1, 2. Σόσκε ισί η Γραφή εκ μπουτ σουκάρ δώρος κατά Ντεβέλ;

ΣΑΡ νιωθίνεσα όταν εκ αμάλ ντέλα-τουτ εκ δώρος χωρίς τι μπεκλεντίνες-λες; Κερέσα σαρ σαρ τι πουτρές-λες ντα χαιρίνεσα επειδή το αμάλ σκεφτιντάς-τουτ. Βακερέσα λέσκε ευχαριστώ οντουλέσκε σο κερντάς τούκε.

² Η Αγία Γραφή ισί εκ δώρος κατά Ντεβέλ. Βακερέλα αμένγκε πράγματα σο να μπορίνασα τι αρακχάς-λεν πουθενά γιαβερτθέ. Για παράδειγμας, βακερέλα αμένγκε ότι ο Ντεβέλ κερντάς ο ουρανός, ι πφουβ, ι πρώτε μουρσές ντα ι πρώτε τζουβλιά. Ντέλα-αμέν συμβουλές σο μπορίνενα τι βοηθίνεν-αμέν όταν τθεράσα προβλήματα. Αντρέ κι Γραφή, σικλιάσα σαρ ο Ντεβέλ κα κερέλ οντουβά σο τθερέλα πι γκοντιάτε​—τι κερέλ ι πφουβ εκ πιο λατσσό τθαν. Η Γραφή ισί εκ μπουτ σουκάρ δώρος!

3. Σο κα σικλιός καμπόρ διαβάνεσα ι Αγία Γραφή;

³ Καμπόρ διαβάνεσα ι Γραφή, κα ντικχές ότι ο Ντεβέλ μανγκέλα τι αβές λέσκο αμάλ. Καμπόρ πιο μπουτ σικλιόσα λέσκε, αμπόρ πιο λατσσί φιλία κα τθερές λέσαρ.

4. Σο κερέλα τούκε εντύπωση κι Γραφή;

⁴ Η Γραφή μεταφρασάλι σε περίπου 2.800 τσσιμπά ντα νικίστιλε δισεκατομμύρια Άγιες Γραφές. Σχεδόν σαρέ ο τζενέ οπράλ κι πφουβ μπορίνενα τι διαβάνεν ι Γραφή πουμαρέ τσσιμπάτε. Ντα κάθε εβδομάδα, πιο μπουτ από εκ εκατομμύριος τζενέ λένα εκ Αγία Γραφή! Βα, να υπαρχίντιβελα γιαβέρ βιβλίος σαρ ι Γραφή.

5. Σόσκε μπορίνασα τι βακεράς ότι ο «άγιος πνεύμας ι Ντεβλέσκο βοηθιντάς τι γραφίντιβελ σαρί η Γραφή»;

⁵ «Ο άγιος πνεύμας ι Ντεβλέσκο βοηθιντάς τι γραφίντιβελ σαρί η Γραφή». (Διάβανε 2 Τιμόθεο 3:​16) Αλλά μερικοί μπορεί τι σκεφτίνεν: “Αφού τζενέ γραφιντέ ι Γραφή,  σαρ αβέλα-πες τι αβέλ κατά Ντεβέλ;” Η Γραφή απαντίνελα: «Τζενέ κερντέ λάφι κατά Ντεβέλ ντα ο άγιος πνεύμας κατευθίνελας-λεν». (2 Πέτρου 1:​21) Σκέφτινε, για παράδειγμας, εκχέ τζενές σο ισί επιχειρηματίας ντα βακερέλα πι γραμματεάκε τι γραφίνελ εκ γράμμας. Κον ισί οντουβά σο γραφιντάς ο γράμμας; Ισί ο επιχειρηματίας, όχι η γραμματέας. Αντικάς-ντα, Οντουβά σο γραφιντάς ι Αγία Γραφή ισί ο Ντεβέλ, όχι ο τζενέ σο τσσουντάς για τι γραφίνεν-λα. Ο Ντεβέλ κατευθιντάς-λεν για τι γραφίνεν λέσκε σκέψεις. Η Αγία Γραφή ισί μπαγιά «ο λάφι ι Ντεβλέσκο».​—1 Θεσσαλονικείς 2:13· ντικχ ι Σημείωση 2 κο παλαϊνέ σελίδες.

