1, 2. Καβά αγώνας κερένα ο υπηρέτες ι Ιεχωβάσκε;

ΣΑΡΕ ο πιστοί υπηρέτες ι Ντεβλέσκε, κατά Άβελ μέχρι αμαρέ ντιβεσέντε, κερένα μπαρό αγώνας. Ο απόστολος Παύλος γραφιντάς κο Εβραίους Χριστιανούς ότι “συνεχιντέ τι κερέν μπαρό αγώνας με προβλήματα”, επειδή μανγκένας τι δεχτίνελ-λεν ντα τι ευλογίνελ-λεν ο Ιεχωβά. (Εβραίους 10:​32-34) Ο Παύλος βακερντάς ότι ο αγώνας σο κερένα ο Χριστιανοί μοιάζελα με τον αγώνα σο κερένας ο αθλητές κο πουρανέ μπρεσά, σαρ για παράδειγμας όταν τθάβντενας, ουσαρένας ντα κχελένας μποξ. (Εβραίους 12:​1, 4) Αντιβές, αμέν-ντα τθάβντασα για τι κερδίνας αμαρί ζωή, ντα τθεράσα ντουσμανίν σο μανγκένα τι ταρτίνεν αμαρί προσοχή ντα τι κερέν-αμέν τι χασαράς αμαρί χαρά ακανά ντα ο ευλογίες σο κα αβέν ανγκλ’ αμέντε.

² Ο πιο μπαρό αγώνας σο τθεράσα ισί ότι «ουσαράσα» ι Μπενγκέσαρ ντα λέσκε πφιρνέ ντουνιάσαρ. (Εφεσίους 6:​12) Ισί σημαντικός τι τζας κόντρα κο πράγματα σο σικλιαρέλα ανταβά ντουνιάς, κο φιλοσοφίες σο βακερέλα ντα κο μπέτι πράγματα σο κερένα ο τζενέ, σαρ για παράδειγμας σο τζάνα γιαβερέντζαρ, σο πίνα τσιγάρα ή ναρκωτικά ντα σο ματιόνα. Πρέπει επίσης τι συνεχίνας τι κεράς αγώνας για τι νικίνας αμαρέ αδυναμίες ντα  μα τι χασαράς αμαρό κουράγιος.​—2 Κορινθίους 10:​3-6· Κολοσσαείς 3:​5-9.

3. Σαρ κερέλα-αμέν πιο ζουρανέ ο Ντεβέλ για τι τζας κόντρα αμαρέ ντουσμανίντζαρ;

³ Μπορίνασα μπαγιά τι νικίνας ασακέ ζουρανέ ντουσμανίν; Βα, αλλά κα αβέλ δύσκολος! Ο Παύλος βακερντάς ότι μοιάζελας εκχέ τζενέσαρ σο κχελέλα μποξ. «Αντικάς ουσαράβα, να ντάβα κι μπαρμπάλ», βακερντάς. (1 Κορινθίους 9:​26) Σαρ εκ τζενό σο κχελέλα μποξ τζάλα κόντρα εκχέ γιαβερέσαρ, αντικάς αμέν-ντα πρέπει τι τζας κόντρα αμαρέ ντουσμανίντζαρ. Ο Ιεχωβά βοηθίνελα-αμέν ντα κερέλα-αμέν πιο ζουρανέ για τι κεράς-λες ανταβά. Ντέλα-αμέν ι Αγία Γραφή. Επίσης, ντέλα-αμέν ο έντυπα σο βασίντιβενα κι Γραφή, ο συναθροίσεις ντα ο συνελεύσεις. Τουμέν χρησιμοποιήνενα-λεν σαρέ ανταλά; Άμα να κερένα-λες ανταβά, μπορεί μα τι κερένα σαρέ οντουλά σο χρειαζίντιβενα για τι τζαν κόντρα τουμαρέ ντουσμανίντζαρ, ντα κα μοιάζεν εκχέ τζενέστε σο κχελέλα μποξ ντα “ντέλα κι μπαρμπάλ”.

