγαβέν ότι μανγκάσα τι σικλιάς λένγκε. Αζομάν μπορεί ατζέ-ντα τι τσσίντεν-αμέν τι κεράς ανταλά μπενγκαλέ πράγματα.​—Διάβανε Γαλάτες 6:7.

17. Σαρ μπορίνελα ο Μπενγκ τι ισταβέλ κι επιθυμία σο τθεράσα τι αβάς ζουρανέ;

¹⁷ Ο Μπενγκ επίσης μπορεί τι ισταβέλ κι επιθυμία σο  τθεράσα τι αβάς ζουρανέ. Αντιβές, μπουτ τζενέ νασφάλιβενα. Μπορεί εκ τζενό τι κερντάς σαβέ τι μανγκές θεραπείες χωρίς τι ντικχέλ λατσσιπέ. (Μάρκος 5:​25, 26) Αφού καλιλό λέσκο γκι, μπορεί τι κερέλ σο νακχέλα λέσκε βαστέσταρ για τι αβέλ λατσσές. Αλλά αμέν, σαρ Χριστιανοί, πρέπει τι τθεράς αμαρί γκοντί μα τι τραμπίνας θεραπείες σο τθερένα τι κερέν “μαγικέ ζοριάσαρ”.​—Ησαΐας 1:13.

18. Καλά θεραπείες να κερένα ο Χριστιανοί;

¹⁸ Κο πουρανό Ισραήλ, ισινέ τζενέ σο χρησιμοποιήνενας «μαγική ζορ». Ο Ιεχωβά βακερντάς λένγκε: «Κάνα βάντενα τουμαρέ βαστά, πφάνταβα μο γιακχά τουμένταρ. Παρόλο σο κερένα μπουτ προσευχές, να ασουνάβα». (Ησαΐας 1:​15) Σκεφτίνεν​—ο Ιεχωβά να μανγκέλας ατζέ-ντα λένγκε προσευχές τι ασουνέλ! Αμέν να κα μανγκάας τι κεράς τίποτα σο κα χαλαβέλας αμαρί φιλία ι Ιεχωβάσαρ ντα κα τσσιναβέλας-λες τι βοηθίνελ-αμέν, ντα ατζέ πιο μπουτ κάνα ισινάμ νασφαλέ. (Ψαλμός 41:3) Οτθάρ, πρέπει τι σικλιάς άμα εκ θεραπεία σο σκεφτίνασα τι κεράς τθερέλα σχέση μπενγκαλέ πραγματέντζαρ. (Ματθαίος 6:​13) Άμα πακιάσα ότι μπορεί τι τθερέλα σχέση, δεν πρέπει τι κεράς-λα!​—Ντικχ ι Σημείωση 32 κο παλαϊνέ σελίδες.

19. Σαρ κερντάς ο Μπενγκ μπουτέ τζενέν τι νταρέν;

¹⁹ Ενώ μερικά τζενέ πακιάνα ότι νανέ Μπενγκ ντα δαίμονες, γιαβερά τζενέ αγαντέ μπουτ λατσσές ότι ισί. Μπουτ τζενέ νταρένα κατά δαίμονες ντα, μανγκένα να μανγκένα, κερένα δαιμονικά έθιμα. Γιαβερά πφερένα νταρ ι τζενέν κάνα πουτρένα λένγκε ιστορίες δαιμονένγκε σο κερντέ γιαβερέν τι τσσίντεν μπουτ. Ο πιο μπουτ φαρ, οντουλά σο ασουνένα ασακέ ιστορίες ατσσόνα πουταρντέ μόσαρ ντα κερένα σαρ σαρ τι βακερέν-λεν κο γιαβερά. Ανταλά ιστορίες μπουτ φαρ κερένα ι τζενέν τι νταρέν κατά Μπενγκ.

20. Σαρ κα πφιραβάας κο γιαβερά ι Μπενγκέσκε ψέματα;

 ²⁰ Σκεφτίνεν: Ο Μπενγκ μανγκέλα τι νταρέν λέσταρ ο τζενέ. (2 Θεσσαλονικείς 2:9, 10) Ισί εκ ψεύτης σο τζανέλα σαρ τι χουχαβέλ οντουλέν σο ταρτίνενα-λεν ο μπενγκαλέ πράγματα ντα σαρ τι κερέλ-λεν τι πακιάν ιστορίες σο νανέ σίγουρα μπαγιά. Ανταλά τζενέ μπορεί τι πουτρένα ιστορίες πραγματένγκε σο αμντίνενα ότι ντικχλέ ντα ασουντέ. Ντα μούι μόστε, ανταλά ιστορίες μπαριόνα. Αμέν δεν πρέπει τι βακεράς γιαβερτθέ ανταλά ιστορίες ντα αντικάς τι βοηθίνας ι Μπενγκές τι πφερέλ ι τζενέν νταρ.​—Ιωάννης 8:​44· 2 Τιμόθεο 2:16.

21. Αντίς τι πουτράς ιστορίες δαιμονένγκε, καλέ πραγματένγκε μπορίνασα τι κεράς λάφι;

²¹ Άμα εκ υπηρέτης ι Ιεχωβάσκο νακχλάας κάτι δαιμονέντζαρ, να κα αβέλας σωστός τι βακερέλ-λες κο γιαβερά για τι νακχαβέν πουμαρό σαάτι. Ο λαός ι Ιεχωβάσκο να χρειαζίντιβελα τι νταρέλ οντουλένταρ σο κερένα ο Μπενγκ ντα λέσκε δαίμονες. Οκιά μπάνταρ, τι τθεράς αμαρέ γιακχά κο Ιησούς ντα κι ζορ σο ντινάς-λες ο Ιεχωβά. (Εβραίους 12:2) Ο Ιησούς να βακερέλας πι μαθητένγκε ιστορίες ι δαιμονένγκε για τι νακχαβέν πουμαρό σαάτι. Τθερέλας πο γιακχά κο αμπέρια κι Βασιλειάκε ντα κι “Ντεβλέσκε μπαρέ πράγματα”.​—Πράξεις 2:​11· Λουκάς 8:1· Ρωμαίους 1:​11, 12.

22. Σο μανγκένα τι κερέν;

²² Μα μπιστρέν ότι ο Μπενγκ μανγκέλα τι χαλαβέλ αμαρί φιλία ι Ιεχωβάσαρ. Κα κερέλ σο νακχέλα λέσκε βαστέσταρ για τι αβέλ-πες ανταβά. Αλλά αμέν τζανάσα ο πφιρνικανέ πράγματα ι Μπενγκέσκε ντα μανγκάσα τι τζας κόντρα σαρέ κο μπενγκαλέ πράγματα. Να κα “ντας κο Μπενγκ ευκαιρία” τι κερέλ μπίζουρανι αμαρί απόφαση. (Διάβανε Εφεσίους 4:​27) Άμα τζάσα κόντρα κο Μπενγκ, να κα περάς λέσκε παγιδέντε ντα ο Ιεχωβά κα αρακχαβέλ-αμέν.​—Εφεσίους 6:11.