Κο γιαβέρ θέμας, ντικχλάμ ο σημάδι σο βακερντάς ο Ιησούς. Ανταβά σημάδι σικαβέλα ότι η Βασιλεία ι Ντεβλέσκι αβιλί κο ουρανός ντα ότι ο Ιησούς Χριστός ισί Βασιλιάς.

Σαρ βακερέλα η Αγία Γραφή, κάνα ο Ιησούς κα αβέλας Βασιλιάς, κα πάλντελας ι Μπενγκές ντα ι δαιμονέν κατά ουρανός. Ακανά τθερένα πουμαρέ βαστέντε σάντε ι πφουβ, ντα ανταβά ισί εκ λόγος σο ο πράγματα αβιλέ αζόμ μπέτι κατά μπρες 1914.​—Αποκάλυψη 12:7, 9.

Παρόλο σο ο ντουνιάς καζόμ τζάλα αβέλα χειρότερος, ο Ιησούς, σο ισί ο Βασιλιάς κι Βασιλεία κι Ντεβλέσκι, τθερέλα κερντό μερικά πράγματα για τι βοηθίνελ ι τζενέν σαρί κι πφουβ. Αντράλ κατά έργος σο ο Ιησούς βακερντάας ότι κα αβέλας-πες σαρί κι πφουβ, μπουτ τζενέ σικλιόνα ο λάφια ι Γραφιάκε ντα κερένα-λεν πουμαρέ ζωγιάτε. (Ησαΐας 2:​2-4) Εκατομμύρια τζενέ σικλιλέ σαρ τι τθερέν εκ ευτυχισμέ φαμιλί ντα σαρ τι τσσουβέν κι σωστή θέση ι μπουτί ή ο υλικά πράγματα. Οντουλά τζενέ σικλιόνα σαρ τι τθερέν εκ πιο λατσσί ζωή ακανά ντα αβένα αντικάς σαρ μανγκέλα ο Ντεβέλ τι αβέν οντουλά σο τσσίντενα λέσκε Βασιλειάταρ.

Παρόλο σο ο Ιησούς κερέλα κουμάντος κο ουρανός, ισί ατζέκ ατζέκ κυβερνήσεις τζενένγκε κι πφουβ. Όμως, ο Ντεβέλ βακερντάς ι Ιησούσκε: «Κερ κουμάντος τι ντουσμανίν». (Ψαλμός 110:2) Ατζεχάνικ, ο Ιησούς κα καταστραφίνελ σαρέ οντουλέν σο τζάνα λέσαρ κόντρα ντα κα λοκχιαρέλ κατά προβλήματα οντουλέν σο μανγκένα τι ντεν καν ι Ντεβλές.

Ατζεχάνικ, η Βασιλεία ι Ντεβλέσκι κα κερέλ κάτι για

• Τι καταστραφίνελ ο ψεύτικες θρησκείες. Η Γραφή βακερέλα ότι ο ψεύτικες θρησκείες ισί σαρ εκ λουμνί σο ατζεχάνικ κα καταστραφίντιβελ. Ο θρησκείες σο σικλιαρένα ψέματα ι Ντεβλέσκε ντα κερένα δύσκολες ο ζωές ι τζενένγκε κα καταστραφίντιβεν. Μπουτ τζενέ κα σαστίνεν κάνα κα αβέλ-πες ανταβά.​—Αποκάλυψη 17:​15, 16.

• Τι τσσιναβέλ ι τζενένγκε κυβερνήσεις. Η Βασιλεία ι Ντεβλέσκι κα τσσιναβέλ σαρέ ι τζενένγκε κυβερνήσεις.​—Αποκάλυψη 19:​15, 17, 18.

• Τι εξαφανίνελ ι πφιρνέ τζενέν. Σο κα αβέλ-πες ι τζενέντζαρ σο συνεχίνενα τι κερέν μπέτι πράγματα ντα να μανγκένα τι ντεν καν ι Ντεβλές; «Ο πφιρνέ να κα υπαρχίντιβεν κι πφουβ».​—Παροιμίες 2:22.

• Τι καταστραφίνελ ι Μπενγκές ντα ι δαιμονέν. Ο Μπενγκ ντα ο δαίμονες να κα μπορίνεν “τι χουχαβέν ι τζενέν”.​—Αποκάλυψη 20:3, 10.

Σο κα αβέλ-πες οντουλέντζαρ σο τσσίντενα κατά Βασιλεία ι Ντεβλέσκι;

Ο Ιησούς, σο ισί Βασιλιάς κο ουρανός, κα κερέλ πιο μπουτ πράγματα οντουλένταρ σο κα μπορίνελας τι κερέλ εκ τζενό σο κερέλα κουμάντος κι πφουβ. Κα κυβερνίνεν λέσαρ 144.000 τζενέ σο τραμπίντιβενα κατά πφουβ. (Αποκάλυψη 5:9, 10· 14:1, 3) Κα κερέλ τι αβέλ-πες κι πφουβ οντουβά σο μανγκέλα ο Ντεβέλ. Σο κα κερέλ η Βασιλεία ι Ντεβλέσκι ι τζενένγκε σο τζουβντιόνα κι πφουβ;

• Κα νασκιαρέλ ο νασφαλίματα ντα ο μεριπέ. «Ούτε εκ τζενό να κα βακερέλ: “Ισινόμ νασφαλό”», ντα «ο μεριπέ να κα αβέλ πάλι».​—Ησαΐας 33:​24· Αποκάλυψη 21:4.

• Κα ανέλ αληθινή ειρήνη ντα ασφάλεια. «Τι τσσαβένγκι ειρήνη κα αβέλ μπαρί» ντα «κα μπεσέλ ο κάθε εκ τελάλ πι ρεζάταρ ντα τελάλ πι χελινγκινάταρ, ντα καέκ να κα νταραβέλ-λεν».​—Ησαΐας 54:​13· Μιχαίας 4:4.

• Κα ντελ σαριλέντε εκ μπουτί σο κα μπεϊντίνεν-λα. «Ο τζενέ σο τραμπιντόμ κα απολαμβάνεν σαρέ οντουλά πράγματα σο κα κερέν. Να κα μαρέν-πες σινανέ».​—Ησαΐας 65:​22, 23.

• Κα κερέλ ι πφουβ τι αβέλ πάκι ντα σουκάρ. «Η έρημος ντα η πφουβ σο ισί ντιπ σουκί κα πφερντιόν χαρά ντα η σουκί πεδιάδα κα χαιρίνελ ντα κα νικαβέλ μπουμπούκια σαρ ο σαφράνι».​—Ησαΐας 35:1.

• Κα σικλιαρέλ ι τζενέν σο πρέπει τι κερέν για τι τζουβντιόν για πάντα. «Ανταβά μανγκέλα τι βακερέλ ζωή για πάντα, τι σικλιόν τούκε, σο ισινάν ο μόνος αληθινός Ντεβέλ, ντα οντουλέσκε σο μπουτσσαντάν, ι Ιησού Χριστόσκε».​—Ιωάννης 17:3.

Ο Ντεβέλ μανγκέλα τι τθερέν ανταλά ευλογίες. (Ησαΐας 48:​18) Κο γιαβέρ θέμας, κα ντικχάς σο μπορίνενα τι κερέν ακανά για τι τθερέν ανταβά σουκάρ μέλλον.