6, 7. Σόσκε μπορίνασα τι βακεράς ότι σαρέ ο λάφια ι Γραφιάκε ταιριάνενα ο εκ ι γιαβερέσαρ;

⁶ Νακχλέ πιο μπουτ από 1.600 μπρεσά για τι γραφίντιβελ  η Αγία Γραφή. Οντουλά σο γραφιντέ-λα να τζουβντιλέ σαρέ κο ίδια μπρεσά. Μερικοί ισινέ μορφωμέ ενώ γιαβερά να ισινέ. Για παράδειγμας, εκ τανό ισινέ γιατρός. Γιαβερά κερένας μπουτί κο χωράφια, κάποιοι ισινέ ψαράδες, τσομπάνια, προφήτες, κριτές ντα βασιλιάδες. Παρόλο σο ισινέ διαφορετικοί ο τζενέ σο γραφιντέ-λα, σαρέ ο λάφια ι Γραφιάκε ταιριάνενα ο εκ ι γιαβερέσαρ. Η Γραφή να βακερέλα εκ πράγμας σε εκ κεφάλαιος ντα κάτι διαφορετικός σε εκ γιαβέρ κεφάλαιος. *

⁷ Ο πρώτα κεφάλαια ι Γραφιάκε βακερένα αμένγκε σαρ αρχισάλε ο προβλήματα ι ντουνιάσκε ντα ο τελευταία βακερένα σαρ ο Ντεβέλ κα σταματίνελ-λεν όταν κα κερέλ ι πφουβ παράδεισος. Από αζομάν σο αρχισάλι τι γραφίντιβελ μέχρι αζομάν σο τελειωσάλι, η Γραφή βακερέλα αμένγκε σο κερένας ντα σαρ τζουβντιόνας ο τζενέ για χιλιάδες μπρεσά ντα σικαβέλα ότι ο σκοπός ι Ντεβλέσκο αβέλα-πες πάντα.

8. Βάκερ παραδείγματα σο σικαβένα ότι η Γραφή ισί σωστή όταν βακερέλα πραγματένγκε σο τθερένα τι κερέν με την επιστήμη.

⁸ Η Αγία Γραφή να γραφισάλι για τι βακερέλ αμένγκε για την επιστήμη, αλλά όταν βακερέλα πραγματένγκε σο τθερένα τι κερέν με την επιστήμη, ισί πάντα σωστή. Ανταβά κα μπεκλεντίναας εκχέ βιβλιόσταρ σο ισί κατά Ντεβέλ. Για παράδειγμας, ο βιβλίος του Λευιτικού τθερέλα ο οδηγίες σο ντινάας ο Ντεβέλ κο Ισραηλίτες για μα τι κολλίνενας γιαβερά-ντα τζενέ όταν υπαρχίντιβελας εκ νασφαλιπέ. Ανταβά γραφίντιλο μπουτ μπρεσά πριν τι σικλιόν ο τζενέ σαρ ο μικρόβια ανένα νασφαλίματα. Επίσης, ισί σωστός οντουβά σο σικλιαρέλα η Γραφή ότι η πφουβ ιμπλάντιβελα κο πουθενά. (Ιώβ 26:7) Ντα όταν ο πιο μπουτ τζενέ πακιάνας ότι η πφουβ ισινέ ίσια, η Γραφή βακερντάς ότι ισινέ κύκλος.​—Ησαΐας 40:22.

