1. Σαρ σικαντάς ο Αβραάμ ότι τθερέλας εμπιστοσύνη κι Ιεχωβάσκι δικαιοσύνη; (Ντικχ ι φωτογραφία σο ισί κι αρχή.)

«ΜΗΠΩΣ να κα κερέλ ο Κριτής σαρέ ι πφουβιάκο οντουβά σο ισί σωστός;» (Γένεση 18:25) Ο πιστός Αβραάμ να κερντάς ανταγιά ερώτηση επειδή τθερέλας αμφιβολίες. Λέσκι ερώτηση σικαντάς ότι ισινέ σίγουρος ότι ο Ιεχωβά κα κρίνελας ο Σόδομα ντα ο Γόμορρα με τέλεια δικαιοσύνη. Ισινέ σίγουρος ότι ο Ιεχωβά ποτές να κα “μουνταρέλας ι δίκαιε τζενές γιεκ ι πφιρνέσαρ”. Ανταβά να “νακχέλας κατά γκοντί” του Αβραάμ. Σοράν, ο Ιεχωβά κερντάς λάφι πι νεαυτόσκε: «Ο Μπαρ—οντουλά σο κερέλα, κερέλα-λεν τέλεια, σόσκε σαρέ λέσκε ντρομά ισί δικαιοσύνη. Ισί Ντεβέλ πιστός, σο νανέ οπρά-λέστε αδικία· δίκαιος ντα σωστός ισί βοβ».—Δευτερονόμιο 31:19· 32:4.

2. Σόσκε να αβέλα-πες τι αβέλ άδικος ο Ιεχωβά;

² Σόσκε ο Αβραάμ ισινέ σίγουρος ότι ο Ιεχωβά κα κερέλας πάντα ο σωστός; Επειδή ο Ιεχωβά ισί ο πιο λατσσό παράδειγμας δικαιοσύνης ντα κρίσης. Κι πραγματικότητα, ο λέξεις  «κρίση» ντα «δικαιοσύνη» μπουτ φαρ αρακχάσα-λεν μαζί κο Εβραϊκές Γραφές επειδή τθερένα περίπου ι ίδια σημασία. Άρα αφού ο νόμοι ι Ιεχωβάσκε ισί πάντα δίκαιοι, πάντα κα κρίνελ ο πράγματα σωστά. Η Γραφή βακερέλα: «Βοβ μανγκέλα ι δικαιοσύνη ντα ι κρίση».—Ψαλμός 33:5.

3. Βακερέν με παράδειγμας εκ αδικία σο αβέλα-πες ανταλέ ντουνιάστε αντιβές.

³ Τζανάσα ότι ο Ιεχωβά ισί πάντα δίκαιος ντα ανταβά ντέλα-αμέν κουράγιος. Όμως, αντιβές ο ντουνιάς ισί πφερντό αδικία. Για παράδειγμας, μερικά τζενέ δικασάλε ντα γκιλέ φυλακή για εγκλήματα σο να κερντέ. Κάποια τζενέ, αφού πρώτα νακχλέας μπουτ μπρεσά αντρέ κι φυλακή, αθωωσάλε επειδή κερντέ ι εξέταση DNA. Ασακέ αδικίες αναστατώνενα ι τζενέν ντα κερένα-λεν τι χολιάνεν. Όμως, ισί εκ γιαβέρ-ντα αδικία σο μπορεί τι αβέλ ατζέ πιο δύσκολος τι νταϊντίνας-λα. Καγιά ισί ανταγιά;

4. Σαρ κα μπορίνελας τι δοκιμάντιβελ η πίστη εκχέ Χριστιανόσκι;

⁴ Ο Χριστιανοί τζανένα ότι κα αδικίντιβεν τζενένταρ σο νανέ κι Χριστιανική εκκλησία. Όμως, αμαρί πίστη μπορεί τι δοκιμάντιβελ άμα κα ντικχάς ή κα νακχάς κάτι σο ντικχίντιβελα άδικος αντρέ κι εκκλησία. Άμα κα αβέλ-πες ανταβά, σο κα κερέν; Κα χασαρέν τουμαρί πίστη;