4. Σο πρέπει τι κεράς για μα τι νικίνελ-αμέν ο κακός;

⁴ Πρέπει πάντα τι βραντίνας-αμέν. Σόσκε; Αμαρέ ντουσμάνια μπορεί τι αβέν αμένγκε αζομάν σο να μπεκλεντίνασα λένγκε ή όταν να τθεράσα δύναμη. Η Αγία Γραφή προειδοποιήνελα-αμέν ντα ντέλα-αμέν κουράγιος όταν βακερέλα: «Μα μουκχ ο κακός τι νικίνελ-τουτ, αλλά νίκινε ο κακός με το λατσσό». (Ρωμαίους 12:​21) Αν κα συνεχίνας τι τζας κόντρα κο κακός, μπορίνασα τι νικίνας! Όμως άμα χασαρντάμ αμαρί προσοχή ντα τσσιναντάμ τι κεράς αγώνας, αζομάν ο Σατανάς, λέσκο ντουνιάς ντα αμαρέ αδυναμίες κα μπορίνενας τι νικίνεν-αμέν. Οτθάρ, ποτές μα τσσιναβέν τι κερέν αγώνας. Μα χασαρέν τουμαρό κουράγιος ντα μα μουκχέν τουμαρέ βαστά τι περέν τελέ!​—1 Πέτρου 5:9.

5. (α) Σο πρέπει τι ντας-αμέν γκοντί για τι δεχτίνελ-αμέν ντα τι ευλογίνελ-αμέν ο Ντεβέλ; (β) Καλά παραδείγματα σο αρακχάσα κι Γραφή κα ντικχάς;

⁵ Για τι νικίνας, πρέπει τι ντας-αμέν γκοντί ότι κεράσα αγώνας επειδή μανγκάσα τι δεχτίνελ-αμέν ντα τι ευλογίνελ-αμέν ο Ντεβέλ. Ο εδάφιος Εβραίους 11:6 βακερέλα: «Οντουβά σο πλησιάνελα ι Ντεβλές πρέπει τι πακιάλ ότι βοβ υπαρχίντιβελα ντα ότι κα ανέλ ευλογίες οντουλέντε σο ρόντενα σαρέ πουμαρέ γκίσαρ τι αρακχέν-λες». Η φράση «ρόντενα σαρέ πουμαρέ γκίσαρ τι αρακχέν» ι Ιεχωβάς μανγκέλα τι βακερέλ ότι πρέπει τι προσπαθίνας μπουτ άμα μανγκάσα τι δεχτίνελ-αμέν. (Πράξεις 15:​17) Κι Αγία Γραφή αρακχάσα λατσσέ παραδείγματα μουρσένγκε ντα τζουβλίνγκε σο κερντέ-λες ανταβά. Ο Ιακώβ, η Ραχήλ, ο Ιωσήφ ντα ο Παύλος νακχλέ δυσκολίες σο ανένας λένγκε ντουκχ εμ κο γκι εμ κο σώμας. Παρ’ όλα αυτά, τθερένας επιτυχία. Λένγκε παραδείγματα σικαβένα αμένγκε ότι, άμα μαρντάμ-αμέν μπουτ, κα λας αμέν-ντα ι ευλογία ι Ιεχωβάσκι. Για τι ντικχάς σαρ μπορίνασα τι μοιάζας λέντε.

6. Σο βοηθιντάς τον Ιακώβ τι συνεχίνελ τι προσπαθίνελ, ντα σο καταφεριντάς; (Ντικχ ι φωτογραφία σο ισί κι αρχή.)

⁶ Ο πιστός Ιακώβ κερντάς μπαρό αγώνας ντα συνεχιντάς τι προσπαθίνελ επειδή μανγκέλας ι Ιεχωβάς ντα εκτιμίνελας ι φιλία σο τθερέλας λέσαρ. Ισινέ σίγουρος ότι ο Ιεχωβά κα ατσσικιαρέλ πο λάφι τι ευλογίνελ λέσκε προσαγγονίν. (Γένεση 28:​3, 4) Όταν ο Ιακώβ ισινέ σχεδόν 100 μπρεσένγκο, για τι λελ ι ευλογία ι Ντεβλέσκι ουσαρντάς εκχέ αγγελόσαρ. (Διαβάνεν Γένεση 32:​24-28) Μήπως ο Ιακώβ ισινέ αζόμ ζουρανό σο κα μπορίνελας τι ουσαρέλ οντουλέ ζουρανέ αγγελόσαρ σάντε πι ζοριάσαρ; Σίγουρα όχι! Αλλά ισινέ μπουτ αποφασισμέ, ντα σικαντάς  ότι κα μαρέλας-πες για τι λελ ι ευλογία ι Ιεχωβάσκι! Ο Ιεχωβά ευλογιντάς τον Ιακώβ σο συνεχιντάς τι προσπαθίνελ ντα νικαντάς λέσκε ο ναβ Ισραήλ, σο μανγκέλα τι βακερέλ «Οντουβά σο Ουσαρέλα ι Ντεβλέσαρ». Ο Ιακώβ λιντάς οντουβά σο μανγκάσα τι λας αμέν-ντα, ι αγάπη ντα ι ευλογία ι Ιεχωβάσκι.