9. Σο μπορίνασα τι αγαβάς επειδή ο τζενέ σο γραφιντέ ι Αγία Γραφή βακερένας ι αλήθεια;

 ⁹ Η Γραφή ισί πάντα σωστή όταν βακερέλα πραγματένγκε σο αβιλέ-πες κο πουρανέ μπρεσά. Όμως, μπουτ βιβλία να βακερένα ακριβώς σαρ αβιλέ-πες ο πράγματα κο πουρανέ μπρεσά επειδή οντουλά σο γραφιντέ-λεν να βακερντέ ι αλήθεια. Για παράδειγμας, μπουτ φαρ να γραφιντέ για το τζένγκια σο χασαρντάς λένγκο τθεμ. Όμως, οντουλά σο γραφιντέ ι Γραφή βακερένας ι αλήθεια ατζέ-ντα όταν ο Ισραηλίτες χασαρένας κο τζένγκια. Επίσης, γραφιντέ πουμαρέ λάθη. Για παράδειγμας, κο βιβλίος Αριθμοί, ο Μωυσής βακερέλα αμένγκε ότι κερντάς εκ μπαρό λάθος ντα ότι ο Ντεβέλ έπρεπε τι τιμωρίνελ-λες. (Αριθμοί 20:​2-12) Επειδή οντουλά σο γραφιντέ ι Αγία Γραφή βακερένας ι αλήθεια, αγαβάσα ότι η Γραφή ισί κατά Ντεβέλ. Ανταβά μανγκέλα τι βακερέλ ότι μπορίνασα τι πακιάς οντουλά σο βακερέλα η Γραφή.

10. Σόσκε μπορίνενα τι βοηθίνεν-αμέν ο συμβουλές ι Γραφιάκε ανταλέ ντιβεσέντε;

¹⁰ «Ο άγιος πνεύμας ι Ντεβλέσκο βοηθιντάς τι γραφίντιβελ σαρί η Γραφή, ντα οτθάρ ισί λατσσί για τι σικλιαρέλ-αμέν, για τι ντελ-αμέν συμβουλές, για τι τσσουβάς σε εκ σειράς ο πράγματα». (2 Τιμόθεο 3:​16) Βα, ο συμβουλές ι Γραφιάκε μπορίνενα τι βοηθίνεν-αμέν ανταλέ ντιβεσέντε. Ο Ιεχωβά τζανέλα σαρ ισινάμ κερντέ, ντα οτθάρ αγαβέλα σαρ σκεφτίνασα ντα σαρ αισθάντιβασα. Βοβ τζανέλα-αμέν πιο λατσσές αμένταρ ντα μανγκέλα τι αβάς ευτυχισμέ. Τζανέλα σο ισί λατσσό ντα σο ισί κακός αμένγκε.

11, 12. (α) Καλά λατσσέ συμβουλές σο ισί κο Ματθαίος κεφάλαια 5 μέχρι 7 ντινάς ο Ιησούς; (β) Σο γιαβέρ μπορίνασα τι σικλιάς κατά Γραφή;

¹¹ Κο Ματθαίος κεφάλαια 5 μέχρι 7, διαβάνασα ο μπουτ λατσσέ συμβουλές σο ντινάς ο Ιησούς για τι αβάς ευτυχισμέ, για τι τθεράς-λεν λατσσές ι γιαβερέντζαρ, για την προσευχή ντα για τι ντικχάς ο λοβέ με το σωστός τρόπος. Ανταλά συμβουλές, παρόλο σο ντινάς-λεν πριν από 2.000 μπρεσά, μπορίνενα  τι βοηθίνεν-αμέν μπουτ ανταλέ ντιβεσέντε ντα τθερένα ι ίδια αξία σο τθερένας αζομάν-ντα.

¹² Επίσης, αντρέ κι Γραφή ο Ιεχωβά σικλιαρέλα-αμέν συμβουλές σο βοηθίνενα-αμέν τι τθεράς πιο ευτυχισμέ φαμιλί, τι αβάς σωστοί αμαρέ μπουτιάτε ντα τι τζουβντιάς με ειρήνη ι γιαβερέντζαρ. Ο συμβουλές ι Γραφιάκε βοηθίνενα-αμέν πάντα, κάι-ντα τι τζουβντιάς, σο-ντα προβλήματα τι τθεράς ή σο-ντα τζενέ τι αβάς.​—Διάβανε Ησαΐας 48:​17· ντικχ ι Σημείωση 3 κο παλαϊνέ σελίδες.