5. Σόσκε δεν πρέπει τι κερέλ αμένγκε εντύπωση άμα κα ντικχάς ή κα νακχάς εκ αδικία αντρέ κι εκκλησία;

⁵ Σαρέ ισινάμ ατελείς ντα κεράσα λάθη, οτθάρ μπορεί εκ πφραλ τι αδικίνελ-αμέν ή αμέν τι αδικίνας εκχέ πφραλές κι εκκλησία. (1 Ιωάννη 1:8) Παρόλο σο να αβέλα-πες μπουτ φαρ ανταβά, ο πιστοί Χριστιανοί να χασαρένα πουμαρί πίστη ούτε κερέλα λένγκε εντύπωση όταν αβέλα-πες εκ αδικία. Ο Ιεχωβά ντινάς-αμέν συμβουλές κι Γραφή σο μπορίνενα τι βοηθίνεν-αμέν τι ατσσάς πιστοί άμα κα αδικίντιβας εκχέ πφραλέσταρ ή εκχέ πφενιάταρ.—Ψαλμός 55:12-14.

6, 7. Σο αδικία νακχλάς εκ πφραλ αντρέ κι εκκλησία, ντα καλά ιδιότητες βοηθιντέ-λες;

⁶ Σκεφτίνεν ι εμπειρία του Γουίλι Ντιλ. Κατά 1931, ο πφραλ Ντιλ υπηρετίνελας πιστά κο Μπέθελ κι Βέρνη, σο ισί κι Ελβετία. Κο 1946, νακχλάς ι τάξη της Σχολής Γαλαάδ κι Νέα Υόρκη, σο ισί κο ΗΠΑ. Αφού τελειωσάλι η σχολή, διορισάλο επίσκοπος περιοχής κι Ελβετία. Κι ιστορία λέσκε ζωγιάκι, διαβάνασα ότι κο Μάιος 1949 ο πφραλ Ντιλ βακερντάς κο Μπέθελ της Ελβετίας ότι κα παντρίνελας. Ο υπεύθυνα πφραλά βακερντέ λέσκε ότι κα χασαρέλας σαρέ πο προνόμια. Κα μουκχένας-λες τι κερέλ σάντε σκαπανικός. «Να μπορίναβας τι κεράβ ομιλίες», βακερντάς ο πφραλ Ντιλ. «Μπουτ πφραλά τσσιναντέ τι χαιρετίνεν-αμέν ντα συμπεριφερίντιβενας αμένγκε σαρ τι ισινάμας αποκομέ».

⁷ Σο κερντάς ο πφραλ Ντιλ; Ο ίδιος βακερντάς: «Τζανάας όμως ότι, άμα κα παντρίναας, να κα τζάας κόντρα κι Γραφή, οτθάρ λιντάμ δύναμη κατά προσευχή ντα τθεράας εμπιστοσύνη κο Ιεχωβά». Παρόλο σο μερικά πφραλά να αγαβένας σο άποψη τθερέλας ο Ιεχωβά ι παντριάκε, όταν αβιλό ο σαάτι διορθωσάλι λένγκι άποψη ντα ο πφραλ Ντιλ λιντάς πάλι πο προνόμια. Ο Ιεχωβά ευλογιντάς-λες επειδή ατσσιλό πιστός. * (Ντικχ ι υποσημείωση.) Ισί λατσσό τι πουτσάς αμαρό νεαυτός:  “Άμα κα νακχάβας εκ ασακί αδικία, κα σικαβάβας με-ντα υπομονή ντα κα μπεσάβας κατά Ιεχωβά τι διορθώνελ ο πράγματα; Ή κα στηρίντιβαβας μι νεαυτόστε ντα κα προσπαθίναβας τι λύναβ κορκορό ι αδικία;”—Παροιμίες 11:2· διαβάνεν Μιχαίας 7:7.