7. (α) Σο πρόβλημας τθερέλας η Ραχήλ; (β) Σο κερντάς η Ραχήλ, ντα σαρ ευλογισάλι;

⁷ Η αγαπημέ ρομνί του Ιακώβ, η Ραχήλ, μπεκλεντίνελας βόι-ντα τι ντικχέλ σαρ κα ατσσικιαρέλας ο Ιεχωβά ο λάφι σο ντινάς λάκε ρομέστε. Αλλά ισινέ εκ πρόβλημας. Η Ραχήλ να μπορίνελας τι κερέλ τσσαβέν. Οντουλέ μπρεσέντε, ανταβά ανέλας μπαρί ντουκχ κο τζουβλιά. Σαρ συνεχιντάς τι κερέλ αγώνας η Ραχήλ παρόλο σο τθερέλας ανταβά πρόβλημας; Ποτές να σταματιντάς τι τθερέλ ελπίδα. Συνεχιντάς πο αγώνας ντα κερέλας ατζέ πιο μπουτ προσευχές αντράλ πι γκίσταρ κο Ιεχωβά. Βοβ ασουντάς ο προσευχές σο κερέλας η Ραχήλ, ντα τελικά ευλογιντάς-λα τσσαβέντζαρ. Οτθάρ, βόι βακερντάς: «Σαρέ μι ζοριάσαρ ουσαρντόμ . . . Ντα νικιντόμ!»​—Γένεση 30:8, 20-24.

8. Καλά δυσκολίες νακχλάς ο Ιωσήφ, ντα σαρ ισί εκ λατσσό παράδειγμας αμένγκε;

⁸ Ο λατσσό παράδειγμας σο ντινέ ο Ιακώβ ντα η Ραχήλ τθερέλας δύναμη οπράλ λένγκε τσσαβέστε, κο Ιωσήφ, ντα βοηθιντάς-λες όταν νακχέλας δυσκολίες πι ζωγιάτε. Όταν ο Ιωσήφ ισινέ 17 μπρεσένγκο, σαρί λέσκι ζωή αλλαξάλι. Λέσκε πφραλά, σο ζηλίνενας-λες, μπικιντέ-λες για δούλος. Σοράν, ο Ιωσήφ νακχλάς μπουτ μπρεσά σε εκ φυλακή κι Αίγυπτος, παρόλο σο ισινέ αθώος. (Γένεση 37:​23-28· 39:​7-9, 20, 21) Βοβ όμως να χασαρντάς πο κουράγιος, να ασταρντάς χολί ούτε προσπαθιντάς τι λελ εκδίκηση. Σόσκε; Επειδή ο Ιωσήφ εκτιμίνελας αντράλ πι γκίσταρ ι φιλία σο τθερέλας ι Ιεχωβάσαρ ντα να μπιστρέλας-λα ποτές. (Λευιτικό 19:​18· Ρωμαίους 12:​17-21) Ο παράδειγμας του Ιωσήφ μπορίνελα τι βοηθίνελ-αμέν. Ατζέ-ντα άμα νακχλάμ δύσκολα κάνα ισινάμας χουρντέ ή άμα νιωθίνασα ότι ακανά να νταϊντίνασα γιαβέρ, πρέπει τι συνεχίνας τι κεράς αγώνας.  Όταν κεράσα-λες ανταβά, ισινάμ σίγουροι ότι ο Ιεχωβά κα ευλογίνελ-αμέν.​—Διαβάνεν Γένεση 39:​21-23.