13. Σο βακερντάς ο Ησαΐας ότι κα αβέλας-πες κι Βαβυλώνα;

¹³ Μπουτ προφητείες ι Γραφιάκε νικίστιλε μπαγιά. Για παράδειγμας, ο Ησαΐας βακερντάς ότι η Βαβυλώνα κα καταστραφίντιβελας. (Ησαΐας 13:​19) Βακερντάς ακριβώς σαρ κα αβέλας-πες ανταβά. Η Βαβυλώνα τθερέλας μπαρέ πόρτες ντα εκ λεν, ντα αντικάς αρακχάντιβελας μπουτ λατσσές. Αλλά ο Ησαΐας βακερντάς ότι η λεν κα σουκιόλας ντα ο πόρτες κα ατσσόνας πουταρντέ. Ο ντουσμάνια κα λένας ι πόλη χωρίς τι κερέν τζένγκι. Επίσης, ο Ησαΐας βακερντάς ότι εκ μουρς σο κα βακέρντιβελας Κύρος κα νικίνελας ι Βαβυλώνα.​—Διάβανε Ησαΐας 44:27–45:2· ντικχ ι Σημείωση 4 κο παλαϊνέ σελίδες.

14, 15. Σαρ νικίστιλι μπαγιά η προφητεία σο βακερντάς ο Ησαΐας;

¹⁴ Αφού νακχλέ 200 μπρεσά από αζομάν σο γραφίντιλι ανταγιά προφητεία, εκ στρατός ισινέ έτοιμος τι τσσουβέλ-πες κι Βαβυλώνα. Κον κερέλας κουμάντος κο στρατός; Ακριβώς αντικάς σαρ βακερντάς η προφητεία, ισινέ ο Κύρος, ο βασιλιάς της Περσίας. Αλλά κα μπορίνελας ο στρατός του Κύρου τι τσσουβέλ-πες κι Βαβυλώνα αντικάς σαρ βακερντάας ο προφήτης Ησαΐας;

¹⁵ Οντιά ιράτ σο ισινέ τι τσσουβέν-πες κι πόλη, ο Βαβυλώνιοι τθερένας γιορτή. Αισθάντιβενας ότι να κα παθίνενας τίποτα επειδή αρακχαβένας-λεν μπαρέ ντουβάρια ντα εκ λεν. Αβρί κατά πόλη, ο Κύρος ντα λέσκο στρατός χαντζουντέ εκ  χαντάκι για τι γουλίν ο πανιά ι λενιάκε. Ο πανί γουλίστιλο αζόμ μπουτ σο ο Πέρσες στρατιώτες μπορισάλε τι νακχέν οτθάρ αντράλ. Αλλά σαρ κα μπορίνελας ο στρατός τι νακχέλ κατά ντουβάρια της Βαβυλώνας; Ακριβώς σαρ βακερντάς η προφητεία, ο πόρτες ι Βαβυλωνάκε ατσσιλέας πουταρντέ ντα αντικάς ο στρατιώτες λιντέ ι πόλη χωρίς τι κερέν τζένγκι.

16. (α) Καγιά προφητεία βακερντάς ο Ησαΐας για το μέλλον ι Βαβυλωνάκο; (β) Σαρ τζανάσα ότι οντουβά σο βακερντάς ο Ησαΐας νικίστιλο μπαγιά;

 ¹⁶ Ο Ησαΐας βακερντάς ότι καέκ να κα ξανατζουβντιόλας ποτές κι Βαβυλώνα. Γραφιντάς: «Καέκ να κα μπεσέλ ποτές οτθέ ούτε κα αβέλ τθαν για τι μπεσέν [ή τι τζουβντιόν] πάλι ο τζενέ οτθέ». (Ησαΐας 13:​20) Νικίστιλο μπαγιά ανταβά; Οτθέ σο ισινέ η Βαβυλώνα, περίπου 80 χιλιόμετρα νότια κατά Βαγδάτη, κο Ιράκ, υπαρχίντιβενα σάντε ερείπια. Ατζέ-ντα αντιβές, καέκ να μπεσέλα οτθέ. Ο Ιεχωβά καταστραφιντάς ι Βαβυλώνα “σαρ τι σουλαντάς-λα ντα τι φουρτιντάς-λα”.​—Ησαΐας 14:22, 23. *