8. Σόσκε μπορεί τι κερντάμ λάθος άμα πακιάσα ότι αδικιντέ είτε αμέν είτε εκχέ γιαβερές;

⁸ Αν πακιάνα ότι αβιλί-πες κάποια αδικία αντρέ κι εκκλησία, τι ντεν-τουμέν γκοντί ότι μπορεί τι κερντέν λάθος. Σόσκε; Ισινάμ ατελείς ντα μπορεί μα τι αγαντάμ λατσσές ο πράγματα. Μπορεί επίσης μα τι τζανάσα σαρέ ο πράγματα σο αβιλέ-πες. Αλλά είτε αγαντάμ σωστά είτε όχι, πρέπει τι προσευχίντιβας κο Ιεχωβά, τι στηρίντιβας λέστε ντα τι ατσσάς πιστοί. Ανταβά κα βοηθίνελ-αμέν μα τι “χολιάνας ι Ιεχωβάσκε”.—Διαβάνεν Παροιμίες 19:3.

9. Καλά παραδείγματα κα ντικχάς ανταλέ μαθημάστε ντα κο γιαβέρ;

⁹ Ακανά κα ντικχάς τριν παραδείγματα αδικίας σο αβιλέ-πες αντρέ κο λαός κι Ιεχωβάσκο κο πουρανέ μπρεσά. Ανταλέ μαθημάστε, κα ντικχάς σο νακχλάς πι πφραλένταρ ο δισέγγονος του Αβραάμ, ο Ιωσήφ. Κο γιαβέρ μάθημας, κα σικλιάς σαρ συμπεριφερισάλο ο Ιεχωβά κο Βασιλιάς Αχαάβ ντα σο κερντάς ο Πέτρος κι Αντιόχεια, σο ισί κι Συρία. Καζόμ κα διαβάνας ανταλέ τζενένγκε, τι σκεφτίνεν σαρ κα μπορίνεν τι τθερέν συνέχεια τουμαρέ γκοντιάτε ι Ιεχωβάς ντα σαρ κα ατσσικιαρέν τουμαρί φιλία λέσαρ, ειδικά όταν αμντίνενα ότι αδικιντέ-τουμέν.

10, 11. (α) Σο αδικίες νακχλό ο Ιωσήφ; (β) Καγιά ευκαιρία αρακχλάς ο Ιωσήφ αντρέ κι φυλακή;

¹⁰ Ο Ιωσήφ ισινέ εκ πιστός υπηρέτης ι Ιεχωβάσκο σο νακχλάς αδικίες από ξένους. Αλλά οντουβά σο πληγωντάς-λες πιο μπουτ ισινέ ότι αδικιντέ-λες λέσκε πφραλά. Όταν ο Ιωσήφ ισινέ 17 μπρεσένγκο, λέσκε πφραλά λιντέ-λες ζορίσαρ ντα μπικιντέ-λες για δούλος. Σοράν, γκερντέ-λες κι Αίγυπτος. (Γένεση 37:23-28· 42:21) Οντουλέ τθεμέστε, βακερντέ ψέματα ότι ο Ιωσήφ προσπαθιντάς τι βιάνελ εκχέ τζουβλιά ντα τσσουντέ-λες κι φυλακή χωρίς τι αβέλ δίκη. (Γένεση 39:17-20) Για περίπου 13 μπρεσά ο Ιωσήφ τσσιντιντάς μπαρί τιμωρία εμ όταν ισινέ δούλος εμ όταν ισινέ κι φυλακή. Καλά πράγματα μπορίνασα τι σικλιάς κατά Ιωσήφ σο κα βοηθίνεν-αμέν άμα κα αδικίνεν-αμέν αμαρέ πφραλά;