9. Σαρ μπορίνασα τι μοιάζας κο Ιακώβ, κι Ραχήλ ντα κο Ιωσήφ;

⁹ Αντιβές, αμέν-ντα μπορεί τι νακχάσα δυσκολίες. Μπορεί τι αδικιντέ-τουμέν, τι πρασαντέ-τουμέν, μπορεί μα τι μανγκένα-τουμέν ο γιαβερά επειδή ισινέν διαφορετικοί, ή μπορεί κάποιος τι ζηλίνελα-τουμέν. Αντί τι χασαρέν τουμαρό κουράγιος, ντεν-τουμέν γκοντί σο βοηθιντάς τον Ιακώβ, τη Ραχήλ ντα τον Ιωσήφ τι συνεχίνεν τι υπηρετίνεν ι Ιεχωβάς με χαρά. Ο Ντεβέλ ντινάς-λεν ζορ ντα ευλογιντάς-λεν επειδή εκτιμίνενας μπουτ ι φιλία σο τθερένας λέσαρ. Συνεχιντέ τι ουσαρέν, ή γιαβέρτουλους τι κερέν αγώνας, ντα τι τζουβντιόν αντικάς σαρ βακερένας πουμαρέ προσευχιέντε. Επειδή τζουβντιάσα κο τελευταία ντιβεσά, ισί σημαντικός τι ασταράς μπουτ λατσσές αμαρί ελπίδα για το μέλλον! Τουμέν ισινέν έτοιμοι τι ουσαρέν, τι μαρέν-τουμέν, για τι δεχτίνελ-τουμέν ο Ιεχωβά;

10, 11. (α)  Σόσκε μπορεί τι χρειαζίντιβελ τι ουσαράς για τι λας ι ευλογία ι Ιεχωβάσκι; (β) Σο κα βοηθίνελ-αμέν τι λας σωστές αποφάσεις;

¹⁰ Σόσκε μπορεί τι χρειαζίντιβελ τι ουσαράς για τι λας ι ευλογία ι Ντεβλέσκι; Εκ λόγος ισί επειδή ισινάμ ατελείς, ντα οτθάρ μπορεί τι κεράσα αγώνας για μα τι μανγκάς μπέτι πράγματα. Μερικοί κερένα αγώνας για τι μπεϊντίνεν ατζέ πιο μπουτ ο έργος ι Ντεβλέσκο ντα γιαβερά επειδή ισί νασφαλέ ή νιωθίνενα κορκορέ. Επίσης, γιαβερά τζενέ δυσκολίντιβενα τι συγχωρίνεν εκχέ τζενές σο στεναχωριντάς-λεν. Είτε υπηρετίνασα ι Ιεχωβάς μπουτ μπρεσά είτε χάνικ μπρεσά, σαρέ πρέπει τι τζας κόντρα πραγματέντζαρ σο μπορεί μα τι μουκχένα-αμέν τι υπηρετίνας ι Ντεβλές, οντουλές σο ευλογίνελα ι πιστέν.

¹¹ Η αλήθεια ισί ότι μπορεί τι αβέλ μπουτ δύσκολος τι τζουβντιάς σαρ Χριστιανοί ντα τι λας σωστές αποφάσεις, ντα ατζέ πιο μπουτ άμα χάσα-αμέν αμαρέ νεαυτόσαρ για μα τι μανγκάς μπέτι πράγματα. (Ιερεμίας 17:9) Άμα αισθάνενα αντικάς, κερέν προσευχή κο Ιεχωβά ντα μανγκέν λέσταρ ο άγιος πνεύμας. Η προσευχή ντα ο άγιος πνεύμας κα βοηθίνεν-τουμέν τι τθερέν ι δύναμη τι κερέν ο σωστός, ντα σοράν κα λεν ι ευλογία ι Ντεβλέσκι. Τι αβέν αποφασισμέ τι τζουβντιόν αντικάς σαρ βακερένα τουμαρέ προσευχιέντε. Προσπαθίνεν τι διαβάνεν ι Γραφή κάθε ντιβές ντα τι αρακχέν χρόνος για τι κερέν προσωπική μελέτη ντα ι φαμιλιάκι λατρεία.​—Διαβάνεν Ψαλμός 119:32.

