Ο στόχος νανέ απλώς εκ σουνό σο μανγκέσα τι νικιόλ μπαγιά. Για τι πετυχίνες ο στόχοι, χρειαζίντιβελα τι αβές οργανωμέ, τι προσαρμόντιβες ντα τι κερές μπουτ μπουτί οπράλ ανταλέστε.

Για τι πετυχίνες το στόχους, μπέκιμ τι νακχέν ντιβεσά ή εβδομάδες, μασεκά ή τι νακχέλ εκ μπρες ή πο μπουτ. Πριν τι πετυχίνες ο μπαρέ στόχοι, ο πο μπουτ φαρ πρέπει τι τσσουβές μπερεκέτι χουρντέ στόχους.

Κάνα πετυχίνεσα το στόχους, νιωθίνεσα πο σίγουρος τι νεαυτόσκε, κερέσα λατσσέ αμαλέν ντα ισινάν πο ευτυχισμέ.

Νιωθίνεσα πο σίγουρος τι νεαυτόσκε: Άμα τσσουβέσα χουρντέ στόχους ντα πετυχίνεσα-λεν, νιωθίνεσα πο σίγουρος τι νεαυτόσκε ντα αντικάς μπορίνεσα τι τσσουβές πο μπαρέ στόχους-ντα. Επίσης, κα ντες πέρα ο δυσκολίες ι κάθε ντιβεσέσκε, σαρ ισί η πίεση ι γιαβερέ τερνένγκι, με πο μπαρί σιγουριά.

Φιλίες: Σαρέ μπεϊντίνασα τι κεράς παρέα τζενέντζαρ σο τσσουβένα στόχους​—σο τζανένα σο μανγκένα ντα κερένα μπουτί οπράλ ανταλέστε. Επίσης, εκ κατά πο λατσσέ τρόποι για τι αβές πο πασέ τι αμαλέσαρ, ισί τι προσπαθίνεν τι πετυχίνεν μαζί εκ ίδιος στόχος.

Ευτυχία: Κάνα τσσουβέσα στόχους ντα πετυχίνεσα-λεν, νιωθίνεσα ότι κερντάν κάτι.

«Μπεϊντίναβα τι τσσουβάβ στόχους. Ατσσικιαρένα-μαν τζανγκαντό ντα ντένα-μαν λόγους για τι προσπαθίναβ. Κάνα πετυχίναβα εκ στόχος, νιωθίναβα μπουτ σουκάρ επειδή σκεφτίναβα κατάρ αρχισάλομ, ντα βακεράβα: “Πω πω, καταφεριντόμ-λεν! Πετυχιντόμ οντουβά σο μανγκάβας τι κεράβ”».​—Κρίστοφερ.

ΑΡΧΗ ΚΑΤΑ ΓΡΑΦΗ: «Άμα μπεκλεντίνεσα ι πο λατσσί μπαρμπάλ ντα ο πο λατσσό βακίτι, να κα φυτίνες ποτές ούτε κα τσσινές ο γκιβά».​—Εκκλησιαστής 11:4, Σημερινή Αγγλική Μετάφραση.

Κερ οντουλά σο κα ντικχές πο τελέ για τι τσσουβές στόχους ντα τι πετυχίνες-λεν.

Σκέφτινε. Γράφινε ο στόχοι σο κα μανγκέας τι τσσουβές ντα τσσουβ-λεν εκχέ σειράστε (πρώτος, δεύτερος, τρίτος ντα γιαβερά) ντα γράφινε καλά μανγκέσα τι κερές πρώτα.

Κερ εκ πρόγραμμας. Για τι πετυχίνες το στόχους κερ ανταλά σο ισί πο τελέ:

• Τσσουβ εκ ημερομηνία σο μέχρι αζομάν μπορίνεσα τι κερές το στόχος.

• Γράφινε σαρέ ο πράγματα σο μανγκέσα τι κερές.

• Σκέφτινε ο δυσκολίες σο μπέκιμ τι αβέν ντα σαρ κα ντες-λεν πέρα.

Άρχινε. Μα τι μπεκλεντίνες μέχρι τι σκεφτίνες σαρέ ο λεπτομέρειες για τι αρχίνες. Σκέφτινε: “Καβά ισί ο πρώτος πράγμας σο μπορίναβα τι κεράβ για τι πετυχίναβ μο στόχος;” ντα κερ-λες. Κάνα τελειώνεσα-λες, τι ντικχές καζόμ λατσσές γκιλάν-λεν.

ΑΡΧΗ ΚΑΤΑ ΓΡΑΦΗ: «Ο σχέδια σο κερέλα οντουβά σο ισί γκοντιαβέρ κα τθερέν λατσσό αποτέλεσμας».​—Παροιμίες 21:5.