17. Σόσκε μπορίνασα τι τθεράς εμπιστοσύνη σαρέ κο υποσχέσεις κι Ντεβλέσκε;

¹⁷ Αφού αζόμ μπουτ προφητείες ι Γραφιάκε νικίστιλε μπαγιά, ανταβά μανγκέλα τι βακερέλ ότι μπορίνασα τι τθεράς εμπιστοσύνη σαρέ οντουλένγκε σο βακερέλα η Γραφή  για το μέλλον. Μπορίνασα τι αβάς σίγουροι ότι ο Ιεχωβά κα ατσσικιαρέλ ο λάφι σο ντινάς τι κερέλ ι πφουβ παράδεισος. (Διάβανε Αριθμοί 23:​19) Βα, τθεράσα ι ελπίδα «τι τζουβντιάς για πάντα, σο ανταλέ ελπιδάκε ο Ντεβέλ, σο ναστί βακερέλα ψέματα, ντινάς πο λάφι πριν από μπουτ μπρεσά».​—Τίτο 1:2. *

18. Σο βακερέλα ο Παύλος ότι ισί «ο λάφι ι Ντεβλέσκο»;

¹⁸ Σικλιλάμ ότι να υπαρχίντιβελα γιαβέρ βιβλίος σαρ ι Αγία Γραφή. Οντουλά σο βακερέλα σε εκ κεφάλαιος συμφωνίνενα οντουλέντζαρ σο βακερέλα σε εκ γιαβέρ, ντα όταν βακερέλα για την επιστήμη ή πραγματένγκε σο αβιλέ-πες κο πουρανέ μπρεσά, ισί πάντα σωστή. Επίσης, ντέλα-αμέν λατσσέ συμβουλές ντα τθερέλα μπουτ προφητείες σο νικίστιλε μπαγιά. Αλλά η Γραφή κερέλα ατζέκ πιο μπουτ πράγματα. Ο απόστολος Παύλος γραφιντάς: «Ο λάφι ι Ντεβλέσκο ισί τζουβντό ντα τθερέλα ζορ». Σο μανγκέλα τι βακερέλ ανταβά;​—Διάβανε Εβραίους 4:​12.

19, 20. (α) Σαρ μπορίνελα η Γραφή τι βοηθίνελ-τουτ τι σικλιός κον ισινάν; (β) Σαρ μπορίνεσα τι σικαβές ότι εκτιμίνεσα ι Γραφή;

¹⁹ Η Γραφή μπορίνελα τι αλλάνελ τι ζωή. Μπορίνελα τι βοηθίνελ-τουτ τι σικλιός κον ισινάν μπαγιά. Μπορίνελα τι βοηθίνελ-τουτ τι αγαβές οντουλά σο σκεφτίνεσα ντα νιωθίνεσα. Για παράδειγμας, μπορεί τι αμντίνασα ότι μανγκάσα ι Ντεβλές. Αλλά για τι σικαβάς ότι μανγκάσα-λες, πρέπει τι κεράς αμαρέ ζωγιάτε οντουλά σο βακερέλα η Γραφή.

²⁰ Η Γραφή ισί μπαγιά εκ βιβλίος κατά Ντεβέλ. Βοβ μανγκέλα τι διαβάνες-λα ντα τι μανγκές-λα. Τι εκτιμίνες ανταβά δώρος ντα τι συνεχίνες τι διαβάνες-λες. Αζομάν κα αγαβές σο σκοπός τθερέλα ο Ντεβέλ ι τζενένγκε. Κο γιαβέρ κεφάλαιος, κα σικλιάς πιο μπουτ ανταλέ σκοπόσκε.