12, 13. Σαρ βοηθίντιλε ντούι Χριστιανοί τι κερέν κουμάντος ο μπέτι πράγματα σο μανγκένας;

¹² Ισί μπουτ παραδείγματα σο σικαβένα σαρ ο Λάφι ι Ντεβλέσκο, λέσκο πνεύμας ντα αμαρέ έντυπα βοηθιντέ μπουτέ πφραλέν ντα πφενίν τι τσσιναβέν τι σκεφτίνεν ο μπέτι πράγματα σο μανγκένας. Εκ έφηβος διαβαντάς κο περιοδικός Ξύπνα! 8 Δεκεμβρίου 2003 ο θέμας «Πώς Μπορείτε να Αντιστέκεστε στις Εσφαλμένες Επιθυμίες;» Σαρ νιωσάλο; «Προσπαθίναβα μπουτ για μα τι κερέν-μαν κουμάντος ο μπέτι σκέψεις. Όταν διαβαντόμ ανταλέ περιοδικόστε ότι “γιαβερά-ντα προσπαθίνενα μπουτ για τι τζαν κόντρα κο μπέτι πράγματα σο μανγκένα”, νιωσάλομ ότι ισινόμ γιεκ μι πφραλέντζαρ. Νιωσάλομ ότι να ισινόμ κορκορό». Ανταβά τσσαβό βοηθίντιλο από εκ γιαβέρ-ντα θέμας σο βακέρντιβελας «Εναλλακτικοί Τρόποι Ζωής​—Τους Επιδοκιμάζει ο Θεός;», σο ισινέ κο Ξύπνα! 8 Οκτωβρίου 2003. Οτθέ διαβαντάς ότι μερικέ τζενένγκε ο αγώνας ισί μπουτ μπαρό, σαρ «εκ καντρό αντρέ κο σώμας». (2 Κορινθίους 12:7) Αλλά παρόλο σο συνεχίνενα τι μαρέν-πουμέν για τι τθερέν σωστή συμπεριφορά, σκεφτίνενα ο λατσσέ πράγματα σο κα αβέν ανγκλά-λέντε. «Οτθάρ», βακερντάς ο πφραλ, «σκεφτίναβα  ότι, κάθε ντιβές σο νακχέλα, μπορίναβα τι ατσσάβ πιστός. Ευχαριστίναβα μπουτ ι Ιεχωβάς σο χρησιμοποιήνελα πι οργάνωση για τι βοηθίνελ-αμέν τι ντας-λεν πέρα κάθε ντιβές ανταλέ πφιρνέ ντουνιάστε».

¹³ Ντικχέν επίσης ι εμπειρία εκχέ πφενιάκι κο Ηνωμένες Πολιτείες. Βόι γραφιντάς: «Μανγκάβα τι ευχαριστίναβ-τουμέν επειδή πάντα ντένα-αμέν ο πνευματικός χαμπέ αζομάν σο χρειαζίντιβασα-λες ντα κάνα τθεράσα-λες ανάγκη. Ισί φαρ σο αισθάναβα ότι ανταλά θέματα γραφίντιλε σάντε μάνγκε. Μπουτ μπρεσά, μαράβα-μαν για μα τι σκεφτίναβ εκ πράγμας σο μανγκέλα μπουτ μο νεαυτός αλλά μισίνελα-λες ο Ιεχωβά. Μπάζιμα, μανγκάβα τι παρατίναβ-λεν ντα τι σταματίναβ μο αγώνας. Τζανάβα ότι ο Ιεχωβά σικαβέλα αμένγκε έλεος ντα συγχωρίνελα-αμέν, αλλά επειδή σκεφτίναβα ανταβά μπέτι πράγμας ντα να μισίναβα-λες, νιωθίναβα ότι να μπορίναβα τι λαβ λέσκι βοήθεια. Ανταβά μπαρό αγώνας επηρεαντάς κάθε πράγμας μι ζωγιάτε. . . . Αφού διαβαντόμ κι Σκοπιά 15 Μαρτίου 2013 ο θέμας “Έχετε «Καρδιά για να Γνωρίζετε» τον Ιεχωβά;”, νιωσάλομ ότι ο Ιεχωβά μανγκέλα μπαγιά τι βοηθίνελ-μαν».