¹¹ Αζομάν σο ισινέ πφαντό κι φυλακή ο Ιωσήφ, πφαντέας οντουλές-ντα σο ισινέ υπεύθυνος τι γκερέλ μολ κο Βασιλιάς. Εκ ιράτ, ο τζενό σο γκερέλας μολ κο Βασιλιάς ντικχλάς εκ σουνό, σο ο Ιεχωβά βοηθιντάς τον Ιωσήφ τι εξηγίνελ-λες. Ο Ιωσήφ εξηγιντάς ότι οντουβά τζενό κα νικιόλας κατά φυλακή ντα κα υπηρετίνελας πάλι ι Φαραώς, δηλαδή ι βασιλιάς. Σοράν, ο Ιωσήφ αρακχλάς ι ευκαιρία ντα εξηγιντάς οντουλέ τζενέσκε σαρέ οντουλά σο τσσίντελας. Μπορίνασα τι σικλιάς μπουτ πράγματα εμ οντουλένταρ  σο βακερντάς ο Ιωσήφ, αλλά εμ οντουλένταρ σο να βακερντάς.—Γένεση 40:5-13.

12, 13. (α) Σαρ τζανάσα ότι ο Ιωσήφ να δεχτιντάς ο αδικίες σο νακχέλας χωρίς τι κερέλ κάτι; (β) Σο να βακερντάς ο Ιωσήφ κο τζενό σο γκερέλας μολ κο Βασιλιάς;

¹² Διαβάνεν Γένεση 40:14, 15. Ντεν σημασία ότι ο Ιωσήφ βακερντάς: «Λιντέ-μαν ζορίσαρ». Η λέξη σο χρησιμοποιήνελα ατθέ η Γραφή μπορεί επίσης τι μανγκέλα τι βακερέλ ότι “τσορντέ-λες”. Ντικχίντιβελα ξεκάθαρα ότι αδικιντέ-λες. Επίσης, ο Ιωσήφ βακερντάς ξεκάθαρα ότι να κερντάς ο έγκλημας σο κατηγοριντέ-λες. Οτθάρ, μανγκλάς κατά τζενό σο γκερέλας μολ κο Βασιλιάς τι βακερέλ-λες ανταβά κο Φαραώ. Σόσκε; Βοβ βακερντάς: «Για τι νικαβές-μαν ανταλέ τθανέσταρ».

¹³ Μήπως ο Ιωσήφ απλά δεχτιντάς οντουλά σο τσσίντελας χωρίς τι κερέλ τίποτα; Όχι. Ο Ιωσήφ τζανέλας ότι αδικιντέ-λες μπουτ φαρ. Οτθάρ εξηγιντάς οντουλέ τζενέσκε σαρέ οντουλά σο τσσίντελας, ντα τθερέλας ι ελπίδα ότι κα βοηθίνελας-λες. Ντεν σημασία όμως ότι η Γραφή να βακερέλα ότι ο Ιωσήφ βακερντάς σε κάποιον, ούτε κο Φαραώ-ντα, ότι λέσκε πφραλά ισινέ οντουλά σο τσορντέ-λες. Κι πραγματικότητα, όταν λέσκε πφραλά γκιλέ κι Αίγυπτος ντα αγαπισάλε  με τον Ιωσήφ, ο Φαραώ καλωσοριντάς-λεν ντα βακερντάς λένγκε τι μπεσέν κι Αίγυπτος ντα τι απολαμβάνεν «ο πιο λατσσέ πράγματα οντουλέ τθεμέσκε».—Γένεση 45:16-20.