14. (α) Σαρ ντικχέλας ο Παύλος ο αγώνας σο κερέλας; (β) Σαρ μπορίνασα τι νικίνας κο αγώνας σο κεράσα για μα τι μανγκάς μπέτι πράγματα;

¹⁴ Διαβάνεν Ρωμαίους 7:​21-25. Ο Παύλος τζανέλας λατσσές καζόμ δύσκολος μπορεί τι αβέλ τι προσπαθίνελ εκ τζενό τι τζαλ κόντρα κο μπέτι πράγματα σο μανγκέλα ντα κο αδυναμίες σο τθερέλα. Όμως, ισινέ σίγουρος ότι κα μπορίνελας τι νικίνελ κο αγώνας σο κερέλας άμα κα προσευχίντιβελας κο Ιεχωβά, άμα κα στηρίντιβελας λέστε για τι βοηθίνελ-λες ντα άμα κα τθερέλας πίστη κι θυσία κι Ιησούσκι. Σο κα βακεράς αμένγκε; Μπορίνασα τι νικίνας κο αγώνας σο κεράσα για μα τι μανγκάς μπέτι πράγματα; Βα, μπορίνασα άμα αμέν-ντα, σαρ ο απόστολος Παύλος, στηρίντιβασα σαρέ αμαρέ γκίσαρ, όχι αμαρέ νεαυτόστε, αλλά κο Ιεχωβά ντα άμα τθεράσα πίστη κο λύτρος.

15. Σαρ μπορίνελα τι βοηθίνελ-αμέν ο Ιεχωβά τι ατσσάς πιστοί ντα τι νταϊντίνας ο προβλήματα σο τθεράσα;

¹⁵ Μερικές φορές ο Ντεβέλ μπορεί τι μουκχέλ-αμέν τι σικαβάς καζόμ μπουτ απασχολίνελα-αμέν εκ πρόβλημας. Για παράδειγμας, αν αμέν ή κάποιος αμαρέ φαμιλιάταρ τθερέλα εκ νασφαλιπέ ή νακχέλα εκ αδικία, σο κα κεράς; Άμα τθεράσα εμπιστοσύνη κο Ιεχωβά σαρέ κο πράγματα, κα μολίνας-λες για τι ντελ-αμέν δύναμη τι ατσσάς πιστοί ντα τι ατσσικιαράς αμαρί χαρά ντα αμαρί φιλία λέσαρ. (Φιλιππησίους 4:​13) Ο παραδείγματα μπουτέ Χριστιανόνγκε, κο πουρανέ μπρεσά ντα αμαρέ ντιβεσέντε, σικαβένα ότι η προσευχή μπορίνελα τι ντελ-αμέν δύναμη ντα σιγουριά για τι συνεχίνας τι νταϊντίνας οντουλά σο νακχάσα.

16, 17. Σο ισινέν αποφασισμέ τι κερέν;

¹⁶ Ο Διάβολος κα μανγκέλας μπουτ τι ντικχέλ-τουμέν τι χασαρέν τουμαρό κουράγιος, τι παρατίνεν-λεν ντα τι μουκχέν τουμαρέ βαστά τι περέν τελέ. Οτθάρ, τι αβέν αποφασισμέ τι «ασταρέν σικίς σο-ντα ισί λατσσό». (1 Θεσσαλονικείς 5:​21) Μπορίνενα τι νικίνεν κο πόλεμος σο κερένα ι Μπενγκέσαρ, λέσκε πφιρνέ ντουνιάσαρ ντα ι μπέτι πραγματέντζαρ σο μανγκέλα τουμαρό νεαυτός! Κα νικίνεν άμα τθερένα εμπιστοσύνη κο Ντεβέλ ότι κα ντελ-τουμέν δύναμη ντα κα βοηθίνελ-τουμέν.​—2 Κορινθίους 4:​7-9· Γαλάτες 6:9.

¹⁷ Οτθάρ, συνεχίνεν τι ουσαρέν. Συνεχίνεν τι μαρέν-τουμέν. Συνεχίνεν τι κερέν αγώνας. Συνεχίνεν τι κερέν μπαρέ προσπάθειες. Τι αβέν σίγουροι ότι ο Ιεχωβά κα “ντελ σαρ μπρισίμ ευλογίες οπρά-τουμέντε, μέχρι τι τθερέν σαρέ οντουλά σο χρειαζίντιβενα”.​—Μαλαχίας 3:10.