14. Άμα κα νακχάς εκ αδικία αντρέ κι εκκλησία, σο κα αρακχαβέλ-αμέν για μα τι βακεράς λάφια σο πληγώνενα ι γιαβερέν;

¹⁴ Άμα πακιάσα ότι αδικιντέ-αμέν αντρέ κι εκκλησία, πρέπει τι προσοχίνας μπουτ μα τι κεράς κουτσομπολιός οντουλέσκε σο αβιλό-πες. Πρέπει τι μανγκάς βοήθεια κατά πρεσβυτέρους, ντα άμα εκ πφραλ κερντάς εκ σοβαρή αμαρτία τι βακεράς-λες λένγκε. (Λευιτικό 5:1) Όμως, μπουτ φορές όταν ανταβά σο αβιλό-πες νανέ σοβαρή αμαρτία, μπορίνασα τι αγαπίνας εκχέ πφραλέσαρ χωρίς τι βακεράς-λες καεκχέ γιαβερέσκε, ούτε κο πρεσβύτεροι-ντα. (Διαβάνεν Ματθαίος 5:23, 24· 18:15) Όταν νακχάσα κάτι ασακό, τι αβάς πιστοί ντα τι κεράς οντουβά σο βακερένα ο συμβουλές ι Γραφιάκε. Μερικές φορές μπορεί τι ντικχάς ότι να αγαντάμ σωστά οντουβά σο αβιλό-πες ντα ότι τελικά να αδικισάλαμ. Άμα κα αβέλ-πες ανταβά, κα αβάς χαρούμενοι σο να κατηγοριντάμ αμαρέ πφραλές ντα να κερντάμ χειρότερα ο πράγματα! Ντεν-τουμέν γκοντί ότι είτε τθεράσα δίκιος είτε άδικος, άμα κα βακεράς λάφια σο πληγώνενα ι γιαβερέν, ποτές να κα βελτιώνας ο πράγματα. Όταν ατσσάσα πιστοί κο Ιεχωβά ντα αμαρέ πφραλέντε, να κα κεράς ανταβά λάθος. Ο ψαλμωδός βακερντάς ότι υπαρχίντιβελα «οντουβά σο πφιρέλα σωστά». Εκ ασακό τζενό «να βακερντάς ψέματα πι μόσαρ γιαβερέ τζενέσκε, να κερντάς κακός πι αμαλέσκε».—Ψαλμός 15:2, 3· Ιακώβου 3:5.

15. Σαρ ισινέ εκ ευλογία η σχέση σο τθερέλας ο Ιωσήφ ι Ιεχωβάσαρ;

¹⁵ Μπορίνασα τι σικλιάς ατζέκ εκ σημαντικός μάθημας κατά Ιωσήφ. Ο 13 μπρεσά σο νακχέλας ανταλά αδικίες, ο Ιωσήφ σικαντάς ότι ντικχέλας ο πράγματα σαρ ντικχέλας-λεν ο Ιεχωβά. (Γένεση 45:5-8) Ποτές να κατηγοριντάς ι Ιεχωβάς οντουλένγκε σο τσσιντιντάς. Σίγουρα, ο Ιωσήφ να μπισταρντάς ότι αδικιντέ-λες, αλλά ούτε ατσσικιαρντάς χολί αντρέ πέστε. Ο πιο σημαντικός ισί ότι να μουκχλάς κι ατέλεια ντα κο λάθη ι γιαβερένγκε τι χωρίνεν-λες κατά Ιεχωβά. Η πίστη σο τθερέλας ο Ιωσήφ ντινάς-λες ι ευκαιρία τι ντικχέλ ι Ιεχωβάς τι διορθώνελ ι αδικία ντα τι ευλογίνελ λες ντα λέσκι φαμιλί.

16. Σόσκε πρέπει τι πλησιάνας ατζέ πιο μπουτ ι Ιεχωβάς άμα κα αδικίνεν-αμέν αντρέ κι εκκλησία;

¹⁶ Αντικάς αμέν-ντα πρέπει τι εκτιμίνας ντα τι αρακχαβάς αμαρί σχέση ι Ιεχωβάσαρ. Ποτές δεν πρέπει τι μουκχάς κο ατέλειες σο τθερένα αμαρέ πφραλά τι χωρίνεν-αμέν κατά Ντεβέλ σο μανγκάσα-λες ντα ντάσα-λες λατρεία. (Ρωμαίους 8:38, 39) Αντίθετα, άμα κα αδικίνεν-αμέν αντρέ κι εκκλησία, πρέπει τι μοιάζας κο  Ιωσήφ ντα τι πλησιάνας ατζέ πιο μπουτ ι Ιεχωβάς. Προσπαθίνεν τι ντικχέν ο πράγματα σαρ ντικχέλα-λεν Βοβ. Αφού κα ακολουθίνας ο συμβουλές ι Γραφιάκε καζόμ πιο λατσσές μπορίνασα για τι λύνας ο πρόβλημας, σοράν πρέπει τι μουκχάς ο πράγματα κο βαστά κι Ιεχωβάσκε. Μπορίνασα τι αβάς σίγουροι ότι κα διορθώνελ ο πρόβλημας με το πιο λατσσό τρόπος ντα κι πιο σωστή στιγμή.

17. Σαρ μπορίνασα τι σικαβάς ότι τθεράσα εμπιστοσύνη κο «κριτής σαρέ ι πφουβιάκο»;

¹⁷ Καζόμ τζουβντιάσα ανταλέ πφιρνέ ντουνιάστε, ισί σίγουρος ότι κα αδικίνεν-αμέν. Μπουτ σπάνια, κάποιος μπορεί τι αδικίνελ τουμέν ή εκχέ γιαβερέ τζενές ή τι ντικχέν κάτι σο ντικχίντιβελα άδικος αντρέ κι εκκλησία. Μα χασαρέν τουμαρί πίστη. (Ψαλμός 119:165) Αντίθετα, τι ατσσόν πιστοί κο Ντεβέλ, τι προσευχίντιβεν λέστε για τι βοηθίνελ-τουμέν ντα τι στηρίντιβεν λέστε. Ντεν-τουμέν γκοντί ότι, επειδή σαρέ ισινάμ ατελείς, μπορεί μα τι αγαντέν λατσσές κάτι, ντα μπορεί επίσης μα τι τζανέν λατσσές σαρέ οντουλά σο αβιλέ-πες. Τι ακολουθίνεν ο παράδειγμας του Ιωσήφ ντα μα τι βακερέν λάφια σο πληγώνενα ι γιαβερέν, επειδή αντικάς κα αβέν χειρότερα ο πράγματα. Τελικά, αντί τι στηρίντιβεν τουμαρέ νεαυτόστε, τι αβέν αποφασισμέ τι ατσσόν πιστοί κο Ιεχωβά ντα τι μπεσέν λέσταρ τι διορθώνελ ο πράγματα. Άμα κα κερέν ανταλά πράγματα, ο Ιεχωβά κα μανγκέλ-τουμέν ντα κα ευλογίνελ-τουμέν, σαρ κερντάς με τον Ιωσήφ-ντα. Μπορίνενα τι αβέν σίγουροι ότι ο Ιεχωβά, «ο Κριτής σαρέ ι πφουβιάκο», πάντα κα κερέλ ο σωστός επειδή «σαρέ λέσκε ντρομά ισί δικαιοσύνη».—Γένεση 18:25· Δευτερονόμιο 32:4.

18. Σο κα ντικχάς κο γιαβέρ μάθημας;

¹⁸ Κο γιαβέρ μάθημας, κα σικλιάς ατζέ ντούι παραδείγματα αδικίας σο αβιλέ-πες αντρέ κο λαός κι Ιεχωβάσκο κο πουρανέ μπρεσά. Ανταλά παραδείγματα κα βοηθίνεν-αμέν τι ντικχάς ότι, όταν ισινάμ ταπεινοί ντα συγχωρίνασα ι γιαβερέν, κα βοηθίντιβας τι τθεράς ι Ιεχωβάσκι άποψη για τη δικαιοσύνη.